Post: #1
Title: حكومة الإنقاذ..أحذري الباراسروالوجي
Author: محمد السر
Date: 03-03-2006, 06:17 AM
Parent: #0
زماااان
بالتحديد صيف92، وفي ندوة عن ما انجزته الإنقاذ، وبعد أن عدَّد الانتصارات التي تمت ضد المتمردين في الجنوب ، والمناطق التي تم تحريرها من قبضتهم في أقل من تلاتة سنوات قال د. مجذوب الخليفة: " الجماعة هسة مندهشين من انتصاراتنا وبيقولوا الناس ديل حدَّهم وين؟" وبعد أن سكت لبرهة تسمح له بترتيب قسمات وجهه بحيث يصبح ملائماً لاستقبال ما منحه له زهو هذا السؤال من ابتسامة ماركة شيخ حسن ( )، وبمصاحبة تلويحة من سبابة يمناه أردف مجيباً على السؤال: " والله نحن حدنا رأس الرجاء الصالح".
(دُرابة كبيرة)!!
صاح!!
دا واحد من عيوب تدريس قصة Grate Expectation لطلبة الشهادة المتوسطة في السودان!!
بتخلي الناس تشطح!!
طيب.. في أقل من تلاتة سنوات كنتوا كاسحين اليابسة جنوباً وقلتوا ما يترسكم غير الأطلسي!!
وبعد 17 سنة بقيتوا تقالعوا في تبعية أبياي!!
فعلا.. ما بتدِّي حريف..
الحكاية ببساطة أنكم ما عندكم قاعدة شعبية حقيقية.. البتشحنوها في المناسبات بالتكبير والتهليل ديك ما تعدوها لأنها دي قاعدة لزوم التشريفة والمراسم فقط.. القاعدة الحقيقية بتتبني بالانجازات لصالحها، والانجازات دي هي الدينمو البيحركها لحماية السلطة..
لحد هسة ما بتقدروا تختوا عينكم في عين القاعدة الوهمية دي وتقولوا ليها نحن انجزنا لصالحكم كذا وكذا ياللا أحمونا.. كل البتعملوهوا لما تحتاجوا لدعمها هو شحن البطارية العاطفية.. زمان كان باسم الدين، هسة دخّلتوا حكاية الوطنية..
دينكم بقى ما مغتِّي؟.
قدامكم حل من تلاتة:
الأول: تواصلوا سياسة التعرِّي لأمريكا (بهدف كسر عينها القوية) الدشنوها الدبلوماسيين الحرفا بتاعنكم لحد الآخر (رغم إنها ما ليها آخر).. يعني ما يجي واحد منهم ويقول ليكم آخر قطعة وخلاص.. لا.. التنازلات دي حا تستمر لما وراء آخر قطعة..
أو ما اصطلح على تسميته عند علماء الماورائيات بـ (الميتاسروالوجي) وعدِّل لاحقاً لـ (الباراسروالوجي) لصعوبة نطق الأول وهو علم مفتوح على كل الاحتمالات!!.
يعني فجأة ممكن يقولوا ليكم: " يللا بسرعة سمُّو سفيركم لتل أبيب!! عشان مستر إيزاك بِن عِميتاي حا يصل الخرطوم ممثل لبلاده بكرة، وما تشيلو أي هم نحن بنينا ليهو سفارة جمب بتاعتنا ،لكن حا تدفعوا 4 مليار دولار نفقات تشييد المبنى.. لكن بالأقساط المريحة..دفعة أولى الليلة والباقي بكرة.. و75% entrust "!!.
ومستر بِن عِميتاي قبل ما يقدم أوراق إعتماده يجي شايل معاهو شحنة بذور خضروات بـ 70 مليون دولار في إطار التكامل التجاري بين البلدين الشقيقين.. وأوعوا تفضحونا وتقولوا ليه نحنا متين وقعنا معاكم اتفاقية تجارية!!. دي في علم (الباراسروالوجي) اسمها التجارة البكماء.. يعني تصموا خشمكم وتشيلوا.. حامدين شاكرين..
وأوعوا واحد من دكاترتكم الشليقين ديك يمشي يحلل عينة من البذور دي ولما يلقى فيها مواد سرطانية وألاَّ مواد بتقلل خصوبة الجنسين يجي يكورك ويقول ألحقو!!. لا.. بكل أدب تمشو للمستر وتشكروه على مساهمة دولته الشقيقة في الحد من الانفجار السكاني المحتمل عندكم بعد 500 سنة..
ولو البذور دي زرعتوها وما قامت أوعوا تشتكوا.. تمشوا للمستر وتقولوا ليه "بذوركم السمحة حردت القومة في واطــاتنا الشينة.. الحل شنو؟.. ونحن حا ندفع" حا يقول ليكم "طياراتنا جاهزة لنقل الخضار من تل أبيب للأسواق المركزية في الخرطوم كل صباح"..
تشكروه وبسرعة تجروا سوق الخضار وتحفِّظوا البياعين نشيد الخدار الجديد:
"عجور يافا أخدر وقيافة..
طماطم حيفا حمرا ونضيفة..
جرجير تل أبيب أحلى من الزبيب..
علينا جااااااااااااااااي "
وتاني يوم تعملوا ليهم تسميع وجلِد (للماحافظين وللبغنّوا من غير إحساس والشُتُر).
وزي ما قلنا قبيل علم الـ (باراسروالوجي) مفتوح.. برضوا ممكن الخواجة (فجأة) كدا يقول ليكم "بِلااااي بسرعة لِمّو لينا المصاحف العندكم وجيبوها هنا عشان حا نبدلها ليكم بمصحف البيت الأبيض قراءة جورج بن بوش..
وهكذا.
الحل التاني: ياهو بتاع أمبارح داك.. ودا أكتر الحلول وطنية.
الحل التالت:
عفيناكم من التالت.
ـــــــــــــ
شكراً للأقبيةِ السودِ وآلاتِ التعذيبِ الوطنيةِ فقد مهدت الدربَ لإسرائيل الكُبرى. (مظفر النواب)
|
Post: #2
Title: Re: حكومة الإنقاذ..أحذري الباراسروالوجي
Author: jini
Date: 03-03-2006, 10:10 AM
Parent: #1
Quote: الأول: تواصلوا سياسة التعرِّي لأمريكا (بهدف كسر عينها القوية) الدشنوها الدبلوماسيين الحرفا بتاعنكم لحد الآخر (رغم إنها ما ليها آخر).. يعني ما يجي واحد منهم ويقول ليكم آخر قطعة وخلاص.. لا.. التنازلات دي حا تستمر لما وراء آخر قطعة..
أو ما اصطلح على تسميته عند علماء الماورائيات بـ (الميتاسروالوجي) وعدِّل لاحقاً لـ (الباراسروالوجي) لصعوبة نطق الأول وهو علم مفتوح على كل الاحتمالات!!.
|
وخاصة شعار بشيرنا البلاقيك مشمر لا قيهو عريان!
الظاهر بشيرنا داير يوريهم الـعين الحمراء!!
جنى
|
Post: #3
Title: Re: حكومة الإنقاذ..أحذري الباراسروالوجي
Author: محمد السر
Date: 03-03-2006, 02:15 PM
Parent: #2
جني
أولا بالتبادي مشتاقين..
البورد في الاسبوع الفات دا طعمو كان كُتُر كُتُر وإنت غائب.
قلت لي البجيك مشمِّر تجيهو كيف؟
دي عند جمهور علماء الماورائيات اسمها (الميتا أمفوكولوجي) برضها مفتوحة على كل الاحتمالات.
كدي خلينا في المفيد..
شايفك بتساعد في أختنا بت الأحفاد في إكمال نصف دينها..
لو وافقت تتنازل شوية عن الشروط دي أنا أمتلك أحدى مواصفات العريس المطلوب..
حركة الجردل دي بقدر عليها.
|
Post: #4
Title: Re: حكومة الإنقاذ..أحذري الباراسروالوجي
Author: محمد السر
Date: 03-05-2006, 11:36 PM
Parent: #1
خبر:
البشير يدعو لانتخابات مبكرة
ـــــــــــــــــــ
تعليق أول:
خير!!.. نعل مافي عوجة!! 
تعليق ثاني:
يعني زول تلاتة انفار قالوا ليهو دك.. دك..دك
قال" حك"
يجي بعد سبعتااااااشر جرة، وبعد ما خلاااص قرّبت تندك خِلقة، يقول دك!!
والله حقو الزول يقول ليهو حك
طيب.. عشان خاطر الناس القاعدة برة راجيا قيما دي حا ندُك..
لكن بشرط..
يطلِّع الجواكر الصبنا دي.
|
Post: #5
Title: Re: حكومة الإنقاذ..أحذري الباراسروالوجي
Author: Najat Al-Bashir
Date: 03-06-2006, 00:14 AM
Parent: #4
الأخ العزيز محمد السر*** ما اصطلح على تسميته عند علماء الماورائيات بـ (الميتاسروالوجي) وعدِّل لاحقاً لـ (الباراسروالوجي) لصعوبة نطق الأول وهو علم مفتوح على كل الاحتمالات!!.
إنت كنت بتزاكر والجماعة مرطبين تحت بلوك 7!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! ياحليل زمن النش
|
Post: #6
Title: Re: حكومة الإنقاذ..أحذري الباراسروالوجي
Author: shammashi
Date: 03-06-2006, 01:22 AM
Parent: #5
| Quote: الظاهر بشيرنا داير يوريهم الـعين الحمراء |
جني
غايتو يوم بتشرط ليك زول.
|
Post: #7
Title: Re: حكومة الإنقاذ..أحذري الباراسروالوجي
Author: jini
Date: 03-06-2006, 04:32 AM
Parent: #6
ود السر
الباراسروال أولوجى مستسصحبا بالأمفكو أولوجى يعفى صاحبنا من أخذ العينة فيزيكالى للفحص المختبرى لانه يمكن جمع العينة على مدار الأربعة وعشرين ساعة فى حله وترحاله
جنى
|
Post: #11
Title: Re: حكومة الإنقاذ..أحذري الباراسروالوجي
Author: محمد السر
Date: 03-06-2006, 04:08 PM
Parent: #7
| Quote: الباراسروال أولوجى مستسصحبا بالأمفكو أولوجى يعفى صاحبنا من أخذ العينة فيزيكالى للفحص المختبرى لانه يمكن جمع العينة على مدار الأربعة وعشرين ساعة فى حله وترحاله |
جني إنت صدقت كلام نجاة البشير دا!!
يا مان أنا بتاع محطة سبعة!!.. ما بلوك 7!!..نسيتني!!
بتاع النِش داك أشرف السر!!
يا جني أنا أكتر حاجة كنت حافظها أيام الدراسة هي جدول الحصص!!
عندي رمّاي داسيهو جوة البوفيه بتاع المدرسة.. يوم يكون عندنا دبل فيزيا ولا كيميا ولا أحياء بعد الفطور طوالي بشيل الرمّاي وشوية عيش وعلى تحت الكبري..
بتاع البوفيه كان زول بتاع سجارات، أول ما يشوفني شايل العدة يقول لي "أها الليلة عندكم دبل قراميط؟"
يا مان أنا لو لا الصحافي الوطني حسين خوجلي (جزاه الله بقدر ما قدم لهذا الشعب، آآآآمييييين ) لي الليلة ما كان عرفت راديكالي يعني شنو!!
تقول لي فيزيكالي!!
ممكن بِلااااي تترجم لي كلامك الفوق دا للعربي!؟.
|
Post: #18
Title: Re: حكومة الإنقاذ..أحذري الباراسروالوجي
Author: jini
Date: 03-13-2006, 05:01 PM
| Quote: ممكن بِلااااي تترجم لي كلامك الفوق دا للعربي!؟. |
جعفر نميرى كان شديد الإمتنان للفنان سيد خليفة عليه رحمة الله لإن جعفر نميرى عملها فى عربية سيد خليفة عتد هروبه فى يوليو 1971 ولكن جعفر العوير فضح نفسه عند ما هاجم هاشم العطا ورفاقه قائلا إنهم منعوه من الذهاب للمرحاض يومين كاملين فإستنتج الجميع إن أخون سواها فى عربية أبو السيد ولم يخاف عقباهاوابو السيد لم يفضح الرجل ولم يأخذ الفسحة الى المختبر ولو فعل لعفا المشير نمير من الذهاب فيزكالى للمختبر يا مان
جنى
|
Post: #8
Title: Re: حكومة الإنقاذ..أحذري الباراسروالوجي
Author: mutwakil toum
Date: 03-06-2006, 05:55 AM
Parent: #6
يا ود السر ازيك ..
تعرف اسهل حاجة تعملا في الزمن الصعب ده هي انك تبقى كوز ..
ايوااااااا سألتني كيف .
الكوزنكيزم ديا انك تقول كلام فارغ بي جدية وما تكون خجلان (دي كل القضية)..نحن راس الرجاء الصالح ما يفرملنا. علي الطلاق البلد دي مقبرة الامريكان . المعارضة تغتسل من النيل حتى تدخل هنا . بندفن في شهيد بدل الغبار مرق دخان مسك .. علي الطلاق شفنا بنات الحور يتشاكلن فوقوا يشهوك الموت ..
اها الحكاية دي بالظبط زي الجوطة العملوها ناس الهلال لي بتاعين المغرب ديلك جاطوا الميدان وبهدلوا كورة المغاربة وانتهت الكورة لصالح الهلال .. اها الكيزان ديل بجوطوا ميدان السياسة بي شليت وتشتيت افكار وكلام مجوبك لم انت ترتبوا في راسك تلقى الهجمة عليك ..
الكوز يا ود السر ما مؤاخذ لانو لو الكوز قال كلام مرتب وبدخل عقل يكون كوز راكب غلط او قاطع (تو ويز)two ways ..
اها يا ود السر شفتك انت وجني بي جاي قلت اكيد امرق بي ضحكة .
|
Post: #12
Title: Re: حكومة الإنقاذ..أحذري الباراسروالوجي
Author: محمد السر
Date: 03-06-2006, 04:19 PM
Parent: #8
متوكل توم
وينك يا حبيب؟
| Quote: بندفن في شهيد بدل الغبار مرق دخان مسك .. علي الطلاق شفنا بنات الحور يتشاكلن فوقوا يشهوك الموت .. |
اتق الله يا شيخنا!!
ياخي دي إشاعات من الشيوعيين وأعداء الوطن والدين، الناس ديل ما قالوا الكلام دا!!، هم بس قالوا إنو الرقيب مظلات (ككّو حليمة) كان لما يشوف الدانة جاية على المجاهدين يطير من شدرتو زي زوغبير ويمسكا ويتنقسا ويشوتا راجعة في نص 18 بتاع الكفرة والمارقين كهجمة مرتدة سريعة..
أنا المطلع ديشي يا متوكل المواطن البصدق الكلام دا!!..هسة عليك الله زول الليل والنهار يقول على زول تاني إنو عميل وعدو دين و... وبعد كم سنة يجي يسميهو الشريك والأخ و...!!
الغريبة نفس السيناريو هسة قعد يتكرر مع ناس دار فور!!
مسمينهم حركات التمرد!!
تاااااااااااااني!!
غايتو جنس حركات!!
أنا بديت أشك في إيمان الناس البتصدق الكلام دا!!..
عليك الله هسة دي كم مرة!! ومن نفس الجُحُر!!
|
Post: #10
Title: Re: حكومة الإنقاذ..أحذري الباراسروالوجي
Author: محمد السر
Date: 03-06-2006, 04:04 PM
Parent: #6
Quote: جني
غايتو يوم بتشرط ليك زول. |
أبو الشُمش
وين يا حبيب!؟
مداخلتك الجميلة دي ذكرتني زمان.. كلنا كنا قاعدين نتغدى في برندتنا في البيت وناس الكورة بيلعبوا برة.. قامت الكورة نطت من فوق حيطتنا ودخلت الأوضة.. جا زول توووش شقانا ودخل الأوضة وشال الكورة، وهو راجع قعد يكورك "والله جدعة عليك إنت!!"
لو ما الحاج قاعد معانا كنا انشرطنا من الضحك
أها بي طريقتك دي يوم بتشرط ليك زول!.
|
Post: #9
Title: Re: حكومة الإنقاذ..أحذري الباراسروالوجي
Author: محمد السر
Date: 03-06-2006, 03:59 PM
Parent: #5
| Quote: إنت كنت بتزاكر والجماعة مرطبين تحت بلوك 7!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! ياحليل زمن النش |
بلوك سبعة!!؟؟
يعني أشرف السر دا طوالي واقف لينا في وش البيع!!
يازولة ما تغشيني!!..
يعني المصطلحات دي طلعت لافقة!؟
يا ستي الله يطمنك.
في 2003 يا نجاة يادوب عرفت إنو النش ياها اسم الدلع للنشيشيبة
فعلاً يا حليل زمن النش.
|
Post: #13
Title: Re: حكومة الإنقاذ..أحذري الباراسروالوجي
Author: Najat Al-Bashir
Date: 03-06-2006, 07:19 PM
Parent: #9
معليش يا محمد السر (الجاتك في بلوكك سامحتك)و ياحليل النش!!!!!!!!!
|
Post: #14
Title: Re: حكومة الإنقاذ..أحذري الباراسروالوجي
Author: محمد السر
Date: 03-06-2006, 10:10 PM
Parent: #13
ولا يهمك يا نجاة
تسلمي
|
Post: #15
Title: Re: حكومة الإنقاذ..أحذري الباراسروالوجي
Author: محمد السر
Date: 03-13-2006, 03:53 PM
Parent: #1
أثب العلم الحديث أن العلاجات البلدية أقل آثاراً جانبية من العلاجات الحديثة (طبعاً بالإضافة لأجرة الطبيب، حسب نوع العملة في دولته)، لكن بعض المرضى يفضلون الذهاب للدكتور بدل البصير (حنكشة وكدا).
نموذج مصوّر يوضح حالة مريض رفض العلاجات البلدية حتى تأخرت حالته وأصبح لا يمكن علاجه إلا عن طريق آخر ما توصل إليه العلم الحديث في استخدام الميتاسروالوجي كعلاج للأورام:
يقول الطبيب للمريض:
"أفتح خشمك..
طلِّع لسانك..
قول الرووووب".
|
Post: #16
Title: Re: حكومة الإنقاذ..أحذري الباراسروالوجي
Author: محمد بهنس
Date: 03-13-2006, 04:07 PM
Parent: #15
عافي منك ياود السر.فوق
|
Post: #17
Title: Re: حكومة الإنقاذ..أحذري الباراسروالوجي
Author: عصمت العالم
Date: 03-13-2006, 04:20 PM
Parent: #16
العزيز جدا جنى..
الحل الاول هو الضمان...استربتيز امريكى على وحده ونصف.حسب ما يرى الامريكيون وترى الامم المتحده..جزء من تبرج وعرى..وتبرج نصف مع عرى نصف.وتبرج كامل مع عرى كامل ومتكامل..والحشاش يملأ شبكته..
وبينى وبينك..شبكة الانقاذ ..مقطعه..ودايبه..ومخستكه..وخيوطها باليه..ودايبه.,. على خيوط.هالكه ومتهالكه.ومنتهيه.نهاية بطل...امريكا...بترقص الجماعه..على ايقاع...نارنا..ونارى.ونارى..ونارنا...والمهندس جا.ورسم البنا..
وفى راى انه انسب وانجع الحلول....
ايه رايكم..دام فضلكم..
عميق الود
|
Post: #19
Title: Re: حكومة الإنقاذ..أحذري الباراسروالوجي
Author: محمد السر
Date: 03-13-2006, 05:12 PM
Parent: #16
الجميل بهنس..
دخلت على بروفايلك لقيتو كلو جزر وفلفل أخضر وليمون وتِبِش..
إذاً إنت بالواضح كدا خُدُرجي وما حافظ نشيد الخدار الجديد..
أرجو إنك ما تعملني حصان طروادة لتنفيذ أجندة تخص الكاروو بتاعك!!
| Quote: عافي منك ياود السر |
يا حبيب كتر خيرك أنا ما داير عفوك، لكن داير تِبشك دا بعدين ساعة تبقى فيها بيوت أشباح.
|
Post: #20
Title: Re: حكومة الإنقاذ..أحذري الباراسروالوجي
Author: محمد السر
Date: 03-13-2006, 05:38 PM
Parent: #1
Quote: جني
غايتو يوم بتشرط ليك زول. |
Quote: العزيز جدا جنى..
الحل الاول هو الضمان...استربتيز امريكى على وحده ونصف.حسب ما يرى الامريكيون وترى الامم المتحده..جزء من تبرج وعرى..وتبرج نصف مع عرى نصف.وتبرج كامل مع عرى كامل ومتكامل..والحشاش يملأ شبكته..
وبينى وبينك..شبكة الانقاذ ..مقطعه..ودايبه..ومخستكه..وخيوطها باليه..ودايبه.,. على خيوط.هالكه ومتهالكه.ومنتهيه.نهاية بطل...امريكا...بترقص الجماعه..على ايقاع...نارنا..ونارى.ونارى..ونارنا...والمهندس جا.ورسم البنا..
وفى راى انه انسب وانجع الحلول....
ايه رايكم..دام فضلكم..
عميق الود |
جني ياخ ما تجي تمسك بوستيك دا.. كرهتنا البرابِلِّي.
وشكراً لأستاذنا عصمت العالم على التحليل العميق.
|
Post: #21
Title: Re: حكومة الإنقاذ..أحذري الباراسروالوجي
Author: محمد بهنس
Date: 03-13-2006, 06:43 PM
Parent: #20
اولا بالتبادي عافي منك تاني.وثانيا رددت لك فتح البروفايل لقيت بروفايلك(حالقو قطعيه اجنى).
|
Post: #22
Title: Re: حكومة الإنقاذ..أحذري الباراسروالوجي
Author: محمد السر
Date: 03-13-2006, 06:56 PM
Parent: #21
| Quote: وثانيا رددت لك فتح البروفايل لقيت بروفايلك(حالقو قطعيه اجنى). |
عايزني لما أمشي أجدد الجواز في السفارة يشوفوأ تِفّتي يقولوا لي "إتفضل يا باشا نحلق ليك"!!
بِلاااااي!!
|
|