عودة الدراويش @@@@@@ ود بادي العكودابي

عودة الدراويش

حال هذا البلد بكاني ما سكتني
ريدتن فيهو كيف مالكاني ما فكتني
ناراً فيها كيف ماكلاني كيف لهبتني

إلا تراني في العرضة انحسب براني
والناس البتعرض جوة ما سمعتني
علا تراني أنبح .. زيي زي إخواني والخيل بى عجاجا عمتني
علا تراني ما سويت ضهر يحجاني .. وإندقيت غصب فوق بطني
توبي قصير وما غتاني .. والزيفة أم برد شقتني
قلت أباصر أمرق مرة من أحزاني
وين قبلت سفكت دمي واتعدتني

ولا زينوبة
آخرت إيدي في الدنيا أم بنايا هش
من شافتني جلفت مني .. خلتت في لواي القش
قلت سلامايغسل حزني
علا سلاما زاد أحزاني زادني عطش

لحقتها في الفريق اتناسى وانشد حالا
طلبتها شاي ودست مداسا .. قطرت عيني فوق خلخالا
عدلت توبا هزت جيدا قالت .. لا لا

قالت لي شن معناكا
وشن كسب الرجاك ورجاكا
وشن راجينا من تالاكا

زمنك كله تاكل بادرة ما ضُق شر
وزمنك كلو نحن نعوموانت تغني ماسك البر
وزمنك كله فوق القارغة فوق ريح المدن منجر
الخير انسرق من دارنا لا حسيتو لا نحاس القبيلة نقر
ولينا سنين خلانا سموم وما شربت حصايبو مطر
منيحة الشافع اللماتو غابن في شموس الحر
صقور الباشا فطرن فيها ما لقن البقولها جر
والباشا الغشيم في ذاتو .. قعقع ومن كبادا فطر
لا ولداً يقولو انتر .. ولا مهيرتن توقولو فشـر
- ويا الباشا الغشيم قول لى جدادك كر -

بعد حكت العليها أتوهجت .. برقن بروق عينها
كست خلاصي بين ايديها
ما لقيت البلفضو ليها
وقعت دمعة من ود عيني قت أخفيها
وقعت عيني ذاتا عليها
حسيت بالمسافة البينا قت أمشيها
كفتتني الصقور بى جيهة والبلد اترمت بى جيهة

عبلة تنادي الولد البعرف الجيهة
عبلة تنادي في الولد البطلقو وشيها
عبلة تنادي في الولد البشق التيهة

Quote: صقور الباشا فطرن فيها ما لقن البقولها جر والباشا الغشيم في ذاتو .. قعقع ومن كبادا فطر لا ولداً يقولو انتر .. ولا مهيرتن توقولو فشـر - ويا الباشا الغشيم قول لى جدادك كر -

البوش الغشيم (أقصد الباشا) اليومين ديل
الاولاد بينادو فيهو.. وينك ووين يقولولو انتر
يا حليلك آود بادي..

عبلة تنادي الولد البعرف الجيهة
عبلة تنادي في الولد البطلقو وشيها
عبلة تنادي في الولد البشق التيهة

كع

وتشكر يا ود عدلان

منيحة الشافع اللماتو غابن في شموس الحر
صقور الباشا فطرن فيها ما لقن البقولها جر

وقعت من ود عيني دمعة .. قلت اخفيها
وقعت عيني ذاتا عليها
حسيت بالمسافة البينا .. قلت امشيها
كفتتني الصقور بي جيهة .. والبلد اترمت بي جيهة

* * *

يا ســــــــــــــــــــــــــــــــــــــــــلام

هذا الرجل حكاية طويلة من الإبداع .. لا أدري ما حل به في السنين الأخيرة .. أخشى ما أخشى عليه الإنزواء

السلام عليكم
يملك ود بادى اضافة لمواهبه المتعددة
مَلَكة الإلقاء الشعري
والذاكرة الحادة
والحضور الطاغي
وشتان ما بين شعره مكتوباً ...وشعره مسموعاً





الا توافقوني الرأى ؟؟


.........................
هذا الشاعر الموهوب
ظلم نفسه وظلمنا بانطوائه في تلك البلاد
تحياتي
...................................
وما الناس إلا هالك وأبن هالك *** وذو نسب في الهالكين عريق