Post: #1
Title: قزازة دم (محجوب شريف)
Author: محمد محي الدين
Date: 02-17-2006, 04:56 AM
Parent: #0
لكل مسافر في الوطن علي مسارات الاغتراب والاقتراب (بيتناالكبير شايلنا) كبر هذاالشاعر (حب واهتمام)
واحلالي القبلي شال شبال لمع برق المهيرة
قيرة قيرة يا مطيره
يا رزاز الدم حبابك
لما يبقى الجرح عرضة ولما نمشي الحزن سيرة
من دمانا الأرض شربت موية عزبة
كل ذرة رملة شربت حبة حبة
موية أحمر لونها قاني
فتقت ورد الأغاني
تهدي لى اسمك رمزاً للوطن كنز المحبة
قيرة قيرة يا مطيرة يا شهيد الشعب أهلاً
مش بتطلع كل يوم الشمس أجمل
وكل يوم النخل أطول زيدو قامة
وياما شفتك ياما ياما
لما شفت البدر طالع فى سما الوطن ابتسامة
إنتّ فى النهر البسافر جاري طول العمر صاحي
طبعو منك يا الملامحك من ضفافي
واللي شافك مرة شافو
واسمك الختيتو فرهد عشب أخضر فى الجناين
فى الشوارع نيمة نيمة فى مصابيح المدينة
فى فوانيس الضواحي
تملا نادي الحلة سيرتك
اسمك الخلانا نقدر فى ظلام الليل نعاين
والبتسأل عنو ده الخليتو شافع
لسه دابو
يا ما حيعجبك ، شنابو
صوتو رقان فيهو بحة
ود فلان اصرار وصحة
عندو قصة حب جميلة
جرب آلام الحراسة وحرض أولاد الدراسة
وهدّو حيل العسكرية
البنية أم طرحة كبرت
يا سلام الفنجرية
ليها راية وبى كلامها وبى اهتماماتها الجديدة
دقت أجراس القصيدة وشدت أوتار الصلابة
الكتوف اتلاحقت فى السكة يابا
واحلالي القبلي شال شبال لمع برق المهيرة
قيرة قيرة يا مطيرة يارزاز الدم حبابك
لما يبقى الجرح عرضة
ولما نمشي الحزن سيرة
|
Post: #2
Title: Re: قزازة دم (محجوب شريف)
Author: Gazaloat
Date: 02-17-2006, 12:36 PM
تصحيح بسيط يامحمد لو سمحت لى
الاغنية اسمها (( رزاز الدم )))
وليس قزازة دم
ولك الحب والسلام والتحية
منعم
|
Post: #3
Title: Re: قزازة دم (محجوب شريف)
Author: هشام آدم
Date: 02-17-2006, 12:40 PM
Parent: #2
ما أروع هذه القصيدة الذي لا يضاهي رواعتها إلا روعة الاستماع إليها بأداء كورال الحزب الشيوعي السوداني. فلهم جميعاً التحية ولمن مات منهم الرحمة والمغفرة.
|
Post: #4
Title: Re: قزازة دم (محجوب شريف)
Author: Magdi Is'hag
Date: 02-17-2006, 03:41 PM
Parent: #3
العزيز محمد
تصحيح بسيط اظنو المقطع بقول
والنخلة اطول جيد وقامة بدلا عن زيد وقامة
ولك التحية والود علي هذه الهديه الرائعة
لك الود
|
Post: #5
Title: Re: قزازة دم (محجوب شريف)
Author: مدثر محمد ادم
Date: 02-17-2006, 04:57 PM
Parent: #4
العزيز محمد لك التحية
وللاستاذ الكبير محجوب شريف
وشكرا الهدية الرائعة
مع ودي مدثر تيف تيف
|
Post: #6
Title: Re: قزازة دم (محجوب شريف)
Author: Amira Ahmed
Date: 02-17-2006, 06:07 PM
Parent: #5
العزيز محمد
Quote: يا شهيد الشعب أهلا
مش بتطلع كل يوم الشمس أجمل
وكل يوم النخل أطول زيدو قامة
وياما شفتك ياما ياما
لما شفت البدر طالع فى سما الوطن ابتسامة |
يا ســــــــــلام
كلمات كالدرر ... تبقى كالمعدن النفيس يزيد مرور الزمن من قيمتها
إلا أنها في روعتها تتفوق على الدر، حيث تنبض مفرداتها بمعاني وقيم إنسانية لم يبخل "شهداء الشعب" العظماء بتقديم ارواحهم فداء لها
كلمات تؤثر كثيرا في أعماق النفس ... ويتجدد وقعها بنفس القوة والروعة في كل مرة تستمع إليها
المجد والخلود لشهداء الشعب ولكل من بذل نفسه من أجل حياة أفضل للآخرين
تسلم يا محمد ويسلم العبقري الموهوب شاعر الشعب محجوب شريف
أميرة
|
Post: #7
Title: Re: قزازة دم (محجوب شريف)
Author: محمد محي الدين
Date: 02-17-2006, 09:39 PM
الاعزاء منعم: هشام: مجدي: مدثر: اميره شكرا علي المرور والتعقيب اخي منعم وجدت القصيده تحت عنوان قزازة دم والعهده علي الشاعر اوالطابع اومعا (ههها)
|
|