يا حليل الراكوبه

الراكوبــــه
يا جماعه الراكوبة بتعرفوها كويس
لما الحنين يسوقكم لاهلكم فى البلد لما تكون مرشوشة
وترابها جميل ونظيف
الراطوبة فيها حاجات بلدنا الاصلية
بس راكوبة ما فيها حديد شعب بس
ومعروشة بي حصير وفوقا
كم عنقريب هباب موسرات بالحبل وبنابر
وزير مويتو ساقطة وفيها جنس برودية
وفي راس الزير كوز يا حليل زمن الشراب بالكوز كوز حق الالمونيوم
ما كباية قزاز
والبنوت فى الراكوبة وحبوبتى كمان مشلخه
ومقعده فى الركوبة
وهنالك فوق الراكوبة النسوان والبنات بي جهة ديل بتمشطن
يا حليل زمن المشاط والمساير والسودان قفل ( نوع من المشاط )
وواحدت طاقات الحنك مع بعض يتكلمن في عرس بت فلانة
الجابو ليها جيب السرور واحدة قالت شوف عيني ما قول قايل
الشنطة العروس ما واحدة هي عاد جابو ليها التياب شنطة
والايسكرتات والبلوزات شنطة والشباشب والشنطة شنطة
وامها واخواتا شنطة براهم
وبنات خالتى يرموا فى الودع وديك تقول للوداعية ليك الله تشوفنى
تقول ليها ارمى البياض
وديلك اخواتى بكسروا فى الفحم
وريحة الجبنة ضاربة الحوش
والرجال مجمعين فى الصالون
يابت الجبنة بسرعه
اها وجبنا يد الفندق ودقينا البن ونضضحك ومرحنا
حكاية والله لمة الاهل سمحة
بالذات البضوقها المغتربين الراكوبة ونسة حلوة
تلغى اولاد عمنا وخالنا فى الصالون يتونسوا بت فلانة سمحة
بت علانة شينه
يااااااااااااااااااااخ انا عاوز بت فلانة التانى يحكى عن ايام نميرى
والونسة تجر
واحد يحكى ايام السكر الانعدم وين يامعلمين منتجين وما مستهلكين
وبعدين ونسة الكورة فى الحلة وونسة بتاعت فلان عاوز يعرس
نمش ندق صيوان
الونسة ياجماعه بتجر اكيد
يلا شباب عندكم الراكوبة خشوا واتونسوا
ايام زمان وزمن ما بنمش نضهب عند ناس فلان وعلان
والونسة بتجر في الراكوبة والمواضيع بتكتر ويلا نتلاقى فى الركوبة
واى زول عندوا ذكريات فى الركوبة
يلا شباب نكون راكوبتنا ونتونس فيها
المغتربين اكيد كانوا بيحبوا التكيل فى الراكوبة
احكوا عنها

إيهاب يا أخوي هذا زمان ولي الرواكيب أصبحت كلها قيشاني وسيراميك في زماننا هذا وحتى شلوخ الحبوبات لم تعد كما كانت فقد أضحت حبوبة هذا الزمان شديدة بدرجة جكساية عديل كده وأهو هذا زمان وذلك زمان وكلو بمحاسنو زي ما بيقولو والتطور والتغيير من طبيعة الأشياء لأن بقاء الحال ودوامه يتعارض والمعني الحقيقي للحياة فقد أصبح قطع فرع شجرة لعمل شعبة يقودك إلى شعبة التحري في بعض البلدان بإعتبار أنك تدمر البيئة وتسهم في التصحر كما أن الشعبة المعوجة أصبحت old fashion وياااااااي خالص وبالضرورة قامت مقامها ماسورة في أضعف الأحوال أو عمود جبس مزخرف منقوش جانبه.
وحتى قريتنا الكائنة مكان جميع الكائنات نفضت عنها بداوتها وتنكرت لجميع أهل العوض عليه العوض ومنو العوض وأصبحت قرية نموذجية ليس لإهتمام الساسة بالتنمية الريفية ومحو الأمية لكن لأنها ضاقت وكان لابد أن تفرج ، وكان الفرج في إتجاهات تمثلت في هجر الزراعة والرعي والهجرة إلى المدن بل وحتى خارج حدود الوطن وتحطمت بذلك مقولة شيخ الحلة التي صارت مثلاً عندما يسافر شخص ويغيب لفترة طويلة عن القرية ، فكان يقول عليه رحمة الله "فلان سافر زمان لمن الغربة كانت عيب" فأنقلبت الصورة رأساً على عقب بعد أن ضاقت وأستحكمت لتزداد ضيقاً.
معليش يا إيهاب مشكلتي تتمثل في ما يعرف بالتفرع الشجري فأنا عندما أكتب بتخيل نفسي قاعد في ركن إسترتيجي في شارع من شوارع العاصمة مع ثلة من نفر لا شغلة لهم إلا معاكسة خلق الله وتمضية الوقت شباب وفراغ وجده والبقية تأتي

كلامك صاح وعلى العين والراس بس برجع وبقول حليل الراكوبه وحليل ايام الراكوبه وحليل حبوبتي