اقاطع طبخ زوجــــتي

فوزية زوجتي ست بيت ممتازة ومميزة ، صديقة ، وزميلة ، وزوجة ، وأم أولادي ، ومربيتهم ،،، وكثير غير ذلك ... تطبخ فوزية يوميا فتجعلك تأكل دونما توقّف ، لها مزاج رايق جدا في تقديم الطعام وتزيينه ... لا تهتم بالملل الذي ينتابني وأنا أتابع عملها الشاق في المطبخ ... وأكثر ما يسعدها ، ويضايقها في آن واحد أن أدخل مطبخها وأمسك بالكمشة أو المفراكة لتحريك بعض الأطعمة أو أرفع درجة الحرارة لطعام يستوي أصلا على نار هادئة ... فترحب بي في البداية لأنها تظن أني سأقوم بدور ( الذوّاقة ) ، لكن سرعان ما تصرخ في وجهي وتطلب خروجي من المطبخ ... وعندما أرفض تقول ببساطة :
ياخي عليك الله خليك في حاجاتك البتعرفها ...
يقفز إلى ذهني فجأة صديقي اللدود صديق الموج ، وترديده دوما أنني عربي من معتوق ، وأن فوزية أمدرمانية ، ولولاها لأكل العربي عصيدة في صبحه ومسائه .. فأتساءل :
بالله في حاجة أنا ما بعرفها ؟
تقول : أيوة حاجات كتيرة ، وانت فاكر نفسك شنو ؟
طيب هاتي الغداء عشان أنا عايز أخلص من الموضوع ده وأنوم ...
خلاص قمت على تعسّفك ؟
زاد وزني كثيرا منذ زواجي حتى اليوم ، ولمدة 25 عاما لم ينزل وزني عن التسعين كيلوجراما ، وانتفخ كرشي ، وأصبحت فوزية تتندر بي ، حيث أنني تعودت أن أقف للسلام على بعض من يقابلونني في الأسواق مثلا ، ثم أحادثهم وأدخل يدي في جيوب الجلابية وأشدها ، فتظهر الكرش ، وحين انتبه ألتفت لأجدها تضحك بسخرية تغيظني ..
وعندما نفترق نحن ومن قابلنا ، أقول لها :
شنو الضحك ؟
تقول :
يا أخي والله منظرك ويدّيك في جيوبك وكرشك باينة ، حاجة مضحكة جدا ..
طيب أنا مطلوب مني شنو ؟
ياخي بس تبطّل الحركة بتاعة دخّيل يديك في جيبك وأنت بتتكلم مع الناس ...
اعتادت فوزية رسم شخصية كرايكاتيرية ، تقوم بتمثيلها في البيت ، وفي أحاديثها معي ، وتظل تردد هذه الحالة التي لا تعجبها ، إلى أن أتخلى أنا عن هذا الفعل أو ذاك .. فقد كنت مدخنا شرها ، فجعلتني أهجر التدخين بعد أن هرتني بتمثيل كحّتي وترديد أنني أكحّ حتى وأنا نائم .... وكنت مترددا تجاه قيادة السيارات إلا أنها دفعتني إلى أن أتحول إلى سائق شبه محترف عبر ممارسة الضغط علي ّ بوسائل شتى ... كنت ألعب الكنكان والويست ، وكلما شكوت من ألم في بطني أو ظهري ، قالت :
ده كلو من العواليق البتعمل فيها دي ،،،
إلى أن هجرت الكوتشينة نهائيا ...
أتابع التلفزيون أو أستمع إلى حديث من شخص ما ، وأنا أعاني من حساسية في الجيوب الأنفيه فأتنفس كثيرا بالفم لأن أنفي يكون مسدودا فيظل ( خشمي ) مفنوحا ، فتقول لي :
أول مرة أشوف زول بيعاين للتلفزيون بي خشمو ...
هجرت الكثير مما كنت أمارس وأفعل قبل التقائي بالزولة الفقرية الإسمها فوزية دي ، إلا أنني لم أستطع أن أهجر إدخال كلتا يدي في جيب الجلابية وأنا أحادث من يقف أمامي وأشد الجلابية فتبين الكرش بوضوح ،،، وفوزية لا تمل من رسم الصورة الكاريكاتيرية ...
فقررت أن أقاطع طبخ فوزية لأنه هو الذي تسبب في بروز كرشي ، أو أن تعتذر هي عن الصورة الكاريكاتيرية التي ترسمها عني ...

يا خال صباحاتك قرض عشان الكحة

يعدين انت قاطعت الناس كلهم ما فضل غير فوزية وطبيخها
الله يكون في عونها تستاهل جائزة ايوب للصبر

Quote: أول مرة أشوف زول بيعاين للتلفزيون بي خشمو ...

انت يا خال كنت قاعد تعاين في lbc
ال بي سي

أحمد حنين
كيف أصبحت ؟
كان في جائزة للصبر تبقى حقتي أنا عشان صبري على الناس الإنت عارفهم ،،،

Quote: انت يا خال كنت قاعد تعاين في lbc ال بي سي

تعرف المسألة دي بتحصل حتى لو كنت بعاين مع قاسم ل spacetoon ، ما هي حتى الرسوم المتحركة مرات فيها حاجات ... يا لطيف ...

ود قاسم

عاد انت ما عارف ناس ام درمان في المطبخ , ما شفت ولدنا دكنور الشفيع من سرحان الشيخ تاي الله بقي قدر كيف,انت احمد الله وزنك بقي تسعين كيلو, والله دكتور الشفيع بقي حاجة تانية بتعرفو مدير السلاح الطبي
وتعال قصتكم شنوانتو كلكم متزوجين من امدرمان , اقصد اولاد دفعتك في الجامعة من اهلي اهل العوض ايام الجامعة ما بتدخلوها الا اهل العوض

سيف مساعد
كيفك يا عريس
أنا عرفت أن نساء غرب السودان هنّ الأشطر في الطبخ والموائد ، وهذه شهادة كثيرين ، وأعتقد أن فوزية قد أثّرت فيها الجينات الوراثية كونها تنتمي إلى دارفور ، وأرى أنه لا فضل لأم درمان عليها ،،، وطبعا صديق الموج ستنفقع مرارته حين يقرأ هذا ...

سلامات يا ود قاسم،

قالت لك فوزيتك:

Quote: ياخي عليك الله خليك في حاجاتك البتعرفها ...

وقد كان عندنا واحد لمَّا يضايقو زول يقول ليهو: يا زول هوي، "أبقى في الْلِيلْتَك".

دحين آخوي، "أبقى في الْلِيلْتَك" والْلِيلْتَك الأنا شايفها ماها غير فوزيتك ذات نفسها.

أسأل الله لكما عمراً مديداً تقضيانه في محبة ووئام.

عادل البدوي
سلام وتقدير
والله ياخي أنا باقي عليها ميتين في المية ، لكن لا يعجبني أن تتساقط عاداتي التي اعتدتها وارتبطت بها ،،، وهي بتتعامل معاي بطريقة ذكية جدا ، لا تطلب مني ما تريده مباشرة ، إنما تظل ترسم الصور الكاريكاتورية وهي تعلم تماما أن هذه الصور تغيظني ،،، لكنها لا تكفّ عن ما تفعل .. فليس أمامي إلا أن اتخذ موقفا واضحا ، وربنا يقدرنا على مقاطعة منتجات المدام ...

Quote: فقررت أن أقاطع طبخ فوزية لأنه هو الذي تسبب في بروز كرش

ي

ستموت من الجوع يا الخال

يموت الأسد في الغابات جوعاً وطبخة فوزية يأكلها عرب معتوق

واحسن خلي ايديك في جيوبك طوالي عشان تظهر خيرات الامدرمانية عليك

حمزاوي يا دفعة
كيفك ؟

Quote: ستموت من الجوع يا الخال

الله يخلي لينا شارع غبيرا العام ..

Quote: يموت الأسد في الغابات جوعاً وطبخة فوزية يأكلها عرب معتوق

عرب معتوق ؟ لما اللحم في أم درمان يكون ب 15 ألف في معتوق بيبيعوه بي 5 ألف ... والعيش إنتاج محلي يا بطل ... واللبن هبطرش ... والتبش ما يديك الدرب ...

شيخ مشايخ المنبر ود قاسم
لرجل مثلك لابد أن يكون له صنو على شاكلته أو من ذات مواصفاته حتى تستمر الحياة وتدوم صفاء يعكره بعض الكدر ليعود أكثر صفاء سنة الله في الخلق.
الكرش يا ود قاسم سبق لأخي الغائب بدر الدين شنا أن فتح عليها النار بعد أن فتح فيها بوستا ناصية تناولته الأقلام والكيبوردات ولم تفلح جميع محاولاتهم في الرفع من معنويات ومعاناة البدري مع الكريشة حينها.
إن تدخل يدك في جيبك وتخرج بيضاء أو لا تخرج لا مشكلة فأنت أفضل بكثير من ممارسي عادات إدخال اليد في الجيب الأنفي لا فرق عند مثل أصحاب تلك العادة الذميمة من أن يكون يحادثك أو يستمع إليك أو حتى يقود مركبة أو يبع لك خبزا أو لحماً أو حتى طعاماً وهو يدخل سبابته في جيبه الأنفي منقباً عن الشئ واللاشئ.
شخصياً لا أعرف التبرير العلمي لمسألة إدخال الأيدي في الجيوب أقصد يد صاحب الجيب وليس غير ذلك لأنه حينها تكون أمام مشروع نشال على قلة دراهمك ، وإن كنت أظن وكالعهد بظني السئ أن من يمارس عادة إدخال يده في جيبه هو في الواقع شخص مفلس يتحسس الفضاء في جيب جلابيته ، أو طالب في زمان سابق أصيب بعقدة الضرب من قبل مدرس النحو أو غيره فأصبح لا يصافحك إلا من وراء حجاب أو شخص مصاب بوسواس قهري يخشي التلوث حتى قبل وصول شحنات الإغريق إلى السودان أو ربما يحس البرد في أطرافه حتي عز الصيف.
أحسب أن حرمكم المصون قادرة بإذن الله وبشئ من الصبر أن تجعل يديك خارج جيوبك شريطة أن تكون أنت متعاوناً. سرد ممتع يا دو قاسم كعهدنا بك. متعك الله وأسرتك الكريمة بموفور الصحة وتمام العافية وظلل بيتكم العامر أبداً بإذن الله بالسعادة والحب ونزع يدك من جيبك من غير سؤ.
مقاطعتك لطبيخ زوجتك هو عمل لا معني له إذ أن مساحدة الكرش الحالية بحاجة دائمة إلى أن تمتلئ ولو قدر لك أن تهجر طعام المنزل فقطعاً سوف تتجه إلى المطاعم وعندها سوف تحافظ كرشك على مستواها غير أنك لن تستطيع المحافظة على صحتك جراء أكل السوق.

الملا عمر
سلام ومودة
التحية لك ولأخونا بدرالدين سماحة ،،،
أعجبتني محاولة التفسير لحالة إدخال اليدين في الجيوب ، وسرحت كثيرا وتساءلت أيهم كانت صاحبة الفضل في إكسابي هذه العادة ،، وبيني وبينك يمكن كلهم مع بعض اجتمعوا وتآمروا علي ليوجدوا هذه الأزمة الخانقة بيني وبين فوزية ...

Quote: مقاطعتك لطبيخ زوجتك هو عمل لا معني له

أعتقد بيكون أحسن من الهجر في المضجع ... وللا رأيك شنو ؟

ايوه يا عم ماشششششششششششششششششا معاك حلاوه بس بطل الشلاقه وانتظر الاكل لحدي ما يكمل

ود قاسم
ممتع
والله بوست جميل
لكن عندى ليك فكره
تقول لى فوزيه انتى اشتغلى وانا بقعد فى البيت اعمل اى حاجه بما فيها الطبيخ

فرح
تحية وتقدير
تعرف أنا حولت كثير جدا أصل معها لاتفاق زي كده ، بس هي تطالبني بنفس الدقة ، نظافة ، طبخ ، تربية أولاد ، وكمان جلسة فوق السجادة ودعاء للأولاد ، وأنا الحاجات دي بالشكل ده ما بقدر عليها ... بس أنا متأكد كمان هي موش حا تقدر على نكد الشغل ، خاصة مع أخوانا الأنحنا شغالين معاهم ديل ...

ابني الغالي إيهاب
تحية ومودة
إنت عارف عمّك دائما مستعجل ، وعايز يخلص ،، وفوزية دائما عاملة إنها بتاعة إتقان ، وأنا اتهمها ب( تقل اليد ) ،، وطبعا هذا مدخل لمعركة ... لكن للأسف عمك كل معاركه خسرانة ،،، يا ريت تدعمنا ، شايف صاحبك ياسر الحلفايا عندو توجّه إنو يدعمنا ، بس طوّل المسألة وحتى الآن ما شايفين حاجة ...

Quote: فقررت أن أقاطع طبخ فوزية لأنه هو الذي تسبب في بروز كرشى

الخال ود قاسم فى ناس ما قدرين يعملو كرشه!! تقول اقاطع

اما موضوع اليد فى الجيب ان شاء مقدوره وشد حيلك واسمع الكلام !!
خليك مودرن وتقدمى

عبد السلام
كيف أخبارك ؟
الناس الما قادرين يعملوا كرشة ممكن يجونا في العيادة نوريهم كيف يعملوها ...
قلت اسمع الكلام ؟
كلام عبد السلام وللا كلام فوزية ؟ هذا ينتمي لأعرق حضارة في التاريخ ، وهذه تدّعي أنها أمدرمانية !
حيرتونا والله ، مساكين نحن أهل العوض ...

والله يا جماعة الواحد ما عارف يقول ليكم شنو ! بس كتّر خيركم على مواساتكم لنا في تناقص أفعالنا التي كانت بالنسبة لنا محببة ..
سآتيكم واحدا واحدا ، فقط بعد ما أمشي احتفالات الملتقى السوداني بالرياض بعيد الاستقلال ...

يا قسوم:
غيظ العدو الذيذ
دخل إيدك في جيوبك
وشد الجلابية
للأمام
حاتختفي الكرش

لكن فوزية حاتتفرغ لللرسوم { المسيئة }

امكانيات السرد عندك عالية جدا يا ود قاسم
وصدقني هذه بداية موفقة جدا لرواية تعالج الاغتراب
لقد امتعتنا ياود قاسم
_______________
رب اشرح لي صدري

الشيخ ود قاسم وفوزية ليك سلام
السياسة المطبخية هامة جدا لإنتاج رجل ليه مقام ( مثال الحصول على الكرش التي ذكرتها )
وعمارة المطبخ من حركية المنزل، لأن سكون الحركة في المطبخ يجعل المنزل أولى الفرار منه إلى مطابخ المدبوس والساندوتشات المهرية بالزبد والجبن والمعجنات

الطباخ الماهر يتجنب التحريك بالكمش والمعالق ورفع درجة حرارة الحلة أو التعجيل والخلاص من الوجبة
أنت على موعد هام هو جلسة الغداء
تقرفص بالصعيد وتنفس الصعداء رويداً رويداً حتى تصل إلى اصابعك السلطة الخضراء
لا تقاطع
أحذر أن تجذبك مطاعم بني بجلاديش
أو قل تدمن إبتلاع الساندوتشات وأنت مقبل على الطرق السريعة
تحية مربعة لست المطبخ

حقو ارسل ليكم انت وفوزية الحلقة الشفتها يومداك فى التلفزيون عن مطبخ واحده نباتية

ما بيولعو البوتاجاز عشان كده بستعملوه كدولاب يختوا فيه الخضروات

مافى اى اكل فى النار

بس فواكه وخضارات نية ..والدواليب كلها والتلاجة مليانه خضارات وفواكه

فواكه طازجة وخضروات طازجة ...وبس


قاطع مطبخ فوزية ..واقطع ليك مطبخ خضرجى ...

وطلع ايديك من جيوب الجلابية ..واتفرج فى التلفزيون ...بى عيونك ..وسلم على فوزية

الاب الروحي
الشفيف
ودقاسم


مودتي لك واسرتك الجميله
وربنا يحفظكم ويعلي مراتبكم
ويديم السعاده


وتحياتي لام العيال والعيال

احترامي

أحمد العربي
حياك الله وأبقاك أيها الرجل الفنان ..
وربنا يخلي ليك أسرتك ،، ويسعدك ،،،
وليتنا نلتقيك هناك في البقعة المحبوبة ، بين أهلنا ، في الرحاب المتسعة بالحب والإلفة ...

تماضر بنت خالتي
كنت أتوقع أن يكون موقفك داعما لي بصورة واضحة وجلية ... لكني وجدتك دوما متمادية في دعم بنات جنسك ،،،
بالله موش كل زول في الدنيا دي على كيفو ؟ اتنفس بالأنف أو بالخشم أنا حر ،،، أتفرج في التلفزيون وخشمي مفتوح أنا حر ،،، وعلى الآخرين أن يبطلوا تريقة ...
وتقول لي نباتي ؟ نباتي ده شنو ؟ أنا تربيت على أكل اللحم مع شاي الصباح ،،، تجي فوزية تغيرني تخليني نباتي وباقتراح من تماضر انطلاقا من حلقة شافتها في التلفزيون ؟ يا تماضر عليك الله شوفي ليك كلام غير ده ...
وخليني أحكي ليك حكاية عمي قسم الله ود القصيّر :
كان رجلا محبا للحم ، ويبدأ مشواره في أكل اللحم في الصباح الباكر مع الشاي ،،، تزوج زوجتين من نسوان البلد وكانت هذه عادته ،،، ثم تزوج ثالثة من قرية قريبة من مدني ، وأهلها أكثر تحضرا ، والزوجة الجديدة متعلمة ومختلفة عن خالاتنا الفي البلد ... عبد القادر ابنه كان مشاغبا ، فقال في نفسه ، ربما أن الزوجة الجديدة تغير سلوك الوالد تجاه أكل اللحم ، ووضع خطة للتجسس على والده ،،، فعمد إلى الذهاب باكرا إلى الاقتراب من غرفة والده مع زوجته الجديدة ، وأحدث حركة ، فناداه والده :
ده منو ؟
أنا عبد القادر يا أبوي .
عبد القادر ؟
آآي يا بوي .
تعال اكل لك لحم ...
فرجع إلينا عبد القادر يضحك ملء شدقيه لأنه اطمأن على والده ...
خليك مع ود خالتك ، وبطّلي تقيفي مع العدا ...

يا مسافر سلام عليكم
والله شكلك كدا معلم في المطبخ لكن ما قلت لي رايك شنو في حلة ( القطر قام ) شايف انها مناسبة جدا مع ود قاسم

الخال ود قاسم
اطيب التحايا
(انا الفسحة الوراء معتوق
وانا العزازي يوم السوق)
وشكراً لمدام فوزية التي حاولت ردم هذه الفسحة
وعسى الله ان يجعل لنا في أم محمود وسيلة لتغيير الصورة النمطية لزحام العزازي يوم السوق
وكلك معرفة
وشكراً تاني
خارج النص
بالمناسبة صفحكتم جملية جدا واسماعيل وراق (محرر خطير) ومحمد عبد الباقي مراسل رياضي محترف
والبقية نجوم زواهر
نرجو الاضافة الثرة واستقطاب ود عقيد

سلمت وسلمت حرمكم المصون فوزية الامدرمانية وطبيخها الممتاز (وجه يدعوكم لعدم الاكتراث للكرش الناتج عن طبيخ فوزية وماحدش واخد منها حاجة )!!!

نادية
كيفك والبنية وابوها ؟
إن شاء الله تكونوا بخير ..
قلتي لي ما حدش واخد منها حاجة ... دعوة للاستمتعاع بالكرش ، وزيادة معدلات التهام الطعام ، دون الاكتراث للكرش ... والله كلامك سمح ، بس فوزية دي عاملة لي مغصة بمكايداتها الكاريكتورية .. سأنفذ المقاطعة ،،،

عادل
كيفك ؟
حقيقة يا عادل كنت أحس بأنك قريب مني بصورة ما ،،، إذن نحن أبناء غرب الجزيرة ،،، وقد زرت سوق العزازي كثيرا ، وعملت فيه بالتجارة مع عمي أحمد قاسم ( الله يرحمه ) وهو يزور العزازي كل سبت وثلاثاء ... تلك أيام عذبة يا عادل ، حيث كانت معتوق والعزازي عامرتين بالخير ،،،
وقد زاملت عدد من أبناء العزازي في 24 القرشي ، وحنتوب ،،، وإلى أهلي بالعزازي التحية والتجلة ...

المسافر
ليك وحشة
في كثير من المجتمعات تكون الكرش وجاهة ، باعتبارها مؤشرً للنعمة ، والراحة ، لذا تجد البعض يبرزونها تفاخرا ...
ولدي بعض عادات كونتها منذ الصغر ، فمثلا كنت أعشق طبخ أمي ، ولا أفضل سواه ، وإذا أكلت خارج البيت أو شربت كوب شاي فإنني أعود للبيت وأنا في حاجة لتذوق أكل البيت ، أو شرب كوب شاي آخر ليكتمل الكيف ،،، ومنذ زواجنا وأنا لا أفضل طعاما على طعام البيت ، وأحسّ أن للشاي طعم مميز وأن اللقمة هنا غير اللقمة هناك ... لكن المدام - كما يبدو لي - بدأت تستغل هذا الوضع ، ويبدو أنها عملت بالحكمة التي تقول أن أقرب الطرق للوصول إلى الرجل هو معدته ... لكني هذه المرة لن أنهزم ، سأعلن عن مقاطعتي ، وسأنفذها ...

صديقي محمد سبيل
تحيات طيبة
سعيد أنا بقراءتك ، ودعمك ... لك الشكر ...

Quote: لكن فوزية حاتتفرغ لللرسوم { المسيئة }

يا مسخوت !
هي فاضية خالص لي حاجة من دي ؟

Quote: فقررت أن أقاطع طبخ فوزية

يا راجل ما تقول كلام غير دا.
طبعاً قرار مقاطعة المنتجات الدنماركية لو ذي قرارك مقاطعتك لطبيخ فوزية معناتا المسلمين ما حيخلوا رطل لبن في الدنمارك.

عارف يا خال يمكن الصدفة البتجمع بينك وبين الوالد انو الوالدة يديها العافية برضو اسمها فوزية فمرات صاحبنا بتجوعل ويقول يقاطع طبخ فوزية ويشير لأخونا صابر صاحب المطعم السوداني الجبنا ويكتب ليهو كم بيت شعر في كسرة صابر وبامية صابر وملوخية صابر وتاني يوم تلقاهو حايم جنب مطبخ فوزية وطبعا أبو الزوز مرة طيبة وحنونة ما بتعرف للشدايد لكن أنا بكون ليهو بالمرصاد حرم بس يعتب برجله المطبخ أقعد أدق ليهو جرس وطبعاً بيزعل شديد من القدر الرماهو علي ولا الرماني عليهو ما عارف وبصرة وش يقول لي مالك ياخي داير أشرب موية وطالع .. أقول ليهو مووووية برضوووووو؟؟

انتوا القرارات الصعبة الما بتقدروا عليها دي الجابركم عليها شنو؟؟؟حركات رجال مدلعين آخر دلع


أعلن تضامني مع الفوزيتين
حتى يعلن المحمدين توبتهما النصوحة

ولدنا الغالي بدري
تحياتي لك ولوالديك الأفاضل ...
والله يا بدري يبدو أنني وأخوي محمد بدري سننشئ نقابة لمواجهة التعسف النسوي الذي نعيشه ... وحتى أولادي أيضا يقفون في صف أمهم ولا أعلم لم يقف الأولاد في صف أمهاتهم ؟!
في هذا الزمان يقع الظلم على الرجال أكثر من النساء ، وتمارس النساء كل الكيد ( إن كيدهن عظيم ) على أزواجهن ، لرغبتهن في أن يصبح الزوج نموذجا لتصورهن ، ولتتباهى الواحدة منهن أنها هي من صنعت هذا الرجل ...
المقاطعة قائمة ، إلى أن تتم الاستجابة لمطالبنا ..

Quote: : فقررت أن أقاطع طبخ فوزية

والله ياخال قرارك ده زي حليفة صلاح إدريس(علي الطلاق اسجل عنتر) مُش بكره هسي تكون إتراجعت عنه.

ولسان حال تذوقك يقول.

اقول انساك وعارف إني ما بقدر ماااااابقدر.

سامي
تحايا طيبة

Quote: والله ياخال قرارك ده زي حليفة صلاح إدريس(علي الطلاق اسجل عنتر) مُش بكره هسي تكون إتراجعت عنه.

أنا عارف كلكم ناس أم درمان ، وواقفين مع بعض ،،، بس المقاطعة قائمة ...