Post: #1
Title: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: luai
Date: 01-30-2006, 08:52 AM
Parent: #0
تقرير وجدي الكردي - خالد البلولة - الرأي العام :
من المدهش حقاً ان « حكايات » اعدت مادة عن : « كاد المعلم ان يكون قتيلاً » تتناول المعادلة التربوية التي انقلبت باعتداء التلاميذ على اساتذتهم بدنياً ولفظياً، وقبل ان ننشر المادة فوجئنا بتلميذ اهدى معلمه منزلاً فاخراً بحي السجانة العتيق يتجاوز سعره الآن نصف مليار جنيه .. فمن هو التلميذ ومن هو المعلم ؟
ارتكبنا جريرة الركشة ونحن في طريقنا اليه ، وتجاوزنا شارع السجانة بالنص وسألنا عن منزل ابو ناموسة ، احد اشهر سكان السجانة ، بل الخرطوم باسرها وعلي الطريقة السودانية المعروفة ، آخد يمين .. لف شمال وصلنا لبيت الاستاذ عبدالحميد عثمان محجوب ، حلفاوي يتمتع بكامل قواه الساخرة والساحرة .. استهلك جبالاً من الطباشير وهو يدرس الطلاب نحو اربعين عاماً .. يمسح السبورة والجهل معاً حتى ترك الخدمة تقرباً لصنم الصالح العام التي تعبده بعض الحكومات .
الاستاذ عبدالحميد استهل مسيرته مع السبورة بمدرسة عبري الاولية بالولاية الشمالية في العام 1955م .. التمرد دخل الغابة وهو دخل غابة من سيقان التلاميذ والادراج في فصول لم تكن مكتظة وفي زمن لم يكن فظاً حيث تخرج علي يديه من تلك المدرسة ، الدكاترة عبدالسلام جريس والطيب حسن كاشف ومحمد سعيد كيلاني ومحمد حسن فضل الذي كان احد اطباء الشيخ زايد.
بعدها ، ذهب لتلقي الكورس الرئيسي في قلعة بخت الرضا التي قال عنها :
- ياخي ديل يوروك تقيف قدام السبورة كيف ..!
من بخت الرضا ذهب لمدرسة كورتى بالشمالية حيث درس التلاميذ وقتها الاستاذ الصحفي حسن ساتي ، رئيس تحرير الايام الاسبق والكاتب بالراي العام الان والدكتور الصيدلي احمد عمر كمبال ومن كورتي لمدرسة ملكال الوسطى وكان اشهر تلاميذه محمد على الاعيسر ، وكابتن كرة السلة المعروف.
التلميذ عمر البشير
في الدامر الوسطى التقى بالتلاميذ حسن تاج السر علي وصلاح علي محجوب ، الدكتور الان ، وبعدها ذهب معلماً لمدرسة شندي الاهلية الوسطى و كان من تلاميذه الرئيس البشير .
ويمتد عطاء معلم الاجيال الاستاذ عبدالحميد عثمان بانتدابه للشقيقة اليمن ليكون من حظ محمد باسدوم وزير الشوؤن الاجتماعية اليمني الان انه كان من تلاميذ الاستاذ عبدالحميد اضافة لعثمان باوزير ، احد اثرياء السعودية اليوم .
حكاية البيت
عقب ركوبه قطار الصالح العام الذي لم يكن يتمتع يومها بالفرامل ، جاءه صاحب المنزل الذي يستاجره عارضاً عليه خيارين ، اما ان يخرج منها او يشتريها وحين سأله عن السعر قال: 11مليون جنيه ..!
- قلت ليهو تفتكر ياخالد ياولدي انا عندي 11قرش ..!
وعبدالحميد في حيرة من امره، جاءه احدهم ليعرض عليه منزلاً للايجار ، اركبه معه في السيارة ليريه البيت وهو نفس البيت الذي يسكنه الان محدثنا.
-« بعد الشهر الاول مشيت ليهو بالايجار .. قال يا استاذ الشهر ده هدية ..!
وتكرر الامر حتى الشهر الثالث وصاحب المنزل يرفض استلام الايجار، « قلت يازول الراجل شكلو حيمقلبني »
بعد فترة زاره صاحب المنزل بصحبة والدته وطفق يتحدث عن السعة التي يعيشها وعن اقدار المعلمين ووفاء التلاميذ و.. فجاة ادخل يده في جيبه ليخرج شهادة بحث المنزل باسم المعلم عبدالحميد ويمده له مكافاة على تعليمه حين كان تلميذاً ..!
* الزول ده اسمو منو؟
- اسمو حسن تاج السر علي
* ده حسن تاج السر على الشيخ ، رجل الاعمال المعروف؟
- والله ياولدي ماعارف ..!
* ماذا فعلت حيث استلمت شهادة البحث ؟
- والله بكيت بكاء النساء..!
* كم يبلغ سعر المنزل الان؟
- اكثر من 500مليون جنيه
* هل يزورك صاحب المنزل ، وماشعورك حيث تلتقيه ؟
- زارني قبل شهر .. ارتعشت والله يا ابني .. ويزداد ارتعاشي كلما يزورني في المنزل .
* اين التقيت هذا الطالب ؟
-انا درست الطالب حسن تاج السر في مدرسة الدامر الوسطي قبل 40عاماً .
* هل كان طالباً مميزاً ؟
- اي والله .
* استاذ عبدالحميد ، ماذا تفعل الان ؟
- أمارس الحرية
* كيف ؟
- انوم زي ما داير .. اصحى زي ما داير ، مش قاعد في بيتي ؟
* كم معاشك الان ؟
- 117الف جنيه ..
* ماذا تفعل به ؟
- 90الف جنيه .جرايد يومياً
* والباقي ؟
- بخليها 6-7 شهور تكتر..!
* وبتاكل شنو ؟
- الله كريم ..!
_________________________________________________________
والله يا حسين ملاسي من يوم ما عرفت منك حكايات وجدي الكردي في الرأي العام وانا بقراها قبل كمال حنفي والبوني ...
|
Post: #2
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: Hussein Mallasi
Date: 01-30-2006, 09:08 AM
Parent: #1
سلامات يا لؤي
| Quote: تقرير وجدي الكردي - خالد البلولة - الصحافة : |
Quote: والله يا حسين ملاسي من يوم ما عرفت منك حكايات وجدي الكردي
في الصحافة وانا بقراها قبل كمال حنفي والبوني ... |
عهدي بها - به - بهم - في الرأي العام؛
ما الذي اتى بها - به - بهم - للصحافة!!
________
 
|
Post: #3
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: luai
Date: 01-30-2006, 09:41 AM
Parent: #2
مرحبا يا حسين ..
والله ما عارف الحاصل شنو عشان الغلطات دي ؟
انا متاكد انو اتغديت وشربت الشاي كمان ...
الصحافة عاجباني انو نسخته الالكترونية منظمة وممكن تقراها بسهولة
ومع انو كتابي البقرا ليهم اكتر في الراي العام لكن نسخته الالكترونية سيئة ..
ما عارف مالم الناس ديل ..ما دايرين يهتموا بموقع الصحيفة اكثر (الراي العام)
التحية ليهم كلهم ناس الصحافة ..والصحافة ..والراي العام..وامتداد الصحافة !!
|
Post: #11
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: وجدي الكردي
Date: 02-21-2006, 10:21 AM
Parent: #2
يا ملاسي
سلام
عاوز الاقيك
ممكن تديني عنوانك؟
|
Post: #4
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: jini
Date: 01-30-2006, 09:43 AM
Parent: #1
| Quote: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!! |
البشير تلميذه يلقيه فى الشارع وحسن تاج السر تلميذه السر يهديه منزلا!
الله يستر على الصحفى دا
جنى
|
Post: #5
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: luai
Date: 01-30-2006, 09:53 AM
Parent: #4
جني كيفك يا زول
ما سمعنا رأيك في (المقالده) الحصلت قبل يومين بين الريس والشيخ
اكيد سمعت بيها ..الريس كان وكيل العرسان والشيخ المأذون والمقالده
كانت حاره حسب الشمارات ...الحكاية شنو ياجني ؟
|
Post: #6
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: محمد السر
Date: 01-30-2006, 04:43 PM
Parent: #4
Quote: البشير تلميذه يلقيه فى الشارع وحسن تاج السر تلميذه يهديه منزلا!
الله يستر على الصحفى دا
جنى |
والله يستر عليك إنت من لسانك دا!!
يعني لؤي تعبان وجايب القصة للتدليل على وفاء تلميذ
إنت تستغلها للتدليل على جحود تلميذ آخر!!
ياخي ما تعاينوا في نص الكوب المليان!!
التحية لنصف الكوب المليان يا لؤي..
والفضيحة للنصف الفارغ.
|
Post: #7
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: Ahmed Abdallah
Date: 01-30-2006, 04:56 PM
Parent: #1
| Quote: في الدامر الوسطى التقى بالتلاميذ حسن تاج السر |
يا له من رجل ونعم التلميذ أعطى فأجزل العطاء
Quote: وبعدها ذهب معلماً لمدرسة شندي الاهلية الوسطى و كان من تلاميذه الرئيس البشير .
|
بئس التلميذ الناكر
|
Post: #8
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: هشام المجمر
Date: 01-31-2006, 02:59 AM
Parent: #1
لؤى سلامات
قصة الوفاء جميلة
لكن السؤال كم أستاذ جليل مثل عبد الحميد ملقى فى الشارع ولم يجد تلميذا وفيا مثل حسن ساتى؟
الجواب : عشرات الآلاف.
|
Post: #9
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: saif basheer
Date: 02-01-2006, 05:41 AM
Parent: #8
عزيزي هشام المجمر: تحيات
عدد المشردين حتى داخل بيوتهم من معلمين وغير معلمين يفوق الوصف
تصويب: التلميذ الوفي الرجل الطيب الذي أهدى المعلم الجليل بيتاً هو العم حسن تاج السر علي، وربما يكون الاستاذ حسن ساتي تلميذاً وفياً أيضاً...
تعرفت منذ أعوام قليلة على قمة الكرم العم حسن تاج السر في لندن... وليس بغريب أن يقدم على عمل جليل كهذا..
سيف بشير
|
Post: #10
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: عاطف عمر
Date: 02-01-2006, 07:14 AM
Parent: #1
الأخ لؤى
تحياتي والإحترام
Quote: وعبدالحميد في حيرة من امره، جاءه احدهم ليعرض عليه منزلاً للايجار ، اركبه معه في السيارة ليريه البيت وهو نفس البيت الذي يسكنه الان محدثنا.
-« بعد الشهر الاول مشيت ليهو بالايجار .. قال يا استاذ الشهر ده هدية ..!
وتكرر الامر حتى الشهر الثالث وصاحب المنزل يرفض استلام الايجار، « قلت يازول الراجل شكلو حيمقلبني »
بعد فترة زاره صاحب المنزل بصحبة والدته وطفق يتحدث عن السعة التي يعيشها وعن اقدار المعلمين ووفاء التلاميذ و.. فجاة ادخل يده في جيبه ليخرج شهادة بحث المنزل باسم المعلم عبدالحميد ويمده له مكافاة على تعليمه حين كان تلميذاً ..!
* الزول ده اسمو منو؟
- اسمو حسن تاج السر علي
* ده حسن تاج السر على الشيخ ، رجل الاعمال المعروف؟
- والله ياولدي ماعارف ..!
* ماذا فعلت حيث استلمت شهادة البحث ؟
- والله بكيت بكاء النساء..!
* كم يبلغ سعر المنزل الان؟
- اكثر من 500مليون جنيه |
قد أصدق أن يحدث شئ كهذا فلا تزال قيمنا فيها الكثير المتفرد
لكنني فقط استغرب
لتتحول ملكية أى مسكن من مالك إلى مالك آخر لا بد من إجراءات مبايعة موثقة بواسطة جهات عدلية ( محامين أو محكمة ) وبالضرورة أن يتم توقيع عقود البيع أو الهبة بين الطرفين فكيف تمت عملية تحويل ملكية المنزل هذا للأستاذ عبد الحميد بدون علمه وتوقيعه على المستندات الخاصة بعملية تحويل الملكية ؟؟
ليتم استخراج شهادة بحث لابد أن يتم تقديم الطلب بوساطة صاحب الأرض ( الحالي ) أو وكيل معتمد منه فكيف تم استخراج شهادة بحث لمسكن باسم الأستاذ عبد الحميد بناء على طلب شخص آخر حتى لو كان هذا الشخص الآخر هو المالك ( السابق ) للمسكن ؟؟
التحية للأستاذ عبد الحميد
والسيد حسن تاج السر
ولك
|
Post: #12
Title: Re: البشير وحسن ساتي من تلاميذه...تلميذ يهدي معلمه منزل بنصف مليار جنيه ..!!
Author: khaleel
Date: 02-21-2006, 01:49 PM
Parent: #10
دها السودان
ياهو دها السودان
|
|