ياريتني كان ماجيت الحج ولا شفتو!!! البعثه السودانيه للتلتله والتعليق

كلمات تطلع بانين ومأساه من حاجه وهي في سن السبعين عام
قالتها وهي تفترش الارض وتضع راسها علي حافه الطريق
وخلفها شداد غلاظ تم تدريبهم علي اللوم وقبيح الكلام تخرجوا في جامعه (ابوب المستشفيات )
لا يعرفون ادني امور دينهم
ولايدرون انها شعيره يجب التحلي بالاخلاق الفاضله
يقفون علي مدخل المخيم المزين بلافته الفنيل
كتب عليها مقر البعثه السودانيه رقم (--)
***وقفات ***
* تم ترحيلهم الي عرفات في تمام الساعه الواحده صباحاً
*كانت العوده الي مزدلفه الثانيه بعد الظهر (يوم العيد)
*صوت يعلو من ذلك الكائن الذي يدعو الامير (ياخي انا قلت ليك امش الحج- انا مالي ومالك)والمشاكل دي ما من اختصاصي!!!!!!
* بعض الحجيج ترحلو بين المشاعر علي النفقه الخاصه
* مايتكرر سنوياًوجود المخيمات خارج المشاعر وبعيداً عن رمي الجمار

****يخرج المؤتمر المنعقد بعد آداء الشعير كان الحج ناجح بنسبه 200% ولا في زول يقول بقم لكي تتكرر نفس المأساه والماعاجبو انت زاتو تجي الحج ليه؟؟؟****

الأخ ود شندي

هذه حقيقة أن بعثة الحج السودانية تعتبر من أسوء البعثات من ناحية الخدمات

حيث لا تقدم أي خدمة للحجيج

ومن مميزاتهم :

بعد السكن عن المسجدين ( مكة + المدينة )

عدم وجود ترحيل بين السكن والمسجد

عدم وجود بصات كافية لترحيل الحجاج للمشاعر ( من مكة لمنى , من مني لعرفة , من عرفة لمزدلفة , من مزدلفة لمنى مرة أخري ) ففي العام 2001 ومعي والدتي كنت أسير كل هذه المسافات بحسابي الخاص وأمشي بعضها بالـــ ( خ 11 )

نسأل الله ان يتقبل من حجاجنا مشقة الحج


وكل عام وانت بخييير



.... أبو شهد ....

ابوشهد
كل عام وانت بخير

وشكراً علي المرور

Quote: عدم وجود بصات كافية لترحيل الحجاج للمشاعر

ازمه الترحيل قاصر علي البعثه السودانيه وبس
انا ما عارف السبب

Quote: والماعاجبو انت زاتو تجي الحج ليه؟؟؟****

صدقني سؤال وجيه
مع الامير العملوه للحج دا
وبتاعين الحملات والمتعهدين
والحرس القاعد قدام المخيم
تقول حارس مدرسة بنات
فظ غليظ القلب

يا ود شندي اخوي الجاتك في حجك سامحتك
وكل عام وانتم بخير
عيد سعيد

Quote: فظ غليظ القلب

حتي في الحج يا حماميزو

اللهم الطف

تخريمه
يا خوي خبر الجلود شنو
لحستهن برضو والا شنو؟؟؟؟

الأخ ود شندي تقبل الله الحجة وجعلها لك في ميزان حسناتك

يا أخي ليس عيباً أن يخطئ الإنسان ولكن كل اعيب أن يصر علية

بعثة الحج هذة تعتبر الأكثر تقصيراً وإهمالاً لمسئولياتها المناطه بها

تجاة الحاج ومساعدتة وإرشادة والسهر علي راحتة تحت كل الظروف

وذلك لأنها كم يوم وأهلك قالوا الجعلي بقضي يومه خنق يعني هي أيام والسلام

لذلك المطلوب من البعثة عدم المزايدة والإعتراف بالتقصير والبحث عن الأسلوب الأمثل لتجاوز ذلك بأي ثمن ووسيلة ولو علي نفسها .

بدلاً من سد دي بي طينة ودي بي عجينة والإستمرار في مسلسل الأخطاء وفي النهاية تقرير معيب بنسبة نجاح بلغت مأئة بالمأئة


بحيراوي

الأخ ود شندي

جئت للتحية والسلام

كل عام وأنت ومن تحب بألف خير

أميرة

اخي ود شندي ... تقبل الله حجكم وجعله مبرورا وذنبه مغفورا .....


البعثة السودانية كما ذكر الاخ الكريم تعد من اسوأ بعثات الحج في العالم .. ورغم ان شعيرة الحج هي عبادة ينال فيهاالحاج الكثير من المشقة والتعب من طواف قدوم وسعي بين الصفاء والمروة والذهاب الى منى والمبيت فيها وبعده التوجه الى عرفة ومن ثم مزدلفة مرورا برميه الجمرة الكبرى وصولا الى الكعبة لطواف الافاضة والتحلل بعدها من الاحرام .. تصوروا كم المسافة ما بين مني وعرفات وما بين عرفات ومزدلفة وما بين مزدلفة والحرم .. حكي لي احدهم انه مشاها مشيا على الاقدام هو واخته المسنة ..حيث لم تتوفر في مقر البعثة التي هم فيها الا باصان وعند الاستفسار من امير الفوج رد عليهم قائلا .. كلو زول بي طريقتو يحج ...

ود شندي ... انا اقترح ان تتولي مكاتب طوافة سعودية امور الحجيج السودانيين وابعاد كافة المسئولين عن البعثة وينتهي دورهم في السودان فقط وواحد قيهم ( يعتب ) مع الحجاج مافي ..

عموما وزارة الاوقاف وكل القائمين على امر الحجاج يتحملون امام الله مسئولياتهم في الاخفاق الشنيع في خدمة من اتوا بهم للحج وايضا عن الاموال التي اكلوها منهم دون تقديم ادنى خدمة لهم ..

الغريب كل سنة نفس الوجوه ونفس الاخفاقات ....

بعدين انت يا ود شندي يا ودعمي ما سمعت عن الحج السياحي ....


ود الباوقة

الأخ الكريم ودشندي....
السلام عليكم ورحمة الله وبركاته....
تقبل الله حجكم وجعل معاناتكم في ميزان حسناتكم.....أنا أستغرب أن تكون هذه حالة بعثة الحج السودانية...إنها مأساة والله....ولكن كما يقولون العبرة في البركة.....فرب حاج يظن أن حجه مقبول وهو غير مقبول....ورب حاج آخر يعاني في الحج ولكن الله يقبل حجته...لذلك لا تقل يا أخي ياريتني كان ما مشيت الحج...فربما كان حجك مبرورآ مباركآ ومقبولآ برغم المعاناة والإحباط.....تقبل الله حجكم وأثابكم خيرآ ....ولك مني التحية والسلام..............

ود القبايل العيد مبارك
واعفي مننا


انا اقترح ان تتولي مكاتب طوافة سعودية امور الحجيج السودانيين وابعاد كافة المسئولين عن البعثة وينتهي دورهم في السودان فقط وواحد قيهم ( يعتب ) مع الحجاج مافي

اليوم داك جماعتنا بغلو الحج عديل وطلعو فتوي بتحريمو
ما تقول جماعتم جاهزين
لك مني خالص الود

Quote: جئت للتحية والسلام

جيداً جيتي
لك صادق الود

اميرة الشباب يا الملكه

جيداً جيتي
مرحبتين حبابك
مع خالص الود

ود شندي
كل عام وانتم بخير
وحجا مقبولا انشاء الله
ماذا تتوقع من نظام شمولي ؟
خدمة للبسطاء انت مخطيء
احد اولاد شندي

Quote: ماذا تتوقع من نظام شمولي ؟ خدمة للبسطاء انت مخطيء

يحي مصطفي
الله يحيك
هل تعلم حتي يوم عرفه وانت داخل المخيم تسال الحاج عن طواف القدوم يقيف زي البسمع في جدول الضرب
وحتي بعض الحجاج لم يكن يعلم ترتيب المناسك واهميتها (الركن من الواجب من الفرض)
غايتو في ناس بيجو باب شريف وبس

قال وزاره الارشاد
وبعثة الحج
حاجات تفقع المراره

اخوي

عماد

والله حجتك دي زاتا ما مقبولة

انت الوداك شنو ،، خلاص يعني كملت الدين
ومافضل غير تحوم عريان وحفيان

وبمناسبة عريان دي احكي قصة جد صديق الموج
من نواحي شندي

اول ما جاء جدة وعاوز يحرم رفض يقلع سروالو
وحلف حرم

كان الحج دا جاب ليهو لوووأأأأأأأأأطة
من دربي دا راجع

ومسك درب المشرع

غايتو

كرر المحاولة مرة اخري

الاخ/ودشنــــدي
تقبل الله صالح الاعمال وكل عام وأنتم بخـــير
عايشت جزء كبيــر من تلك الماسي التي يعيشها الحجاج السودانيون
والتي طرفها ماتسمي بعثة الحج السودانية 0
لاخدمات لاترحيل 0 حجاج تائهين بلادليل 0
كلماذكرت صحيح 0
يجب اعادة النظر في تكوين البعثة السودانية وتكليف من هو كفء اداريا
لقيادة البعثة مستقبلا 0

حاج محمد الحسن

الزول الجميل
تقبل الله الحجه
وشكراً علي المرور

Quote: كان الحج دا جاب ليهو لوووأأأأأأأأأطة

وحات الله انت فاقد الشيخ الجعلي بس
العيد مبارك عليك

التحية والتجلة وكل عام وانتم بخير
وبما انني من مقيمي مكة المكرمة
اقر واعترف بما جاء اعلاه وكل
ما ذكر صحيح بسنبة 200%

البعثة السودانية
المقر خارج حدود المنطقة المركزية للحرم المكي
(( وكل ما بعد المسافة كلما قل ثمن استئجار العمارة ))
المواصلات من والي الحرم علي النفقة الشخصية

مني :- المخيمات خارج الحدود
الامير : جاي مجاني علي نفقة الحكومة
ومسئول من فئة ولكن اول ما
يصل جده دوره ينتهي بذلك .

وساحكي لكم قصة واقعية عايشتها في العام الماضي

حيث وبعد نزول الحجاج من مني ذهبت الي مقر البعثة
لأسال عن لقريب لي ،
دخلت الي غرفة الأمـــــراء وبينما انا هناك اتت حافلة
تقل التائهين وبها حاجة سودانية في السبيعنات من العمر
تم انزالها هناك لانها لاتدري الي اين تتجه وهي لاتعرف
اسما لأمير ولاتعرف اين هو ذلك الرجل الذي تم توكيل امرها
من السودان . حاول البعض ن يفكوا طلاسم الحجة ولكن لغتها
بالرطانة الدنقلاوية غلبت امر الجميع
توجهت اليها وسالتها
فقالت وهي باكية انهابمني منذ ان غادرالحجاج مني الي عرفة
وانها لم تؤدي اي مناسك للحج .
ودوها المخيم بمني ونسوها هناك
لاعرفة لامزدلفة لا جمرات
والحج انتهي خلااااص
ولكن ارادة الله اتي بي الي ذلك المكان
حيث بالحديث معها تعرفت عليها عن قرب
ومن اين هي (( مشو _ ديم بركية ))
بالفور اتصلت باحد اقرباءها
بالرياض ومن ثم تم تسليمها الي الامير
الذي وجدناه في مقره بعثته نائما ولاحق الراعي
علي الرعية .
والطريف في الامر
حيث من المعروف ان لكل حاج / حاجة
اسورة في اليد مسجل بها عنوانين البعثة
وتلفوناتهم
ولكن الحاجة فقدت كل شي
ولكن احسست ان هناك شي مخفي
داخل قميصها تحاول هي كل مرة
اخفائها طلبت منهااخراجهاحتي اطلع
بما بالداخل عسي ولعل اجد
طريقا لاميرها ولكنها رفضت
رفضا باتا .
فخرجت وذهبت بعيدا من اعين الناس
واشارت لي وذهبت بقربها
قالت بهمسة ياولدي ( دا كيس تمباك )
-------
الحاجة رجعت السودان بكيس التمباك
----
هكذا هم احوال بعثتنا
وربنا يتقبل

صهيب المحسي

كل عام وانت بخير

حقيقه شر البليه ما يضحك

Quote: قالت بهمسة ياولدي ( دا كيس تمباك )

اخي محسي
الشاهد نحن من كل الشعوب ياتي حجيجنا كبار السن وذلك لاعتماد علي الابناء (الدراسه المؤهل -العمل حتي يوفر تكلفه الحج )وكلام كتير عن الحاله الاقتصاديه وعبد الرحيم حمدي وحنك كتير......
ولكن هذا لايعني تجاهل القائمين علي الامر لتمليك الحاج اهميه اداء الشعيره ومعرفه الواحب والفرض والركن
وكما زكرت اخي المحسي
بعض الحجيج يكتفي بحمل الشمسيه والسبحه والطواقي
وهناك يزين مدخل الباب بعبارات
ياداخل هذا الدار
صلي علي النبي المختار
وحج ومقبول
وسعي مشكور
وليليه كاربه وبمديحه ويمكن بالاصايل كمان
وهنا يطلق لفظ الحاج وانتهي
وهنا تجد مايدعي الامير يتحرك مابين الوزاره والبنك ليخلص بستلام مبلغ 3 مليون اجر التمثليه التي كانت بين الاماكن المقدسه

اخي المحسي
في دواخلنا مايفقع المراره
الجماعه تخصصو اتنزاع هيبه الحاج ووقاره
يدهم تطول حتي اماكن تفريغ الذنوب
تجدهم في انتظارها بالبلدوزرات والفوركلفت حتي تمتليء رغباتهم الدنئه
الي متي وهم في جشعهم وطمعهم لاحترام حتي لاماكنا المقدسه


نترك المذكره مفتوحه حتي العام القادم لنضيف انجازات بعثتنا المجيده