مصطفى سيد أحمد.. سألتك هل؟ غشاك الطل؟ جفاف زهر العمر ينبل!!

مصطفى سيد أحمد.. سألتك هل؟ غشاك الطل؟ جفاف زهر العمر ينبل!!


01-15-2006, 06:28 AM


  » http://sudaneseonline.com/cgi-bin/sdb/2bb.cgi?seq=msg&board=50&msg=1137302899&rn=0


Post: #1
Title: مصطفى سيد أحمد.. سألتك هل؟ غشاك الطل؟ جفاف زهر العمر ينبل!!
Author: nashaat elemam
Date: 01-15-2006, 06:28 AM

هذا النص بدأ الأستاذ مصطفى سيد أحمد بتلحينه.. لكن المنية كانت يدها أسرع من يد مصطفى وهي تغازل أوتار العود.. وقد أهدانا إياه شاعرها الأستاذ مدني النخلي.. فإليكم هذا النص ونحن نعايش انقضاء عشرة أعوام من رحيل مصطفى سيد أحمد


منو البفتح صباح البوح
ويلملم صوتك المجروح
على شرفة قماري تنوح
وبغني عديلة للجايات؟
أسف لو دون مداك شايف
شظف عيشك ولا تخمة رحيل زايف
وقار صمت الكلام المر..
ولا وعد الغنا الهايف
ردمت الهوة بيناتنا وفي بدء الكلام يادوب
أنا العريت.. قواميس الكلام غنيت
لا قبلك ولا بعدك.. عشق يمخر عباب الهم
ويجاوبك بالقصيد النم
اسائلك كيف.. ووين نتلم؟
إلاما يلفظك حلمك
يقبل فيك شقاك وينجم
عشم فيك
من عشم فيّ
يمازجنا إلتقاء الدم
ويادوب الطشاش حلمك
ندهني طشاش
اداريك من سموم تلفح
أتاريك.. غيمه جات ترمح
إلاما تنزحي وأنزح؟
نقوم من ضو يفج المشهد الزاهي
سكون الكون يطل باهي
يلاقي الشارع الفارع
ناسو الفي الحياه تصارع
تزيد الهوه بيناتنا
ولا عاد الرصيف ضاراي
ولا شقشق صباح مرساك
ونادى للفرح ناداي
ندهتك هل
غشاك الطل
جفاف زهر العمر ينبل؟
عذرتك.. لو بساورك شك
إذا انسدت مداخل الحل
متى انهزمت بشاراتك
وايقاع الزمن اختل
على لوحة شروق الفال
يزف وردك صباح الطل
على شرفة قماري تنوح
تغني عديله للجايات

Post: #2
Title: Re: مصطفى سيد أحمد.. سألتك هل؟ غشاك الطل؟ جفاف زهر العمر ينبل!!
Author: Ibrahim Mohammed Ibrahim
Date: 01-15-2006, 07:34 AM
Parent: #1

كتب نشات الامين قائلا :

(هذا النص بدأ الأستاذ مصطفى سيد أحمد بتلحينه.. لكن المنية كانت يدها أسرع من يد مصطفى وهي تغازل أوتار العود.. وقد أهدانا إياه شاعرها الأستاذ مدني النخلي.. فإليكم هذا النص ونحن نعايش انقضاء اثنا عشر عاماً من رحيل مصطفى سيد أحمد)
وانا اضيف على هذا النص بمناسبة فاجعة ود المقبول الاتي:-


الي روح ذالكم الغائب الحاضر .... الي خل الوطن الوفي ....
الماقصر فى حقو تب .... الي هبابة عرق الجباه الشم التي لم تعد تبصر نحو الافق بعد ترجلك من قطار هذه الفانية ...........
من غير متاع .............
ورحل معاك كل الغنا الانكتب والمانكتب جوه الدفاتر...
وحتي القلم سنو انكسر .. مابي البري ......
والعبرة سكنت فى السطور ..........
وفات النهار بعدك رحل لملم معاه بسيمات الامل النضير..........
وليل الغنا اتوسد البلد الفسيح مدد ضراعاتو وطمح مدادي .. ماقصر تب .........
والنيل غرق فى همو وسرح بي وراك فات بي وشي .........
وين الفرح بعدك يهل ماانت فرحة غنا البايتاب ...
والوطن بعدك منو البطراهو زيك .. دايما منسي ..
دايما ودران بفتش للوليد الكان شايلوا معاه محطة محطة ..
ومات وحيد .. مفطوم حنان .. فاقد هويتو و الانتما ...
واللحن بعدك شتر .. اتوحد القافية القديمة..
ورجع للاسطونة النشاز ... بدل كلامو وغيرو. ...
وانحنا يانا نحنا .. لا نسيناك .. ولا سليناك ..
خليتنا فى الزمن الهوان ... ماشين بنكدح فى النزيف وكل المنافز الكانت معاك مشرعة .. بعد غيابك سدت علينا الدرب .......
مافي حتي بصيص امل .......
كل الدروب اتشتت كل الناس الكان ملمومة بيك مهمومة بيك ... فرحانة بيك ... مشدوهة ليك ... صبحت حزنانة عليك ......... ضهابانة دونك وتفتش .....
عن بلد رحل فراق .... عن ولد رحل وغطي كل جدران الغناء ... احزان ...
عن ... حقيقة ضاعت فى الدرب .. واصبحت اوهام .....


وللحديث بقية .....

Post: #3
Title: Re: مصطفى سيد أحمد.. سألتك هل؟ غشاك الطل؟ جفاف زهر العمر ينبل!!
Author: nashaat elemam
Date: 01-16-2006, 03:54 AM
Parent: #1

أسف لو دون مداك شايف
شظف عيشك ولا تخمة رحيل زايف
وقار صمت الكلام المر..
ولا وعد الغنا الهايف

Post: #4
Title: Re: مصطفى سيد أحمد.. سألتك هل؟ غشاك الطل؟ جفاف زهر العمر ينبل!!
Author: معتصم الطاهر
Date: 01-16-2006, 06:17 AM
Parent: #1


عفوا ..

أخى نشأت

أظن أن هناك معلومة مغلوطة ..

هذه القصيدة كتبت بعد وفاة مصطفى ..

وهى من أجمل ما كتب مدنى النخلى أخيرا.. بل اطلاقا ..

راجع مصدرك ..

Post: #5
Title: Re: مصطفى سيد أحمد.. سألتك هل؟ غشاك الطل؟ جفاف زهر العمر ينبل!!
Author: بدر الدين الأمير
Date: 01-16-2006, 02:04 PM
Parent: #4

أخى نشأت لك وللاصفياء أجزل التقدير

يقينى أن حضوره تعب وغيابه تعب آخر

Post: #6
Title: Re: مصطفى سيد أحمد.. سألتك هل؟ غشاك الطل؟ جفاف زهر العمر ينبل!!
Author: nashaat elemam
Date: 01-17-2006, 03:01 AM
Parent: #4

العزيز جداً معتصم الطاهر
حفي أنا بمقدمك هنا.. وكل عام وانت بخير
ربما لم تظهر هذه القصيدة إلا مؤخراً.. لكن المصدر هو النخلي نفسه.. والذي اسماها (صباح البوح) وذكر لي أن مصطفى بدأ الترنم بها لكن لم يكملها.. وربما انت تقصد (ضفيرة الروح) والتي كتبها النخلي بعد زيارته لود سلفاب وتداعيات رؤيته لقبر مصطفى بين تلك الوهاد التي أحبها مصطفى كثيراً وتمنى العودة اليها.. لكنه عاد في تابوت.. واليك مقاطعاً منها:

حسن النيه ما كفاك
حسن النيه لو كفاك
ما هزيت ضفيرة الروح
على الوطن الصبح مرساك
ولا اتراخيت.. صعب تتنحى عن مبداك
ولا اتواريت خجل بكيت عيون الوردة في مغناك
فيا وجع الدماير قوم
شقي ومهموم
شوف النيل رماك منديل
على شوق ضفتو الفاقداك...

ولك عظيم تقديري استاذي معتصم الطاهر

Post: #7
Title: Re: مصطفى سيد أحمد.. سألتك هل؟ غشاك الطل؟ جفاف زهر العمر ينبل!!
Author: بهاء الدين سليمان
Date: 01-17-2006, 02:10 PM
Parent: #6

فوق مع الرحمة والمغفرة