الفضائية السودانية والكاظمين الغيظ..!

..هل استطعت ان تكظم غيظك حيال ما قدمته الفضائية السودانية من برامج خلال ايام عيد الأضحى؟

مواد ابعد ما تكون عن الخفّة ..!! ثقيلة بكميات تضاهى ما سكن بطوننا من لحوم!

أفلام اجنبية؟!! + كمان كاميرا اسكوب !!!!!!!

والباحث عن افلام أجنبية عادةٌ ما يوجه (ريموته) نحو قنوات تعج بتلك الافلام (انتاج الشهر)
فما حوجته الى افلام تسكن رفوف التلفزيون تُنفض عنهاالاغبرة متى جاءت مناسبة


الدنيا عيد يا تلفزيون..!

يخيـل لي متغاظـين مـن حـاجـات وقـرروا يعاقبونـا...تكـون الحـاجـات
دي شـنو ياربي??

مـني

أفلام اجنبية؟!! + كمان كاميرا اسكوب !!!!!!!



افلام اجنبية + كاميرا اسكوب = ابو جلمبو حمزة عوض الله


وليد العيد مبارك عليكم ....



ود الباوقة

ود الباوقة ..
إزيك يا ريّس وكل عام وانتم بخير

دكتور حمزة - وهذا يشغل حيزكبير فى مسألة الغيظ وكظمه- هو حقيقة ظاهرة غير مسبوقة فى التلفزيون
لماذا ؟! كل من ظهر فى التلفزيون نال حظه من النقد ومع الايام تعوّد عليه المشاهد إلاّ هذا الرجل
لم يتعود عليه المشاهد السودانى ابداً !!! سبحان الله
وإنشاء الله ما اكون ظلمت الرجل

ربنا يصلح حال التلفزيون

وعيد سعيد،،

الأخت منى خوجلي
كل سنة وانتى طيبة وعيد سعيد

لعل غيظكم أكثر من غيظنا ..فأنتم فى تلك الاصقاع احوج ما تكونوا الى (عيدية) من برامج متنوعة مستمدة من الشارع السودانى ومواقف الشارع السودانى ترسم على شفاكم البسمة وانتم تحتفلون بالعيد وفى خاطركم شوق كثيف الى الوطن.

Quote: متغاظـين مـن حـاجـات وقـرروا يعاقبونـا...

ما اقساه من عقاب


ربنا يصلح التلفزيون

لك التحية أختى
ودمتى

الأخ وليد طه العيد مبارك عليك أنا خلاص تخطيت مرحلة الكاظمين الغيظ من التلفزيون وبرامج التلفزيون وناس التلفزيون بدون فرز وأصبحت أقرب ما أكون إلى طور كاظم الساهر وهو المرحلة التي تلي مرحلة الكاظمين الغيظ
أمامك حل واحد من إثنين يا تبيع التلفزيون بتاعكم يا تطنش من فاتورة الكهرباء وتخلي الجمرة الخبيثه تقوم بالباقي وما أظن في تلفزيون الأيام دي بشتغل بالجاز وخلي اليتشغل

أخي وليد وأخي الملا.. وأنا على وشك أن أرفع قضية على تلفزيون السودان بدعوى التلوث البصري.. ودعوى أخرى لأن الفضائية دفعتنا - من خلال برامج العيد - لمحاولة الانتحار ونحن مسلمون.
اللهم إنا لا نسألك رد القضاء ولكن نسالك اللطف فينا.

وليد طه..

كل عام وأنت بألف خير..
والأسرة الكريمة..


تحياتي..

المُلا عمر تحياتى وكل عام وانت بخير

Quote: يا تبيع التلفزيون بتاعكم يا تطنش من فاتورة الكهرباء

إذا استمر الحال على ماهو عليه فمن الافضل صرف الكهربا دى فى فى اى حاجة تانية انشاء حتى(دفاية) فى الشتاء ده.

حسب بى الله ونعم الوكيل

دمت وعيد سعيد

الاخ الاستاذ/ وليد طــه

لك التحية ولك الاجر والثواب وانت من الكاظمين الغيظ وما اكثرهم , ولا تنسي العافين عن الناس لان العفو في مثل تلك الحالات يكون فيه اجرا عظيما ( عظم الله اجركم )


الاستاذة / منى خوجلي

حاجات ....وحاجات ...تانية , حامياهم.....( يبدعوا) ...........



أعاننا الله واياكم

الاخوان محمد الأمين موس
خضر الطيب
عبد الرازق
كل عام وانتم بخير وعيد سعيد

ما علينا إلاّ الصبر ولا شئ غير الصبر
ما حنقدر نشتكى ناس التلفزيون
بكرة يقولو ليك الإمكانيات

صبراً جميلاً

العزيز وليد

لك التحية

بالنسبة للامكانيات , لو كنت تقصد في مجال تكنلوجيا التلفزيون فهي بلاشك تضاهي في تقدمها

الكثير من القنوات المعروفة ,اما في مجال الكادر البشري ففيهم من تم ابتعاثهم الي خارج

السودان الي انجلترا وماليزيا ومصر وسوريا وقناة الجزيرة بقطر وفيهم من ذهب قبلها الي

المانيا . هذا غير الدورات على راس العمل والتي كانت تنظمها منظمة fredrich ibert & hanz

zaydle . . اذن اين تكمن المشكلة ؟ .هذا مايجب ان تسال عنه وهذا مانود معرفته ...ولاتنسي ان

هذا التلفزيون (حكومي)

الأخ خضر لك التحية مُجدداً

لا أدرى لماذا أحس ان (المسائل) فى التلفزيون تتم (حِبيّاً) يعنى مثلاً لو عايز تعمل اى حاجة او تقدم اى برنامج بس تمشى تكلم زول مسؤول ويكون (فردتك) ويكلم ليك المدير ويقول ليك (خلاص ظبّط ليك الموضوع) وطوالى تقدم الدايرو.

هنالك شئ لفت نظرى تلقى فنان فجأة بقى يقدم برنامج او مخرج بقى مُمثل ،مرة شفت المخرج القدير شكر الله خلف الله بيمثل فى مسلسل فما عارف الفكرة شنو؟! هل لانو نجح كمخرج بالتالى فكّر ينجح كممثل ولاّ ممثل الدور إتأخر ماجا؟

شئ آخر لفت نظرى فى ايام العيد ..مقابلة مع الفنانة المُروتانية (معلومة بنت المداح) فى موروتانيا..حقيقة إتفاجأت بأن مجرى اللقاء واحد كان ممثل إسمو (خليفة.....) -ما متذكر إسمو بالكامل - فهل كان مُبتعث من قِبل الفضائية السودانية ام تصادف وجوده فى مروتانيا؟
إن كانت هذه ام تلك فهل هو الشخص المناسب ؟!!!


شكلها جايطة

واضح اننا محتاجين برامج رياضية كتيرة خالص عشان منتخبنا يصعد لكاس العالم في اسرع زمن ممكن ونلحق بالشعوب الكروية المتقدمة .. عالم الرياضة ، مباراة اليوم ، مباراة في الزاكرة ، رؤي رياضية وهلم جرا .. بالاضافة لبرنامج تلي ماتش !!!؟؟؟ برنامج عمره الافتراضي انتهي برضو التلفزيون السوداني بيجيبو وكمان السيرك العالمي !!؟؟ وبعدين ايه حكاية البط اللي بيجيبوه ماشي في كل فاصل؟؟؟ عجيب يا تلفزيون السودان!

الأخ وليــد
لك التحيــة



وقبيـــل شن قلــنا

حماميــزو ... يا خي قــديتنــا !!!

يا جماعه تلفزيونا بقي فضائية
وبتشوفو الناس في كافة بقاع المعمورة
وهو من المحطات التي يعتبرها الكثير من المشاهدين محطه كوميدية أو سنده بلغة القطارات يتوقف فيها الريموت كنترول للحظات تاركاً إياها لمحطة لأسباب تأتي في مقدمتها البرمجة ونوع البرامج ومقدمي البرامج وطريقة التقديم ولغة الحوار ناهيك عن الديكور والإضاءة إلى آخره.
أى برنامج يمكن أن يصيب الإنسان في مقتل لذلك نجد أكثر البرامج نجاحاً عطفاً على عدد المشاهدين هو المسلسل اليومي ، للحد الذي قال فيه البعض قولتهم المشهورة شدة الحرامي السرق التلفزيون والمسلسل شغال وهي شدة تصنف كرابع المستحيلات إن لم تكن أولها.
مقدم برنامج سياسي – على حد زعمه – يكرر وبإستمرار عبارة أل لل لل وبكثرة وكأنه يستحضر شيئاً وبين الشئ والاشئ تستمر الأأله إلى ما لا نهاية ، كثير ما يقاطع مقدم البرنامج الضيف يعني يختف ليك الكلمة من خشمو كف ويغير مجرى الحوار وما يحلنا من البهدلة دي إلا إبتسامه مصطنعه من المذيع يقول ليك سيداتي سادتي يرفع الآن آذن العشاء . والله يا ناس الواحد يلحس كوعو عديل كده من الغيظ ولو قلت الروب أو ما قلت واحد ، أها نقبل وين عليكم الله
وأول مرة ؤمن يقينا بأنو في زول قد وواحد براى وواحد ما لاقي ليهو مسمى حتى الآن.

1/ المساهمة الوطنية...
2/ زكاة..
3/ دمغة الجريح..

4/ رســــــــــــــوم فــضــائــية!!!!!!

المساهمة الوطنية لغوها على حسب ما قرأت بس ما تلوموني لو ما لغوها لأنو جميع قراراتنا إرتجالية ولا يتحمل فيها أى شخص المسئولية
والزكاة مفروضة على المسلم العاقل البالغ المستطيع
والجريح يا مات وبقى شهيد يا بقي كويس وأصبح من قدامى المحاربين
ورسوم القناة الفضائية لابد منها لأنه دون دعمك يا معشر المغتربين لن تصبح حتى قناة أرضيه ونكون دولة تتمتع بالإستقلال وبسلام جمهوري ورئيس يرقص السنه كلها ووزراء دولة وجيش نظامي وأمن دولة دون أن يكون لنا تلفزيون يعني رئيسنا ده يرقص ليكم في الراديو ولا شنو.
إنت عارف جاتني فكرة الناس تقوم تعمل مخطط تخريبي وتفجر مبني التلفزيون وتريح الناس من هموم الفضائية السودانية ونكون بذلك ضربنا كل عصافير الزهج والسخف والدبرسة ونستبدل قعداتنا أمام التلفزيون بالكمبيوتر وأهو في أسوأ الإحتمالات بجيك فيروس طائر يضرب الجهاز ويريحك وهو أخف ضرراً من فايروس التلفزيون نه يضرب ويلوث كل من يقف أو يقعد أو يجي ماشي قدام الشاشة.

المُلاّ عمر كيفنك؟

Quote: وتفجر مبني التلفزيون وتريح الناس

طيب لو قامو بنو مبنى التلفزيون تانى وواصلو فى غيظهم لينا؟

اقترح تفجير البرامج نفسها

تخريمة:

مافى زول شغال فى التلفزيون فى البورد ده؟؟

أقترح الآتي لمشاهدي فضائيتنا وأرضيتنا وبرمائيتنا:
أول ما تصحي من النوم أفتح الماسورة حا تلقي المويه قاطعه – عادي لأنك صاحي متأخر وأنك لا تؤمن بالمثل القائل "ود البدري سمين" – طبعاً الكلام ده ما ليهو أى علاقة بالتلفزيون وبرامج التلفزيون بس ما تستجعل يعني لوك الصبر وحاول أن تقرأ بين السطور مش الفلاسفة والأدباء بيقولو كده صحيح أنا ما فيلسوف ولا أديب لكين بتعجبني أغنية وردي البيقول ليها – الكلام فيهو كلام - صاح بين السطور دي تحديدا ما في ولا نفس زيها وزي أى حافله متجهة إلى الحاج يوسف أو أمبده السبيل ، المهم بعد أن تلقي الموية قاطعة فأكيد تحققت النبوة الأولى.
تقوم تعصر باقي صباع المعجون نظام سواك وكده يقوم المعجون يختار مخرج الطوارئ ويدقسك إنت والفرشاة يعني زي لمن تطق ليك قصير – وهو عظم من عظام الساق أو الأنكل لا فرق - قاصداً إخراج المخ من العظم يقوم يقع في ا########## ورغم عدم تأففك من ذلك ورغبتك في أن تشيل المخ ومن الأرض مباشرة يقوم ديك الجن يسبقك ويلحس المخ ويجري وهو فرحان.
أها زي ده صباح شكلو معكنن تفتح الرادي يجيك صوت جهوري يقول ليك هنا أمدرمان بالرغم من إنك في الكلاكة صنقعت تقوم تقفل الرادي وتقول أمدرمان عاوز تجنني لي 15 سنة ساكن هنا تقول لي هنا أمدرمان ومال هناك شنو وترتفع وتيرة غضبك وحوارك بصوت مسموع لسابع جار بينك وبين نفسك أها تجيك أم العيال إذا كنت متزوج حتى لو ما عندك عيال - بإعتبار ما سيكون – ولو ما متزوج أى من أفراد الأسرة ، يقولو ليك شنو مالك قول بسم الله بتنضم براك مالك جنيت ولا شنو ، وهنا يخرج الموضوع عن السيطرة وتقعد تكورك ويبدأ الأمر بسيطاً ثم يستفحل وفليها تكسر ليك سن زول أو تجيك حلة طايرة تغتس حجرك المهم داحس والغبراء ويا ملايكه سيري معا.
أها بعد ما تشيل نفسك وتروق شوية – هو ده هسع كلو علاقتو شنو بالتلفزيون وبرامج التلفزيون وهي البرامج البيقدموها ناس التلفزيون كلها علاقتها شنو بي البرامج التلفزيونية وذنب المشاهد المغلوب على أمره شنو ، يعني حا يلقاها من أنثي الأنفوليس ولا التلفزيون ولا الخدمات ولا سيد الدكان ولا ولا ولا ... والكلام جاب ليهو سياسة والسياية قبالو مشتقة من ساس يسوس والسوس لو لم في الضرس يا تحشيهو يا تقلعو وأى ضرس يتقلع ما بتعوض ورجعنا تاني للمسواك والمعجون.

ياوليد طــه

اخيرا بقيت تدور لي واحد شغال في التلفزيون ...ولو لقيتو حتسوي شنو ..انت مش قلت انك

من الكاظمين الغيظ ؟ ...( ولا فاض بيك الشجن... فاض بيك الحنين )..بالمناسبة انا لحدي

قبل ماتكتب البوست دا كنت شغال في التلفزيون وبعد ماشفت البوست دا بطني طمت من

المشاهدين الجاحدين المابقدرو مجهوداتنا العظيمة ..لوووووووووووول وقدمت استقالتي

احتراما لرغبة المشاهدين...وانحنا دائما عشان رغبة المشاهدين مستعدين نعمل المستحيل

( اتدللو انتو بس )

Quote: اخيرا بقيت تدور لي واحد شغال في التلفزيون ...ولو لقيتو حتسوي شنو

خضر الطيب إنتا مخرج ولا مُمثل ولا مقدم ؟ ولا شنو؟ حــدّد

Quote: مجهوداتنا العظيمة

انت يا زول فى فضائية تانية؟!

شكلك فى إحدى الفضائيات الخليجية والدليل

Quote: ( اتدللو انتو بس )

صاح؟

يجازي محنك ياوليد

انت بتحكها كده ليه ؟ عاوز توصل لي شنو المسالة واضحة ذي صلعتك الكبيرة

دي لورجعت لتعليقي الاول بتلاقي اجابات كثيرة .وغايتو انتو المشاهدين العبيطين ديل

ربنا يصبرنا عليكم كمان بتتشرطو علينا .عاوزين دا لا ماعاوزين دا .بالله عليك الله القناة

السودانية دي انحنا طلعنا ليكم منها تعالو شغلوها انتو ..وبعدين ياخ انت لما كنت

بتشاهد في القناة بتاعتنا دي يوم العيد حالتك ابدا ماكانت طبيعية ..قال ايه مالي

بطني لحمة وطبعا معاها ام فت فت فت كتمت على مراوحك وخلتك تكوس في النفس وبعد مادخلت

في غيبوبة بسبب اللحمة ماقصرت مع بطنك اديتا شر شر شر بوووووووت .بالله عليك انت كنت

في كامل وعيك وانت بتشاهد القناة السودانية في العيد ..واحد بي حالتك دي مفروض اشاهد

افلام .... ....كر.....توووون .........وسع صدرك معانا ..وخلينا نحكي بموضوعية

خضر مساء الخير ياخى

يا زول انامالى زى البعرفك كده

بتعرف ديل:
- خالد العطشان
- محمد أحمد القديم

أرجو الإفادة سريعاً

دمت

لا ... ده كلو كوم و الفنانه الموريتانيه معلومه
بنت منو كده ما عارف كوم تانى


جارى و ود حلتى وليد طه

معقول ما نلاقيك فى العيد ؟؟
كل سنه و إنت طيب ،

الأستاذ مصدق (ود حلتى)..

كل عام وانتم بخير والاسرة بخير وعيد سعيد
دايماً بشوفك فى صلاة العصر ..وكل ما اقول اسلم عليك من بعيد ألقاك عاكف فى قراءة كتاب الله
ربنا يقبل وما تنسانا بدعواتك،،

والله امر التلفزيون بقى عجيب يا مصدق!
ويا ريت تتحفنابكركاتير يعبر عن هذه (الأزمة)

مسكينة (معلومة)

دمت ونلتقى

اكيد ياوليد بتعرفني طالما انك بتعرف الرائع الصديق خالد والعم محمد القديم

طيب انتا وقت بتعرف الناس ديل الموديك تشوف التلفزيون شنو في العيد .ديل كوتشينتم مدورة 24

ساعة

تسلم وتحياتنا للجميع