Post: #1
Title: ابداكي كيف- 4- (بسمة القمرالندي) يتبع
Author: عبدالله وداعه الامين
Date: 01-08-2006, 12:17 PM
الدنيا جد فرحانه بيك
يا زايده في الوانه لون
يا راسمة عشقك في الارض
يا طاعنة سهمك في العيون
وريني بس ابداكي كيف؟
او حتى بعدك كيف اكون؟
والدنيا غيرك ما بتسر
يا احلى من كل الجنون
ببداهه بيك وانتي الفرح
يا شايله من فرحي السكون
اتوسدك وانتي القمر
يا شاربه من بسمو الحنون
الرقه والذوق السمح
والالفة و الطبع البكون
انشوده الزمن البحن
والبهجة يا كل الشجون
يابسمة القمر الندي
وعصفوره الفرح الجميل
بالله بس نبداكي كيف؟
يا شاربه من لون الاصيل
ومعطره الكون بي بهاك
ومنوره الدنيا التشيل
الروعه من وشك براك
وتنور الناس القبيل
يتشابو يسرقو دهشتك
يا داهشة لي زمنك عديل
ورينا بس نبداكي كيف؟
يا لابسه من فرحك تقيل
ياقادلة بي فوق الارض
وانا في سماك والدنيا ليل
لو حنا يوم مطرك علي
برويني بس منك قليل
يا ستي اديني الفرح
واندفقي في اعماقي نيل
بتمدى في غيمك وانوم
ارتاح علي الشوق النبيل
عبدالله وداعه الامين
لندن 2006-01-08
|
Post: #2
Title: Re: ابداكي كيف- 4- (بسمة القمرالندي) يتبع
Author: هشام آدم
Date: 01-08-2006, 12:30 PM
Parent: #1
الأخ عبد الله وداعة
لك التحية وكل عام وأنت بألف خير
نص جميل ورقيق . . رغم البساطة التي تضرب التكلف والصنعة إلا أنه من النوع الذي يدخل ( تووش ) إلى القلوب. ولي فقط ملاحظة بسيطة على الأبيات:
( 1 )
Quote:
ببداهه بيك وانتي الفرح
يا قاطعة بي ليل الشجون
|
أعتقد أنه بحاجة إلى إعادة نظر من حيث الإيقاع حيث أن الشطر الأول من البيت مختل الإيقاعية. فالإيقاع منتظم جداً في مجمل القصيدة ما خلا هذا البيت.
( 2 )
Quote: واندفقي في اعماقي نيل
بتمدى في غيمك وانوم
|
لو قلت (واندافقي) بتصور يكون أجمل
دمت ولك التحية مرة اخرى
|
|