وتبقى الاخوة الصادقة ..أخي محمد ابراهيم قرض

الاخوة الاعزاء
هاتفته بدون استئذان طالبة منه ان يدلني عن توفر دواء معين للحبيب زهير في البلد الذي يقطنهحيث انني عجزت عن البحث عنه هنا

فما كان منه الا وتبرع بكل الجرعات المطلوبة وقام بارسالها
اقولها لك اخي محمد ادام الله عليك هذه النعمة التي يختص الله سبحانه وتعالى بها عبادة دون غيرهم
واحمد الله على مثل هذه العلاقات التي ربطتني بكثير من الاخوان فكانو سندا لنا اوقات الشدة
شكرا اقولها على لسان سهى وسارة قبلي انا وزهير

الاخت العزيزة ام سهي

هكذا هي الشخصية السودانية الطبيعية ، اخو اخوان و ساعة الجد ارجل رجال .

التحية لك قرض ، و تمنياتنا للاخ زهير بالسلامة و دوام الصحة ز

كتب حمد فتح الرحمن:

Quote: هكذا هي الشخصية السودانية الطبيعية

الحمد لله ربنا ستر و ما خزلتك يا حمد !!!
بس أم سهى زودتها مليون حبة ...
كل سنة و أنت طيب ..

Quote: هكذا هي الشخصية السودانية الطبيعية ، اخو اخوان و ساعة الجد ارجل رجال .

نعم اخي حمد
هذه هي الشخصية السودانية الاصيلة واحمد الله ان جمعتني علاقة بمثل هؤلاء النفر الكريم ..تلقاهم ساعة الكرب وكت تضيق عليك الدنيا يا حمد
ازجي شكري وعرفاني للاخ النبيل محمد المنير احمد صفي الدين الذي تبرع لنا ايضا بقيمة دواء آخر لزهير .ليس بغريب عنه فهو اخو اخوان منذ ان تعرفنا في 1987 حينما جمعنا العمل سويا في جمعية صباح لرعاية وتأهيل الاطفال المشردين واتمنى من كل قلبي ان يقدرني الله على رد جميلهم الذي يغرقني
ادام الله المودة والاخوة بننا جميعا وادام الله لهم محبتهم لفعل الخير
شكرا اخي حمد على مرورك الكريم

زهير فيصل
ياوليد ده زول تلاقيهو طوالي تحضنو دون اي عبارات ترحيب..
شخصيا عبارت الترحيب لاتكفيني حين لقائه ..
ونااااااااااااااااااااااس وحبوب ومنشرح وتألفه ..ويعرف كيف يكلمك عن حبيبتنك الماشافها وحبيباتك القادمات الانتا ذاتك ما شفتهم وعن الجيل الجميل الذي له ادواته وتصوراته..

زهير راجل صنديد وجميل ومضياف لا يحده في ذلك حد..وكم اتجلى حين اجلس اليه..


ام سهى
زوجة المشار اليه اعلاه..زميلتا بالبورد ومشاركة دايمة في سودانيات

لو صح ان توصف النساء بالرجالة فهي ارجل مرة ..
ولو صح ان وراء كل جميل مرة فهي هذه الجميلة المرحابة الهاشة ..
ام سهى يا خوانا جبل من الوفاء والطيبة والمرح .. مضيافة وزولة حبابها كده كميات ..ويغلبني الحديث فيها بصراحة .. والله تسلم عليك ام سهى دي لامن تقول المرة دي صاحبة اختك زمان..

مؤخرا ام سهى بقت مديونة لي بي خمسين ريال لانها كضبتني وصدقت من لايُصدق .

ام سهى وزهير
ربنا يحفظم ويديم بينهم المودة والريدة..
ــــــــــــــــــــــــــــــــــــــــ

حي الله محمد ابراهيم قرض

وزي ماقال اخوي حمد .. ذلك شي من خوة السوادنة وفضائل اعمالهم وليس بغريب ..وزي ما قلتي تبقى الخوة السمحة الصادقة

ويا ام سهى لا ادري لم يلازمني دوما حسسي بالتقصير كلما التقيتكم ..
الواحد تلفون ساي ما قادر يضربو ليكم ..
هذب الله حالنا وشواغل دنيانا..

كتب دكين ..

Quote: حي الله محمد ابراهيم قرض

و حياك الغمام يا دكين ..
ياخي الجماعة ديل ماسكنك مودنك وين ؟؟؟؟
هم ما عارفين إنك دكين شيخ الهمباتة نحنا
أصلنا معروفين ؟؟!!!!

حي الله محمد ابراهيم قرض ذلك الشهم والتحية لك ام سهى،،،

كتب الموج الأزرق:

Quote: قرض ذلك الشهم

صديق ...
برضو ما بعفي ليك الألف دولار الطالبك ليها من 10 سنوات
زمن الدولار كان بوبار ..
خلي البوهية و سدد قواااااام!!!!!!!!!!
كل سنة و أنت طيب ..

دكين looooooooool

Quote: تسلم عليك ام سهى دي لامن تقول المرة دي صاحبة اختك زمان..

يا متخلف
ما بتقدر تقول انو كاني صاحبتك من زمان؟؟
ولا خايف العكاكيز تجيك؟
نحن يا خوي ما عندنا عكاكيز
اقالدك واسالمك بالاحضان انا قبال زهير
لك ودي واحترامي
وبالجد مديونة ليك بي 50 ريال لكن يشهد الله مفروض يدفعهم لينا انا وانت عوض هارون

Quote: ما بتقدر تقول انو كاني صاحبتك من زمان؟؟

ابو الزوز ده انا خاتيهو لي عوزة وونستي معاهو ما كملت لسع ..

من ناحية تانية
انا لو قتا كده حاكتل الدش في يدي وبعدين سهى تجي تقول لي خالو عزيز...

نحنا رامين النظر لي قدام يا حبة ..
ما سمعتي الشاعر قال اجلي النظر يا صاحي ..
منظر سهى وهي صاحية ونايمة صاحية كالنعسان..


وما سمعتي العسل القالت :

يا ناسينا ومخربشنا
ويا مطنشنا وياماعارف يا شنو
انشالله بي رسالة بس عبرنا ..

اها ده معقولة يمرق من بين يدينا ساااااااااااااااي كده ويختفوهو عرب الحلفايا وهمج بربر ..


والخمسين ريال دي اخصميها من حق الريحة ..

الاخت ام سهي



لك الشكر و انت تقدمين للشكر جزاءه،

ود قرض اخي الذي اجبرته الانقاذ لترك مرضاه في السودان،

قابلته بعد اكثر من عشر سنوات كنت حينها طالب متوسطة ، قابلته في نجيريا في سعي لحل الالم الدارفوري،
تمنياتي له بوافر الصحة و اتمني ان يكون الجميع سودانيون دونما قبلية او عرقية تفسد طيب اخلاقنا ، شكرا لك ثانية و لسوف اهاتفه خلال اليومين القادمين انشاء الله

الأخت أم سهى / و زهير ...
أسفي الشديد لإنقطاعي مدة عن النت بسبب
الشديد القوي ...

و حقيقة الأمر ، رغما عن لساني الطويل ،
أجد نفسي لأول مرة في التاريخ ، و الخجل قد بللني من الأخمص
لصلعةالرأس .. بل أنني خفت أن أمشي في الشارع حتى لا يرى
الناس الموية كابة من كل حدب و صوب ، فيظنون بي الظنون ،
و هذا آخر شئ أتمناه في هذه الغربة الموحشة !!!

ما هذا يا أم سهى ؟؟؟؟
ويحك يا أم سهى ؟؟؟؟؟؟؟؟؟
بصراحة كده أنا زعلان جد جد لأنه ما كان في داعي
لهذا البوست ... و كمان على العلن ؟؟؟؟؟؟؟؟؟؟؟
أنا أصلي عملت شنو ؟؟؟؟ بالغتي يا أم سهى .. بالغتي عدييييييل ..
أنا أصلا و في الأصل صيدلي ... و لو غلبني أجيب الدوا تكون فايدة
قرايتي شنو ؟؟؟؟؟؟؟ ما ليك حق يا أم سهى ...

Quote: و لو غلبني أجيب الدوا تكون فايدة قرايتي شنو ؟؟؟؟؟؟؟

قرض يا لذيذ كل سنة وأنت طيب

الاخت ام سهي

سلام تحايا عطرة، اتدراكا لما يمكن ان يكون خلط عفوي في الاسماء
ود قرض الذي اعنيه طبيب مقيم بلندن ، و علي كل حال فكلهم اخوتي و له تقديري الفائق
انور

كتب أنور آدم:

Quote: سلام تحايا عطرة، اتدراكا لما يمكن ان يكون خلط عفوي في الاسماء ود قرض الذي اعنيه طبيب مقيم بلندن ، و علي كل حال فكلهم اخوتي

أنور ..
و لا يهمك ..
يبدو أنه قد تشابه عليك القرض !!!
طبعا ياخي كلنا أخوان و لك ودي و كل
عام و أنت بخير ...

كتب بدري:

Quote: قرض يا لذيذ كل سنة وأنت طيب

بطل مجاملة يا بدري ..
شفت في حياتك قرض لذيذ ؟؟؟؟
القرض ياخي أمرًَُ من الصبر ذاتو !!!!!
لكن برضه بقول ليك كل عام و أنت بخير !!!

الاخ قرض
لك تحياتي وكل سن وانت بالف خير
كيف لي بالله عليك ان لا أشكرك؟؟ هذا اقل من الواجب

اقولها مرة تانية والف مرة هذا موقف نبيل منك عزيزي قرض ان تقف مع اخ لك لم تلده امك هذا الموقف الانساني
اعزائي المتداخلين
ببركة هذه الايام المباركة ادعو لكم من كل قلبي بالصحة والعافية و(الماهية الكافية) وكل سنة وانتو طيبيب
وياقرض بطل التواضع انا ما عملت الا الواجب واراه بسيطا في حق رجل بقامة امة