Post: #1
Title: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-16-2005, 06:43 AM
Parent: #0
(1)
درقة الرغوة كم دمرت ناس ومساكن
كم ذليتي بعد العزه شامخ وماكن
كم صبحت قلبا حي متلج وراكن
وكم صبحت عمران ذي مباني سواكن
(2)
الغني فيك يوسع ولي الزيادة يكابس
في اللين يخضر وقلبه طاري اليابس
بسراع تدي ضهرك ويبقي وجهك عابس
وحالا ينقلب عريان بعد مو لابس
(3)
خيرك ما يدوم يالبهرج الغشاشة
يا مطر المنية الديمه سايقة رشاشه
كم قصرا جميل انواره تضوي بشاشه
دمرتيه اصبح فاقد المقشاشه
(4)
عمارك لي خراب والفرحه فيك لي كربه
اسمك من الست الفانيه دار الغربه
اولك المعيشه جري وتعب في هربه
والثانيه الامل والثالثه دفن التربه
(5)
كم حطمت راجلا في مشيه مسلق
صبحتيه بي حبل النكر النكر متحلق
دربك لي البصاحبك بي عجل بيزلق
يا صقر القبور الفوقنا ديمه محلق
(6)
تعصري علي البريدك وتقربي تانسيه
يترك طاعة الخالق يكون ناسيه
بي توب سحرك البعمي القلب تكسيه
يصبح محتضر في تربته تمسيه
(7)
سرورك ما بتم تابعه ديمه الفجعه
ظاهرك لينا سكر الا طعمك وجعه
كم طفشت مرتاح قلبو مابي النجعه
روحه تشابي وانت قطعت خط الرجعه
(8 )
شمس حسنك مخنقه ما بيدوم اشراقه
يالفيه شليل عضم اب قبيح براقه
كم الليهو منزل في الجنان وراق
خنت اسياده هجو ولجو بالفراقه
(9)
فيك الحي يامل والفرح يبداله
ترقصي ليك يبشر يقتكر رايداله
للشبال يميل ترميه بالابداله
تتني رقبته بالخاربه وتكوسي بداله
(10)
اوصيك نفسي اوصيك الحيا وما فيها
شق ود الاحد بيت الشبر صافيها
لي متين تقيفي ونار الضلال تطفييها
تمسكي سكه الشافوها حاجه تقيها
(11)
اتغشينا في حبك لبسنا عبايه
يا مويه الرهاب الما ملت كبايه
عجيب امرك الانحن غبايه
عاشقين الجمال في لمعه الحربايه
(12)
تبقالك حنينه تمتعك بسماره
ترقد في امانها وتنهمك في عماره
باكر تبقي ليك حنظل تشوفو دماره
تسحب منك النعمه وتدق مسماره
(13)
دي الغشاشه دي الغداره دي العقاره
كم قلبت زغاريت عرس بي نقاره
اعلنها بي الحرب قبال تشن الغاره
وقبل الروح تقرقر تبقي في الغرقاره
(14)
يا سامع دبيب النمل جوف العاتمه
ياكاشف الخفايا الفي الضمائر كاتمه
بي جاه سيد الرسل الكرام ابو فاطمه
لطفك بي عكير يوم الدفن والخاتمه
ولطفك بعنيده يوم الدفن والخاتمه
|
Post: #2
Title: Re: درقـــــة الرغوه(الدنيـــا) .... لك الرحمه ياعكير الدامر
Author: بخاري بشير
Date: 11-16-2005, 07:17 AM
Parent: #1
الفاضلة جدا عنيدة..تحياتي
والله إنه اختيار عظيم منك أن تتحفينا بهذه الدرر من شاعر قومي عظيم مثل عكير الدامر ,الذي سار بشعره الركبان ..وكان شعرا ملئ بالحكم والعظات وجاء بمفردات دارجة يتداولها الناس ,والمعروف عن عكير الدامر بين شعراء المسدار أو الرباعيات ,كما يحلو للبعض أن يسموها, أنه شاعر يمتاز بالقدرة على التعبير وقوة الوصف وهي سمة قل أن نجدها بين الكثيرين.
وفوق هذا وذاك كان لعكير الدامر تأثيرا كبيرا على الرأي العام المحلي بما يطرحه من آراء وأفكار ..حيث كان معتزا بأنصاريته وانتمائه الى الأنصار ,وكان صديقا للزعيم الراحل عبد الرحمن المهدي ,وفيه كتب أشعار من الرباعيات ظلت باقية الى يومنا هذا من روعتها وقوة تعبيرها.
رحم الله الزعيم عبد الرحمن المهدي ,,ورحم الله المبدع عكير الدامر فقد ترك إرثا لن تمحوه الأيام..وشكرا ليك كتير الرائعة عنيدة.
|
Post: #3
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-16-2005, 12:05 PM
Parent: #2
المقدر جدا" بخاري بشير اضافتك جد جميله
واسعدني مرورك وتعقيبك علي البوست
وانشالله حاواصل في ( حكم ) عكير له الرحمه
عكير قال :
سياسة الناس يكتبو ولجريده يودو
اما سياستي انا السيف البزين حدو
الحر في القتال دايما بقدم يدو
عود الطيب بلا النار مابيفوح ندو
|
Post: #4
Title: Re: درقـــــة الرغوه(الدنيـــا) .... لك الرحمه ياعكير الدامر
Author: القلب النابض
Date: 11-16-2005, 12:14 PM
Parent: #3
| Quote: ولطفك بعنيده يوم الدفن والخاتمه |
آمين يارب
ومعاها صاحبتها القلب النابض يارب.
اشتاق اليك كخبيز العيد
وملاح السبروق والخدرة
والقراصة بي المفروووووكة
اشتاق اليك
عنييييدة
|
Post: #5
Title: Re: درقـــــة الرغوه(الدنيـــا) .... لك الرحمه ياعكير الدامر
Author: nashaat elemam
Date: 11-16-2005, 12:22 PM
Parent: #1
الاخت عنيدة
امتعتنا والله بهذه الحكم الجميلة التي تناولها عكير الدامر.. واتحفنا الأستاذ الباتع بخاري بشير بفيض من سيرة الرجل, مما اضفى على البوست نكهة توثيقية محببة..
لك الود على هذا السبر الجميل في باهر القول الذي نستفيد منه كثيراً.. وذلك لما يحمله من عبر وحكم ادخرها الرجل -عكير- من تجارب كثيرة.. وها هو يعطينا خلاصة هذه التجارب في قوالب شعرية رصينة..
|
Post: #8
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-16-2005, 02:57 PM
Parent: #5
ود الامام تسلم انشالله
يقال انه عكير اصلا من البجا
وصل الاسم ( اوكير ) ونسبة للنشأه نسب للدامر
كحال المثيرين من مبدعي بلادي
واهديك كلام عكير:
الظاهر عيان مابدور بيان ودليل
ياباقة الزهور الفاح نسيما عليل
ياروح الثقافه وقبلت التهليل
مقامكم نجمه فوق للزهرة والاكليل
|
Post: #6
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-16-2005, 02:47 PM
Parent: #1
ياقلب والله مشتاقه ليكي
عارفه عكير دا عنده قصيده من اطول القصائد
بصف فيها رحلته من بيته الي ان يصل الحجاز
وفيها قال عكير
عند ربنا انقطعت خيوط اللعبه
وبقت النيه في البيت المسمي الكعبه
سواها اب عروض عين البمل الصعبه
رحمان فرة القلب الملان بالرعبه
اهديكي هذه
http://drmoiz.com/phpBB2/viewtopic.php?t=11220&highlight=[/B]
|
Post: #7
Title: Re: درقـــــة الرغوه(الدنيـــا) .... لك الرحمه ياعكير الدامر
Author: محمد عبدالرحمن
Date: 11-16-2005, 02:56 PM
Parent: #6
عنيدة
تحياتى ...
جميل جدا هذا البوست ..فالتوثيق لشاعر مثل
عكير الدامر رحمه الله عمل مطلوب بل ضرورى
جدا ، فقد اشتهر شعره بالحكمة وسهولة العبارة
وصعوبتها فى نفس الوقت ..
سأكون متابع لهذا البوست ..وانتظر اسهام
المهندس عبدالرحمن العجيل ولنا مهدى فهما
قادرين على الاضافة والاثراء ...اتمنى ان ينضما
لهذا البوست للتوثيق للشاعر عكير الدامر ...
ودى ..
|
Post: #9
Title: Re: درقـــــة الرغوه(الدنيـــا) .... لك الرحمه ياعكير الدامر
Author: القلب النابض
Date: 11-16-2005, 04:35 PM
عنيدة الرهيبة
ايتمعت الى المدحة مانت رائعة بمعنى الكلمة
سافرت روحي هائمة في رحاب الحبيب المصطفي صلى الله عليه وسلم استمعت اليها مرتين ورا بعض , لك الشكر
والله يحججنا مع بعض يارب .
نزورو وبالحب نروى ظمأ أرواحنا المشتاقة!!
نسيت ان اقول لك في هذا الشعر حكم تذكرني بشعر علي بن ابي طالب.
وبهذه المناسبة من له دايوان علي بن ابي طالب يخبرني.
|
Post: #10
Title: Re: درقـــــة الرغوه(الدنيـــا) .... لك الرحمه ياعكير الدامر
Author: almohndis
Date: 11-16-2005, 05:26 PM
Parent: #1
يا سلااااااام
يا ربي دى
عنيدة البعرفها
ولا عنيدة تانية
|
Post: #11
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-17-2005, 02:40 AM
Parent: #1
محمد عبدالرحمن اسعدتني مشاركتك
ويسرني انك من المهتمين ومتابع وانتظر قدوم من زكرت
وعكير عنده مايسمي بقضارفيات ودي القصايد الاتقالت
في رحلة القضارف
واليك جزء من قضارفيات:
قطر الجن بلا صبية الخلا المزعوره
رامح كالرؤوم خارج المخيفه وعوره
في العظشان وقف
جات ريله ناديه شعوره
انفاس الخيال اتملكني شعوره
مره اشيل يدي فوق راسي ثم نحوري
ركاب القطر مانزلو عامو بحوري
لو علمو الاصابني من الملاك الحوري
ماكان ياحسن اكلو الحمام في الحوري
تصحيح
كم حطمت راجلا في مشيه مشلق
صبحتيه بي حبل النكر متحلق
دربك لي البصاحبك بي عجل بيزلق
يا صقر القبور الفوقنا ديمه محلق
ودي
|
Post: #12
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-17-2005, 02:58 AM
Parent: #1
ياقلب
من شعر عكير وهو في رحلته للحجاز
(انشاااااالله نكون مع بعض)
ببداها صباح يوم السفر وتحركو من بيته زي ماقلت
ومرورا بشارع المعونه الي ان يصل الجمرك والتفتيش و....
الي ان يصل البيت الحرام
زاكرا: كل الشعائر ..الصفا والمروه ومكه
وحراء وعرفات ومزدلفه ومني ورمي الجمرات ومن ثم
العوده الي مكه وطواف الافاضه بجد ماخلي شي
وبقول:
اهلا" كوكب الدين قبلة التبجيل
نعمة الجاها مشتاق لي الزياره عجيل
دي الكعبه الحماها المولي دون تأجيل
هلك اعداها رش بي حجاره من سجيل
بطلبك لديوان لعلي كرم الله وجهه
زكرتيني مدحة(الكرار علي)
والله مدحة عجييييبه انشالله تكوني سمعتيها
(بمدح باب مدينة العلم والاسرار
النصر الشريعه الليث علي الكرار.... الخ)
لو عندك رسليها لي
تخريمه اساسيه
الشوق فاض بي وحيرني يابنيه
تعالي لي في البرايفت حاضر
|
Post: #13
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-17-2005, 03:14 AM
Parent: #1
المهندس ياعزيز ياها عنيده زااااااااتا
وعكير كمان قال
بي حكم الاله راضي وباليقين شبعان
وبي القسمه القبيل مقسومه لي قنعان
مابقيف غير شبية الفي الزنوب طمعان
شبيه الفاجر النمرود بني كنعان
|
Post: #15
Title: Re: درقـــــة الرغوه(الدنيـــا) .... لك الرحمه ياعكير الدامر
Author: فيصل نوبي
Date: 11-17-2005, 03:39 AM
Parent: #13
عنودة
واصلي يا حبيبة
|
Post: #14
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-17-2005, 03:26 AM
Parent: #1
المقدر محمد عبدالرحمن
في معاني كلمات كتيييييير بجد مابعرفا
سنتين ويدووووب عرفت القليل
والباقي بعتمد علي معني البيت كلو
وبفسر الباقي بمعرفتي
لو ساعدتونا بالمعاني
تكونو هونتو علي الكتيرين لاني
بجد بلقي صعوبه في العاميه(الخاااااالص ) دي
برغم حبي لحكم عكير وشعرو وغيرو من شعراء الباديه
وبكونو في امثالي كتاااار جدا" بس ماافصحو
تحاياي النواضر
|
Post: #16
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-17-2005, 04:19 AM
Parent: #1
انت جيت يانوبي
ماتبتعد
ثمحك
ؤبث
|
Post: #17
Title: Re: درقـــــة الرغوه(الدنيـــا) .... لك الرحمه ياعكير الدامر
Author: فيصل نوبي
Date: 11-17-2005, 04:26 AM
Parent: #16
عنودة تروتسكية
|
Post: #21
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 03-19-2006, 10:55 AM
Parent: #16
احمد عثمان وين ليك زمان
الطيب بشير ظاااتو بهنا
حبااااااااااابك يالاخو
بعتزر عن التاخير لكن ...
اتفضلو
البتقول صباح خير تلقاه دبيب وعقارب...عكير 2
|
Post: #18
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 11-17-2005, 05:12 AM
Parent: #1
معتز اليومين دي عامل فيها مشغول
لكن الجمله دي حقتي ماحقتو
طبعا يانوبي عكير من اجمل اشعارو أغنيه
يامولادي ... يامولاي اه من غلبي
من النار وحرقت قلبي ...
وفيها بقول:
اخدر ليه ضل فوقو المحاسن شرن
وافلج فاطرو زي برق السواري الكرن
يتقسم مقاطع في المشي ويتحرن
زي فرخ القطا الاماتو ركن وفرن
|
Post: #19
Title: Re: درقـــــة الرغوه(الدنيـــا) .... لك الرحمه ياعكير الدامر
Author: Ahmed Mohammed Osman
Date: 12-28-2005, 02:46 AM
Parent: #1
الشاعر عكير الدامر من المتمكنين في الوصف القوي..بس المفردات البستخدمها
بتكون مرات شوية كدا صعبة...
لكن برضو شاعر يستحق ان يوثق له..
تسلمي يا عنيدة ..
من اقواله:
قليعات الرزق صبحن تعولهن ماطرة...
محرين طلق ريحة الفلير والباترة...
كان دورتهن فوق اب محاجمن قاطرة...
تلقي العافية من غير بنسلين ودكاترة...
|
Post: #20
Title: Re: درقـــــة الرغوه(الدنيـــا) .... لك الرحمه ياعكير الدامر
Author: الطيب بشير
Date: 12-28-2005, 07:55 AM
Parent: #1
سلامات يا عنيدة
رجاء شديد الإلحاف أن تنعمي علينا بالمزيد من عكير الدامر
شاكرين لك روعة بوسـتك
و له ، مع الدعاء بالرحمة ، إعتراف بأن ـ درقـة الرغـوة ـ وحدها تكفي لتتويجه إمبراطورآ للدوبيت.
|
Post: #22
Title: Re: درقـــــة الرغوه(الدنيـــا) .... لك الرحمه ياعكير الدامر
Author: محمد بهنس
Date: 03-19-2006, 12:48 PM
Parent: #20
"لو ايدينا من الملكه فيك تتملخ
السما ينتكي و..جلد النمل يتسلخ"
اوكير
|
Post: #23
Title: Re: درقـــــة الرغوه(الدنيـــا) .... لك الرحمه ياعكير الدامر
Author: Soumeta
Date: 03-19-2006, 04:36 PM
Parent: #1
لولا ادمعي من ناري كنت حرقت،،
و لولا ناري من كترة دموعي غرقت،،
إلهي النبي،،
عنود،،
ؤبث،،
|
Post: #24
Title: Re: درقـــــة الرغوه(الدنيـــا) .... لك الرحمه ياعكير الدامر
Author: عنيده
Date: 03-19-2006, 05:34 PM
Parent: #1
بهنس شكرا" علي الطله
سوميتااااااااااااااااا
سعاده
1000
ؤبث
|
|