هل وصلنا هذه الدرجة من الجهل؟؟؟؟

هل وصلنا هذه الدرجة من الجهل؟؟؟؟


04-05-2003, 09:20 PM


  » http://sudaneseonline.com/cgi-bin/sdb/2bb.cgi?seq=msg&board=5&msg=1049574001&rn=0


Post: #1
Title: هل وصلنا هذه الدرجة من الجهل؟؟؟؟
Author: جدو
Date: 04-05-2003, 09:20 PM

سمعت صباح اليوم وانا استقل الحافلة الاستاذ عبد المطلب الفحل يسأل احدي المستمعات في برنامجه الاذاعي (علي الخط) عن معنى كلمة اميرة (وهذا اسمها..بدون تشهير)بالانجليزية واتغظت جدا من السؤال وتساءلت ما هذه الاسئلة السخيفة التي لا تقيس اي ثقافة او معلومات ولكن غيظي تحول الى دهشة عارمة ثم الى احباط مريع عندما فوجئت بها لم تعرف الاجابة !!!!!!! واخذت اطنطن من الزعل الى ان اتلفت الي ركاب الحافلة .. والادهى وامر انه اخذ يسألها عن اخبار الحرب والعراق فتصورت انه سيسألها عن اسم الضابط الذي فجر نفسه ولكنه سألها عن معنى كلمة سيارة مفخخة فأجابت بأن معناها سيارة مظللة ولم ادهش هذه المرة (يا جماعة هذا الكلام ليس فيه اي نوع من المزاح او الكاميرا الخفية ) نجي للمهم هذه المستمعة ذكرت في بداية المكالمة انها خريجة جامعة وجامعة كبيرة (ومؤممة ان جاز التعبير) فبالله عليكم اي جامعة هذه التي تخرج مثل هؤلاء وماذا درست في الجامعة .. وهذا ليس المثال الوحيد علي اضمحلال الاهتمامات الثقافية في اوساط الشباب ,هناك واحدة سألوها في نفس البرنامج عن النبي الذي سخر له الحديد ,طلبت خيارات وبعد الخيارات ردت قائلة هود..
بالله يا جماعة موش حاجة تفرس عديييييييييييل كدة..
يا اخواناواحد يطمني (ان شاء الله بالكضب) انه الجامعات لسة بخير وانه الخريج السوداني لسه بخير...

Post: #2
Title: Re: هل وصلنا هذه الدرجة من الجهل؟؟؟؟
Author: tariq
Date: 04-06-2003, 05:46 AM
Parent: #1

جدو يا اخوى لا بنطمنمك و لا حاجة يا هو ده الوضع ، رضينا ام ابينا


بعدين لا نعيب الجامعات وحدها فالعيب فينا

ونعيب زماننا والعيب فينا
وما لزماننا عيبو سوانا

Post: #3
Title: Re: هل وصلنا هذه الدرجة من الجهل؟؟؟؟
Author: مبيوع
Date: 04-06-2003, 07:08 AM
Parent: #1

ما تستغرب يا جدو
فانت فى سودان الانقاذ

Post: #4
Title: Re: هل وصلنا هذه الدرجة من الجهل؟؟؟؟
Author: ود عقاب
Date: 04-06-2003, 07:18 AM
Parent: #1

جدو تحيه وحترام
والله انا دايره لمه فى الراجل دا من زمان
اولا وقت ازاعه البرامج مافى رجال فى البيت يعنى خاصه بالنساء طريقه حديثه مع النساء ونوع الاسله اسله كلها ارتجاليه وما مفهوم القصد منها الا ونسه نسوان ساكت
تانى ترجع للموضوع وتدنى ثقافه الخريج وقرايه الزمن دا التى لايوجد فيها تطور علمى ولاثقافى
يعنى الواحد يقد كم شهروفى النهايه يقرا الملخص او يصور من زميل ويدخل الامتحان وينج والسلام لا دخول مكتبه ولا وجع راس
لنا عوده
ودعقاب

Post: #5
Title: Re: هل وصلنا هذه الدرجة من الجهل؟؟؟؟
Author: جدو
Date: 04-06-2003, 07:38 AM
Parent: #4

طارق
مبيوع
ود عقاب
شكرا على المداخلة ,وتسلموا ,الحمد لله زول رد وعبر الموضوع. امس قاعد لغاية الساعة 12 ما في زول قال حاجة ..
يا جماعة والله الموضوع دا جد خطير. الاهتمامات بقت سطحية جدا والواحد لو ناقشته في اي موضوع تلقاه قاعد لاترال .حاجة تجيب الاحباط ووجع الدواخل .. لكن تسال الواحد عن آخر شريط لفرفور او آخر حفلة لنادر خضر ينضم ليك عنها لامن تقول كفى . انا لست ضد الغناء والفن لكن يكون جزء من الثقافة العامة (وأي فن).
ودمتم
جـــــــــدو

Post: #6
Title: Re: هل وصلنا هذه الدرجة من الجهل؟؟؟؟
Author: doma
Date: 04-06-2003, 08:24 AM
Parent: #5

يا جدوالاوجاع كتيره اها قول واحد انا ذاتي سياره مفخخه دي ماعرفتها بعرف سياره فاخره او فخمه فارهةاو مفجخه لكين مفخخه دي مامرت علي

Post: #7
Title: Re: هل وصلنا هذه الدرجة من الجهل؟؟؟؟
Author: Alsawi
Date: 04-06-2003, 08:38 AM
Parent: #1

ولسع لمن تشوف معرفتهم في مجال تخصصهم الذي نالوا فيه درجات عليا فوق جامعية

وما ح نطمنك ابدا لان الوضع اسوا كمان من كده

Post: #8
Title: Re: هل وصلنا هذه الدرجة من الجهل؟؟؟؟
Author: ابو فاطمه
Date: 04-06-2003, 08:40 AM
Parent: #1

الاخ جدو
تحياتي
لا تستغرب اطلاقاً مما تسمع وتشاهد
الفرق بين الجامعات زماااااااااان والجامعات في الوقت الحاضر يمكن تلخيصه في
الجامعات قديماً كانت تركز على النوعيه والان على الكميه

Post: #9
Title: Re: هل وصلنا هذه الدرجة من الجهل؟؟؟؟
Author: جدو
Date: 04-06-2003, 12:56 PM
Parent: #8

الاعزاء
دوما
الصاوي
ابو فاطمة
مشكورين على التفاعل..
والحقيقة لسة عندي امل انو زول يطمني ..لو مافي زول طمني براي بطمن نفسي .. عارف يا جدو الحكاية دي ما في كل الجامعات نحن قبل كم سنة عملنا اسبوع ثقافي وكان ناجح جدا .. وكان عندنا ليالي ادبية وامسيات شعرية والكلام دة في كلية الطب فأكيد من باب اولى انه بقية الكليات الادبية عندها الحاجات دي كتيرة..
والله كتر خيرك يا جدو طمنتني
جــــــدو

Post: #10
Title: Re: هل وصلنا هذه الدرجة من الجهل؟؟؟؟
Author: ba7ar
Date: 04-06-2003, 04:30 PM
Parent: #9

جدو ما تطمن نفسك ساي
الحكاية اكبر حتي من الكلام القلتو ده
بعدين المعلومات الما عرفتها البت دي - اذا اعتبرنا انها معلومات عامة - دي معلومات ما ليها علاقة بالمستوي الجامعي .. يعني ابتدائي وبالكتير متوسطة ..ناهيك عن الثانوي والجامعة
الله يساعدك علي الاحباط ... ويساعدنا

Post: #11
Title: Re: هل وصلنا هذه الدرجة من الجهل؟؟؟؟
Author: Ahmed satoor
Date: 04-06-2003, 09:18 PM
Parent: #10

ما تستغرب يا اخ جدو ، إلهام شاهين هذه الممثلة القديرة سألوها فى برنامج من سيربح المليون - اين تقع ميتاء الحديدة ؟ سألت الجمهور وإتصلت بصديق وحرقت كل الاوراق اللى عندها وطلعت فى النهاية بالف ريال.ولى قدام.

Post: #16
Title: Re: هل وصلنا هذه الدرجة من الجهل؟؟؟؟
Author: doma
Date: 04-07-2003, 05:13 AM
Parent: #10

لووول يا بحر شكرا ليك يعني انا مستوي ابتدائي لكين طلعت عارفه كلمه اميره بالانجليزي بالمناسبه انا في كلمات بتستعملها بتنا شيري ابدا ما بفهمها . والله طبعا انا بعرف كلمةفخ اللي هو الشرك او الكمين بلغه العساكر لكين علاقه الشرك بالعربيه ابدا ما فهمتها الا بارك الله في اخوي كانتونا قال لي يعني عربيه ملغومه كشرك للعدو

Post: #12
Title: Re: هل وصلنا هذه الدرجة من الجهل؟؟؟؟
Author: خضر حسين
Date: 04-06-2003, 09:50 PM
Parent: #1

.يا جدو
كيف نزع الشوك وننتظر أن نجنى العنب .. التدهور الثقافى البتكلم عنو دا شئ عام .. عليك الله أقرأ صحفنا السودانية وحا تلاقى اجابة لأسئلتك .. وحقو ما نلوم الشباب لوحدهم .. بل يجب أن نسأل عمن تسبب فى ذلك .. ولى عودة لمواصلة النقاش .. دى بس بداية

Post: #13
Title: Re: هل وصلنا هذه الدرجة من الجهل؟؟؟؟
Author: Hozy
Date: 04-06-2003, 10:08 PM
Parent: #1

اااااااااااااااااااااي
شكله وصلنا


الناس ماشه لقدام
واحنا جاريين جري شديد لورا
من كل النواحي

Post: #14
Title: Re: هل وصلنا هذه الدرجة من الجهل؟؟؟؟
Author: خضر حسين
Date: 04-06-2003, 10:32 PM
Parent: #1

والله دى ما شكلة يا هوزى .. حقيقة الموضوع المطروح للنقاش موضوع جيد .. لكن أنا داير يتم نقاشو بعمق عشان نقدر نحدد موضع العلة .. مع شكرى وتقديرى للاخ جدو على تناول موضوع مهم زى دا بالنقاش

Post: #15
Title: Re: هل وصلنا هذه الدرجة من الجهل؟؟؟؟
Author: xspice13
Date: 04-06-2003, 10:58 PM
Parent: #1

الإجابة تفرض نفسها وبقوة

من منا قرأ كتاب وهم بتلخيصه

خليك من الكتاب الذي يعني الذهاب إلي مكتبة عامة والإشتراك واستلاف الكتاب إلخ

الإنترنت القدامنا دي
بنقعد نقلب في الصفحات من جرائد واخبار وهي اكبر بحر يلج بالمعلومات وشتي علوم الدنيا
وبكل اللغات





وإذا قلنا الحكومة والكيزان هم السبب فنحن كدا بنكضب علي روحنا

قالها طارق في بداية البوست

نعيب زماننا والعيب فينا وما لزماننا عيب سوانا

...

Post: #17
Title: Re: هل وصلنا هذه الدرجة من الجهل؟؟؟؟
Author: PLAYER
Date: 04-07-2003, 08:20 AM
Parent: #15

جدو
هناك فرق بين الدراسة الاكاديمية والثقافة العامة
حيث الاولى توجد فى المدارس والجامعات حيث يشرف عليه الحكومة ويحتاج لمدرس او محاضر ولكن الثانية
توجد في اى مكان ولا يحتاج الا لرغبتك
لذلك من الظلم ان نلقى اللوم على الحكومة
وليس من العدل ان نلقى بالمسئولية على الجامعة
اذا كان حضرتها لا تقرأ في المجلات ان صفحة الازياء والابراج
ولا تتابع الاذاعة الا فى الاعياد
ولا تشاهد في التلفاز الا المسلسلات
وفي الانترنت مكانها الشات والمسنجرات
فلا
تشغل بالك كثيرآ لان هى المسئولة عن تنمية ثقافتها ومعلوماتها العامة

Post: #18
Title: Re: هل وصلنا هذه الدرجة من الجهل؟؟؟؟
Author: جدو
Date: 04-07-2003, 05:04 PM
Parent: #17

الاعزاء
بحر
احمد ساطور
خضر حسين
بلاير (عشان ما تتلخبط مع توني بلير الكلب)
لكم التحية
مشكورين على التفاعل
وزي ماقلت يا خضر الموضوع محتاج بحث ودراسة
ودمتم
جدو

Post: #19
Title: Re: هل وصلنا هذه الدرجة من الجهل؟؟؟؟
Author: Rose
Date: 04-07-2003, 09:51 PM
Parent: #1

للأسف يا جدو
الوضع ما مطمئن أبدا والأمور تسير من السيء إلى الأسوأ . وكما ذكر بعض الأخوة المسألة ليست مسألة مستوى أكاديمي بل هي معضلة ثقافة عامة واطلاع ، و أصبحت الشهادة الجامعية مجرد مظهر شكلي يخفي وراءه الكثير من الجهل حتى بأبسط أمور الثقافة العامة. يعني ممكن تسألأ الواحد أين يقع البلد الفلاني يقول ليك والله أنا كنت علمي وما لي في الجغرافيا والعكس صحيح أيضا بالنسبة للعلميين .
على ذكر من سيربح المليون أذكر انه في إحدى الحلقات كان هنالك متسابق كاد أن يصل إلى المليون وكان على درجة عالية من الثقافة والاطلاع ، ولكنه لا يحمل أي شهادت بل كان يعمل خياطا للملابس الرجالية ، يعني لا جامعي ولا يحزنون .

شكرا جدو

Post: #20
Title: Re: هل وصلنا هذه الدرجة من الجهل؟؟؟؟
Author: SAMIR IBRAHIM
Date: 04-08-2003, 00:05 AM
Parent: #19

يخوانا ما تلوموا الطالبه .....اميره المسكينه...لقد بدأت تلك المصيبه عندما كتب للرئيس جعفر النميري خطبه علي ان يقرأها هو كما كان شائعا في عهده...لقد كانت الجمله واننا هنا نشكر ونكرم المواطن علي حسن سلوكه.....اي الكاتب يشيد بسلوك المواطن....وعندما قرأها نميري قال واننا نشكر ونكرم المواطن علي حسن سلوكه وجلس يتلفت لحضور المواطن لمنبر الخطبه كي يكرمه...وللاسف الشديد لمن يكن هناك هذا المواطن علي او ابيه حسن او جده سلوكه بفتح السين ..وقد كان الموقف محرج للرئيس وانقطع الارسال......وكانت هذه اول نكبه في للسودان

يخوانا اتمني تكونوا في علي حسن سلوكه ,,,,ما مرت عليكم كما مرت علي النميري واميره

Post: #21
Title: Re: هل وصلنا هذه الدرجة من الجهل؟؟؟؟
Author: beko
Date: 04-08-2003, 00:44 AM
Parent: #1

والله يا جدو
دي مصيبه لكن اميره ما عندها ذنب
وليست اميره وحدها الان
في غيرره كتير
من حظ الجيل الزمان اتلقو تعليم جيد
لكن جيل اليوم من امثال اميره
ضحيه لي حكومة الانقاز التي اوصلت التعليم الي هذا المستوي
لكن نقول شنو ربنا يستر ويجازي اللي كان السبب

Post: #22
Title: Re: هل وصلنا هذه الدرجة من الجهل؟؟؟؟
Author: جدو
Date: 04-09-2003, 09:55 PM
Parent: #21

الاعزاء
هوزي
روز
سامر ابراهيم
بيكو
شكرا على المداخلة
والله لو كان الجهل رجلا لقتلته بسن قلمي هذا
ياجماعة والله القصة طويلةوالموضوع جد خطير .ان الجهل يحاصر امتنا هو والضلعان الاخران للمثلث المرعب (الجهل ,الفقر ,المرض) والناظر الى الاجيال الناشئة يلاحظ انتشار ثقافة البلاي استيشن والحفلات والسهرات والتش تش تش مع اختفاء تام لاي دور تربوي وقد انتشرت هذه الظاهرةمنذ ان تحولت وزارة التربية والتعليم الى وزارة التعليم (ساي بدون تربية) وانتشار ما يسمي بالتعليم غير الحكومي ,, ولماذا غير حكومي ؟؟هل عجزت الحكومة ان تؤدي دورها المنوط بها تجاه التعليم ؟؟؟؟؟ والتعليم غير الحكومي هذا (للذين لم يحضروا الىالسودان منذ مدة)هوعبارة عن بيت او شقة في عمارة (ما ضروري شقة كبيرة) امامها لافتة انيقة مكتوب عليها مدرسة فلان العلاني وقد انتشرت هذه الشقق(المدارس) كالنبت الشيطاني او الورم السرطاني
ولم لا فهو مصدر ربح سريع وسهل ومضمون100 % فكل ما عليك بعد ان تملا وسائل الاعلان باعلاناتك الا ان تنتظر اولياء الامور وهم يهرعون بابنائهم يحدوهم الامل بان يحصل اولادهم اعلى الدرجات ,ثم يفيضون على خزانتك بما في جيوبهم.....
اين حوش المدرسة الواسع وجرس الصباح والطابور والبرنامج الصباحي
الذي تفتحت عليه اعيننا وكان لنا بذرة حب الاطلاع والمناقشة والقراءة؟؟؟
اين حصص التربية البدنية والفنيةو حصص التاريخ وحصة القصص التي كنا ننتظرها بفارغ الصبر ونتحلق حول الاستاذ وهو يحكي لنا قصص من سبقونا لنستقي منها العبر؟؟.... اين؟ واين؟؟؟ واين؟؟؟
ولنا عودة
جـــــــــــدو