مجـلـس الشـلـــــوخ الامــــريكـي

نفيسة يا اختي عليكي الله ناوليني الكُمشة ديك...... اها يا سعاد قلتي لي كيفين؟...... حسي العراق دا.... الضرب والدق دا لمتين يا اختي......بري بري...... الامريكان ديل شكيتهم علي الا نام ولا اكل طعام... يا اختي من يوم مجلس شلوخهم دا اجتمع وقال لصدام.... تمرق الشي الداسيهو كلو....وانا قلبي اكلني.....علا يا سعاد اختي قالو مجلس الشلوخ دا مسوينو مخصوص.... عشان أي حيكومة.تفرفر..... يلمو فيها يشلخوها ويسجموها ويرمدوها....عاد حيكومتنا فوقها سيدي الحسن....وربنا يشدههم منها...ويشغلهم في نفوسهم. والله زول .زي صدام دا يفرفر جاي والله جاي يلمو فيهو ويشلخوهو...يا يمة ديل شكيتهم علي الله...انشاء ربنا يحفضنا . ويحفض صداماتنا...ونحن يشلخو لينا شنو؟ نحن مشلخين خلقه.....لكن يا سعاد ناسنا ديل ما يسوا مجلس شلوخ زي الامريكان وزي الانكليز....والله يا اختي بري بري..... يقومو يسو مجلس طهارة بدل مجلس شلوخ. يلمو في الناس يطهروهم لا يفرزو مرا ولا راجل....ولا يميزو لا شافع ولا كبير...يا اختي هوي ما نجيب سيرة الطهارة دي.... ربنا بيحاسبنا.... انتي ماكي عارفة الطهارة من الايمان؟.... قالو ليك يا اختي حاجتين ما تسويهن..... النضم في الطهارة.... وما تزعلي راجلك يوم الجمعة....قالو حرام في ضُمتهم يا اختي......والله صدام دا كان سمع نضمي ولملم وليداتو ديل وجاء قعد في ..... ام بدة دي.... دا حين في زول بيعرفو؟ والله يجيب خبرو...؟