ود دا برق ... وعشوشة .... بينك يا اسامه

ود ابرق وعشوشه
ود ابيرق طيرة من دنيا الطيور
بصحى بدرى بودع العش والجحور
شان يفتش لقمه طاهره حتى لو يعبر بحور
مابكوس وبيرقر بعشق الفول والبزور
همو اولادو وبلادو مابسيب واطاتو بور
ودابيرق ضاقت الدنيا في وجيهو
قاعد يبنى والسيول بتهد بنيهو
بس مواصل فى طريقو وفى مشيهو
والطريق قدامو هاويه والجبل اتهد بيهو
عشوشه ام عولو والزوجه الوفيه
كان بيطلع فى الصباح لم يرجع فى العشيه
لقاها تعبانه بترقع مابتفكر فى الشكيه
ماجايا ام اولادو بس جايا للعالم نبيه
صوره واضحه مكرره صوره لامنه ورقيه
ودابيرق راضى صابرماعندو غيرربك كريم
بيتو خيمه بين شقوق حيطان ونيم
عراقى سبحه وباقى مركوبا قديم
ودابيرق كبرو اولادو الصغار
همو لقمه هموحقنه وحصه دار
هموتعليمن علاجن همو لقمه وشاى ونار
ود ابيرق حسب الحال واحتياجو عقلة طار
ماظهر قدامو مخرج الاهجره واغتراب
كان بنازع فى دواخلو والصوره تتداخل رهاب
اتهدم قدامو مدخل واتقفل فىوشو باب
قالت
ما كنت بفتكر السنين زى اى طيرحتغيرك
انت القبيل خضته الصعاب عشى الرهيف مااتخيرك
فايتنى لغدر الزمن داير كمان ما اسالك
سافر خلاص سيب الوطن لوماالمبادى بتجبرك
قاليها
عشوشه يادخر السنين ياحب سكن جوا الحشى
ليه دايرانى دايمن اقول عليك مطرطشه
داير اغترب شان العيال اكل الصغار حق العشى
يرضيكى نسكن فى جحور حيطان قديمه مدشدشه
يعنىايه لو اغترب مين فى الطيور المامشى

قالت
جنبى انت بشعر بالسعاده وبالامان
كيف تفكر فى السفر والمطرميعادو حان
مين براجع للصغار باقى الدروس والامتحان
يعنى ايه قيمه الهدوم وانت مامالى المكان
البلاد محتاجه ليك وماعرفتك يوم جبان
قال
لا الوجود بدى الامان لاالجناح بصبح عرش
لاالوجود بعنى لاالامان بنسج برش

طب ليه كده:
واولادنا بس شن الاكل الماجى والفول والتبش
ماالعلم اصبح مستحيل والجهل للعادم القرش
نحن نفديه الوطن نحن الكبش
والوطن لو دارنا يوم ليه بقول ترحل تمش
قالت
انت ودابرق مناضل الكل بيشهد ليك جسور
رساله الانسان يعمرما يخلىالارض بور
انت قدم وما تفكر فى المرتب والاجور
وحال الدنيا مالافه وتدور
مره دمعه ومره بسمه تبنى فى الخدين قصور
ارضى بالقسمه ونصيبك وكون شكور
قال
عشوشة يا ليلى ونهارى ويا صباحى
شوفينى كيف من الفجر قبل الديوك انا قمت صاحى
عشان ادافر عشان اصل شان محال اركب سياحى
اليلة النبل كسرت جناحى
داير اغترب ما لا للغنى لكن بفتش لى صراحى
فى المدن ببنى وبعمر بمشى ارحل للضواحى
لا مدارس ولا علاج كيف اكمل بس نجاحى
قالت
قش دموع محال اشوفك انت تبكى
لو الجحور مليتا انت
يلا نبنى برندة زنكى
والبومة ظهرت من جديد
وقالو فتحت ليها بنكى
امشى قدم لى وظيفة
شوف منو الممكن يزكى
قاليها
عشوشة يا مسكينة يا الحولك ننسوك
يا فكرة اقدم من زمان منسية من غزوة تبوك
نحن اتخلقنا للنيم والجحور
ما النعيم جوة البنوك
البنوك دايرين دقون قاصد ديكوك
قاصد سنون تقدر تلوك

ما سنونى ولا السنون العند ابوك
قالت
انت واصل فى صلاتك وفى صيامك
وربى عارفك فى سجودك وفى قيامك
النصيحة قيف وقوله وشد لجامك
العمر مكتوب مسطر
لا فى زول يقدر يذيده ولا ينقصك فى ايامك
قاليها

داير اغترب ما بكوس لدش وفيلا
بس كرهت طيور وملا
سوى من الدين بسلة
يخمو بيها رغيف وغلا
قالت
يعنى خطط وتانى ما بتقبل نقاش
انت بتسافر تسيبنا يبقى يربطنا المعاش
نحن بس طالبين وجودك ما بنكوس دولار وكاش
المطر لا بد ينزل
والخضار يملا الرشاش
كل غايب لا بد يرجع
والبلد يبدا انتعاش
ربنا يحقق مقاصدك
امشى فوت لو قلت ماش
نحن بس طالبين وجودك ما بنكوس دولار وكاش
قاليها
عشوشة يا مسكينة اقناعك محال
السفر ماعندى غاية
لكنو صورة من صور النضال
ابقى عشرة على مبادئك
وابقى عشرة على العيال
بلادنا لما دورنا نحن
بتلقانا قبل ما تكمل تعال
بتلقانا قبل ما تكورك تعال

دايما تاتى بالرائع عزيزى الرائع بامسيكا
دوما لك التحيه ولك منى كل الاحترام والحب
دوما انت فى القلب
وربنا يخلى ليك عشوشه بتاعتك
الحبيب

حبيبنا وحبيب الجميع
لك التجل والتقدير
بس يا حبيب وحياتك عشوشه ما تبعى

هاك ليها يا حبيب هدية
تحياتى

ياسلام على الكلام السمح
روعة بمعنى الكلمة