***كدة إنقاذ و لا بلاش ***

قالوا لينا ..
جيناكم نحرر .. جيناكم نرقي
ما البلد مكسور جناحا
ومركبا مستحيل تعدي
والحزبية البغيضة كانت
تسرق أموالآً تشيل وتودي
في الجنوب كملت دمانا
في البلاد شعب يستجدي
والغرب الكان مهجور..
نبني له الأنقاذ الغربي
والمياه الكان عزيزة نعملكم
دونكي مكان التبلدي
ونحنا جينا عشانكم
وعلى كلامنا الشاهد ربي
والدين ببقانا راية
وفيه ما بناخد وندي..
وانتظرنا نشوف كلامكم
وقلنا ادوهم فرصة نبدي
وابتدينا..
ما أديتونا غير الكلام
وتاني يوم لقينا حالنا صالح عام
ومرت سنين ومشيت وراها أعوام
والبلاد يوم معاكم ما خطت قدام
الجنوب زادت مصايبه
وفقدنا حتى في بيوتنا السلام
وشبابنا بلا جنية..
ساقته اللجان الشعبية
وبقى للحرب وقود نار
تحت شعار الوطنية ..
والانقاذ الغربي الكان أملنا
هرب أموالنا للبنوك الأجنبية
وفتشنا عن الدوانكي
ما لقينا حتى التبلدية
ومركبنا الكان مكسور دفتا
سرقوها وما قدرنا نعمل قضية
لأن السارق شيخ وواصل
وليه ضهر وايدين عليه..
وأموالنا السرقتها الحزبية
أحالوها الى رأسمال البنوك الأسلامية
وكلام الدين الكان ساري
لقيناه مجرد غطاء وشعار ساي
وفت مرة باعوا أخوة الدين
للسي آي أى والأف بي آى ..
وبيوتنا الكانت ساتره حريما
بقت بالضيق قهاوي شاي
وحكاية العملة الوطنية
وضمان استقرارا قدام الأجنبية
ديك أغرب قضية..
فالدولار الكان بأطناشر
اليوم قرب بالألف التلتمية
والرغيف الكان شحمان وكبير..
بقى كل يوم يضعف ويطير
ود كله ماهو قضية ..
دا ما فن التحرير
وبلادنا الكان وقفت تتاتي
عادت تاني نوم شخير..
واموالنا البقت سايبة ساكت
مقابل كل مواطن سوّ لنا وزير
دا ما هو التحرير ..!!
وحيلنا الأصلو مهدود
أتفتت بمرزبة الضريبة
وحكاية عجيبة لسه
نخاف من بكرة وبعده الجاي
ما الضريبة على البائع والشاري
وراكب الباص والماشي كداري
وقدرة الفول وست الشاي
ومرات ندفعا زندية ساي
والعجيب اللينا ما أنعرف
زكاة الراتب يوم الصرف ..
وهو الراتب ما بتم اليوم
وراجنه وراك كم زول
رسوم المدرسة ..وغدا الشفع..
رسوم التسجيل.. ودفتر الكنتين..
وشويه لأولاد المرحوم..
ما ديل أولادك وليهم حق يكسروا الصوم
يا أخوانا ما معقول..
ما لكم فت مرة نسيتوا القول..
ما قلتوا جيتونا أنقاذ
ما لكم دفنتونا قبال الحول ..؟!
وبلا حياء ولا خوفا من عرقنا الراش
بعتونا وقبضوا الكاش
كدا أنقاذ ولا بلاش
كدا الأنقاذ ولا بلاش .....

مسقط
12مارس
2003

تسلم اخي كباشي

كلمات رائعة جدا تعبر عن مايجيش في قلب كل سوداني حر

دقنه

ياسلاااام عليك ياكباشي