الحقوووووووو وقفوه قطع نفسنا

طال الغياب وعند العودة كانت اللوحة مشوهة ومختلطة الالوان
عناوين نابية ومواضيع بزيئة تشبه احدي الوارات التي تدور في زقاق من الازقة التي تصطف علي جانبيها الاندايات والبيوت التي تنعدم منها الفضيلة
تلاهث حول الكتابة ولا شئ غير الكتابة الكل يكتب واظنه ينسي ان يقرأ بالرغم من الكمية الكبيرة للاعضاء ولكن تدهور مستوي الزيارات للبوستات الجديدة للاطلاع ويقابله في الجانب الاخر ارتال من البوستات التي تضخ ضخا ولكنها تذهب سريعا الي الفناء
هل الكل مشغول باثبات انه كاتب يقرأ له ام هي فرصة وجدت للتعبير عن موضوعات وباي طريقة لا لشي الا لانه هناك مكان توفر للكتابة لا رقيب عليه وهو مقرؤ
عناوين غير مستورة العورة وداخلها خواء
اننا نجسد باننا شعب الله المثقف الذي يجيد الكلام كله ولا يقوي علي اشعال شمعة تضي ظلامه الذي ادمنا لعنه
فالكل يتحدث والكل ينظر والكل مؤهل للقول ولكن لم يوجد الذي يفعل او حتي الذي يسمع
هذه دعوة للاستراحة من اللهاث الذي يتباري فيه الجميع نحو الا غاية ولترسيم الخطوات ومراجعة الزات وتحديد الغايات
ان البورد اشبه بالشات الذي يتحدث فيه الجميع في وقت واحد وكل يذهب الي حال سبيله
متي تم عمل ملخص لاي ورشة نقاش دارت في البوستات وتلخيص النتائج
هيا لتواصلوا العدو لبلوغ اللانهاية

زمان قلنا كلام حار لكن لا حياة لمن تنادي اخي

الناس اصبحت تجلس في الظل وتترك الجسم المعني بالمرض وتنظر في الظل

اساسي
صدقت القول
يبدو فهم البعض يقول:انت مسجل في البورد اذن انت كاتب
ومن حكمة الله ورحمته على اهل البوردان مهما كان سواء اسلوب الكاتب وانعدام الموضوعية في كلامه...فهناك مؤيدين ومريدين ومشجعين له
لقد انعدم النقد الصادق
وحلت مكانها المجاملة الرخيصة
لقد قرات مرة في البورد ان التسجيل سيكون للادباء السياسين والكتاب
لكن يبدو اننى اساءت الفهم حيث المقصود بالكلام اعلاه
سياسين امبدة وفنانى الكرنتيناوادباء وكتاب الدقي
وذى ما قال مهاجر

اقول كمان: قلنا فقالوا اخرجوه من البورد
ربنا يعطيك الصبر
ويعجل لينا بالفرج

و برضو زي ما شايف ان المفيد يغطس الي باطن البورد ، اما الزبد فيبقي طافيآ ولا يذهب جفاءآ !!ــ

لاخ اساسي
سلامات
اولا اتفق معك تماماً بان هذا البورد بقى يقوم النفس عديل كدة، واصبحت الكتابة في حد زاتا غاية ، والما قادر يكتب يمشي يشوف ليه موضوع ويبسسته لينا والقصة بقت حكاية نلحق السوق !!0 لكن تبقى هناك اشكالية حقيقية ، كيف يمكن ان تمنع الناس من الكتابة؟ وما هي المعايير التي تجعل من شخص له حق توقيف البعض من الكتابة؟ وها هو احد الاصدقاء يذكرنا واظن ه الاخ منير بأن ما هو مفيد لا يدد من يقرأ له!! وبالعكس كل ما هو زبد تجده يجلس بالايام الطوال00 وهنا تكمن المشكلة حقيقة؟ فاذواق الناس تختلف، والغاية من البورد نفسها تختلف؟ فهناك من يجد البورد مجرد تسلية وقضاء وقت فراغ لهذا فهو ليس معني بكل المواضيع الهادفة او التي تناقش قضية حيوية لأنه يجدها مدعاة لوجع الرأٍس وهو في غنى عن ذلك0 انها مأزق وامتحان حقيقي لكل من يثق في حقوق الانسان وديمقراطية الممارسة، ولكن أي تدخل من اي نوع هو في النهاية شكل من اشكال السلطوية والابوية المرفوضة حتماً والتي لا يعززها منطق او حق0
سلامي

اتبراوي

كتير جدا..الكلام بكون واقف لي في ..حلقي..اقصد كي بورديني...وعايز اقولو...وبما اني..فاقد الرغبه في الكلام اصلا...بحس بي راحه شديده جدا..لما القاك عبرت عني ..تمام التعبير

حصلت كتير ..في اكتر من موقف..واكتر من موضوع

شكرا كتيرا

الاخ اساسي

لي برهه..بعد قراءة كلامك ده..فكرت..يا ربي..البورد ده عشان..يكون مثالي..واي زول يكون مبسوط منو!!شكلو مفروض يبقي كيف!!!!!!؟؟
الناس البكتبوا فيهو منو!!؟
الصفحه الاولي عامله كيف!!؟
والمواضيع .زاتها شنو!!؟

ما لقيت اجابه طبعا لانو باختصار...مافي بورد مثالي..او علي الاصح..البورد واقعي...ومافي واقع مثالي
يعني البورد ..زي الدنيا..دي
فيها الطويل..وفيها القصير
فيها الكويس والكعب...مافي زول يقدر..يتحكم فيها..ولا يفرض عليها صبغه معينه
يبقي انت المفروض تحدد موقفك من المواضيع..والحاجات...مش البورد ..اللي هو..ناس البورد..مطالبين بانو..يتشكلوا ليك بي صيغه..انت..او اي زول غيرك من الناس..يرضي عنها

وجهة نظري باختصار
انت..البورد
عايز حوار راقي..حاور حوار راقي

ما عايز..مواضيع هايفه...!!ما تقرا المواضيع الهايفه.,..ولا ترد عليها
الصفحه الاولي مافيها مواضيع جميله..امشي الصفحه التانيه
كلامي ده ما عجبك..ولا اقنعك!!!شيلو..ارميهو.في البحر
لووووووول

العزيز اساسي سلام
انا واحد من الناس ما قاعد اكتب كتير
لكن عضو مشارك وبقرأ معظم البتكتب
وراضي جدا عن الوضع الحالي
ما الرضا عن المضمون الممكن اكون بختلف او اتفق معاهو
لكن الرضا نابع من انو نحنا بدينا نخطي الخطوة الاولي في طريق معرفة بعضنا...نحن السودانيين...لحم الرأس..المعرفة الفكرية النابعة من العقل والقلب لناس منشرين علي مدى 360 درجة في واقع جغرافي دامغ..وأكيد اي واحد بكتب هنا بكون بعبر عن نفسو اولا وثانياعن قطاع كبير جدا من السودانيين الما بعرفو حتي شكل الكي بورد..ودي في رائي فرصة عظيمة اتاحتها لينا الشبكة والمجتمع الافتراضي ..فرصة انو الناس تطلع الفي قلبها بدون حذلقة تعبيرية ولا سطوة اكلشيهات اجتماعية..وعشان ما تفهمني غلط انا ما بدعو للابتذال لكن انا داير اشوف الحقيقة المجردة الشفافة..الحقيقة البتتقال بين الشلليات..اتنين اتنين وخمسة خمسة..في ناصية الشارع او علي المصطبةاو في النادي او في اوضة البنات لما يقفلو عليهم الباب او في ونسة النسوان الكبار مع الجبنة..اما الصورة التي تتمني انت ان تري البورد عليها- مع تقديري الشخصي لدوافعك النبيلة - واذا كنت قد فهمت قصدك كويس ،هي ما يمكن ان تجده في اعمدة الجرائد او في كتاب مصقول او في جلسة اجتماعية يتباري الناس فيها لقول كل ما يمكن ان يكون لائق - وفي النفوس ما في النفوس ..البورد بوضعو الحالي اداني فرصة عظيمة انو اكون قريب من الناس واسمعهم بوضوح وبدون غتغتة وابدأ اتعرف علي دوافع كل واحد في الشئ البقولو ..كان عن الهوية او العنصريةاو شكل الحكم او الدبرسة او الحب او الجنس .. والملاسنة- حسب الموضة - في رائي حاجة صحية لسبب واحد هو انها بتفتح الجروح المغرغنة وتديها فرصة العلاج ..والسكوت ليس من ذهب دائما.. والغاية في رائي المتواضع هي فهم الآخر والقبول به كما ونوعا- في الاساس - وثم التعايش معه والتحاور والاخد والرد بسماحة - او بملاسنة - حتي يصل الناس الي مكان مستوي لا ترتفع فيه قامة عن اخري الا بمقدار ما تنحني للاخرين
ولا يمكن ان يحدث هذا بتعليق المشانق لكل من خالف هواه هوانا..او تكلم في المسكوت عنه بلغته الخاصة التي تشف عن موروثاته ..والمطالبة بإلغائه من الوجود..او الدعوة الي صفوية البورد.. معليش علي التطويل لكن الكلام في الموضوع ده كان شئ اساسي بالنسبة لي
علي سبيل انا اختلف معك لكني استميت دفاعا عن حقك في التعبير عن رائك