سلام الحن

بالمناسبة والله السوادنة (علي قول اخوانا الخليجين) في السعودية ودول الخليج الواحد يجي ماشي فوقك مرش ولا كانوا شافك بالرغم من انك مقلوز العمة وسط ولابس المركوب والجلابية خليك من ديل السنة دي مايديك ليها ما عارف الحاصل شنو في الدنيا دي قالوا زمان المغتربين الواحد يشوفولوا طرف عمة ولا طرف توب ( والتوب ده خل خبروا كمان) يقيف يرجاها يقلده ويضمها لامن الناس الفي الشارع تقيف تتفرج
ما عارف السبب شنو الناس بقت جافية علي بعضها من شنو كترة الناس قللت السلام المشغوليات بتنسي الزول الغربة غيرت طباع الناس الحنية اتعدمت من الشعب السوداني
فعلا ظاهرة تستحق الوقوف يمكن يكون لاحظة اكتر من واحد
بالمناسبة دي هاكم القصيدة دي للشاعر ابو نيران
سلام الليد ده يا اهلي
حكايتو لذيذة حاصله لي
الشهرين عليها مضن
ده لما السمحة لاقتني
قالت إت فايت بعيد لي شن
تعال قرب وسالم الناس سلام الحن
وختت أيده في ايدي
لقيت بطن ايده صح لين
واريد لين ايده بس هين
اهز في ايده
.............معاها يتهزن
اصلو حكاية مامكن
دي حاجة تجنن الزول جن
اصابعي بقنلي ما ياهن
اعد فيهن
واواسيهن
ضمة انا تاه علي عددن
اجر فيهن
قدر ما قلته يتفكن
لقيتها حكاية مامكن
( وده سلام الحن حالتو بالايدين بس ماهو بالاحضان )