Post: #1
Title: يا سودانير لكم ما ممكن!!
Author: ensana
Date: 02-11-2003, 05:27 PM
تصحيح العنوان:يا سودانير لكن ما ممكن!!
صديقتي ذهبت للمطار الساعة التاسعة صباحا عشان تسافر السودان بالطيارة السودانية...الطيارة ما جات لغاية اليوم التاني..السبب حسب ما قالو انو الطيارة تعطلت و ليس هناك طائرة بديلة ...الناس قعدوا في المطار كل الساعات دي...المنظر كان فظيع في المطار...السودانين طبعا اشتغلوا لعب كتشينة في ارض المطار و النسوان راقدات في الرض و منظر بشع في مطار دبي و خاصة انو الدنيا مهرجان و المطار زحمة و جميع الجنسيات بتجي البلد دي...طلبوا ينزلوهم في فندق المطار..قالو الفندق مليان....جد وضع يخجل..
انا بطالب اي زول بعرف احد يعمل في سودانير يدعوهوا للبورد عشان نتناقش معاهو و جد لازم يكون هناك حل للخدمات السيئة جدا لخطوطنا الجوية..يعني البلاد كلها بتمشي لقدام و احنا ماشين لوراء
و بعدين احنا كسودانين عاديين متين حنسيب السلبية دي!!!..اقصد انو مفروض نطالب بحقوقنا و نرفع قضية مثلا في حالة حصول تصرف زي دا...
و على فكرة التصرف دا اتعاد تاني تاني يوم و الطيارة اتاخرة..و كمان صديقتي فقدت شنطها ..و الناس الماشين اجازة العيد ضيعوا زمنهم من اجل خدمات ناقلنا الرسمي السيئة
يا جماعة جد لازم يكون في حل يعني
|
Post: #2
Title: Re: يا سودانير لكم ما ممكن!!
Author: Bakhaf
Date: 02-11-2003, 06:43 PM
Parent: #1
لازم يكون في حل ؟ اكيد في حل وبسيط
ماتسافروا بسودانير بس
|
Post: #3
Title: Re: يا سودانير لكم ما ممكن!!
Author: abas
Date: 02-11-2003, 08:58 PM
Parent: #1
سلام يا اخوان
وكل عام وانتم بخير وصحه جيده انشاء الله
الاخت انسانه انتي برضو من المتضررين
ربنا بس اكون في عون الشعب السوداني
وفي شمار سمعتو انو الجماعه دخلو السوق عشان اشترو حاجيات العيد
|
Post: #4
Title: Re: يا سودانير لكم ما ممكن!!
Author: مارد
Date: 02-11-2003, 11:39 PM
Parent: #3
إنسانة سلام
الأخ بخاف ..والله خطفتها من خشمى .. أنا من زمان بقول لأصدقائى لما يجو يشتكوا من " سودان طير " تستاهلوا .. إنتو الوداكم ليها شنو ؟
|
Post: #5
Title: Re: يا سودانير لكم ما ممكن!!
Author: وجن
Date: 02-12-2003, 01:50 AM
Parent: #4
إنسانه
كل سنه وإنتى طيبه
لكن ما تقولى لى أنت أول مره تشوفى مناظر زى دى
والله ياما شفنا
بس زى ماقالوا ليك ناس مارد وبخاف
الحل بسيط تستغنى عن خدماته
وتكلمى كل أصحابك
إحتمال لما الطلب يخف عليهم
ما يحتاجوا يشتروا الطيارات الخربانه
والفى نهايه عمره وطياراتهم الباقيه تقع
عليك الله عمرك شفتى ليك منظر بتاع طياره
خسرانه موقفنها قدامك ويلكلكوا ليكى فيها قدام عينك بمفكاتم
ويقولوا ليك بنصين فى الطياره فى حين إن مواعيدإقلاعه قبل 4ساعات
عزيزتى إنسانه
إشترى راحه رأسك ورأس البتحبيهم
وشوفوا طيران غير
ناسنا ديل لسه بدرى عليهم
الله معانا ومعاهم
|
Post: #6
Title: Re: يا سودانير لكم ما ممكن!!
Author: Mirghani Ali AlAmin
Date: 02-12-2003, 07:30 AM
Parent: #1
الله يكون في عون السودان والسودانيين
دا طبعاً واحد من النتائج السالبة لسماحة وعفوية السوداني ، دا مثل مما يحدث في كل المرافق نتيجة لسماحة السوداني وعفويته ، فإذا كان كل سوداني يتمسك بما له من حقوق وما عليه من واجبات وتصعيد الأمر إلى أعلى مستوى . فإذا توافرت الجهات التي يرفع إليها الأمر وتميزت بالقوة والفصل الحاسم لما آلت الأمور إلى هذا الحد من الهون والتهاون ، وهذه دعوة لأن يتمسك السوداني بحقوقه ويصل بها إلى أعلى المستويات عله ينصلح الحال
|
Post: #7
Title: Re: يا سودانير لكم ما ممكن!!
Author: zozo
Date: 02-12-2003, 08:30 AM
Parent: #6
هذا ماحدث لى أول واخر مرة فى أواخر السبعينات فى مصر
حيث مكثت فى المطار 24 ساعة لأن الطائرة تأخرت فى الخرطوم
|
Post: #8
Title: Re: يا سودانير لكم ما ممكن!!
Author: james
Date: 02-12-2003, 08:42 AM
Parent: #7
انسانة
كل عام وانت بخير
تعرفي اللوم علي صديقتك وعلينا
البنركب سودانير
امتنعوا عديييل عن ركوب سودانير حتي سودانير تعيد النظر في
فن معاملة الناس
وتاكدي طالما في ركاب الحال ح يكون هو حالها
آل سودانير آل
|
Post: #9
Title: Re: يا سودانير لكم ما ممكن!!
Author: ensana
Date: 02-12-2003, 01:12 PM
Parent: #8
يا جماعة سلام
يعني كلكم متفقين انو الحل هو المقاطعة حتى يستقيم الحال...لكن السودانين طبعا بحبوا الطيارة السودانية عشان الوزن و كدا
|
Post: #10
Title: Re: يا سودانير لكم ما ممكن!!
Author: Bakhaf
Date: 02-12-2003, 11:20 PM
Parent: #9
عشان الوزن وكده
والله احسن تشيلي قروشك وتشتري من السودان هناك لبن الطير موجووود
مالك ومال الدوشه
والله بتاع الوزن ده براهو يجيب لك شنطه في السودان وحاجت ما اي كلام كمان... كان ماعارفه وين قولي عووك .
|
Post: #11
Title: Re: يا سودانير لكم ما ممكن!!
Author: Elsadiq
Date: 02-13-2003, 12:54 PM
Parent: #10
العزيزة انسانة كل سنة وانت طيبة
بالنسبة لمشكلة الناقل الوطني سودانير فهذه مشكلة منذ الازل وحتي الان قائمة ويرجع اسبابها الي حجم اسطولها الضئيل ومواعيدها الفلكية التي اصبحت مضربا للمثل نظرا لترسبات وأخطاء قديمة جار العمل على تلافيها ومعالجتها من قبل القائمون على الطيران المدني بتنشيط اتفاقيات مع بعض الخطوط العربية الاخري مثل الاردنية و القطرية الخ وعلي حسب علمي ان السيد أحمد اسماعيل زمراوي المدير العام الجديد للخطوط الجوية السودانية رجل له باع طويل في مجال الطيران وان سودانير ستشهد تطورا ملحوظا وملموسا في عهده الذي نترقبه. وما علمته ايضا ان زمراوي خلال هذه الفترة القليلة التي تولى فيها المنصب أحدث تغيرات جذرية كبيرة واقال بعض المتقاعسين الذين كانوا يملأون الأماكن الشاغرة فقط فمن هنا نطالب السيد زمراوي ان يضع كل المشاكل على طاولة واحدة ويبدأ حلها شيئا فشيئا وان يضع خطة مستقبلية واضحة المعالم واستراتيجية بمعنى الكلمة حتى ولو كلف ذلك عدة سنوات فزمراوي شخص لا يستهان به وهو أهل لهذه المهمة ولكي نساعده على السودانيين ان يقفوا معه وألا يتذمروا من التأخير أو التأجيل بل يجب ان يستفسروا عن الاسباب ويشاركوا في حلولها هذا اذا كانوا حريصين على مصلحة الشركة وليس أنفسهم ولك الشكر ياانسانة للتطرق لهذه المشكلة التي تؤرق معظم السودانيين
|
|