أحمد ساطور

الاخ العزيز بكرى
أهنئك واشكرك علي ما تقوم به من خدمات عبر هذه الصفحة الجميلة والتى جمعت فيها كل عباقرة الكلمة الجميلة والذوق الرفيع ، حيث رجعت بى الذاكرة إلي زمن جميل مضى ،ولم يبقي لنا إلأا أن نبكى على ذكرى حبيب ومنزل .
وشد ما راقني في ذلك أن وجدت زملاء دراستى الأحباء بمعهد الموسقي والمسرح والذين يكتبون على البورد ،أمثال الاخ الذى فقدته كثيراً
الاخ الفنان السمندلاوي (عثمان النو) والاخ الموصلى والاخت المجتهدة دائماً تماضر شيخ الدين ،لا أدري إن كان هنالك بعض الإخوة يستعملون أسماء حركية التحية لهم ايضاً.
كنت اتصفح البورد ذات يوم وتحت عنوان اين هؤلاء؟ أُ دُرج إسمى ضمن ألأسما ء بإسم أين صلاح ساطور معليش
إسمى أحمد ساطور وانا موجود مع القوات الامريكية في السعودية (يعنى الغربة ما فايتانا يابكري) بعد غربة طويلة بولاية كاليفورنيا كنت ابكى فيه الغربة كما بكي إبن المنطقة البار الاخ الشرنوبي فى مقاله الاخير واقول ليه ياشرنوبي تلزمك رجعة ألى نلوتى وكويكة.
المهم ارجو ان تبلغ كل الزملاء تحايايا الحارة ولابد من عودة ولقاء ، إذا سنحنت ظروفك بالتحادث مع الاخت تماضر قول ليها (لحمة ساطور) وستحكى لك قصة طريفة عن ذلك
فى الختام تحياتى للجميع إلي أن نجد مساحة للتسجيل ونحادث كل الزملاء
أحمد محمد عثمان (ساطور)
E-mail- [email protected]

نرحب بيك ياساطور
ومتين ترجع من الغربه للغربه القديمه

يا ساطور
ساطورك كيف؟
الشوق بحر ياأبوعلاء كيف حالكم أنت ونور وعلاء
أفتقدكم بشده أفتقد تلك الشخصية الودودة المرحه صاحب الأبتسامة الساخرة والتعليق اللاذع والنكتة المضحكة وأن كانت بالرطانة برضوا بنضحك والله أيام زمان كانت لنا أيام ياساطور ثق سوف أحملهامعي لقبري أذا تمت مشيئة الله لن أحمل معي مالا أوشهادة أوجاها أرجوأن أحمل معي حبنا لبعضنا البعض والأيام الجميلة التي قضيناها معا والنكات والقصص الحلوة التي أضحكتنا بها حتي أغرورغت عينانا من دموع الضحك والفرح كما هي تنزل الآن لفقدانك ياساطور
عارف ياساطور لو كان هنالك شئي جميل وسط كل المعانأة التي عانيناها في سبيل أنشاءذلك المركز السوداني للمعلومات هو أنه أعطانا الفرصةعبد الخالق وشخصي بن نقف معك أنت ونور وسعاد بكل الحب والوفاء ولقد وفقنا الله في ذلك فأنت ونور تلك الأنسانة والزوجة الراسية الرزينةتستاهلوا كل خير سلامي لها
أفتقدك بشده ياساطور بس عندي سؤال واحد أنشاء الله بقربك من الكعبه يكون بقي عندك دين هاهاهاها
والا القاعده الامريكية زادتك كفر هيك هيك هيك
تحياتي
أخوك د.متوكل

يالحمة ساطور

سلاما سلاما

النجم اللامع الصلعة،

فى المنتدى

واحكى القصة ليه ما احكيها،

هو احمد ساطور كان بفطر قبل ما نحن نداهم البوفيه من قسم المسرح ن ولما كنت ماشة على الشباك اشترى ، احمد ساطور ناولنى صحن فولو وقالى قوليهم يدونى وصلة
بقيت شايلة صحنو المجربن وواقفة اقول للولد، ادينى زيادة لاحمد ساطور

يقول لى

لحمة ساطور؟؟؟؟

اقوليه

لا لى احمد ساطور

يقول لى

لحمة ساطور؟؟؟؟

عشرين مرة، لمن دايرة اموت من الضحك حتى عرفها
ومن يومتها وهو فى نظرى ما اكتر من

لحمة ساطووووووووووور

اهلا بيك يا سيدنا

والقومة ليك ولى مرحك ونكتتك التلقائية وصفاء قلبك

ونحن الاسعد بوجودك معانا

وتحياتى لاسرتك العامرة

وما سمعنا بى مشيك للسعودية دة يطرشنا الا هنا،

يا ساطور
يا هميم وحميم
تحياتي و كثيف الاشواق
و مرحب بيك في هذا الحوش الالكتروني
و بعدين ايه حكاية القوات الامريكية دي في السعودية
تعرف يا ساطور انا مشتهي حفلة انشا الله مع خالد اب رقبه و اكون انا فيها بعام و معاي شلة من الكوفنجية
و بعد نهاية الحفلة نكون خليناك شايل الاكورديون بتاعك و نكون نحنا ملينا بيت الاكورديون بما لذ و طاب و بما يحرض علي النشوة
يا حليلك يا ساطور
و كل عام وانتم بخير

ساطور العزيز
تحياتنا لروحك العالية
انا أحد أصدقاء عطبرة الحلوة
ايام المسرح والغناء
كنا نلتقي بك مرة مرة في لقاءات الغائب الحاضر مصطفى سيد أحمد