مقدمة
ما أعذب أن نمتطي قطار الذكريات فيطير بنا القهقرى 000 عبر الأيام 00 والسنين إلى عهد الصفاء والنقاء 00 عهد الطفولة وأيام الصبا 000
ها أنذا قد ركبت القطار 00 ثم حططت الرحال في قرية "القرير" بشمال السودان 00 وبالتحديد في خلوة شيخنا العوض ود مدني عليه رضوان الله ورحمته وغفرانه 00 هنالك وجدته 00 شيخ طويل فارع 00 لحيته كثيفة بيضاء 00 ووجهه صارم وقور تكسوه هالة من نور القرآن وسماحته 000 وهنالك وجدت نفسي 000 ووجدت أترابي 000 ورفاق طفولتي 00 "حميدي" 000 "إبراهيم دليق الشملي" و "توم حامد" 000 أجسام متسخة كساها الغبار ، وثياب ممزقة مجللة "بالعمار" 000 ولكن 000 نفوس طاهرة بريئة 000 وقلوب صافية نقية كأنها قلوب الملائكة 000 وهناك عشت مع أترابي أحداث قصة طريفة كنا نحن أبطالها.
ثم عدت من رحلة الذكريات وأمسكت اليراع محاولا أن أنقل فصول تلكم القصة لمن يقرؤها 000 بشعر دارج 00 وبلهجة الشايقية بالقدر المستطاع 000 ترى إلى أي مدى حالفني التوفيق
ــــــــــــــــ
في يوم من صباحا بدري…
جانا "حميدي "…
يجري ويجري. . .
يا إبراهيم.. حلالنا.. حلالنا..
"أحمد بكري" .. ماتت أمو
والناس في المحطة اتلموا
وقالوا التالتي يوم الجمعة
طبعا فتة!!
مو بي دمعة
وابراهيم دليق الشملي..
إتحزم هناكع نطَ.. ..
وا حلالنا
العمدة خالنا..
يوم الجمعة ناكل فتة أحمد بكري..
بالرز والرغيف.. مو كسري .. !
توم حامد سكر بالفرحة
جيَر لوحو قبال يمحا
أحمد بكري..
لو دايرين تعرفوا حكايتو..
بالخير ربكم يطراهو-
واحد أفندي
منقول "للقرير" من "شندي"
كان زولا كريم وأجواد
أكلو رغيف
ولبسو ظريف..
وكل يومين قميص بشرايتو
ماب يركب حمار حاشاهو
عندو جواد
والسايس دوام يبراهو
بيتو اسمنتي مبلوط كلو
والحوش داك000
أسكت خلو000 !
القميز داير ما يدور بيضلو
يوم جاهو الخبر بي أمو
والناس في المحطة اتلمو
يكشحوا في التراب 000 ويخموا 000
"زايلي الدنيا دي وخرباني"
"زايلي الدنيا زايلي وفاني"
"زايلي الدنيا حي حي ووب"
"يا أم أحمد الحبوب"
جانا حميدي مبسوط ويجري
يجري ويجري 000
سبحان الله 000
سبحان الله 000
"كل زولا دوام في همو"
الساعات مشت برَاحة 000 !!
ما جات راحة
والشمش أصلوا ما بي الغيبة !!
عاد وا عيبا 000
وا عيبا الشديد 00وا لوما 00
ايه يعني الفسالي لزوما
أصلها هالتقول حاسدانا 000
ما دايرنا
نمشي برانا
للفتة وشمار وتوما
فات يومنا الطويل واتعدى
وفاض بحر الخميس واتمدى
بس لا بد
رغم الموج نعدي نعومو
"يا ود حاج 000 "
"يا لحاق 000 "
وكل واحد قلع لهدومو
وا جيد لينا 000
اتعدينا 000
بي غادي ووصلنا الحجرة
وحل علينا يوم الجمعة 000
واتلمينا 000
أولاد دفعة 000
وساعة جينا 000 جوَة الخلوة 000
شيخنا نهرنا كورك فينا
قال : "بالله شوفوا البلوة "
" شن كايسين كمان الليلي " ؟؟
"ما عارفنوا يوم الجمعة ديمي بطالة"
وعليك يا الله 000 شدَيت حيلي
وجمَع كل طرف في حماسي 000
"بس يا شيخنا أظنك ناسي 000 "
"إنو الليلي يوم التالتي "
000 000
"يا جان أوع تفلق راسي"
"الطلبة الكبار بس يمشوا"
"الدرديري000 طلحة 000 وود فزع 000 "
شوفوا البدع 000 يا شيخنا أماني الليلي سويتلك وجع
وعمَت فوقنا يا زول كرسه
كرسة شديدة000
مدَت إيدا
سلَت من قلوبنا الثورة 000
وكانت ديك أول ثورة
" للحيران " 000
بس ليه نان ؟ !
أنحن كمان
"لازم نمشي 000 !!"
" والموت في الجماعات عرسة 000 !!! "
قالا حميدي 000 كورك فينا 0000
" الخواف ما بنريدو
" نشيل السيف نقطع إيدوا
الخواف شدُو شدُو
أحسن بي حناسة تعدُو
واتعديينا 000
فوق الدقشي
ماب نقدر نخالفوا "حميدي"
ويللا بقينا 000
نسكت نمشي 000
نمشي ونمشي
وقفتنا الأخيرة الأولى 000
في "المنقولة"
واتعدينا فوق الكبري
واتخيلنا إنو القمري
طار فرحان 000
وصفق لينا 000
بارك ثورة الحيران
000 000
ما همانا 000 يا شماتة 000
لو سلخت رجولنا الباتا
بس لكن 000
نحن تملي أصلو ضكارة
مابي نهاب جهنم ذاتا 000 !!
000 0000
واصلت المسيرة مسارا
وساعة جينا في البيارة
كنا خلاص تعبنا 000 ودشنا
لكن هشنا
وكتين جاتنا ريحة الكشنة
وقلنَا كدي ودفرنا الضلفة
وشيخنا زعل وجاتو الرجفة
وطارت من عيونو شرارة
وطارت من كتابو "الغرفة"
ما نضم أصلوا 000 ما قال حاجة 000 !!
بس لو شفتو منظر ايدو بي كرباجا 000
كنتو تعرفو إيه بكرة الصباح راجينا 000
لكن في سبيل الفتة 000
راضين نحن بالموت حتى 000 !!
وقال كدي جانا 000 أحمد بكري 000
- الله يزيدو رتبة وهيبة -
وينزل أمُو منزلة طيبة
رحَب بينا
ونحن كمان سخينا 00 قرينا 000
بي إخلاص 00
بعضنا سورة الإخلاص" 000
والباقين "سبِح" و"قد سمع" و "الفجر"
000 000
خلاص تمينا
شيلو الفاتحي 000
ربنا يرحم المرحومة 000
وجاتنا الفتة
في صحنا كبير مردومة
وكل واحد ختفلو قصير
وطار خوفنا القبيل 000 واتحتا
ما هامينا 000
تب بالبتة 000
إيه بكرة الصباح راجينا
لو كانت جهنم حتى 000
إيه يعني الجلد بالسوط
وإيه يعني الضرب "بالصرمة"
اتحقق هدف ثورتنا 000
ما دامت طفينا القرمة
000 000
وكانت ديل أول ثورة للحيران 000
يشوفا "قريرنا"
مين كان غيرنا
يعلن في الزمن داك ثورة 000 ؟؟
مين كان غيرنا