Post: #1
Title: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 07:52 PM
مــات النهـار
وفي الافق دمـو رسـم لون الشفق..حزن كتير داهـمني.صـمت الـمسا بلل كل الـملامح والدروب..نجـمة بزغت تقاوم غبار الزمن وترسم معـنى الوضوح.سيل الكآبة غرقني..قـمح الهـم شال خضار في بيادر الذات والقلب..صورة بـكا..تشيل مني ملامح قصه منسيه
أكتب وعارف انو الحرف بيني بينك ماتت سكتو..وحفنة مراصد تسد براءة الخـطى وشهقات الحنين..بطاقات الود ضاعت..وعزي بلاك مفقود ..انتي ياروح النبض ودفق الكلام..انتي يا عشق الصفا..بلاك فارقني طهر الحضرة والتجلي ..وصلوات حزني بترجع مرفوضة..وفيك سري..فيني مـنك صدق الكلام والانفعال..بتذكرك وبدور أعيش لحظة من غير مـا أتذكرك
فـي قلب الحـواري ،وكت بتوه خطـانا..تجن الريـح..تفر تـوبك..وتتبعثر خصل فرعك..تشتت بسـيماتك ضــي..تنـمو الـمسافة غنـا..نـمة فرحة بالرعشة مروية..ننسـى الكــون كلو..ونغيب في معارج النور والبـها
بتذكرك ، وبدور أعيش لحظة من غير ما اتذكرك
سـرب البداية..حفنة سـلام..مشاوير البوح..هـمسة تغزل جواي ملامح الندم على الزمن البفوت مسراع..ضعت فيك ومشت فيني ملامحك السمحة..بقيت موبوء بيك..في صـمتي..في حـزني..في مشـي خطــاي وسط الشوارع والضجيج..مـسكون بيـك..وسـاكنة في نبضـي، تيراب هواجـس وقسـوة لحظة تفاجـئني بالتذكار..عينـيك نبع قولي ..وهـمسـة "مشـتاقة" اخـر حروف الندا البتهـمني..عقب ما اطوف وفيني مباهـجك ،مشاعل تفجر درب الخطـى بالنـور..
بتذكرك،وبدور اعيش لحظة من غير ما اتذكرك..
فـي عـمق الـمغيب بتوهـمك..و أفيض حسرة، آهة وجع مسكوب فوق شـقى الجدران..حـزمة تصـاوير تـظللني من هجـير لحظة فيها بتذكرك..و أتقاسـمك ونسة شقى، فضلت تكلل دروب البـوح جـوانا..بتأمـلك مـعاني..فيها براي بعاني..و صعوبة تسـآل تـمرق من مرافي الشفاه وتـموت في أرصفة السـكوت..و الخـوف..والنجيع..
بتـذكرك ، وتعجـز شـفاي من قـولة حـروف بتحـمل في جوفها معـاني اسمك..و أنقش في عيون الزمن مساحة للفرح والتأريخ
كنت مرة وعشت في الأزل.. ويوم ما اتولدت..اترسم فيني خيط من رؤاك ..جيت لقيتك طفلة في حضن الـمدينه..قلت ألعب معاك بالطـين، قلـتي تلعبي معاي بنار الحزن..ومـشيتي انتي في رحلة أبد.مرسومة من بدء الزمن.. وبقيت وراك ، جـزيرة هـواجس..فاقد الهوية والملامح
بـتذكـــرك ، وبدور لحظة من غير ما اتذكرك
محمد النور كـبر
|
Post: #2
Title: Re: بتذكرك ، وبدور أعيش لحظة من غير ما اتذكرك
Author: Hozy
Date: 02-03-2003, 08:33 PM
Parent: #1
Kabarالمبدع
بصراحة كلماتك جميلة ومتناسقة
وماشاء الله عليك ياعم
الى الامام
عجبتني جدا الحتة
Quote:
ويوم ما اتولدت..اترسم فيني خيط من رؤاك ..جيت لقيتك طفلة في حضن الـمدينه..قلت ألعب معاك بالطـين
|
ودمت
|
Post: #3
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 09:03 PM
Parent: #1
العزيزة
..Hozi
ما دي الحته..المجننة بوبي..
أشكرك على العزاء وربنا ما يوريك يوم في أشياءك العزيزة.. ولو ما بتخافي الحزن..ابقي تابعي باقي الـمناحة..
كل الود
ودمت
كبر
|
Post: #4
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 09:08 PM
Parent: #1
ح..أبكـيك بـراي..
لأن الأصــدقاء ..الآن مشغولين بهـموم زيـك،
أو ربـما..أنهكـتهم الأسـئلة الشاردة من حضن الاجابة
كبر
|
Post: #5
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 09:14 PM
Parent: #1
مـش العـيب في انك تـموتي..
لـكن العيب في انـي انســاكي..
يـعني..كان لازم انو اليوم ده يكون مـدبس في خارطة الزمن؟ ..ما كان يفطوهو ويريحــــونا..
كـبر
|
Post: #6
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 09:23 PM
Parent: #1
حــتى درويــش اصـبح محاصر..وفي رام اللـه كمان..
قـريت ليك بالنيابة عنـك بورخيس..استورياس..امادو..واللعين كونتر غراس..
ثـــم..
زدتـك من عندي..واسـيني الأعـرج..وأمبرتو ايكو..وكـونديرا..
حــتى الآن لم اتحصل على محمد شكري..
أمـا حيدر حيدر ، فلقد حصروه في الـمربع رقـم واحد بعد وليـمة لأعشـاب البـحر
كبر
|
Post: #7
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 09:29 PM
Parent: #1
بـعدك الحــــزن اصـبح خـمرة..
ســكرت بيها لـحد الذهــول..
وكشفت للشـــمس عـورة قلبي
لـكني فيـك قطعـني ســيف الغـياب
كــبر
|
Post: #8
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 09:34 PM
Parent: #1
انا معـاك..
انتـي قلتي انـو البــوح معبر لـمدخل النسيان
لكـني لازم أبـوح بيك..لأني ما عدت قادرة احتـملك نحيب جـواني هـد حيلي بالتذكار
كبر
|
Post: #9
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 09:40 PM
Parent: #1
الـمساءات بعدك ، كل الـمساءات ، مسـيخه
خــاويه من مـلح التفـاصيل البهـيه
و النـهارات مـعفرة بغـبار الدفارات
لـن أشـرب بعدك الـشاي بالزنجبيل..أو عصير التبلدي بروح الـــــــورد
كـبر
|
Post: #10
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 09:47 PM
Parent: #1
ارتــخت قـدرة الاحـتـمال
و الافـق اصبح مـسور بالهـواجس
نـسيت اقـول ليـك..بعد ما انتي فـتي..الديـموقراطية برضـها فاتت ، وجـاتنا حاجــه اسـمها "الانقاذ"..قبلت عزاك لحالي ..وباقي العزا يوصـل لعموم الشعب الـسوداني الفضـل
كـبر
|
Post: #11
Title: Re: بتذكرك ، وبدور أعيش لحظة من غير ما اتذكرك
Author: حنين
Date: 02-03-2003, 09:52 PM
Parent: #1
جيت ارد عليك اول زول كتبت الرد بس النت بتاعي قطع
مشيت وجيت لقيت كميه من الابداع من الصعب على مجاراتها مهما قلت وكتبت
لله درك يا استاذ هيجت شجوني وافراحي ودموعي
|
Post: #12
Title: Re: بتذكرك ، وبدور أعيش لحظة من غير ما اتذكرك
Author: rani
Date: 02-03-2003, 10:18 PM
Parent: #11
ما انتى عارفة غيرك انتى ما لي غير جرحى الكبير سفر الخيال ليل الانين ووووووووو
ما حاقدر اواصل لانو زمن الشغل على وشك
لكن اكيد حا ارجع ليك
وواصل لانو بعد يومين كراساتك الكتيرة دى ما حتلقي لانو الورق داب مع مرور الزمن الكتير فدى فكرة جميلة انك تنزلها هنا عشان نقدر نحافظ عليها
وتوجسا من فكرة تراود كاتب بحرق ما تبقي من سيئات الزمن الجنون
انت فاهمنى انا بهضرب وبقول في شنو
هاهاهاهاهاها
وفي انتظار المزيد يا رائع
|
Post: #13
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-03-2003, 10:49 PM
Parent: #1
الجـميلة حـنين..
كـتر خيرك..وكل فرح وانتي بخـير..ولو كانت هي كتابة بتعني عندك كثير ..فهي لك..لأن الحـزن ملك خاص والدهشة للجميع ..
rani العزيز
وين انت يا حبيب..
ما كفاية كده ياعـم..
ويا ريت نشوفك ونقراك كمان
ودمتم
كبر
|
Post: #14
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-04-2003, 02:48 PM
Parent: #1
اعدت ترتيب ذاتك فيـني واتعلمت اني اتصـالح معاها..
الأســئلة لازالت فجـة ..ولم نتعلم بعد صياغتها بصـورة أفضــل..لك الورد ولي من بعضك صفوة حزن..
كبر
|
Post: #15
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-04-2003, 11:55 PM
Parent: #1
مـا الذي كان سيخـسره الفرح لو خبأك النهـار لفرح قادم..ثـم نثرك على كتف الزمن ورود ورياحين تمسح من جبين التعـابى ما تبقـى من تعب؟؟
كبر
|
Post: #16
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-06-2003, 02:48 PM
Parent: #1
لـك وردة الصـباح وفنجـان القهوة الـمد نكل
ولـي مغبة الانتـظار وكل تواريخ الـمساغب الـمجانية
كبر
|
Post: #17
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-07-2003, 00:35 AM
Parent: #1
مــا كفاك امـرقي مـن دمـي
ورسـيني مـعاك في مـرافي الضـو
كـبر
|
Post: #18
Title: Re: بتذكرك ، وبدور أعيش لحظة من غير ما اتذكرك
Author: doma
Date: 02-07-2003, 09:31 AM
Parent: #17
العزيز كبر
ما اجمل الحزن النبيل
|
Post: #21
Title: Re: بتذكرك ، وبدور أعيش لحظة من غير ما اتذكرك
Author: SAdo7
Date: 02-07-2003, 02:46 PM
Parent: #17
كبر يا كبر يا كبر
ابداع ابداع ابداع
تعرف ياكبر عندى عمى لمان اشوف صورتك دى طوالى بتزكروا
المهم الزول ده ما عندو حاجه غير العلم
انتهى من شهاده وادخل فى شهاده تانيه يعنى ساكى القرايه
المابتنتهى دى وانا لمان شفتك قلت اكيد انت وعمى ده موديل واحد
والرومانسيات دى الا اعملوا ليها داونلود ليكم لكن
لكان قريت كلامك الرائع ده اديتنى امل انو عمى ده ممكن فى يوم
من الايام اتعب من القرايه واكتب كلام رومانسى عذب زى كلامك ده
المهم ياسيدى والله كلمات توزن بميزان دهب
ولك ودى
|
Post: #19
Title: Re: بتذكرك ، وبدور أعيش لحظة من غير ما اتذكرك
Author: بت قضيم
Date: 02-07-2003, 09:53 AM
Parent: #1
استاذي الفاضل كبر
لأول مرة اقف تعجزني الحروف
اردد فاقول بين كل حرف والذي يليه... سبحان من ابدع الجمال حروف
الله عليك يا فنان
ارجوك واصل
|
Post: #20
Title: Re: بتذكرك ، وبدور أعيش لحظة من غير ما اتذكرك
Author: imad braka
Date: 02-07-2003, 01:07 PM
Parent: #19
الاخ الاستاذ كبر ـ
طبعا العزيزه بت قضيم سبقتنى فى الرد وكمان المفردات .. فماعندى طريقه غير اضم رايى معاها ..
وايضا عجبانى دراساتك النقديه ـ
براكة
|
Post: #22
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-07-2003, 03:56 PM
Parent: #1
سـيدتي دومــا..ليـك الفرح ..وكل ما قالته الورود لندى الصباح..وتلاوين الشمس التي لم تتعب قط من سكب الضياء..
الحـزن احساس ايجابي لحد التصالح..وميزتو بيعلـمنا قيمة العمق في التعامل مع وقايع الحياة المغبرة..وان كان يعنيك كثيرا فهو لك..
ودمت
كبر
|
Post: #23
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-07-2003, 04:06 PM
Parent: #1
العزيز
..SADO7
..حبابك
صـدقني أنا و عـمك ده يانا القاعدين يقولوا علينا الأغلبية الصـامتة..وتأكد ح اكتب بالنيابة عنه الى ان يظهر..وسـلم لي عليهو كتير..واتـمنى انو الكتابة دي تعني ليكم حاجة
ودمت
كبر
|
Post: #24
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-07-2003, 04:18 PM
Parent: #1
البهيـة بت قضـيم..
انتي وين يا فقرية ، أنا أمي حممتني مرتين ..انشاءاللـه تكوني سمعتي النكتة دي ..مـا هو برضك الشنب ليهو جرستو وتفاصيلها اللـعينة..عـملت ليك احتفالية في بوست الفطاحلة ابكر ادم والـملا عمر..ولا يعني مش عاجبك السي خضر بشير..ولا يا ربي تكون افتكرتيهو مشروع كسرة..من الناحية دي اطمئني وارقدي قفا..انا اترضرضت من زمان ..والبتقروا فيهو ده الرفات..
أنا بهظر ساكت
كتر خيرك على الطلة ..وحبابك..
بالمناسبة ضحكني كتير مشروع قطامتك
ليك البهاء..ولي من حزني السكوت
ودمت
كبر
|
Post: #25
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-07-2003, 04:28 PM
Parent: #1
الجـميل عماد براكة..حبابك
كتر خيرك على الطلة..
هي محاولة على الأشتغال على مفاصل لغتنا الدارجية اليومية..طبعا كتير من الناس ابدعوا فيها شعرا وغناء وما افعله هنا اضافة متواضعة في مجال النص الـمنثور ..وكتر خيرك يا حبيب ..كلمة دراسات دي كبيرة علي وده شعر ما عندي ليهو رقبة
ودمت
كبر
|
Post: #26
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-23-2003, 04:40 AM
Parent: #1
up
|
Post: #27
Title: Re: بتذكرك ، وبدور أعيش لحظة من غير ما اتذكرك
Author: AlRa7mabi
Date: 02-23-2003, 07:00 AM
Parent: #1
الأستاذا محمد النور كبر
وجدتي أقرأ هذه التحفة على هذا المنوال ، هكذا بدأت لي ، وجدت فيها – عفو – الخاطر
وطيبة سريرة ، زمن طفولة مسروق .. تسرب مع ليالينا بكل شجونها وافراحها القصيرة
اسمح لي أن أعود لهذه القصيدة مرات ومرات فقط بهذا الشكل ..
سلام
رحمابي
مــات النهـار
وفي الافق دمـو رسـم لون الشفق..
حزن كتير داهـمني.
صـمت الـمسا بلل كل الـملامح والدروب..
نجـمة بزغت تقاوم غبار الزمن وترسم معـنى الوضوح.
سيل الكآبة غرقني..
قـمح الهـم شال خضار في بيادر الذات والقلب..
صورة بـكا..تشيل مني ملامح قصه منسيه
أكتب وعارف انو الحرف بيني بينك ماتت سكتو..
وحفنة مراصد تسد براءة الخـطى وشهقات الحنين..
بطاقات الود ضاعت..وعزي بلاك مفقود ..
انتي ياروح النبض ودفق الكلام..انتي يا عشق الصفا..
بلاك فارقني طهر الحضرة والتجلي ..
وصلوات حزني بترجع مرفوضة..
وفيك سري..فيني مـنك صدق الكلام والانفعال..
بتذكرك وبدور أعيش لحظة من غير مـا أتذكرك
فـي قلب الحـواري ،وكت بتوه خطـانا..
تجن الريـح..تفر تـوبك..وتتبعثر خصل فرعك..
تشتت بسـيماتك ضــي..
تنـمو الـمسافة غنـا..نـمة فرحة بالرعشة مروية..
ننسـى الكــون كلو..ونغيب في معارج النور والبـها
بتذكرك ،
وبدور أعيش لحظة من غير ما اتذكرك
سـرب البداية..حفنة سـلام..مشاوير البوح..
هـمسة تغزل جواي ملامح الندم على الزمن البفوت مسراع..
ضعت فيك ومشت فيني ملامحك السمحة..بقيت موبوء بيك..في صـمتي..في حـزني..
في مشـي خطــاي وسط الشوارع والضجيج..
مـسكون بيـك..وسـاكنة في نبضـي،
تيراب هواجـس وقسـوة لحظة تفاجـئني بالتذكار..
عينـيك نبع قولي ..
وهـمسـة "مشـتاقة" اخـر حروف الندا البتهـمني..
عقب ما اطوف وفيني مباهـجك ،مشاعل تفجر درب الخطـى بالنـور..
بتذكرك،.. وبدور اعيش لحظة من غير ما اتذكرك..
فـي عـمق الـمغيب بتوهـمك..
و أفيض حسرة، آهة وجع مسكوب فوق شـقى الجدران..
حـزمة تصـاوير تـظللني من هجـير لحظة فيها بتذكرك..
و أتقاسـمك ونسة شقى، فضلت تكلل دروب البـوح جـوانا..
بتأمـلك مـعاني..فيها براي بعاني..
و صعوبة تسـآل تـمرق من مرافي الشفاه
وتـموت في أرصفة السـكوت..و الخـوف..والنجيع..
بتـذكرك ، ..
وتعجـز شـفاي من قـولة حـروف بتحـمل في جوفها معـاني اسمك..
و أنقش في عيون الزمن مساحة للفرح والتأريخ
كنت مرة وعشت في الأزل..
ويوم ما اتولدت..اترسم فيني خيط من رؤاك ..
جيت لقيتك طفلة في حضن الـمدينه..
قلت ألعب معاك بالطـين،
قلـتي تلعبي معاي بنار الحزن..
ومـشيتي انتي في رحلة أبد.
مرسومة من بدء الزمن..
وبقيت وراك ، جـزيرة هـواجس..
فاقد الهوية والملامح
بـتذكـــرك ، وبدور لحظة من غير ما اتذكرك
محمد النور كـبر
|
Post: #28
Title: Re: بتذكرك ، وبدور أعيش لحظة من غير ما اتذكرك
Author: Kabar
Date: 02-24-2003, 01:15 AM
Parent: #1
الـشفـيف ..رحـمابي
لـك الـود والـسلام..
والـله يا أخـوي ..انا ذاتي بعد اعادة شكلها قريتها تلات مرات..اشـكرك على الاضافة البعد ان كان الكلام يثير فيـك قليل الدهشـة ممكن اقول انا كتبت حاجة..
وحـتى حاسي بانو بينها وبين الشعر مـسافة ، واذا انت حسيت بانها قصيدة فليك شكري..
ودمت
|
|