الحقو هيثم دار يعرس اختو

هيثم احيلكم حيكايتو قولي صح مافيهو ريبة
قصتو المشهورة كانت حاصلة قبل سنين قريبة
تبداء بي مشوار عواطف بين قلوب مليانة طيبة
وريدة في عمق المشاعر كل يوم يزداد لهيبة
نجوي بت خالتو الوحيدة ريدة اصبح مبتليبة
واشتياق للقيا دايما كان يسوقو علي دريبة
كاتم الريد في دواخلو وبرضو كاتمة هي قليبة
مطوي في الوجدان غرامم زي خلايق ساترة عيبة
كان هي يومة الماتشوفو نهارة كلو تكون كائيبة
وتبكي لم الليل يهود ويسمعو الجيران نحيبة
الا في زمنو المعاكس ودنيتو الجايرة وعجيبة
لازمو قصر الليد ودايما حالتو للناس يشتكيبة
كان يقول لو سبته نجوي الشمس تجي من مغيبة
يتركو الناس دين محمد والنصارة تسيب صليبة
قال بعد تاكيد عزيمتو امي شورتة يبتديبة
اصلو في كل المواقف يحترم لي امو شيبة
مو بعيد جات امو داخلي دابة وصلت عنقريبة
وبي حنان الام بتسال مالو راقد علو طيبة
وانقطع حبل الوصال الكان خطاهو بتبدائبة
البنية هي زين سميحة وخاتي من شيتا يعيبة
والعفاف لابساهو مقنع وفاق جمال تاجوج نصيبة
الا يا هيثم جناية خالتك انت رضع حليبة
وفي الشرع تبقالك اختك ومابتكون لي اختك خطيبة