من صفات المذيع السيئ

اهدي هذه المواصفات الي القناة الفضائية السودانية

1- ضعف اللغة ومخارج الألفاظ
2- عدم التمتع بالقبول لدى الناس
3- السطحية وانعدام المعرفة بالمحتوى الذي يقدمه
4- طغيان الإعجاب بالنفس على أي شئ من حوله
5- عدم احترام آراء الطرف الآخر وعدم سماعه
6- التطرف في الملبس والمظهر
7- السعى لخطف الكاميرا من الضيوف بإحراجهم
8- أن يكون اسمه محمد بلال الطيب
9- الرتابة وعدم التجديد
10- الجهل بأساسيات المهنة من حيث الأداء و التعامل مع المشاهد
11- الإستظراف
12- عدم القدرة على ادارة حوار بشكل مفيد
13- الخوف أو الأنبهار بالضيف
15- التركيز على مواضيع تافهة أثناء مناقشة مواضيع مهمة
16- التعالي على الجمهور بحجة (الناس دي مش فاهمة حاجة)
17- تجاهل النقد وعدم التحسين
18- نسيان المهمة الاساسية له كمذيع أو مقدم برامج والإنخراط في مهام أخرى كالغناء او الرقص او ماشابه
19- عدم جدية التحضير كأن ينسى اسم من يقوم بمحاورته
20- محاولة فرض رأي مخالف لرأي الضيف
21-كثرة استعماله لليد بلا مبرر


يمكن ان تضيف ما تراه مناسبا

هو انت خليت لينا حاجه يالصادق
يديك العافيه

والله يا الموصلي اخوي لو تابعت برنامج في الواجهه لمدة عشرة دقائق يجيك اكتئاب نفسي وشعور بالغيظ و خاصة مقدمه احمد بلال الطيب و الطريقة التي يدير بها الحوار مستفزة و غير جدير بادارة هذا النوع من البرامج و احبذ ان يعمل في مجال بوليس الحركة لانه يجيد استعمال الاشارات , كما اتمني ان تنتبه الادارة الجديدة التي تطورت الي حد ما بعض البرامج و الديكور و نقاوة الصورة

الصادق سلام انت يا اخوى مشيت الامارات والله شنو بتشوف البلاوى دى من اصلو لى شنو يا خى دا والله يرفعالضغط
تحياتى وكل الاشواق

والله ياود الجيلي ما مشيت ولكن عما قريب بس الله يخلي الصحن الهوائي خلانا متابعين المستجدات في القناة السودانية و مرات الواحد ضغطه بيرتفع شوية من ناس احمد بلال الطيب و اشكاله , الله يكون في العون

الحمد لله يالصادق نحن البرامج ديه ما واصلانا في ايوا

الموصلي

يعني ما شايفين السودانية والله احسن من ناحية و اسواء من ناحية اخري .... يعني ما عندك قناة تنقدها

سلامات اخي الصادق،
انا بصراحة رأي مخالفك شوية ـ اصلو لمن كل شي يكون تمام من وين تجي متعة المشاهدة ؟؟ لازم تكون هناك الاختلافات والكنتراست في ما يقدم عشان
المشاهدة تتفاوت بين المتعة احيانآ والمغصة احيانآ اخري ـ
يعني الواحد ياخد فرصة ينتقد ويعلق ويتونس بالجيد و السئ معآ
انا غايتو اكتر شئ مجنني ان الصورة في شاشة الفضائية السودانية تقول ملونة بالوان موية !!

والله صدقت

كيف حالك وتحياتي


تعرف في البداية الواحد ممكن يتمتع بالنقد و مقارنة النقص بين القناة السودانية ورصيفاتها العربية ولكن في النهاية تصيبك الشفقة الي متي هذا التأخر ومتي يبدا التقدم ؟ ويصيبك نوع من الاحباط عندما تحلم بقناة منافسة للقنوات الاخري ... بخصوص رداءة الصورة فحقيقة الايامات الاخيرة لاحظت تحسن فيها بعض الشئ ولكن هذه المشكلة يمكن التخلص منها اذا كانوا جادين في ذلك

والله بيني بينكم كلامكم صح تلقي الموضوع سمح الضيف تمام لكن تلقي يجيب ليك الضغط كما حصل مع الدكتور كمال ابوسن والمتحدثين عنو اسمو منو احمد بلال ولا البلال
هو أصلا مفرض يكون تاجر ما يكون صحفي ولا اعلامي لانو بيعرف كيف يلم القروش وكيف يتلون

عزيزي الباقر

احمد البلال الطيب ده زي ماقلت زي الحربوية يتلون مع كل الانظمة و الحكومات بس الشئ اليغيظ يتعامل مع المشاهد كانه انسان جاهل وهو الوحيد العارف و المدرك لكل الامور ومعجب جدا بنفسه بس يكون تاجر دي حلوة , ومعجب جدا بالتكنلوجية اذكر مرة استضاف مواطن فلسطيني من غزة عبر الاقمار الصناعية و اعطاه معظم زمن البرنامج دون مقاطعة او مداخلة تبين فهمه او ادراكه للموضوع وانما ينظر فرحا لتمكنه من استضافة مواطن من خارج السودان

أذكر مرة أنني ذهبت إلى مكاتب جريدة الاسبوع التي كان سئ الذكر أحمد البلال الطيب صاحب امتياز اصدارها ورئيس تحريرها وكان أن صادف موعد زيارتي لمكاتب الاسبوع زيارة وفد من منظمة الوحدة الأفريقية للخرطوم وقد اقام ذلك الوفد مؤتمرا صحفيا وكان المتحدثون لا يعرفون العربية وكان طبيعيا أن يدار المؤتمر باللغة الانجليزية
ولقد والله فوجئت بان كل الصحفيين السودانيين الذين تواحدوا في ذلك المؤتمر لا يعرفون الانجليزية مما اضطرهم لطرح أسئلتهم باللغة العربية لتتم ترجمتها للانجليزية لأعضاء الوفد حتى يفهموها ومن ثم يجيبون عليها

استفزني ذلك المنظر جدا مما جعلني اسال أحمد البلال عن كيف يمكن لصحيفة محترمةأن تبعث صحفيا لمثل ذلك المؤتمر وهي تعلم أنه لا يمكن أن يستوعب ما يدور في ذلك المؤتمر لأنه لا يمتلك اللغة التي هي الأداة الوحيدة للاستيعاب

أتدري بم أجابني

بعد أن اشهر في وجهي ابتسامته تلك البلهاء قال لا فض فوه
هو أسه أنا القدامك دا قالوك بعرف انجليزي وبعدين نحن عندنا قروش عشان نصرفها على تعليم الصحفيين لغة تانية

تلك والله كانت إجابته

إذن فإن الرجل لا يزال هو نفس الرجل يمارس الفهلوة على الناس لأنه اسير قناعة تامة بأنه متميز بين مجموعة من الجهلاء ومثل البلال هذا لن يتغير لأنه لا يشك في أن شيئا ينقصه وهو من شاكلة الحمقى الذين لا يدرون ولا يدرون أنهم لا يدرون ولا يستحق من كان على هذه الشاكلة سوى الضرب على رأي المقولة الشهيرة

آسف إن شطحت لكن والله منظر البلال فقط يكفي لشحني بكمية من الغضب تكفي لنسف العالم

ولكم الود كله

دالي

ممكن يا اخوان نقلب البوست ده الي موجب ؟ فلنحاول نقترح مواصفات وارشادات اذا امكن للمذيع الناجح ــ ثم ندلف قليلآ علي اقتراحات لبرامج مفيدة ـ يمكن السادة في التلفزيون ياخدو بيها ـ
انا غايتو معجب بفكرة ـ اصوات وانامل ـ واعتبره برنامج متميز جدآ ـ بس يا ريت الاستاذ بابكر صديق يخفف شوية علي
الموهوبين الذين يرسلون تجاربهم الفنية ـ قليل من التشجيع وعدم التثبيط مطلوب ـ

اتمني ان اشاهد برنامج للمواهب في كل المجالات ..
اتمني ان اشاهد برنامج يغطي النشاطات العلمية لطلاب الجامعات ـ مثلآ مشاريع تخرج ـ بحوث علمية ..الخ. . دي ممكن ترفع الروح المعنوية للطلاب وتزكي التنافس بين الطلاب وبين الحامعات ...

يمكن تكثيف البرامج الاستطلاعية ـ دي ممكن تجذب جمهور المغتربين بالامل في رؤية اعزاء لهم ..
اريد ان اري برامج توثيقية عن حياة الريف ـ مثلآ يوميات مزارع ، أو معاناة راعي ... او .. او ياجماعة الحاجات الذكرتها دي دايرة امكانيات؟؟..

و و... سلامات استاذ دالي ـ

عزيزي دالي

واقعتك اكبر دليل علي جهله وعدم مقدرته علي اداره برنامج تلفزيوني ناهيك عن رئاسة تحرير جريدة , واجابته تدل علي جهل متقع لو ركز نقده علي خريجي كلية الاعلام كان يكون احسن حالا لان من المفترض ان يكون الخريج علي الاقل يجيد لغة ثانية غير اللغة العربية , ياخي في الشهر الماضي تم رفد 1400 موظف يعملون في الاذاعة و التلفزيون ولا يحملون شهادة ثانوي يعني المنظمة الاعلامية برمتها عاوزة اعادة صياغة وانا في استغراب اين دور وزارة الاعلام من اللغط ؟ هل هم راضون عن اداء الاعلاميين ؟ ام اصبح الاعلام شئ من الترف في هذا الزمن

والله يا الصادق كلامك صاح بس دا بنطبق على كل المذيعين مش البلال براهو
والمشكلة انو التانين ديل اسمهم مذيعين محترفين
يعني من الكم وتلاتين مليون ما لقوا واحد بعرف يتكلم عربي كويس وخليكم من الانجليزي

وبعدين صحي انت الوداك شنو؟؟ والله انا من سنين طويلة ما بشوف تلفزيون السودان ولو فتحوه وانا موجود بقوم، أولا لأنو برفع الضغط وتانيا لأنه بسبب التخلف العقلي وتالتا لأنو ضياع زمن وما مفيد خالص ورابعا

سبق وقلت ليهم كدي بالأول دخلوا كل ناس التلفزيون ديل مدرسة محو الأمية عشان يتعلموا الف باء الصورة والصوت والأضاءة، ولو قلت اي حاجة يقولوا ليك الأمكانيات، يا خي والله ما ممكن تكون اللمبات غالية للدرجة دي!!! واي هاوي بكون شايل كامكوردر بطلع صور أحسن وأوضح واكثر تعبيرا من تلفزيون السودان والصوت المرة واطي ومرة رايح وسط الصدى والمؤثرات الفارغة، أعمى ومسكوه عكاز

الإقتراح الوحيد العندي ليهم انه اذا بليتم فاستتروا، ما في داعي يذيعوا الهباب للعالم، خاصة حكاية الرئيس دخل الحمام والوزير مشى السوق دي، أعني انهم لو كان بجيبوا الأخبار الحقيقية البتهم الناس في الخارج كان نقول معليش، بأي صورة كويس وأحسن من العدم، لكن هم متخيلين نحن مشتاقين لصورة الوالي والدفاع الشعبي واحمد البلال وحسين خوجلي

طب والنعمة دحنا طلعنا منها عشان ديل !!!ا

فعلآ يا الصاوي الاضاءة دي انا ما عارف الغالبهم فيها شنو ـ ياخي غباشتا وشناتنا دي محتاجة كشافات استاد ويا حبذا لو ساعدوها بشوية مسوح انشاء الله بي زيت فول ـ والله لكين مهما ولعوها ما حتنفع مادام الديكور يظل من الدواكن ممتصة الضو ـ

عزيز الصاوي

والله الواحد بحاول يهرب من قرارات بوش الرعناء وصورته ويشوف برامج اقل اثارة ولكن تصاب باحباط اكبر من وغيظ اكبر من الهجوم الامريكي المرتقب علي العراق ... وحقيقة ابسط كاميرا يمكن اقتناها من اقرب دكان يمكن ان تعطيك صورة اوضح و انقي من الصورة المقدمة وتنقصهم معالجة البرامج بالكومبيوتر وتنقيتها وهذا يحتاج الي برنامج رخيص للغاية , واخص البرامج المسجلة اصلا وماعارف ماهو دور المخرج ؟ ودور المنتاج ؟ هناك برامج مسجلة مسبقا وفيها اخطاء تقدم بنفس الاخطاء بعد عشرين سنة واذكر علي سبيل المثال تسجيل اغنية نادر الخضر وحاول الفنان ان يتراشق فوقع من مسرح التلفزيون ولازال التلفزيون يقدم الاغنية بنفس الاخطاء , والله زي ماقلت عاوزين يدخلوا مدرسة محو الامية عشان يتعلموا الف باء العمل التلفزيوني اما الصوت و الاضاءة فحدث ولا حرج

وبعدين زيارات المسؤولين و افتتاح معسكر للتدريب تدل علي الفراق البرمجي و عدم ابتكار افكار جديدة واخص برامج العيد وزيارة السفراء في منازلهم ماذا يستفيد المواطن من ذلك ؟ افتكر اذا قدم برنامج علمي يمكن ان يستفيد المواطن اكثر من معرفة كيف يعيش السفير واسرته وماذا يأكل ويشرب .... كما اهدار مبالغ طائلة في عمل الديكور من اعمال نجارة و حدادة ومشابه ياخي العالم تقدم واصبح الديكور يتم رسمه ببرنامج كومبيوتر لاتزيد تكلفته عن سعر خشبة واحدة وهناك الكثير اسكت خليها ساكت

الصادق ... تحياتي وإليك ...

22/ الرشاقة ال كتلت إشراقة
23/ أنا آينشتاين ، أنا نجيب محفوظ ، أنا ليفنهوك ، أنا أعلم كل شئ !
24/ أنا أكبر منافق ! آآآآه مجامل !
وللحديث بقية ، بعد أن أستعيد ثقتي في التلفزيون السوداني , وآخد فيهو ولو نص ساعة في اليوم ! ( وقت المسلسل ما محسوب طبعاً ) ...

الصادق حبابك..
انا غايتو وبكل امانة اخر مرة شفت فيها سيدنا تلفزيون السودان قبل اربع سنين قمرية،اضفت قمرية عشان ما يتهموني بانتهاك روايع الباشكاتب..لكن عندي سؤال وحيد عن عدد الأسهم التي يمتلكها أمن النظام الحاكم اليوم في جريدة أخبار اليوم ؟
ودمت
كبر

بتاريخ الجمعة 31 يناير , كاميرا برنامج مساء الخير الخارجية فى منطقة المسيكتاب

استضافوا شخص عمره 22 سنة ونموه الجسمانى متوقف
سألته المذيعة ( الخفيفة اللفيفة ) : انت عمرك 22 سنة
ولسة ما اتزوجت , ما عندك فكرة تتزوج !! رد عليها
بسرعة : لا !! , المذيعة ( الهبلة ) تستنكر عدم زواجه وهو فى ال 22 وكأن شبابنا السودانى بيتزوج فى ال 15,
عينك ليه حجمه حجم طفل وحتى صوته , الهبالة ليك شنو

لما المذيع يكون ماااابيعرف يتكلم دى كااااارثة

طيب المذيعة عرفناها هبلة , المخرج دة نائم
وين !!! والفقرة مسجلة , يعنى ما على الهواء

البرامج دى بتهذبوها وتنقحوها ولا الشغلانية ساااااى


شاهدت الحلقة فى وجود صديقة اردنية وزميل سودانى , الاردنية قالت لى : والله بتكم عيب عليها , لما هو وافق يلتقى بكاميرا البرنامج هى ما فى داعى تحرجه بالسؤال دة
زميلنا السودانى قال : لو كنت محله كنت حاقول ليها لو
بتوافقى بى ما عندى مانع
حكيت الموقف دة لشاب سودانى تانى , قال لى : ايوة كلام محمد صاح , انا كمان كنت حارد اقول ليها , عشان تعرفى
كرمنا حرم ما تمرقى مننا الا والبايرات ناقصات واحدة



بالله عليكم برنامج مساء الخير دة , باعتباره من البرامج
الخفيفة على قلبنا , خلوه حكر بقرار كريم منكم
لايمان احمد دفع الله وايناس محمد احمد , لغاية ما الله يفرجها , دة لو فرجت , وارحموووونا
من المبشتنات المبهدلات الهبلات