مناحة .. للزمن القبيل

مناحة .. للزمن القبيل


01-28-2003, 09:59 AM


  » http://sudaneseonline.com/cgi-bin/sdb/2bb.cgi?seq=msg&board=5&msg=1043744364&rn=0


Post: #1
Title: مناحة .. للزمن القبيل
Author: البعيو
Date: 01-28-2003, 09:59 AM


مناحة .. للزمن القبيل
للشاعر سيد أحمد الحردلو


فترت خلاص من السوليت
ما خليت وما بقيت
وكم شقيت بلود وبحار
وكم باطنت كمن جان
وكم بارزت كم سلطان
وكم عديت جزاير واق
وكم لفيت سواحل قاق
وكم تاوقت في المحظور
وكم تاوقت في المشكور
وكم سولت في مدن الهوى والنور
وكم طاشت سهامي هناك ..
فوق وادي الملح .. والزور
وكم طشيت سنين رايح
دنين ما جيت
وكم مرات أقع وأقوم
تلاتين زول
وكم مرات تعيش يا زول
أموت وأقوم
وألقى الدنيا يا هه الدنيا
ألقى كمان حمار كلتوم
وكم مرات جينا لقينا
ناس الصبرة و البعشوم
ياكلوا تقينا
ونحن بقينا ناكل الدوم
حليلك .. يا مسيكة الصفقة والمردوم
حليل زمنك
كان شبال .. وكان غناي
حليل زولك وكان فارس ..
وكان سواي
حليل فهمك وكان مفهوم
وكان عطاي
حليل إسمك
كان فوق السما مرسوم
وكان عاشق
وكان معشوق
وكان معشوق وكان موسوم ..
وكم مرات بلعني الحوت
عشت سنين في بطن الحوت
وبطن الحوت كما التابوت
والتابوت تراه الموت
وكت أقوم من التابوت
وتاني أعيش
وأبقى كتير
وأبقى غزير
وأقوم أبلع جنات الحوت
وتاني الحوت
يقوم يديني بالنبوت
ويبلعني .. ويفوت الفوت
أكون محبوس في بطن الحوت
دنيا دبنقه
دنيا أونطه
دنيا تجيك
ودنيا تفوت
دنيا تكوس
ودنيا تعوس
دنيا عبوس
ودنيا عروس
ودنيا تقولك ..
أسكت لف .. وأسكت دور
وأوعك تلمس المحظور
ويعني المعنى ..
إنك زول بهيمة و بوم
وماشي عديل .. على الملحوم
حيث الهبجى
ود اللبجى بالقدوم
فترت خلاص من السوليت
ومن قولة أريت وأبيت
وما خليت وما بقيت
وشفت الشوف
وبعد الشوف
رءيت الدنيا بالستيان
شفت في ناس حلاوة وذوق
شفت كمان
في ناس تانين
عدمانين و خرمانين
وما لاقين ضفر ملين
ولكن - شوف عجايب الدنيا
مستورين .. وتغيانين
فترت خلاص من السوليت
وما خليت .. وما بقيت
وقت الروب
وحتى الروب
يجيك باللفه
ما طوالي زي الووب
وزي حبوب
أقول ياخينا
مالك .. ليش
لأنه فلان .. أمير الحوت
ياكل الناس
ويبلع كل يوم خمسين
ويقدل في ملجة السوق
ومالي جرابو بالأحزان وبالأكفان
ومافيش زول بني آدم
طبظ للحوت عيناتو
وقال .. البغلة في اللبريق
تقول لي .. ليش
أقول ليك ليش
لأنك إنت زول نصين
نص مافي ..
ونص مافي
ونص معليش
ونص شقيش
وعمرك راح في هذي الدنيا ..
في الطرطيش
وفي الهبيش
وفي قولة .. ولكين ليش
بلاوي تخم حروف الشين
من قشرانة .. لي شقيش
وحتى الشولة بعد الشرطة
في شق الكلام الشين