Post: #1
Title: الفيش فاش
Author: سجيمان
Date: 01-27-2003, 07:53 PM
النقعد في واطة الله دي......ونفكر بعقل شوية... ما نشوف نفوسنا بس.... لكن نشوف غيرنا برضو.... سجيمان حافظ روايات شكسبير صم...ومتبحر في فلسفة... بن خلدون....وهيغل ..وجان بول سارتر....وسيمون دي بافوار....يقعد في القهوة....مع بتاعين الاورنيش....الكهربجية....والبناين....ويشرح لهم ..... اكون اولا اكون تلك المعضلة...وتغني سميرة دنيا باعلى صوت....وسجيمان... عندو قصيدة...مليانة من كل اصناف البديع وضروب الجناس...والكلمات التقيلة.... الجابها من امهات الكتب...وحبوبات الكتب..وعاوز يسمعها للجماعة... الزول دا مجنون خلي بالك...نحن مالنا ومال الشنفلي... والله تأبط شرا....والله حتى عنتر بن شداد...؟ ديل ناس ماتو زماااااااااااان...وراحو في حق الله.....خلينا مع الف الطوب والمسطرينة...ومفتاح النجمنجم......سجيمان زعل ونطط عيونو وحمرهن... وقال انا غلطان....مالي ومال الرجرجة والدهماء..... الدهماء دا يكون لون جديد؟...زي البيج...و اللون الفاري؟......عارف يا بتاع الاورنيش يا متخلف انت.... نحن نعاني من ازمة ثقافة....واغانينا تعاني من التقوقع...والانحصار داخل السلم السباعي الضيق.....والادب السوداني في طريقه الي الانتحار..... الانتحار بالصبغة...والله بالبنادول.... الكهرباء لا .... لانها حارة.......وانت يا عربجي.... يا الديمة مقابل دبر حصانك....ازمة السياسية السودانية....لا تعالج بانتعال الباتا....ولا بالقامها حزمة من برسيم...البسو الياقات...وتهندمو جيدا....واحتسوا الشعب مدام...معتقة.....الزول دا بيقول في شنو؟..الزول اظنو زييييين... متعلم...وفاهم....كيفن ما فاهم؟ يا زول ها..... دا ما شفتو في التلفزيون..... عليك امان الله خلانا كلنا فاتحين خشومنا...وما عارفين منو ولا كلمة..... والله ظانيتو هو زاتو بعد مرات ما بيعرف نضمو........الزول مثقف..... يا زول .... انت بتلعب
|
Post: #2
Title: Re: الفيش فاش
Author: عشة بت فاطنة
Date: 01-27-2003, 08:59 PM
Parent: #1
السجيمان الليلة قالب شماشة بسفسطة بطاطس ، الا اخير ليك اعمل حسابك ناس سارتر وبوفار ديل كاشفين ورق الكوشتينة بتاعك شوف غيرة
يا معلم، سلام سيجي، فاقدنكتعزمنا مرارة وفشفاش وتقلب سفسطة بطاطس
|
Post: #3
Title: Re: الفيش فاش
Author: ود شاموق
Date: 01-27-2003, 11:29 PM
Parent: #1
سلام مكعب سجيمان
IT NEEDS AN EXTRACTION
|
Post: #4
Title: Re: الفيش فاش
Author: سجيمان
Date: 01-28-2003, 01:05 PM
Parent: #1
عشة يت فاطنة....... انت معزومة كسرة بملاح تقلية.......ما اخير لك؟
ودشاموق........ فرتقت السلام....ورديتو ليك... مضروب في اسداس
|
Post: #5
Title: Re: الفيش فاش
Author: almulaomar
Date: 01-28-2003, 01:28 PM
Parent: #1
الأستاذ الكريم س جي مان
عنوان المقال شكلو كده على وزن الكيت كات مش الفيلم العربي الكيت كات أب ورق أحمر الشكولاته أصلو أخوك متخصص في الشكولاتة برغم نصائح الأطباء والخوف يا غالي من زيادة الوزن وتقدم العمر وعدم ممارسة الرياضة ، وطبعاً لقيت الموضوع برضو شوكولاته.
|
Post: #6
Title: Re: الفيش فاش
Author: سجيمان
Date: 01-28-2003, 02:23 PM
Parent: #1
اخوي الملا عمر......... الفيش فاش برضو زي الشوكلاتة..لكن من فصيلة حلاوة قطن.... بس طعمو ما حلو
|
Post: #7
Title: Re: الفيش فاش
Author: سجيمان
Date: 01-28-2003, 02:23 PM
Parent: #1
اخوي الملا عمر......... الفيش فاش برضو زي الشوكلاتة..لكن من فصيلة حلاوة قطن.... بس طعمو ما حلو
|
Post: #8
Title: Re: الفيش فاش
Author: Elmosley
Date: 01-28-2003, 02:28 PM
Parent: #1
عزيزي سجيمان جيدا جيت
اها قاعد وعامل حمايه للسلم السباعي الدياتوني المهرمن الموشح بالتضاد الصوتي الافقي
والباقي علي الباقين
تسلم
|
Post: #9
Title: Re: الفيش فاش
Author: سجيمان
Date: 01-28-2003, 02:47 PM
Parent: #1
اخوي الموصلي....... بارك الله فيك
لكن يا اخوي جنس نضمك دا ......انا مابعرفو....... انا زول دلوكة سااااااااااكت
|
Post: #10
Title: Re: الفيش فاش
Author: Elmosley
Date: 01-28-2003, 02:58 PM
Parent: #9
حاشاك والله بوستاتك فيها متعه في كل البوردات
بس حبيت اشغالك
|
Post: #11
Title: Re: الفيش فاش
Author: garjah
Date: 01-28-2003, 03:24 PM
Parent: #10
سجومي
معليش ما فهمت حاجة
ممكن تفهمني
تكون عايز تلف لينا العمة يا معلم
بعد لبستنا الطاقية
|
Post: #12
Title: Re: الفيش فاش
Author: سجيمان
Date: 01-28-2003, 04:36 PM
Parent: #1
شكرا يا موصلي يا ذوق يا فهم.........
قرجة........ زولك الماشي وشايل سجارتو في كتفو دا؟....... دي لافيها بشنو؟
|
Post: #13
Title: Re: الفيش فاش
Author: garjah
Date: 01-28-2003, 06:26 PM
Parent: #12
تتجازى يا سجومي اللذيذ
عكازي متبرع بيهو ليكم يا ناس الرياض تنجضو بيهو خرفانكم
شرط تولعو نار كبيرة في السفارة....ااااي السفارة...مالك صريت
وشك...زي بنطلون الجينز القديم...وتبطلو حكاية تختو خرفانكم في
التلاجات تاكلو فيها وتجغمو شهر كامل...نحن هنا يا كافي البلا الامام
قبل ينزل من المنبر يكونو الجماعة لحسوهو وكاسو غيرو
التمر راااقد عندكم وشوية موية من الحنفية...لكن شربوتك عارفو ما
بتاع يومين....تكون مصبنو من العيد الفات..بس اعمل حسابك ما يقوم
بيك
|
Post: #14
Title: Re: الفيش فاش
Author: سجيمان
Date: 01-28-2003, 09:46 PM
Parent: #13
قرجة ..... نحن عيدنا هنا... ما بنضوق لو طعم....وحاتك انت....نحن شغالين عشان الناس يفرحو فوق شقانا....وبعدين النار خلي زول غيري يولعها.... علا انا بشيل عكازي وبعرض....واغني.... النار ولعت وبقلبي بطفيها...... والشربوت البيقوم بينا...زمااااااااان كنتوشو اتكسر..... حليك انت وحليل الحي
|
Post: #15
Title: Re: الفيش فاش
Author: abas
Date: 01-29-2003, 09:05 AM
Parent: #1
سجيمان
بمناسبة الشربوت ده ممكن توصفو لي كيف
وممكن يعملوه كيف
عشان نفسي فيه
|
Post: #16
Title: Re: الفيش فاش
Author: سجيمان
Date: 01-29-2003, 01:39 PM
Parent: #1
والله يا عباس....... كان قلت لك بيسوهو كيف اكون كضبت عليك.. لكن انا بشربو بالحيل........ خليني النسعال لك
|
|