ديوانين للاستاذ هاشم صديق في مكتبة بجدة ( كلام للحلوة + جواب مسجل للبلد )

دائما احب التجوال في المكتيات وهذه هوايتي المفصلة
حين لا اجد وقت للاطلاع ادخل اي مكتبة واقزز بالكتب واطلع
لكن اليوم وجدت ما لم اتوقعه
ولكم مني كل كام يوم قصيدة من كل ديوان
ونبداء بكلام للحلوة
لما شقتك
ليلي ضو وبق نور
ونرجس الجنة المفرهد
رف بي جنحات عطور
وغني فارسك
خت صورتك في الاطار
في الليالي نجم يلالي
ونسمة في وهج النهار
وقال قي وصفك لما بنتي
احلي منك... برضه انتي
ومافي غيرك زول معانا
حتي كان يا سمحه غبتي

ومره جالن الف خاطر
بي عيون عقلي المساهر
فجأة عينيك الحبيبه
قالو سارح وين مسافر
عشت قولن شيل وصفقة
وقلت بس يا ريتني ابقي
همسه في حلم الاميرة
او سبايب في الضفيرة
او عقيد في تبر جيدها
او قليب في راحة ايدها
يا زمان اسمعني واكتب:
البريدها وريدها سيدي
وريدي سيدها
الزمان لوحتي بالغ
ما اظن في زول يعيدها

يا حلاتك
مره همسه...ومرة نسمه
ومره هلت نجمه غابت
ومره صحوة غمزة نامت
ومره ضحكة ترضي شوقنا
ومره كلمة تضوي فوقنا
ولما نسرح فيك قادله
زي ملايكه علينا نازله
بس نغني
يا حلاتكم يا اهلنا
يا مصابيحنا ونجومنا
الضاويه في واحات زمنا
1971

ودي امونة من ديوان جواب مسجل للبلد

كل البنات امونه يا خرتوم
معاي ساعة افتح الدكان
معاي ساعة الدرس بالليل
معاي في البص علي امدرمان
من الكبري الكبير في الليل
اعاين في البحر مهموم
الاقي وجيها شاقي النيل
وفي ساعة التعب والخوف
تشيل خطواتي وامشي عديل
دحين خاتي
اكان يا يمه صبحت نفسي
ساعة الكتمه
من الزمن والناس
وصبحت راحتي
لا من القي دمي يفور
تمد ايدنها
تمسح للعصب والراس
امانه كلامها كان رفرف
وكت ساعة الدرس يا ابوي
يطير قلمي
ويزغرد سنو في الكراس

ونواصل مرة اخري

و تسلم
بالله قلب كلام للحلوة في الاخر
و نزل لينا ضي الفوانيس البعيدة اتعب عيونك و انطفا
لمتين مواعيدك سراب و الر.....

بتاعت خطاك يالشبح النحيل لسع بعاد
المكتبة اسما شنو؟؟

الاخت عزة
شكرا لك ومعليش علي الحوامة في البورد
المكتبة اسمها الامالي
في مركز الشعلة التجاري شارع المدينة
الطابق الاول
جوار مركز المدينة
واذا ما تحصلتي عليه ارسلي ماسنجر
وسوف ارسلوا ليكي

القصيدة ما لقيتها في الديوان ممكن تديني اسمها وابحثها ليكي مرة تانية لاني في المكتب

اهديكي القصيدة دي

الشوق والوطن

يا جنا
في بعادنا عن ارض الحنان
الليلة مرت كم سنة
واشواقنا لي نخل الفريق
الضامي في سدره الجنا
وللحلوه ام وجها قمر
ضواي مورد بالمني
الليلة زارتنا الرؤي
المنسوجه من عمق الجذور
رسمت صور ضوت جمال
وجوه الخيال عاشت دهور
افراح فريق يوم الحصاد
وجريف يضم طينه البذور
وزغروده وصلت للسحاب
وعريس معطن بالعطور
وجهاد فتح درب الصباح
وشهيد ملفح بالزهور
وشباب بعز ديمه الارض
شايل مبادي نضاله نور
وف مره طار بينا الخيال
بعد الغياب الطال جرح
شوفنا البخور في الليل عبق
والليل شرب عطر الطلح
والقمرة نامت في الرمال
والطين شرب نديان صبح
وحدا الصريف قام الخدار
حاضن صفيقات القمح
والوادي فرهد بالخريف
الٌشر بي قشه السمح

الفين سلام
يا يمه يا شتل المحنة
الشب في وسط الجروف
ويايابا يالدرع المتين
الليهو كم سجدت سيوف
وياجده يا ام صوتا حنين
حجواتها بالوادي بتطوف
وياسمحه ياشمس الفريق
الليها كم غنت حروف
في الغربة يا اهلي الحنان
كم عشنا في قسوة ظروف
اشواقنا لي ارض الوطن
ولي خضرة الوادي العطوف
خلتنا كم ساقنا الخيال
طار بينا لي دار الولوف
والفرحة غنت صفقت
والشوق حضن شتل الجروف

نديكم دي برضو يا عزة

حروف اسمك
وعشان الحلو دا يا عزة


حروف اسمك
جمال الفال
وراحة البال
وهجعة زول بعد ترحال
وتنية حلوة للشبال
ودنيتنا ومشاويرنا
وغنواتنا اللي ما بتنقال

حروف اسمك
نجوم ركت علي الياسمين
فرح في عين جمالهاحزين
اساور في ايدين طفلة
بتحفظ في كتاب الدين
زفاف عاشقين بعد فرقه
وسط باقات دعا الطيبين
حروف اسمك
عقد منضوم بخيط النور
وطلة وردة من السور
ونغمة تنادي من طمبور
وشعلة فرحة في الوادي
تشع جذلانه ليها شهور

حروف اسمك
وكت اشتاق وارحل ليك
واسرح في عسل عينيك
بتحضني
قبل المس حرير ايديك
تأـرجحني وتفرحني وتخليني
ادق سدري
واقيف وسط البلد واهتف
بريدك يا صباح عمري







ٌ

شجن الزمن

كل وردة...وكل قمحه
كل ساعه وكل لمحه
كل تايه وكل سمحه
كل شي ....راجع لخالقه
والزمن لو فات بخطوة
ما بتعود ترجع دقايقه


ونحنا قاسينا وشقينا
وآخر الرحلة الحزينة
غبنا في الحسره وبكينا
وقلنا دنيا...وحي علينا
نحنا فيك....صعنا انتهينا
راح زمنا
وغاب املنا
ولو بتقدر وماحتقدر
ابكي يا شراع المدينة



يا زمناالخت رحله
في صحاري المستحيل
بالغموض لفح املنا
وضاري من عينا السبيل
وني مثلنا
ووين قيمنا
ووين صحاف ناسنا القبيل
ومالو حالك يا زمنا
ديمه تتجبر تشيل

يا سنين عمر المثالي
الماها زي كل السنين
فيك نجم الالفة غرب
وضاع معاك سر اليقين
حتي احلام الصداقة
الكانت العز للجبين
مات ضياها
وراح شذاها
ورنح اغصانها الحنين
لي مثلنا
ولي قيمنا
ولي صفا الماضي الامين
وياهو حالك يا زمننا
ديمه تتجبر تشيل
الوهم فيك انه نحيا
واليقين هو المستحيل
وكل ساطع .. وكل ضايع
كل شي
راجع لخالقه
والزمن لو فات بخطوه
ما بتعود ترجع دقايقه