مالكم متشاكلين ياناس المنتدى السياسي ؟؟

قلت الواحد الليلة يصوم عن صفحة الوفيات المشيت أكتب فيها
وأشوف الحصل شنو في ميشاكوس ودافوس
دخلت المنتدى السياسي
لقيتكم متشاكلين ونيرانكم مولعة
شيء عكاكيز
وشيء سواطير
وشيء سكاكين
وتلاسن بالكلمات
وتراشق بالحجارة
وجدت بعضكم مفلوق
وبعضكم مفهوق
والبعض الآخر قد لف رأسه بشاش
غايتو النسوان واقفات بعيد
وكل واحدة رافعة برطوشها
طبعاً قلت لأصحابي في صفحة الوفيات
ماتمشوا تكلموا ناس المنتدى السياسي
وتقولوا ليهم ابوحراز قال
يقوموا يكسروا عليكم هنا
ويختلط الحابل بالنابل
وهونولولو بكاب الجداد

قال أدب سراويل قال
ليه سموه كدا ؟؟؟

بالمناسبة نحن منتدنا اليومين ديل خرفان ضحية بس
تعالوا أكلوا ليكم شية
معانا عمو قرجة وكولا وغريبة والزولة وحنين ونسمة وبت الجزيرة وناس ياااااااااااااااي

يا ابا حراز
بعد السلام
الدواس عمار دار... الدواس هو المشاجرة بلغة هجين الخرطوم...

عشان كدا لمن الدواس يكتر البورد ببقى عامر بيكم وبالناس البداواسوا

الدواس دائما بالعصا والسكين والكلاشينيكوف
طبعا الشكل بالبونية والكف والشبشب... الخ

لكن ... ألمي البارد بقد الدلو

ابو حراز يا خى ازيك وانت وين ياخى

كنا هسى انا وشنتير بنقطع فيك وقلنا انت ودافى وبعض الناس انتو السودان .. وانا اضيف شنتير معاكم اما انا فمن ناس الدواس والله يستر

أدعو جميع الاخوة الدخول لهذا البوست الذى حتما سيكون فيه الحل والحكاية ما مستاهلة والله .. لكن على شرط يضعوا أسلحتهم برة ويجيونا

ولا شنو يا أبو حراز

معليش دخلت توش وبدون استذان .. ولو عندك كلام تانى أنا سفروقى معاى

هووووووووى كلامى دا هزار وبس

لكم حبى