Post: #1
Title: روضة البورد....جنة الله على الأرض
Author: zola123
Date: 01-23-2003, 05:00 PM
أحبتي مع الاعتذار لاسم المنتدى ولبكري
كتبت ما يلي وكلي خوف من ان يثور على احد المذكرين فيه, قمت بالتعديل مرارا حتى وصل للصيغة التالية, ارجوا استقبالها بصدر رحب وقرائة ما بين السطور لعلنا نفهم المغزى
تحياتي وحبيي للجميع
____________________
روضة البورد( جنة الله على الأرض)
العنوان..........الشبكة العنكبوتية, شارع المنتديات العربية, بيت نمرة 2, مكتوب عليه : سودانيز اونلاين.
شروط التقدم للروضة.....
لا توجد حدود معينة للسن , فكل الاعضاء أطفالنا ونرحب بهم شبابا وشيابآ
الشرط الوحيد ان تكون متعطشا للحنان, ومقبلا لنهل جرعات الحب والتقدير, فليس لدينا هنا من سيعكر صفو حياتك مثل الخارج.
الواجبات......
تقعد تحت ضل الشجر وتكتب واحنا حنقرى ليك, ولو ما عجبنا كلامك ما تخاف ما حنقول ليك, انتا حبيبنا وجيتنا لحد بيتنا كيف نخيب ظنك, ولو داير تقرى بس ما عندك مشكلة.
لائحة العقوبات.....
اي زول يضايق زميلة حنزعل منه ونخاصمة ونهيج فيه ونشاكله, بس احنا ناس طيبين ما بنصل لعقوبة الطرد من الروضة دي ابدا, بنهدد بس
يعني لو طردنا االناس حيقعد لينا فيها منو؟
رسوم الاشتراك........
مية وحدة نقد وردية, تغلفها في مظروف حب وترش عليها بختين عطر سلام وسماحة, ترميها في البوسطة وما مهم تصلنا, المهم تكون طلعت من زمتك
....نتعهد لك بقضاء أوقات ممتعة ونعزلك عزلآ تاما عن العالم الخارجي
نوفر لك اقصى درجات الراحة والأمان والانسجام
ستمطر عليك السماء معجبين لم تحلم بهم من قبل ان كنت حتى هذه اللحظة مغمورا وان كنت من المشاهير فحدث ولا حرجو سنصنع لك تمثالا ذهبيا في ساحة الروضة, وطقم حراس للذود عنه ضد اي محاولة حتى للمسه.
اذا راتأينا انك مشروع لكاتب ناجح او مشهور فسننظر ايضا في أمر حراستك وليكن بطقم أقل عددا من الاول
أما اذا كنت ما موهوب او موهوب لاكن حتى مافي معاك كرت توصية فلك الله........
.......يتبع
|
Post: #2
Title: Re: روضة البورد....جنة الله على الأرض
Author: zola123
Date: 01-23-2003, 05:02 PM
Parent: #1
.........وكدي تعالوا في جولة تفقدية عشان نعرفكم على روضتنا الحبيبة, فالمشاهدة خير برهان.......
ده بكري الناظر, أطيب ناظر في الدنيا, بس الله بلاهوا بحبة تلاميذ ما عارفة حيستحملهم ليمتين
الفي المكاتب ديلاك ناس الادارة, ما بنشوفهم كتير ولا بيقولوا بيعملوا في شنو, لاكن ما شاء الله الروضة شعلة بيوجودهم.
على يدك اليمين ناس سنة تمهيدي أول, موديك وساري الليل, ديما , حنين’ كحلوش, بت العرب, رؤى وعزة والباقيين......
ناس حلوين ولطاف كانوا بيتفرجوا في البداية على الروضة , لاكن ماشاء الله كمان شهر ويسحبوا البساط من السناير.
الصف الفي النص داك حق ناس تمهيدي تاني, ناس الجندرية وبت الخليل, بت القبايل وزولةو روز , بت الجزيرة, نصار, ود الجزيرةوالباقيين
ده صف الشطار, في الدرس شعلة نشاط ووقت الفسحة ماشين جنب الحيط
قبل الفصل التالت دي اوضة الفنون, ناس فلان وفلان وفلانة والاسامي محذوفه عشان ما يزعلوا , غايتو الاوضة دي على قدر تجددها ونشاطها ما قادرين نعرف الناس مقبلين بعيد عنها ليه
آخر مرة مدرس الفنون تصدقوا زعل من طالبة في سنة أولى؟ والله مشى اشتكاها للناظر زاته لمن انا حنيت عليها , غايتو الله يحنن قلبك عليها بس
عشان نصل لفصل ناس سنة أولى كبار الروضة لازم نمر على الساحة
بس الله يستر ويكونوا حبسوا ناس أساسي وسنتمنتال ومشاكس لحد الجولة التفقدية ما تخلص
الللللللللللللللهه, ياهو داك أساسي الشاغب شايل علبة الكبريت وولع في عمة عاطف عبدالله... يا أساسي ما لقيت الا اليوم تفضحنا, قام جاري قال سنة تمهيدي تاني الساكتين ديل أولع ليهم في اوضتهم برضو.....
طبعا ده من أطفالنا المدللين وما بنزعل منه ولا بنفكر في اي اجرائات ضدو, تعرفو لو اتصلح حالوا بتبقى الروضة دمها تقيل...
القاعد في المسطبة داك العمدة قرشو, طبعا ناس العمدة ديل اتخرجوا من زمان , لاكن لسة محتفظين بعضويتهم في الروضة, قاعد يتونس مع ناس قرجة والجعلي وابو حراز داكي حصة وبسمع ونسة الكبار.قالوا ليه كم يوم حردان الفصل عشان قالوا عنه بتاع نكت وضحك قال يتعلم ونسة الكبار شوية.
يومين وحاتكم ويرجع يكتب جنه اللذيذ داك.
تحت الراكوبة ديك ركن الشعراء, تلقى الجماعة المرهفين ديل بيسمعوا في العصافير ويكتبوا معاهم..... شرنوبي وود شاموق وسوما ديل قصة تانية بعدين بنحكي ليكم عنها......
اها الفي آخر الممر ده سنة اولى
الناس القدام , منهم صغار سنا لاكن كانوا من االرعيل الأول نهى, الخواض, رقم صفر, المسافر, ديك الجن , الزول زاتو وود الحردنلوو قصدي ود عزة
في آخر حردة ليه حطم الرقم القياسي و أظنه من الآن يفكر في سبب للحردة القادمة قالوا دي حتكون غيبة سنة...
بين هذا وذاك نعود لمجلة الحائط وعريضة الشكاوي
يا بكري دقوني, يا بكري عضوني, يا بكري شدت لي شعري, يا بكري داس على رجلي, يا بكري خطف كراستي, يا بكري جرح احساسي يا بكري نبذني, يا بكري اطرد لي فلان, يا بكري اضرب لي علان, يا بكري عاقب لي فلانة يا بكري.. يا بكري.. يا بكري
انا راسي صدع فما بالكم ببكري
مع ذالك ما قفل ضرفها ولسة فاتحها متحلي بالصبر وبحكمة ان الأطفال أحباب الله
وما دام ارتأى ان يقوم بتلك المهمة الصعبة فعليه الحتمال والصبر.
ملاحظة في المستقبل ستتم الاستعانة بأطباء تفسيين ومشرفين من القمر للتكيف مه رغبات رواد الروضة الأحباب.
فعلى من يرغب التقدم من الآن لتلك المهمة الصعبة
عشتي يا روضتي عامرة وهنية
وليسقط كل مخطط للاعتداء على حرماتك, ولا عاش المخطط الامبريالي
للنيل منك وكسر شوكتك, وتبا لقوى الاستعمار الغاشم التي تحاول النيل منك
ونندد باليهود المتربصين بالروضة كمان واي زول دايرين تضيفيه للقائمة
عشان الناس دي بقت فاضية لينا
تحياتي وحبي وعليكن الله بطلوا شكل خجلتونا
وكونوا قدوة للصغار من رواد البورد
زولة123
|
Post: #3
Title: Re: روضة البورد....جنة الله على الأرض
Author: Elkhawad
Date: 01-23-2003, 05:23 PM
Parent: #2
لووووووول
زوله نسيتي اهم ناس في الروضه
الجنايني وغفير الباب والفراش
وست الداندرمه والتبش والشطه الحاره
|
Post: #4
Title: Re: روضة البورد....جنة الله على الأرض
Author: اساسي
Date: 01-23-2003, 05:43 PM
Parent: #3
شوفو الحلوين بهجة الانظار
ضحكة رنانة بسمة ريانة
منظرهم يفرح
وربي ما تحرم بيت من الاطفال
|
Post: #5
Title: Re: روضة البورد....جنة الله على الأرض
Author: بت القبايل
Date: 01-23-2003, 07:46 PM
Parent: #1
بسم الله الرحمن الرحيم
زولة يا روعة
ربنا يخليك لينا يا رب ويخلي ناس الروضة ديل كلهم
والله ضحكتيني لما دموعي جرت خاصة حتة الحريقة الولعت في استاذ عاطف دي
قالو جيتي شايلة الموية
وكشححححححححححححححت طيفيتي النيران
ربنا يخليك لينا
ويخلي لينا الناظر والادارة
والشفع كلهم
تحياتي يا ناس الروضة
|
Post: #6
Title: Re: روضة البورد....جنة الله على الأرض
Author: bint algazeira
Date: 01-23-2003, 09:23 PM
Parent: #5
اقبض بت القبايل في البورد
ازيك وكيف حالك
زوله123 الله يديك العافيه
الروضه دي حلوه لكن انا بقيت بخاف من ناس سنه تالته ديل
عشان هم بيتشاكلوا ويقوموا يزعلوا من بعض وانا بزعل جدا لما واحد يزعل من التاني
لكن لما قلت للناظر قال لي ديل مابيتشاكلوا ديل بيتناقشوا واختلاف الرائ لايفسد للود قضيه
ارجو ان لايفسد اختلاف الرائ الود الذي بيننا
لكم تحياتي
بت الجزيره
سنه تانيه
|
Post: #7
Title: Re: روضة البورد....جنة الله على الأرض
Author: omdurmani
Date: 01-23-2003, 09:45 PM
Parent: #1
ياربي الروضة دي انا اترفدت منها وما عارف
|
Post: #8
Title: Re: روضة البورد....جنة الله على الأرض
Author: zola123
Date: 01-24-2003, 07:29 AM
Parent: #1
الخواض
دي روضة متطورة ما بيقدموا فيها الحاجات دي
بس قالوا مرات قرشو بيتفق مع البواب وبيدخل ليهم الشيشة
أساسي
عامل فيها بريء؟ بركة الما ولعت في بوستي ده زاتو 
بت القبايل
الموية دي كانت برة الكواليس وقفوا التصوير نص ساعة لمن الناس نشفت
باقي الشمار بعدين
بت الجزيرة
ما هم ناس سنة تالتة ديل زااااتم الجننونا
كنا دايرينهم يبقوا مثل أعلى, لاكن الظاهر كلنا في الروضة شفع
مع الاعتذار
امدرماني
ياخي انا بقيت اخاف عديل كدة اخت اسماء ناس
انتا معاهم بس قلنا سنه تانية ديل مساكين وما بيعملوا مشاكل
تحياتي زولة123
|
Post: #9
Title: Re: روضة البورد....جنة الله على الأرض
Author: بكرى ابوبكر
Date: 01-24-2003, 07:46 AM
Parent: #8
الدكتورة الزولة
مبدعة مبدعة و بينى و بينك مفكر اعمل الروضة روضة خاصة
|
Post: #10
Title: Re: روضة البورد....جنة الله على الأرض
Author: Yasir Elsharif
Date: 01-24-2003, 07:57 AM
Parent: #1
شكرا يا زولة
بوست جميل
في داخل كل منا طفل، لو استطاع الكبار أن يكونوا بحكمة الشيوخ وبراءة الأطفال نكون قد دخلنا الجنة فعلا
البراءة هي الأخلاق الحسنة
البراءة هي أن يستيقن الإنسان أنه محتاج لله فقط وأن يستيقن أن رضا الله يأتيه من حسن معاملة عيال الله..
قال النبي عليه السلام:
الخلق عيال الله فأحبهم إلى الله أنفعهم لعياله
"وقالوا الحمد لله الذي صدقنا وعده وأورثنا الأرض نتبوأ من الجنة حيث نشاء فنعم أجر العاملين"
في يوم قال النبي عليه السلام لسيدنا بلال رضي الله عنه: بم سبقتني إلى الجنة يا بلال؟.. ما دخلت الجنة قط إلا وسمعت خشخشة نعلك أمامي..
وقد أراد النبي صلى الله عليه وسلم أن يبين للناس والسامعين أن سيدنا بلال كان يجسد الحاجة إلى الله..
شكرا
وقلت لازم أحي جنة الأطفال لأن البوست أعجبني
|
Post: #11
Title: Re: روضة البورد....جنة الله على الأرض
Author: Dafi
Date: 01-24-2003, 07:59 AM
Parent: #1
|
Post: #12
Title: Re: روضة البورد....جنة الله على الأرض
Author: zola123
Date: 01-24-2003, 08:45 PM
Parent: #1
حضرة الناظر
نورت البوست والله الف مرحب
خاصة شنو؟ والله تدفع الجماعة ديل يطلعوا فوق راسنا, يقولوا قاعدين بقروشنا
هم بلوشي وما هينين لوول
عم ياسر
شكرا ليك والله , يا سلااام بقوا يجونا ناس كبار كمان
اها انتا بس اختار ياتو صف ولا نفتح ليك صف براك؟
دافي
جدا, من حسي اتوصى بطلبية دستة شماسة للشكلة الجاية
وصلتني اخبار انه .. بيحضر في شكلة مع ..... وعشان وكالات الانباء ما تنشر الخبر نتكتم عليه
بس انا محاقصر وعشاهم علي
زولة123
|
Post: #13
Title: Re: روضة البورد....جنة الله على الأرض
Author: zola123
Date: 04-18-2003, 11:43 AM
Parent: #1
دي رفعة نسأل من ناس الروضة مشوا وين؟؟
ومنو الناس الكتيرة الشايفاهم
انتوا فتحتوا فصل تاني من واري لوا شنو؟؟
زولة123
|
Post: #14
Title: Re: روضة البورد....جنة الله على الأرض
Author: manubia
Date: 04-18-2003, 12:57 PM
Parent: #13
وانا اقول شايفك شايفك وين يا زولة،في روضة ست عشة،سندوتش الطحنية والجبنة بالمربة،تزكريييي
|
|