اصغوا واسمعوا لي يا زماله

الاخوة شوايقت البورد لو في واحد عندو خلفية عن القصة الجاية دى والتي في شكل قصيدة اخذت حظها من الرواج في فترتها
لاادري أن كان فيها شيئا من الرمز والسياسة أم لا وهل شخصياتها حقيقية ومن هو شاعرها وقد تغني بها الاستاذ عثمان اليمني الاخ محمد شيلي علي ما يبدو عندك خلفية عن هذه الحكاية العجيبة ارجو أن تلحقنا بي المناسبة والاحداث لو أمكن
الكلبه علي ما يبدو تسميتها
صغوا واسمعوا لي يا زمالة
حقيقة وحاصلة مو ساكت قوالة
كلبةُ والدة فوق كوم الزبالة
محجوب كلموهو وقام مشالة
مستعجل قبل ياخد سوالة
بي فد طلقة اتم لي عيالة
الله الله الله
بعد سلخوها واجتمعوا الرجالة
وكل الشافلوا قوطة سمينة شالة
اخوياً لينا شغال في أم جلالة
قال ناولوني ماعون حتي أن كان شوالة
بعد جابو البرش وطوالي فرو
فرحان بابكر مما يسرو
صفقايديهو وقال يا اخوانا تروا
كل الماهو قادر لا نضروا
اكلو وخلوا والماباقوي شرو
بعزل حقي في منديل واصرو
البعضي ولادنا لابد من نضرو
اصلو سعراً حايم الله يكافي شرو
في الحقيقة هو لونة ابيض وصفة يرهز
وكل الشافة أولمرة قال عز
اتاري الدنيا ماشي عليها جز جز
وبي واحد عيار نافوخة بزبز
شويتين مو كتير جاهم خليفة
قال الراس اسلخوهو وسو نيفة
يتوكل وحدو ولا مع رغيفة
وصفو المرقة في الفاضي النضيفة
عثمان حمزة قال حصانو جراي
يفج في الناس يعاين جاي وبي جاي
قال فرصة سعيدة دار اعملكم راي
نعملة شية تستاكل مع الشاي
عطا قرمان لحم قال كلو سيبو
اليوم جمعة كان عازم نسيبو
الطايوق مجكنو في جيوبو
لا كبير اخوانو لملمو بي خبوبو
كمان داسي الجلد ورافض يجيبو
احمد ود عمر زولا مدروش
قال اصلو خوتكم بقت غش
محل تقسيمة وينو نروح نفتش
بدل نقمح من الرمرام نقرمش
وغضبان يترقط متل المتلبش
وللقصيدة بقية
هذا ما بقي في الذاكرة منها
وساحاول الحصول عليها انزالها
وكل من له خلفية عنها ارجو أن يدول بدلوه

الأخ الباقر



تحية

أدناه مشاركة سابقة حول موضوع الكلبة وهي لشاعر مغمور اسمه عطا من تنقسي الجزيرة ويسكن الآن بالحاج يوسف المايوقوما. وللمعلومية الدافع للقصيدة هو قتل الكلبة وهي نفساء حيث قتلت بالرصاص وكان عطا معترضا على قتلها رأفة بصغارها إلا أن بقية الجيران وعلى رأسهم محجوب قاتلها، أصروا على رأيهم.. ويقال أن الشاعر عطا عندما سقطت الكلبة مضرجة بدمائها وتحلق حولها صغارها بكي بكاء شديدا وأقسم أن يعمل في جميع المشاركين في الجريمة عمل تتحدث به الأجيال.. وكانت القصيدة... نستطيع أن نقول أنه سبق برجيت باردو في الرأفة بالحيوان


Re: بشرى لجميع أنواع الجــِداد ..فراريج وديوك


مع تحيات مامان

الاخ مامان الف شكر علي هذه المعلومة التي كنت افتقدها طوال هذه الفترة وحقيقة القصيدة جميلة ومعبرة بس انا كنته مفتكرة فيها بعض الرموز ومن كلامك والموضوع الذى الفت فيه كل شخصياتها كانت حقيقية وحقيقة اوفي بما قيل الزبالي عطا وارك لوحة فنية جميلة خالدة لك التحية اخي مامان ودايما مخزن اسرار وعند جهينة الخبر اليقين
والف شكر علي المشاركات