عنتر وعبلة فى الخرطوم / واهداء الى الزول ذاتو

عنتر : اوووه عبلاه , اين انت يا حسناء كل النساء
ومخضرة الصحارى الجدباء .. يا عسل

عبلة : اهلا يااخوى

عنتر : ما بك يا عبلة
شنو !! دى مساخة جديدة ولا شنو

عبلة : انى اكلة فى خاطرى منك يا عنترة

عنتر : تاكلى فى خاطرك ولا تاكلى زبادى
انا ماذا فعلت , فانا جهبوز كل القبائل
وشرف كل العوائل , اكل الجداد ومصدر السماد

عبلة : سجمى سجمى
اجننت يا عنترة , متين كنت مصدر سماد
ولا يمكن مصدر سماد وانا ما عارفة
اتخبى على يا حبيبى !! هيا شخلل جيوبك
وطلع حق الفطور وكريمات الظهور

واثناء جلستهما اتى شحرور

شحرور : يا عنترة لقد غارت علينا قبيلة بنى الاشتر
ولطشوا كيس الصعوط بتاعك

عنتر : اليوم القتال
بعدين انا ما قاعد اسف .. اجننت يا شحرور

عبلة : اوووب على !! بتسف صعوط
اذهب انت لست حبيبى , وبكرة تعال خطوبتى

عنتر : لا تصدقين كلام هذا المخبول
اذهب يا شحرور واحضر لى فرسى والدرقة والطبنجة

عبلة : انا لا اصدق احد غيرك يا حبيبى
انت اسد الادغال وموزع الاموال

عنتر : يا هبلة , اقصد يا عبلة
اقسم لك لم اسف هذا التمباك , اول مرة واخر
مرة سفيته هسى قبل اجيك , وهسى انا ذاتى
عايز اسيبه

عبلة : كدى خلينا من الصعوط , انا مالى ومالك , تسف
ولا غيره , هسى ادينى حق الفطور , وحق القشرة
للحفلة

عنتر : يااخى اااى بسف وبسكر كمان , مالك عايزة تدقى
جرسى !! خليك حنينة
عهدتك عبلاه الحنينة , ولاقيتك فى الجنينة

عبلة : ادق جرسك ولا اقد سلك , انت ما شفت دق جرس
والله اوريك كتاب من الله خلقك ما شفته

عنتر : انى اهظر معك يا عبلاه , ما تخليكى صعبة كدة

شحرور : يا عنترة , يا عنترة
امى قالت ليك تعال اغرف البلاعة

عبلة : ( تضحك ) ها ها ها
ما هذا الهراء يا عنترة .. عنترة قاتل الوحوش
وقائد الجيوش يغرف البلاعة !!! ها ها ها

شحرور : امى قالت ليك , ان لم تحضر الان
شوف محل نوم فيه

عنتر : اذهب يا ولد , اذهب يا ملعون
مانى بغارف للبلاعة
نظرتى ورايتى يا عبلاه كيف الهرشة دى

عبلة : دى حركات ساى
طيب يا عنترة , جاو الله والرسول , اشوفك
وخلينى اشتاق ليك

عنتر : ما هذا !! انا عنترة سابى القبائل وساكن العنابر
ان لم ترجعين فى كلامك دة تلقينى بكرة فى معسكر
الالزامية
:)



بكرى الابنوسى
اوراق الكاريكاتير

************

وبدووووون ضحكتك وتوابعها

سلامات
واسجماه يابت ام در لكن شحرور بالغ في كيس الصعوط ماكان يجر الفارة دا علي جنبة هو ماعارف عبلة دي بتاعت اجراس وكتب ناشفة
غايتو شغل لذيذ جدا

وسط كل هذه القضايا الشائكة و المصادمات .. أبصرت موضوعك .. دخلت . فارتسمت بسمة كبيرة علي وجهي
لك كل حبي يا بت أهلي

محمد

السلام عليكم يا ام در
والله يكفينا شر دق الاجراس وطلوع الصفائح وطليع الفضايح
تحيات.......واحشني

ام در لون جديد ومساحات من الانبساط وعايزين كمان وكمان بس بدون غرف بلاعات ... قال بلاعه قال ... والله والا بلاش ... ودمتي ايها العزيزه

العزيزة امدر
مشتاقين هالص هالص
خلاص بدون الضحكه وتوابعها شكرا علي الهدية القيمة التي تدل على اعمق انواع الحب التي عرفها التاريخ وما ذال يسجل سطورها من نور
شفتي الكلام ده كيف

عبلة قالت لي عنتر : انت ياعنتر ح تعرسني متين مش قلت لي بعد ما اتخرج وانا اسع اتخرجت ومنتظره واتقدمو لي ستين واحد وانا فورتهم ليك وتعاين ليهو من تحت لي فوق وتقبل منو كده كده طبعا علي القبله بتاعتهم زمان
عنتر يقول ليها : والله انا كنت متوقع يجيني عقد عمل من الخليج قالو ماعندهم فرسان هناك واتوقعت بعد ما اتخرج اطلع اعفى من الخدمة الوطنية وشتات لي الخليج وكده لكن ربنا ماسهل وانا قررت خلاص اسع بعد سته شهور لو ربنا ما سهل الامور انا ح ابيع الحصان بتاعي في المزاد بتاع لندن قالو بيجين سعر كويس واجيب الشيله 19 شامله السكن والترحيل واجي اعرسك
عبلة : انت قايلني انا منو تعرسني بي تمن حصان داير تشيل حسي يقولو بت سيد القبيلة عرسوها بي تمن حصان ، بعدين شوف انا ح اخت النقط علي الحروف يا تبقى راجل وتبطل كلام الحب الفاضي ده وتجي تعرسني خلال سته شهور يا تاني سلام الله ما تديني ليهو انا من حبك ده غير كلام الناس جاب لي شنو
عنتر : عبلاه ما اصابك عقلك يا حبيبتي انتي تعلمين الظروف وكده وانا قاعد بدون شغل والايام دي حرب زاته مافي عشان الطش ليك غنيمه غنيمتين كده يعني الامور كلها واقفه كدي اديها صنة وشيلي موضوع السته شهور ده
عبله : شوف يازول والله انا موضوع السته شهور ده ما بخليهو وانا زاتي قلت دايره احضر الماجستير بدل قاعده في البيت ومنتظراك
عنتر : والله ياعبله انتي الليله مابراك الحاصل شنو ما تكوني شربتي حاجه من الزير الكبير داك لخبت ليك راسك
عبله : زير يكسر راسك انا يوم متين كنت بشرب بلاويكم دي يالله خلاص ما دايراك شيل المعلقة بتاعتك دي العامله زي الاسطبل بتاع الحصين دي كلها حصين و حديد وسروج الله ينعل ابو اليوم اللمانا معاك فيهو
عنتر : خلاص ياعبله ما تزعلي والله انا كنت بهظر معاك ساكت خلاص خلال السته شهور بتاعك دي يكون في وقف اطلاق النار وانا بجي بعرسك انشاء الله اسرق اخوي شيبوب زاتووو طالما الهدف حميد وهو زواجك بس ماقلتي لي ياعبله سته شهور بالعربي ولا بالافرنجي
عبله : تعاين لي عنتر وتبتسم والله انت حركاتك دي اصلو ما بتخليها يازول سته شهور شنو انا بقدر بخليك يازول غيب وتعال تلقانا نحن يانا نحن وقالت ليهو انت ماعارفني انا بحب اسمع لي مصطفى سيد احمد واكتر حاجه المقطع البيقول يافرس كل القبيلة تلجمو

ولنا عوده ههههههههههههه يكه

زاتوووووووووووووو