زمن الشارلستون

بسم الله الرحمن الرحيم

أيام الشارلستون والقميص المظبط والخنفسة أنا كنت بقرا في الخرطوم في الثانوي العالي وكنت بجي حلتنا تقريباً كل شهرين ولا شهر ونص المهم بجي بالمناسبات وخاصة الأعراس والإحتفالات وبكون مخطط ليها عديل كدا وشاحد ليها لبسة كمان وطبعاً بلقى ليك كتير من أصحابي في القرية راجيني عشان أجيهم بي آخر موضة في الرقيص لكن بيني وبينكم أنا كنت النوع (المعرابس) يعني من المدرسة وللبيت ما بمشي حفلات في العاصمة ولا بحب الكوكتيل عشان ما بشبع. المهم في الأمر الجماعة راجيني ولابد من رقصة جديدة فأقوم يا زول (أتكلوج ليك كدا وكدا .. وشي نبط بالكرعين .. ووضع اليد بين العينين وفوق الأنف بالضبط واليد التانية على الخصر) والجماعة مصدقين وأنا والله كان قالوا لي أعملها تاني ما أظن أقدر عليها0
أها المرة دي .. قومي يا المره موتي في حلتنا وقوم يا العرس إتأخر إسبوع وطبعاً ما بقدر أجي تاني إلا بعد شهرين أو شهر ونص ولابد من حل حتى ينهل أصحابي من فيض فنوني في الرقص المهم يا زول بعد نقاشات وحوارات وطاولات جاء الحل عندما اشار أحدهم بأن هناك حل لكنه مكلف شوية ويتطلب ذهابنا للقرية المجاورة لنا حيث هناك عرس كبير . فرغم بعد تلك القرية إلا أن الهدف يبدو أكبر وكلو يهون مع صاحب (الشارلستون) غايتو يازول تحرك ركبنا الميمون وكان أول عمل لابد أن نقوم به هو كسب رضا شرذمة الصعاليك في تلك القرية والمشهورين بي خراب الحفلات وعدائهم السافر للأجانب والوافدين فقدمنا إليهم بعض القرابين و (زاد) الحفلات المعروف المهم كسبناهم وكلو يهون مع صاحب (الشارلستون) 0 إمكن زي الساعة عشرة ونص الحفلة بدت والناس كلها دخلت فسحة الرقيص وكان لابد من التريث أغنيتين أو ثلاثة لأنو دفسة زي دي تضيع فيها المواهب يازول في الأغنية الرابعة والفسحة فاضية نزل (ترافولتا) القادم من العاصمة غايتو أتمرصعت وإتمرصعت وإتكلوجت زي ما عايز وأدهشت الحضور أها يازول الناس بدت تسأل دا منو؟ من وين ؟ هو بدرس في العاصمة ولا أساساً أهلو من العاصمة؟ وكيف نجا من جماعة الصعاليك ؟ المهم قدمت كل ما لدي (والله لا شبعان ولا حاجة) وطلعت وقفت برة شوية وحولي مجموعة من أطفال تلك القرية يعبرون عن إعجابهم وأنا أتكلم معاهم لكني مشغول عنهم بالنظر للجنس الآخر واعلم جيداً أن لدي من (الشنا) ما يكفي لطرد حتى المطلقة والأرملة المهم وأثناء تجوال بصري بينهن صاح جهاز الإنذار عندي فهو أشبه بجهاز التفتيش في المطار فعندما يصيح فلابد أنو (زيني) مكتول في هذا المكان وبعد تدقيق شفت واحدة تبسم لي بيني وبينكم أنا شكيت وتلفت يمين وشمال وخلف فوجدت الجميع منشغلين بأشياء أخرى فقلت يا معلم القصة دي معاك إنت ، المهم للإحتياط إبتسمت ورفعت يدي رفعة صغيرة .. وكمان هي رفعت يدها في إشارة واضحة للإعجاب وربما الحب كمان ، يازول قمت ناديت لي واحد من المعجبين الذين كسبتهم في تلك الليلة وبديت أسأله وأوصف ليهو عشان أعرف إسمها وأهلها فهي الوحيدة التي ضحكت معي غير أخواتي في هذه الدنيا
أسمع يا ولد .. شايف كوم البنات المواجهنا عديل دا؟
الولد..آي
طبعاً أنا بسأل فيه من غير ما أعاين ما أنا خلاص حفظت الموقع
أسمع.. اللابسة التوب الأحمر خليها أحسب بعدها من ناحية الشمال ثلاثة وقول لي الرابعة دي إسمها منو
الولد ..قلت شنو؟
يا دين النبي ... بالله عليك الله شوف الغبي دا .. ياخي قلت ليك ...
الولد.. أه .. تقصد اللابسة الفستان الأصفر
أيوه شاطر
الولد.. دي طرشا
طر إيه ؟ يا ولد إنت حسبت صاح؟

عاطر التحايا
بدرالدين شنا

يا البدري
ياخ بالغت فوقكا

أخوك في الله والعروبة والاسلام حصلت له قصة شبيهة .. الفرق بين القصتين هو كالاتي

إن تلك الطرشا كانت جميلة
والموضوع كان أكتر من بس ابتسامة والسلام
والفاصوليا كانت قربت تنضج

فقمت قصيت القصة لزميل دراسة من تلك القرية . وبعد الوصف والتوصيف والتمحيص ، أفاد بالاجابة القاتلة ، هي طرشا وكما بنت خالته

لكن الفرق بيناإنو أنا ما شين
رغم إنو ما كان عندي شارلستون
وأن الحفلة كانت في حلتنا

لكن القسمة
نسوي شنو عاد

ي غايتو يا بدر الدين شلاقة شديدة دايما مجلي مرة طرشا زمرة عزبا
وكلو كوم والشارلستون وتحرمني منك كوم واكيد معاها سلسلة وقلبين
وامكن غويشة سودا لووووووووووووووووووولي يا ابهول

الأخ بدر الدين

والله ايام يا زمان

الشارلستون البمبى كان هو صاحب النصيب الاوفر من الاعجاب والجكس وطبعا الرقيص كان هورس يا سيدى وكله يحفر وسط الدايرة بنات على اولاد ومافى ايامها كان عزل النساء عن الرجال ولا فى عيب تسوق اسمح بت ترقص معاها ما كلهم جايين للرقيص يعنى شنو لو رقص واحد مع واحدة ما بيعرفها بل كانت الحسناوات ينتظرن من يتقدم لهن للرقص ..

والله ايام يا زمان

مالك علينا ياخى نحن نقول التوبة وانت ترجعنا للذكريات ياخى

أولاًُ أحي فيك شجاعتك الأدبية وقولك الحق في شأن عدم إقتران الجمال بك شكلاً لا خلقاً وأدباً – جابت ليها نفاق ومجاملة في أحسن الأحوال – المهم أنا برضو من أنصار ليس لي فيه يا فتاتي يد ، يعني حاجة كده قضاء وقدر ، أو من باب قاعدة هذا جناه على أبي وما جنيت على أحد في حال أنني لم أتزوج والحال غير ذلك يعني سوف نظل نكرر أخطاء الكبار ما دمنا تزوج بنفس طريقتهم.
شوفو يا جماعه أنا داخل الموضوع ده على الله ثم على تقديركم – وآه آه من تقديركم المستتر والظاهر - بس في كل الأحوال ده ما معناه أنني من جيل ترافولتا والشارلستون أحمراً كان أم أصفراً تريفيرا أو اسموكنج نحن أصغر بي كتير ، ولو صدقتو أو ما صدقتو البقت بقت والإبتبلبل عام وبراي سويتا في نفسي.
بس ملاحظ إنو الزمن بعد ما غير ملامحنا رجع تاني جاب سيرة الشارلستون وليس سيرة البحر هذه المرة حيث أن الشارلستون عاده موضة لجيل الألفية الثالثة بعد أن كان موضة لجيل الخنافس مش البتكون في البيوت البتغني.
وقلت لي يا بدر الدين كنت تمثل فريساتشي لناس القرية وآخر صيحات الموضه ، حكمة والله وحكايه. ولمن الزهور بسمت لينا كانت زهور برسيم حرام والله حرام

بسم الله الرحمن الرحيم

أهل العوض أهل الأصل
مشتاق ليك عديل كدا
إنت أخوي في الله والعروبة والإسلام وفي حب الطرش كمان .. أريتو ود خالتها دا كان جلدك عشان تاني ما تتشالق وتحكي لي اي زول

عشة بت فاضلة
سلام وتقدير
لكن يا عشة أنا ما غلطان هن الغلطانات كان الطرشا وأكان العزبا القال ليهن أضحكن معاي منو؟ والله أنا صعب خلاص أقلّ حركة بحب في المليان

شيخي قرشو
سلام وإحترام
والله يا شيخنا ديك كانت أيام حلوة وبريئة .. الشارلستون البمبي وزي ما قالت عشة القميص تحرمني منك (بالمناسبة سمي تحرمني منك لأنو كان بلبسو الفنان عبدالعزيز المبارك وغنى بيهو أغنية تحرمني منك) والرقيص تويستي والسيجارة يتداولها خمسة أشخاص كل واحد يدخل بيها ساحة الحفلة ويعبر عن شعوره ويرجع ويسلمها لزميله وهذه العملية تسمى (تخميسة) .. لكن يا شيخنا بعد شوية ناس البورد ديل بقولوا الناس ديل كانوا سايطنها سواطة دحين يازول تعال نحافظ على توبتنا

عاطر التحايا
بدرالدين شنا

الأخ بدر الدين يمكن الجكس كان بضحك عليك ما كان بضحك معاك شوفت اللغة العربية دي بتخلبط كيف مع إنو كلو ضحك بس معاك غير عليك

بسم الله الرحمن الرحيم

صديقي ملاّ
سلام وحب شديد
إنتو الصغار ديل زمنكم زمن الطواقي المزركشة وتعدد الألوان .. نحن كنا بنحب ونتزوج بي ضحكة بس لكن إنتو مسألتكم بقت صعبة خلاص الله يعينكم

عاطر التحايا
بدرالدين شنا

بسم الله الرحمن الرحيم

صديقي ملاّ
عندنا واحد في حلتنا قال لي إمام الجامع الله يهديك فرد عليه إمام الجامع قائلاً أنا مهدي الله يهديك إنت دحين يا الملا أنا كان ضحكن معاي ولا كان علي أنا عرست الله يعرس ليك إنت

عاطر التحايا
بدرالدين شنا

إنت زعلت ولا شنو يا دكتور ، المهم يا بدر الدين يا أخوي لو إنت عرست في الحقيقة فأخوك ولله الحمد هد ركن العزوبية منذ أكثر من أحد عشر عاماً تصور ولي بحمد الله ولدين وبنت يعني مخاوي زي ما بقولوا ناس الكشتينه وبالتأكيد لو فكيتهم بتلقاهم خمسة بنات على إعتبار أن للذكر مثل حظ الأنثيين ، وحتى قبل ذلك التاريخ عرست بس في حرينا ولعب الرجال لينا.

الاخ بدر
السلام عليكم ورحمة الله وبركاته
عند بداية ظهور الشارلستون وفى خطبة الجمعة قال امام الجامع وكان ناظر مدرسة ان لابسى السارلستون هم قوم لوط هذا الزمان صدقنى يا شنا الكان عندو شارلستون بقى مابيقدر يلبسو والعندو قماش مع الترزى غير الطلبية الى جيب بندقية وبعد فترة انتهت ضجة الشارليستون وبقى موضة مقبولة للجميع هل تصدق شفت ليك ولد الامام الناظر لابس شارليستون

الاخ العزيز بدر

اها كلو عرفناه سليمةبائعة اللبن والانفلات الامني
كمان بقيت تلخبط في أسامي القمصان

تحرمني منك ده دحين ما جات تسميته من غنية الراحل المقيم الاستاذ مصطفى سيد احمد

طبعا اناالكلام ده ما حضرتوه لكن حكى لي الرحمابي شخصيا

بعدين الطرشه ما لها ما كان احسن ليك هسع بدل النقة الكل يوم في الراس
غايتو في ياجازتك دي شوفها لي كان اخدوها ولا لسه


تحياتي

looooooooooooooooooool
عزيزنا بدر الدين

Quote: المهم للإحتياط إبتسمت ورفعت يدي رفعة صغيرة .. وكمان هي رفعت يدها في إشارة واضحة للإعجاب وربما الحب كمان

جاجة غريبة و الله انو في يوم من الأيام كان التعبير عن الحب أو الاعجاب بالشكل ده
يا حليل الشارلستون .. و هسعدي رجع موضة تاني بالمناسبة
لك كل الود

محمد

بسم الله الرحمن الرحيم

عزيزي/ أبو الزفت
سلام وشوق
وإنت خطبة الإمام دا خلتك تبكي ولا البرشح من عينيك دا شنو؟

صديقي/ ياسر حنا
أعتقد في تحرمني منّكين واحدة حقت الراحل المقيم مصطفى وواحدة حقت المقيم الراحل عبدالعزيز المبارك لكن إنت كان بالصح ماحضرت جيب لي أخوك الكبير عشان أغالطو.. أما الطرشا الحضرت زمن الشارلستون قطع شك أكبر منك ولا أظهر وبان على حقيقتك

عاطر التحايا
بدرالدين شنا

الاخ بدر
السلام عليكم ورحمة الله وبركاته
فى نهاية السبعينات كان ولد امى وابوى البكر طالب فى معسكر لدراسة الرياضيات فى كلية التربية وكان بيحكى لنا عن واحد اسمو ترافولتا عندما زار ابوعاج المعسكر طلب واحد يرقص ورقص ليهو الاسمو ترافولتا واعجب به برقصه ابوعاج وصفق ليهو كان هل انت هذا الترافولتا
وبالمناسبة او مرة نطقت فيها اسم ترافولتا هكذا ترالوفا وضحكوا على السامعين

بسم الله الرحمن الرحيم

الغالي/ محمد موديك
والله بختك لو الشارلستون رجع موضة تاني بس عليك تبتسم وترفع يدك رفعة صغيرة وتمش شهر العسل

أبو ال... ولا مافي داعي

في نهاية السبعينات أنا أبو عاج ضحكتو لكن في المسرح وليس في كلية التربية .. سلم لي على أخوك البكر

عاطر التحايا
بدرالدين شنا

العزيز
بدر الدين
مازلت احتفظ بالصورة التى اهديتنى لها فى نفس هذه الفترة
وانت مخنفس
ومعك الصديق
وقريبك عثمان على)ود ابروف)
وكان زميلنا بمدرسة بيت الامانة
يا لها من ذكريات
ولا انسى ترديدك لاغنيات عبد الله محمد
وعلى ما اذكر كانت لك فرقة غنائية فى قريتكم اليس كذلك
وبمناسبة قريتكم هذه
ذرتها مرة
مع صديقى لعلاج اخيه الاصغر الذى كان يعانى من كسر فى يده وتم علاجه بالمستشفى ولم تكن اليد سليمة
على كل
اتينا لبصيركم واشترينا منه
فروجة صغيرة
وتم ذبحها ووضعها وهى ساخنة على يد المريض وكسر يده مرة ثانية
وكان الطفل يصرخ من الالم
فرجعت يده كما كانت اول مرة
والله ايام يا زمان
وحليل زمن الحنان يابا..تجف دمعة وتسيل دمعة
الزول كان يرضى كان يابا

تحياتى اخى وعزيزى بدر الدين
زمن الشارلستون زمن جميل بس اليوم عاود الظهور من جديد
يعنى فى موضه الايام دى رجع الشارلستون من حيثما ذهب

بسم الله الرحمن الرحيم

الغالي/ الملاّ عمر
مبروك الزواج ومبروك الولدين والبنت وربنا يخليهم ليك وأنا برضو مخاوي لكن ما ولدين وبنت إنما بنتين وولد يعني بي لغة الكتشينة قافل جوز ثري

عزيزي وصديقي وزميل الدراسة منعم
سلام وشووووووووووووووووق
ياخي رجعتني لأحلى الأيام أيام بيت الأمانة وأغاني الفنان الحلاوي عبدالله محمد يا سلالالالالالالام والمدير محمد الغزالي السراج ودفع المصاريف وأكل البوش لك التحية وأشكرك على المداخلة .. أما البصير الفي حلتنا كويس إنو طلب منكم أحضار فروجة لأنو بعض الأحيان يطلب أشياء غريبة مثلاً يقول ليك جيب لبن غنماية حوصا ولا بول غراب ضكر ولا ورك نملة عاقر .. أكرر لك التحية عزيزي منعم

الظريف وليد خمسمائة وألف
سلام ومحبة
وين اراضيك يا راجل؟
بالإمكان عودة الشارلستون ولكن ليس بالإمكان عودة زمن الشارلستون

عاطر التحايا
بدرالدين شنا

اضحكتني حد العشرقة
الله يخليك

بسم الله الرحمن الرحيم

العزيزة/ بت قضيم
سلام وإحترام
ويخليك إنتي ايتها الرائعة وما يحرمنا من مشاركاتك .. وطالما بترقصي كدا العشرقة بتروح وإنشاء الله دائماً فرحانة

عاطر التحايا
بدرالدين شنا

البدري
ما قادرين نأترك
ضربنالك مسنجر
وكتبنالك تلفون