بوست فاضي كيف معاكم ؟ ما تخشوا ما في أي حاجة جوه

عزيزنا ودشاموق


لا اسكت الله لك حسا

لا اعتقد ان المعين قد نضب

ولا كمان الحاجة دى ياربى تكون مكتوبة بالحبر السرى؟؟؟؟؟


تحياتى وودى

الغالي سمندلاوي

قلتا أملاهو بالناس الرائعة

واهو اتملأ

لك كل الحب

مع انو فاضي يا ود شاموق.....لكن ابداع فاضي





مع تحياتي
ليون

ليون يا جميل الروح
تسلم وتسلم روحك الخلاقة
أنتا الزيك ممكن يحول الفاضي مليان
بالأمل
تسلم

البوست الفاضى ما مشكلة المشكلة في الراس الفاضى
بعدين الممنوع مرغوب يا ودشاموق

بت العرب العزيزة

الله يملأ البوست

الرأس هين بيتملي

عشوشة الحلوة

المبدع ود شاموق:
شفت الشمار الكتير بوصل الزول لحدي وين ، اها انا مكتوب قدام عيني انو البوست فاضي وما فيهو حاجة بس الشمار كتلني وقلت لازم اخش
.
.
بعدين انت غيرت صورتك الممحنة ديك لي ، هل تصدق انها رغم المحنه كانت بتدي احساس بالراحة
وربنا يفك كل محنك يا رائع.
دمت لي

الغالي كحلوش

صورتي الممحنة جابت لي الهم

قلتا أغيرها لكن جابت ليها نوم شايف

من هم لي نوم ويا قلب لا تحزن

لك كل الود ولا شيء غير الود

تبيع؟؟؟؟

انا دايرة البوست الفاضى دة ابنى فيهو مسرح لفصلى الفتحتوا دة

بنتفق، بس ورينى لو بايع
انا شارية

شارية بت عسة مبارك

في لحظة بس كان مالني الكلام
بس رحل عني الامل
وزاملني الالم في مكان
فقد حس الالم
لكني شايل امل جريح
لك يا ودشاموش

الغالي مهاجر

عشان الوجع دا، عملناهو فاضي

الغالي
ودشاموق
والله فكره ابداع ،،،، عديييييل
ودي نسميها حاله الهدوء الذي يسبق العاصفه
يعني حانتوقع روائع
في القريب
ولك الود

الرائع أبو يوسف

والله لا عاصفة لا حاجة

الله لا جاب عواصف

تسلم يا ملك يا سيد الناس

ليك يا تماضر هدية
انتي الزيك منو

أساسي يا حلو

تسلم وتسلم الأنغام يا رائع

لك كل الحب ولا شيء غير الحب

منو قال ليكم البوست دا فاضى
البوست ملان كلام وكلام كتير
وياء فردة كلامك وصل
وابيت الكلام المغطغط وخمج
تضيع الرموز التغنى الكلام
واحيانا يكون الصمت احلى واجمل واصدق من الكلمات
التى نقولها عندما نحس ان الحروف عاجزة عن استيعاب انفعالاتنا

كيمو يا راقي

صحي والله البوست دا كتاب كامل

تسلم يا زول يا حنين

كنت ولا زلت اعتقد أننا ربما نكون افريقيو الموقع واللون ، ولكننا لا يمكن أن نوصف بأننا افريقيو الثقافة على الإطلاق. لم الم ـ ككثير من أهل السودان ـ بمظاهر هذه الثقافة كما يجب ، لكنني أستطيع أن أتخيلها وأعيشها من على البعد . فهي ذلك المزيج الرائع بين الفطرة الإنسانية والطبيعة البكر، كلاهما لم يمس ولم تعبث به أيادي العصر بعد ( ولو بشكل نسبي). الإنسان الإفريقي ما زال ذلك الكائن الذي لا يفعل إلا ما تمليه عليه فطرته ، يتعامل مع الكائنات حوله حسب ما تسببه له من ضرر أو نفع، يستجيب لآلهته لأنه يحتاج لدوافع روحيه ولأنه يعلم أن هناك قوى اكبر منه تملك زمام الكثير من مقاديره ، وربما هي التي خلقته . يحتفل حين تكون هناك حاجة للاحتفال ، ويفعل ذلك في براءة الأطفال . يستمد من الطبيعة حوله مظاهر فنه، لأنه يحس بجمال محيطه. ولأنه واثق من نفسه ويمشي بخطوات ثابتة أحب إيقاعات هذه الخطوات ، وقلدها . وبحسه المرهف أحالها لمنظومة إيقاعية ، اخذ يطرب لها ويتمايل مع نسقها. وعندما أحس بعجزه عن فهم كثير من الظواهر حوله، نسج من الأساطير ما يمكنه من تفسير هذه الظواهر ونقلها لأبنائه عندما يسألونه.
طبيعة إفريقيا هي مجموعة من الكائنات والجوامد ، مختلفة ، لأنها تشترك في إحساسها بالحرية والشمس المشرقة.
لماذا توصف كائنات إفريقيا بالشراسة ؟
لأنها لا تعرف معنى أن يسيطر عليها الآخرون ويجعلونها مدعاة للفرجة والترويض. ولأنها قديمة عهد بالحرية وتعرف قيمتها جيدا ، لا تتخلى عنها بسهولة. حتى صحارى وانهار إفريقيا تعرف قيمة أن تظل على طبيعتها ، فهي صعبة المراس أهلكت الكثيرين لتظل على عذريتها.
من هذا المزيج الذي لم أراه كما يجب ويصعب علي جدا صياغته في كلمات اقل ما فيها أن تكون مترابطة، كانت الثقافة الإفريقية.
ربما فيما ذكرت كثير من الخيال والمثالية، لكنه ـ ومن وجهة نظر شخصيه ـ المظهر النموذجي للقارة السمراء، والذي يعكس ثقافتها.
أنا لا أؤمن أن الإفريقية يمكن أن تمثل إطارا ايديوليجيا ، يحاول البعض أن يلتف به على مشكلة الانتماء عندنا. ولا ارغب حتى في مناقشة هذه الفكرة، ولكني انظر للإفريقية كمظهر ثقافي استمدت منه ثقافتنا الكثير ، وحتى بعض مظاهر سلوكنا الاجتماعي .
كنت باستمرار اطمح لان انهل من هذه الثقافة حتى ولو ذلك القدر الذي يمكنني من فهم بعض جوانب أسرارها التي سحرتني منذ سني وعي الأولى ، ولكن للأسف لم اشبع طموحي بالقدر الكافي ، لقلة المصادر ؟ ربما ، لكسلي؟ الاحتمال الغالب.
مؤخرا، شئت أم شاءت الصدف أن اطلع على رائعة من روائع الأدب الإفريقي، فحلقت في عوالم هي مزيج من الأسطورة والنبل الفريد، تذوقت طعم الاندهاش ، تجربة رائعة ودت لو لم تنتهي .

لا اعلم ماذا دفعني الى التفكير هكذا، ولا اعلم إذا كانت الأفريقية africanaty تدخل ضمن حدود هذا البوست المتليء رغم انف عنوانه ، ولكن عندما تملكتني الرغبة في أن اكتب بعض الكلمات ، كان في ذهني صورتان: الأولى افريقية ، والثانية تخص تماضر ، وهي صورتها المشرقة دائما بجانب بوستاتها. دمجت ما بين الصورتين دون ما اعير الصلة المباشرة بينهمااي اهتمام . ربما لم يكن هذا الدمج مصادفة ، فكثيرا ما كنت المح فيها بعض المظاهر الإفريقية ، تعجبني تلك التسريحة والإكسسوارات ، تلقائيتها في الردود ، عنادها ، الابتسامة الوضائة التي اتخيلها وتأسرني بشدة ، رغم يعد المسافة ، ورغم ان بيني وينها الاف الكيلومترات من الالياف الضوئية ، تلك مظاهر فيها من الروح الإفريقية ما فيها ، استطعت أن المحها رغم ما أتميز به من ضعف في الملاحظة ، وملاحظتي تلك كانت كافية جدا لان أجد صلة ما بين الصورتين.
دمت لي تماضر يا الذ واظرف خالاتي.
ودمتم لي جميعا.
واسف على البري في بوستك ( الفاضي) يا ود شاموق ، بس خشيت تاني ولقيت رد تماضر.

منــفاخ

كيف معاك يا ود شاموق





تمبس

تمبس الجميل بجمال النيل والأزاهر

منفاخ شنو ؟ قلنا فاضي ما منفس

في بوستات بتاعتي جعانة كدا، سلفنا منفاخك دا يمكن ينفع

آمن بالله

تاني كل يوم من دا

ما مصدق عينيا

كل صباح تاني نديكم واحد فاضي زي دا

كدي عندي بوست ما فاضي

نشوف حيبقى زي دا

حلوين والله

أنتو الزيكم منو يا رائعين

كحلوش المزاد رسى عليك ولا شنو منفرد بالبوست
تماضر دي ما عاجباك ماقالت انها شارية بشارية بتي


شفتي يا تماضر كحلوش ملاهو زوت جاب افريقيا بشمشا
وتماضر بقمحها وسمندلاوي ما خلا ليهو زهرة اها ود شاموق حسي كان قال داير واطاتو دي وشكاكن ف يالنقطة اها بتسو شنو غايتو انا برا ما شلت منو ولا شبر ومسرحك يا تماضر الا كان مسرح شارع بعد الدفسة الشايفاها دي
بس الناس دي ما تشوف ليها محل فاضي الا تصنقع يا النبي؟

طيب ياود شاموق الجيب البملاه مين ؟؟؟

والله يا بت بربر

الجيب دا زي العين

أصلوا ما بيملاهو غير التراب

صمــــــــــــــــــــــــــت
ولا بد من وقفة
كم نحتاج الى مثل هذه الوقفة يا ود شاموق
قالوا اكان كترت عليك الهموم... نزل ليك بوست فاضى و نوم

يا ود شاموق

معليش

في موضوع لا يستحق نعمل ليهو بوست

وهو هزيمة المريخ من الاولمبي الليبي

عليكم الله اخر الزمن ليبيا كمان بقت تغلبنا

تشششششششششششششششش

وضرب كف بكف

دنيا فرندقس

والله يا قرجة الخبر دا أخير منو البوست الفاضي

بقينا أمة زي ما قال دكتور نت

ضحكت من جهلها الأمم

ومن عوارتها الأمم

الله يكون في عون الأمة السودانية من الجايي

الغالي أسامة

كلو سويناهو ما نفع

نقبل وين ؟

يا ود شاموق

يا سلالالالالالالالالالالالالالالالام

الموضوع جميل جدا … يستحق القراءة …..


لقيتني كضاب موش

خال العيال

والله ياجماعة مشتاقين ليكم لاكن احى انا من الفلس "عطية مطلع عينا نتفكى من موباتيل تخش سوادتل "

لاكن ياود شاموق اول يوم الواحد يخش يلقى وهماتك دى
لاكن بينى وبينك حركة
لانو الشمار بيجيب ليك الناس كلهم وانا اول واحد

تحياتى ليكم ياغالين

كوليل والمعاناة اليومية

والله انتا فتا عمك تنقو

الأخبار شنو ؟

وعملتا لي شنو في موضوعي داك

شكيتك لي الله

شكلك حتوديني التوج

والله يا خال العيال محشوم من كذب

بس برق كويس بين السطور بتلقى أكيد

شيتاً تقراهو

ود شاموق

والله نحن محتاجين فى كثير من الاحيان للصمت الذى قرأته من خلال البوست وقد اكون مصيب او مخطئ ولكن الصمت فضيلة احيانا يجب التحلى بها

أزرق العزيز

والله فعلاً الصمت مرات بيكون رسالة

محتاجين ليهو بشدة

نسيت اهم حاجه...


بوست فاضي كيف معاكم؟ماتخشوا مافي اي حاجه جوه(((.)))...ه

تحياتي..معاها ابتسامه صفراء
Solara...

ازيكم دا حالتو فاضي!!لا ما فاضي ابدا ما فاضي

اخي ودشاموق...
عليك الله كتر لينا من بوستاتك الفاضيه ده....
شايفاها صحيه ميه ميه ...
ينصح بقرايه بوست فاضي كل يوم بعد تناول الطعام


تحياتي
ليون