من الشاعر محمــد سعيد دفع الله إلي الأخ يوسف الموصلي

الأخ يوسف
تحياتي

كان من ضمن حضور تكريم العمالقة الطيب صالح وحميد وبرفسور عز الدين الأخ الشاعر محمد سعيد دفع الله وبما أنني لم التقيه لعقدين رغم وجوده في الرياض وعدم علمي بذلك..كان لقاءا حارا ..وجلسنا نجتر ذكريات الجيرة والحلة وجاء الحديث عن ذكر الناس الطيبين فكان أول سؤاله عنك..قلت له أننا نتواصل عبر النت...فقال أكيد يوسف لي هسع ياهو يوسف الودود الخلوق..وطلب مني أن أهديك سلامه وأشواقه وأن أقول لك أن محمد سعيد باق على الود ويهديك أمنياته الطيبة

عزيزي الزاكي
ياسلام والله بختكم ان التقيتم بالاحباب من المبدعين من امثال محمد سعيد
بالله بلغ سلامي له واعجابي بشعره الرائع ة\وليتك دعوته ليكتب في منتدي النيل وينضم الي سودانيز او لاين
سلامي لك وللاسرة الكريمه

الأخوان نايل1 والموصلي

لكما التحية

وشكرا لك نايل بايصال تحية محمد سعيد دفع الله للأستاذ الموصلي وكان وعدني بكتابة رسالة للأستاذ الموصلي لايصالها عبر البورد بعد اطلاعه على تعليق الاستاذ الموصلي على قصيدة السر عثمان الطيب التي نشرتها سابقا بالبورد وعرفت ساعتها أن هنالك معرفة سابقة بين الأستاذين.

ــــــ

أدناه رسائل شوق متبادلة بين الشاعر محمد سعيد دفع الله ومحمد الحسن محمد سعيد
نشرت هاتين القصيدتين بمجلة (الأضواء ) والتي كان يصدرها الدكتور ألأديب حسن أبشر الطيب من واشنطن إبان عمله مستشارا ثقافيا بسفارة السودان- كان ذلك تقريبا في عام 1974م .

رسالة شوق

مقدمة دكتور حسن أبشر:
تأمل هذا الرسم جيدا..الشاعر محمد الحسن محمد سعيد…لابد أنك ستعيش مع كلماته الوارفة ذات يوم عندما يجمعها في ديوان….يرسم بالكلمات أشواقه وحنينه…وعنده من ذكريات الطفولة العديد من اللحظات الرومانسية الحافلة بالمشاعر …نسمعه قريبا في (ثورة الحيران)…أما قصيدته اليوم فهي رسالة شوق إلي الوطن الحبيب الذي يبدو بعيدا كالحلم…وهي رد على رسالة صديقه محمد سعيد دفع الله

..يدرس الان المال ب (جامعة جنوب كاليفورنيا) مع نخببة من شباب بنك
السودان..ولا بد لدارس أن يتأمل ظاهرة علاقة الحسابات بالشعر…شيخنا الشاعر المبدع محمد المهدي مجذوب ..محاسب….الشاعر المطبوع صلاح أحمد إبراهيم عمل مدة ليست بالقصيرة في أمر الضرائب …محمد الحسن..مصرفي….عندما كتب محمدالمهدي مجذوب في مقدمة ديوانه:أحتاج لنقدكم ..حسبته يعني "المال" وقد قصد الرجل"الدراسة المتأنية".

رسالة محمد سعيد دفع الله

أخوي حسون
عساك بي خير وكيف الحال..
كيف حال كشة ,وازي ياخي حال إقبال
أريتكم تبقوا طيبين إنتو والله يحقق الآمال
…..
دي ياها الدنيا يا ها طباعه…فراقة العبوس الجايري
تمام الدنيا زي دولاب لافي تروسو ديمة ودايري
وزي مركب وسط موجات ما عارفين هي شقيش سايري
…..
إلا ترانانسكت نحن لا قدام نأمل نبني
نزرع نغرس الشتلات عشان بكر ثمارن نجني
لاكين مالو لو لمتنا …دايري فراقنا ليه بس يعني
…..
برضو أقوأكيد نتلاقا…الله يطول الآجال
وغنتوا تجوناتاكلوا تمرنا …تشربوا من مياهنا زلال
تنسوا الغربة والآلام مهما كان عذابا الطال
تجو الخرطوم وتنعموا فيها ..عاد يا خويا نعم الحال
…..
رد الرسالة:محمد الحسن محمد سعيد

عزيزي حمد سعيد
جوابك جانا
وا بشرانا
شكرا ليكا…تسأل منك العافي
ويجيك الخير
لقانا بخير
وفد شيتن كعب مافي
بلا الغربة وفراقنا الطال
…..دوام وااه مشتاقين..
كتر…وكتير
نحن لي شمسنا الدافي
ونحن لي الكوثر الصافي
ولي كل الأهل من جم
…..
سلامات ياخي…كيف الحال
أريتكم إنتوا تبقوا نصاح
وتبقوا شداد
وخيركم زاد
وديمة معيدين أعياد
واريت بالله يا حمد سعيد ناس البلدطيبين
ومبسوطين
ورايقين لا تعب …لا هم
…..
دوام والله بطراكم
وبقراكم…قصايد في ليالي الريف
أغنيها…واناجيها…واقول ليها:
عليكم الله يا نجمات ليالي الريف…تمدن لي شعاعكن جاي
وتشيلن لي أهلنا غناي
تسون لي الصغار اللول
وتقالدن في البلد كل زول
تقولن ليهو…كيف أصبحتا وامسيت كيف
…..
ــــــ

تحياتي
مامان