Post: #1
Title: وبحبك لا قدر مكتوب ولا دمعا سقى المنديل
Author: sharnobi
Date: 01-12-2003, 05:12 AM
بحبك احساس متجانس بطلع من جواى لمن كل الغرف الداخلية تكون مليانة ومعبأة بالود والحب.. وتكون لغة الصمت لمن الكلمة تعجز النطق من التعبير.. وتكون لحظة كل مسماتك بتنح بالهوى المبنتح من جواك.. وبتكون كلمة مكثفة فى حرفين.. وبتكون لحظة آه وغلب مغبون.. وتكون محاولة يائسة لحظة طلق اكيد جواك.. وتكون محاولة التشبث بالحياة لحظة الغرق.. وتكون انت وكلام
بحبك رغم الاسى والحزن
وبحبك رغم الصراخ والضجيج والحزن
وبحبك رغم الانفعال والهرجلة والصوت العالى
وبحبك
لا قدر مكتوب
ولا دمعا سقى المنديل
|
Post: #2
Title: Re: وبحبك لا قدر مكتوب ولا دمعا سقى المنديل
Author: الأمدرمانية
Date: 01-12-2003, 05:31 AM
Parent: #1
صباح الخير ياصاحب الحب الكبير والقلب الواسع ربنا يوسع ويملئ قلبك بالحب الرائع دا على طول ويعطيك اللى تستاهل تتربع جوه الوساع رغم الزمن الضيق طبعاًكلامك جميل ورائع ومنمق وجذاب للقراءة والتمعن والحب فى أى ذرة أوكسجين نتنفسها وربنا يجعلنا من الذين يستمتعون به ويصونونه لأنه شئ يمثل الوجدانية الفطرية إذا صح التعبير
وبختك بهذا الحب
الأمدرمانية
|
Post: #3
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 01-12-2003, 05:43 AM
Parent: #1
انها يا مدرمانية
انها الجميلة والمستحيلة
انها الاحساس بوجود فى الخيال انها لحظة السجود الطوعى والجلوس الخشوع انها لحظة الانبهار
انها هى التى تمسك بزمام امرك
وتملى عليك نبض قلبك
انها هى
هى
تلك الجميلة
والمستحيلة
انها هى بعينها
الفتاة الكون
والوردة التى تتفتح خارج المواسم انها
الناكرة
التىترقص تجعل الايقاعات
تتبرع خطاها
هى المجنونة
انها هى
تطلع من كل المسامات وفى صوت المطر
|
Post: #4
Title: Re: وبحبك لا قدر مكتوب ولا دمعا سقى المنديل
Author: الأمدرمانية
Date: 01-12-2003, 07:21 AM
Parent: #3
يااستاذ فى إنتظارالمزيد من الكلام الرائع الممتع ودمت لنا منبعا ًمن الصفاء والنقاءللكلمات العذبة الرائعة
الأمدرمانية
|
Post: #5
Title: Re: وبحبك لا قدر مكتوب ولا دمعا سقى المنديل
Author: layon
Date: 01-12-2003, 07:59 AM
Parent: #3
الاخ شرنوبي
يبدو ان ذالك السيل الجارف ....ينحدر من صدرك...تارة تغرق فيه ...وتارة تتفنن في السباحة فيه ...
يبدو ان ايقاع نبضاتك ...لا تقبل الا ان تراقص خطى نبضاتها...
يبدو ان........
ويبدو ان ...............
.....................
يديك الصحه والعافيه ...امتعنا بالمزيد روائعك
مع تحياتي
ليون 
|
Post: #6
Title: Re: وبحبك لا قدر مكتوب ولا دمعا سقى المنديل
Author: azza
Date: 01-12-2003, 08:57 AM
Parent: #1
و الله الا القال عليها الصادق الرضي
في علاقة الدم
لا ادري لماذا كلما قرات عن حبيبتك تا تي لذهنى هذه القصيدة
سوف أصنعُ لي فتاة من دمائي
كي تقدسني وتبكي عند موتي
دون زيف
سوف أصنعُ لي فتاتي
من دخان سجائري
لتلمَّ عن وجهي غبار الاغتراب
وكي تقيني من مكابدة النزيف
سوف أصنعُ لي حبيبة
تفهم الوطن الذي أشقى به
وأخصُّها بالشعر والحمَّى
اسمّيها : نضال
( إنَّ هذا الاسم أقربُ من دمي)
_______
فلا مفرَّ من الحبيبةِ
سوف أصنعها لتكتب عن دمي نثراً
وتصنع ثورةً للحلمِ والوطن الحبيب
ما دايرة اطول بس دي الابيات الجاتني و القصيدة ككل رائعة
و انت كذلك رائع
والبتحكي عنها دي الا من دمك مش؟؟
|
Post: #7
Title: Re: وبحبك لا قدر مكتوب ولا دمعا سقى المنديل
Author: ensana
Date: 01-12-2003, 09:40 AM
Parent: #6
في اتصال هاتفي هذا الصباح مع صديقة لي..سالتها عن احوالها و احوال زوجها..فقالت لي لقد سافر اليوم(و جلسنا نبكي انا و هو)...علقت هذه الكلمتان في راسي ...و جلست افكر ان حياتنا لا يمكن ان تكون حياة من غير الحب ..لمن بكى زوجها لفراقها دي لحظة في راي مهمة جدا ..ما عارفة اعبر كيف...بس اتخيل لي لو الرجل بكى اما المرأة بكون قد سلمها جميع مفاتحه..
جاء شلال فرح،و شجرة ياسمين تساقطت ازهارها على وسادتي.
كنت اكتشف صوتك على الهاتف...شعرت انه يشرع نوافذ غرفتي
هل ايقظتك؟!
احلام مستغانمي-ذاكرة الجسد
|
Post: #8
Title: Re: وبحبك لا قدر مكتوب ولا دمعا سقى المنديل
Author: solara
Date: 01-12-2003, 07:45 PM
Parent: #1
..
.
..._حبيبتي_....
ولكم وددت اقولها لك 1000 مره..
لست حرا في رسالاتي اليك...ولست حره
لست اكتب ما اعي و احس:حزنا و مسره
كي اخط صحائفي....
واقول رغباتي و احلامي وسر مخاوفي
لكنما القيد الثقيل يشل تعبيري و صوتي...
كل من حولي يطاردني...ويحملني لموتي...
مره صلبوا لساني عنوه..من اجل صمتي...
مره.....مليـــــــــــــون مره...
احرقوا الرغبات في صدري شواظ مستعره...
مره رصدوا خطاي و سجلوا لي كل خطره
وعندما ارنو اليك تموت اخيلتي
وتقفز من اجابتي اليك خيوط فكره
تطل من وهج الحديث عميقه بعدا و غورا...
..._حبيبتي_......
عيناك تحترقان من عامين...كالطفله البريئه
بغير اجنحه يطوف بنا الحديث الى عوالمنا المضيئه...
الى الحكايات الجريئه
حكايه الحب الذي قتلته اظفار الجريمه...
وشيعته الى مداه النائي في الارض القديمه...
ولم نعدنبكي عليه.....
بفرط اشواق مجنحه اليه....حبيبتي و لكم وددت اقولها لك و الجموع..حشدت مواكبها امام الدرب ميدان الفدا...قد لوحت لي فانطلقت و قد ممدت لها يدا...وصحوت القط ما تبقى لي على طول المدى...وحدي باجنحه من الاشواق يحملني الصدى...
يــــــــــــــــــامـــــــــــن صنعت لنا غــــــــدا
ونظرت خلفي تاركا انساتني...ورحاب حبي
آآه..حين وجدتها تجري..وتلهث خلف دربي
أسرعت حين انطلقت...واقسمت تحتضر قربي
علمتني:الحــــــــــــــــــــــــب اكبر ملتقى و اعز غايه
للملايين التي عطشت اليه تحرقت منذ البدايه
تعمقت معناه في صــــــــــــــــــدق....لترجئ فرحه الاعياد من اجل النهايه.....هكذا كان حبي
عندما حطمت من صدري رتاج قواقعي
وفتحت قلبي.....شيعت روحي بقايا الوهم في اعماق حفره...
عرفت ان الناس...كل الناس احبـــــــــــــــــــــابي
صنعنا من شعور الظلم ميلاد اسره...
..._حبيبتي_.....
ولكم وددت اقولها لك 1000 مره
قدصنعنا(نحن)للانسان و التاريخ مجرى
صنعنا من احزاننا لكليهما شطا و بحرا
فــــــــــــــاض في اعمـــــــــاقنا مـــدا و جــــــــزرا...
د.الزين
....
اعتذر للاطاله اولا.....احببت ان اهديك هذه الخاطره لاني احبها...
ودمت محب..و..منحب
تحياتي
Solara....
|
Post: #18
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-01-2003, 03:13 AM
Parent: #8
سولارا
ما زلتى فى الخاطر
ولا زحام الدنينا بتمنعنى حق الوصال
ولكن لو الاسى
لقلت تفديك الليالى الطوال
|
Post: #9
Title: Re: وبحبك لا قدر مكتوب ولا دمعا سقى المنديل
Author: نادر
Date: 01-12-2003, 07:58 PM
Parent: #1
شرنوبي
ووجوع الدرب لا بفضي إليك
ولا إلى اللغة الصريحة
كي أحدد ما تبقى
من رحيقك في مسام الروح
والجسد استعال وهذا النبض أبقى
هكذا توحد يوماً يحيى فضل الله مع القوافي في وجع واحد وهمس شفيف ففاض سيلاً من كلمات أرقت مخدع السكينة فينا
أكتب طالما لازالت الكلمات تريج بياض الورق وتسافر بلا تصاريح للسفر وتعود للدار مرتاحة ذي صهب البحر
كل الود ودمت
نادر
|
Post: #10
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 01-14-2003, 07:54 PM
Parent: #1
وتعتريك حالة خاصة كمس من جنون وتتفرق فى مخيلة صور الاشياء وينتابك هبوط متدرج.. وتصيبك رعشة حين تحاول ان تتذكر.... وانا فى باب الذكرى.. حاجز ركن قصى متكوم قاعد صبح مساء مدمدم بوشاح العشق ما قادر افيق منه.. وبجينى عديل ما هو خيال صورتك يا سمحة وبكون محتار.. ما لاقى التفسير.. غير انى بحبك.. رغم المساة والقصة المتلاشية فى وجدان الحجر الجواك... ولو كنت عرفتى معنى الحب كنت نفضت قميص ووقفت وصت الجمع شقيتى فستانك نصين وطرحت الطرحة للريح وفجيت الجمع ووقفت وسط الامة تقول انا عاشقة وعاشقة من اخمص قدمى... اها لوكان جاك احساس بالدنيا وخليت الهرج شايل منك عنوانك.. واحساسك لو كنت عرفتى معن الكلمة بتطلع ذى الطلق تغازل كل مسامات الجلد.. وتتعبأ بالمعنى الصح ولو كنت رجحت انسانيتك عن شكلك وجمال المنظر كنت ما ضيعت لحظة خلف مرايا او ما ودرتى دولار من اجل العطر.. لو كنت سمحت للاشياء العادة تكون فيك الاشجار الخلوية تقوم وتخلى عادة زراعة الورد المستورد خلاف بيوت الوهم.. لعرفت معنى الحب
وكنت بجرجر فى ساقى وانا مهزوم بردد مقطع اغنية بحبك لا قدر مكتوب ولا دمعا سقى المنديل
يا بت يا فنان
|
Post: #11
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 01-17-2003, 04:47 AM
Parent: #1
اشكالية
نص
بعد زمن مريت على كلام كتبو شرنوبى الحلفاوى العجمى
اتشككت فى مقدرتى
بقدر اكتب عربى يا رطانى
اها
مستقرب انا مادى لا اؤمن بالمثاليات ولا بعرف شيطان كتابه
لكن انت ما انت
محتار الحقونى عصافيرى بطير
|
Post: #12
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 01-17-2003, 04:47 AM
Parent: #1
اشكالية
نص
بعد زمن مريت على كلام كتبو شرنوبى الحلفاوى العجمى
اتشككت فى مقدرتى
بقدر اكتب عربى يا رطانى
اها
مستقرب انا مادى لا اؤمن بالمثاليات ولا بعرف شيطان كتابه
لكن انت ما انت
محتار الحقونى عصافيرى بطير
|
Post: #13
Title: Re: وبحبك لا قدر مكتوب ولا دمعا سقى المنديل
Author: Adil Osman
Date: 01-17-2003, 04:33 PM
Parent: #12
جوليا اللبنانية غنت هذه الاغنية الحزينة
لا أعلم هل هى مناسبة للتعبير عن مشاعرك فى هذه اللحظة
و لكنها مترعة بالحزن والأسى فى الليالى الطوال
http://songs.6arab.com/julia..ma-maraa1.ram
|
Post: #14
Title: Re: وبحبك لا قدر مكتوب ولا دمعا سقى المنديل
Author: ensana
Date: 02-27-2003, 11:57 PM
Parent: #13
|
Post: #15
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 02-28-2003, 01:16 AM
Parent: #1
فجرت يا انسانة جواى جرح
اتخيلتو
دمل
لكنى
مع الزمن البتوه
ابقى فاقد عنوان
واشكرك
|
Post: #16
Title: Re: وبحبك لا قدر مكتوب ولا دمعا سقى المنديل
Author: Teeta
Date: 02-28-2003, 05:12 AM
Parent: #1
العزيز المبدع شرنوبى
اخالك تحس الكثيرين وتريحهم من عناء البحث عن الذات
وبتخيلك وبتوقع انك تكون مكسر
وبختها التى تبحث عنها جمعك الله واياها فى زمان ات قريب قربك من مشاعرنا واحاسيسنا يا شمس البورد المشعة الدافئه
حياك الله ورد الله غربتك يا رجل ولا عدمناك
وفى انتظار الكثير
ام الاء
|
Post: #17
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-01-2003, 03:10 AM
Parent: #1
ام الاء
حاولت امسك قلمى للرد البجامل
ولكن غلبنى
حسيت ببقى جاحد شان ما اتلوم والوم نفسى قلت افرد ليك كلام جوانى
كلام منى وما من تانى
مرات تلقى الكلام بتبخر لمن ما بجيك من جوه وفتر اللسان البمدح السلطان
وفتر القول المكرر فى سماء المداح
ولكن منى
بكثف كل الكلام وبقول
احترت ما لقيت كلام الرد
وكان الصمت
منى وقار
وشكرا مكرر
انسانة
مازلت اترنح على سماع الغنى البتسرب للعضام الهشة جواى وبتعمل فينى عمل تانى
|
Post: #19
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-01-2003, 09:34 AM
Parent: #1
هيام
لحظة
اقول انى
بحبك
لا اتواريت ولا كضبت شبيت بالفرح
جيتك
اقول بهمس
احبك
احبك
واتواريت بين ضفات الكلام والحرف
وقلت اكيد
ورغم البين
انى اكيد بقدر ما بتباها
اقول بحبك
وكان سيف مسلول
على الرقبة
بقول
بحبك
واه
وكان
بحبك
|
Post: #20
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-03-2003, 04:17 AM
Parent: #1
واحبك
لمن الوتر النغم يعتريك ويستوعبك بلا اذن وتكون تحت تاثير الكلام والغناء البدغدغ جواك احساس تانى لمن يكون المعنى لحظة تتوهك كلمات.. وتلعب بخواطرك وانت ما عارف.. البدايات .. البقت جواك عناوين تهزمك و تدعو عدوك عشان يقتحمك نهار.. ولمن يبقى الكلام.. دعوة صريحة للهزيمة.. وتبقى الألحان سيل من مشاعر تهد فيك كل احساسك.. وتنهزم فى رائعة الكلام.. وتبقى هايم وسط الحروف.. ويبقى معناك .. ذى جريد النخل .. تداعبك نسمات الصباح.. ويبقى الكلام..
فى
واحبك
تدى لعمرى الامان
وتعودى بالفرح الاصيل
وتسافرى
هواك لاقى صوت الوطن جواى
نعس جرحى القديم وارتاح
عرف رمش الليالى
معاك
معاك
يبقى الزمن حاضر
معاك رجع الصدى الصداح
من الهجرة
واتكتبت على الابواب معانى النظرة لى بكرة
|
Post: #21
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-13-2003, 04:08 AM
Parent: #1
وبحبك
لم اضمر لك كرها ...لم أفكر ابدأ أن أكون عدوا لك يوما
جلستك فى دواخلى ونسجتك فى خيالي اجمل لوحة.. حاربت الدنيا من أجلك سكنتك فى مصاف الاولياء وغنيت لك اجمل الأغنيات..... لم يخطر فى خارطة ذهني ان افكر حتى ولو للحظة.. ان تكونى عدوة او افكر فيك بمنطلق... كهذا......
احببتك وآمنت صديقا مؤمنا انك آخر الموانى.. حلمت وكنت نجمة فى خيالى كنت لحنا فى كل الاغانى .. وكنت كل آمالى العراض فى الممشى الذى يتسع بظلالك... كنت زغرودة فرح تطلع من صوت امهات سكالا رغم الحزن.. وكنت كل المحطات التى عزمت العقد للرحيل اليها....
وكنت آخر الاغنيات.. والترانيم وكنت حسالة الحزن الذى ترسب فى ركن فؤادى الجريح الذى تلون بلونك.. واعتارنى بك قافية من بيت منسى
لماذا هذا الشعور الغريب
لماذا كل هذا الكره منك
ما الذى اغترفته من ذنب
احببتك يا هذا وحورت كل الامانى لك تصب فى رحيقك.....
أحببتك ياهذا وتكورت حولك كالكسيح لا ابارح ظلالك
أحببتك لانك فى داخلى كل الهمس والهمز والاشاعات
لماذا هذا الشعور منك
ينتابنى احساس ندم اراجع هويتى الف مرة فى اللحظة لك اجد مبررا واحدا اصدق به قولك وموقفك هذا
هل كل هذا لأني أول من احبك بصدق
ومعاك
احزانى تتساقط على ارضا بها الشوك لا تجد من يجمع ثمارها وانا على الحزن البجينى منك
ومعاك
كان يردد باقى الكلام لحظة يغنى للنفس ويردد فى الغنى الممنوع
وقال معاك
واحترقت فى دواخله انفاس مكتومة وبين اللظى والهب والرماد تسربت خيوط دخان
وقال وهو يلفظ آخر النفس
معاك
وهى ترحل ضد التيار تتوارى بين الزبف وهى توزع ابتسامات مزيفة
وفى مقلتها دمعة وعلى شفاها ابتسامة
انه النفاق
فى زمن رمادى
ومعاك
كنت كالغريق التف حولك لحظة الرفض لهذا الجسم الغريب
وكانت دمعة منسية
اليك الكلام
ولوحت لى بطرف اصابعها وبطرف مقلتها وهى فى حضن آخر
وكنت الفظ آخر انفاسى التى تسامت اليها وتبخرت فى فى مجرى شهيقها وسكنت فى شعبها الهوائية
ومت وكان مسواى الاخير عنوانها
وخلاها آخر المشوار
والمرسى
|
Post: #22
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-13-2003, 04:22 AM
Parent: #1
واصبح يقينى معاك
لمن رحلت طيور النورس من الشاطئ
وكان غفر السواحل ليل بنادوا والمراكبية بشد اللحظة بالمرسى
كتبت اليك وانا المدسى فى الرملة
تعالى
كلى اليك
وما صدقتى انى اليك
وكنت بتبحثى عن آخر
وانا المبعوث اليك من الآخرة
وغنيت ليك وفى الحنجر غصة بتاوه الكلمة
وكنت معاك
واترجيت
وكانت دمعتى المفتاح
وبحه الصوت الغلب تعبير
وكنت اليك
مسدار للعشق واه
|
Post: #23
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-13-2003, 04:27 AM
Parent: #1
ومعاك
يبقى الزمن حاضر
واختصر الماضى فيك
والقاك لحظة الحسرة مراكب راحلة واتوسد ضراعى حلم
تبقى
الملهم الجاى عبر المستحيل غنوة
معاك
|
Post: #24
Title: Re: وبحبك لا قدر مكتوب ولا دمعا سقى المنديل
Author: AbuAla
Date: 03-13-2003, 04:41 AM
Parent: #1
شرنوبي
طيب الله أيامك يا صديقي المحب..
نتمنى لك كل السعادة
ودمت أخا وصديقا
عبدالأله
|
Post: #25
Title: Re: وبحبك لا قدر مكتوب ولا دمعا سقى المنديل
Author: sari_alail
Date: 03-13-2003, 08:49 PM
Parent: #1
تسلم يا استاذ شرنوبي و أتمنى أن أتعرف عليك عن قرب
يا أنسانة ايه الاغاني الحلوة دي ادينا المزيد بالله
|
Post: #26
Title: Re: وبحبك لا قدر مكتوب ولا دمعا سقى المنديل
Author: sari_alail
Date: 03-13-2003, 08:59 PM
Parent: #1
انت يا أستا قصدك وبحبك لا قدر مكتوب ولا دمعا سقى المنديل بتاعت الاستاذ وردي و أذا كدة أنت حتكون زيي من معجبي وردي و مشجعينه و أنا بسمع لي وردي كتير و عندي ليهو مكتبة و العموم أشكرك على أحساسك الفني والثقافي النبيل
|
Post: #27
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-13-2003, 09:23 PM
Parent: #1
العزيز سارى الليل
كنت مترددا ان اعقب عليك حيث اننى ومنذ زمن طويل جف قلمى ونضب معينى واصبحت الكتابة ليست تلك الممارسة المسلية التى كنت بها انقل ما ينتابنى من احساس الى الشاشة....كنت حزينا ليلة الامس وكنت اعانى من جراحات .. حاولت ان اداويها بالتى هى الداء اعنى دواء الكتابة... كنت استمع الى اغنية ابو عركى البخيت..سرحت تفتحتت جراحات كنت اظنهاوسالت دموع مدادى.....
واليوم بعد ان رجعت الى صومعتى والثمت بالصمت مشاعرى وقيدت يراعى وحطمت اناء المداد.. وانا نفسى تجبرنى ان اجلس كثيرا على ارائك الزوار والضيوف.. مستحسنا من اللعب فى ميدان الكتابة.... وجدت ردك الاول..قلت يازول ما ترد حتقول ايه.... تسللت الى البروفايل او السيرة الشخصية وجدتك من مواليد 86 ارسلت لك بالماسنجر ايدت مبدأ التعارف.... رجعت لقيتك اضفت بوست تستفسر عن العنوان وانك تدعوا اهل البورد بالاحتفال بذكرى صديقى الشهيد دكتور على فضل..واراك قد حملت صورته التى دفعت الدمعة ان تنهمر وينقبض نفسى لبرهة ومرت الاحداث امامى مخيلتى كفلم مثير تفتحت ينابيع الذكرى والجراح لايام خوالى ايام الدراسة بمصر وعلى فضل.......استغربت قلت البلد بخيرها... النضال ما بيقف على جيل .. انو الجيل الجديد برضو بحلم وممسكن باسنة الرماح... اعترانى شجن ممزوج بالحزن والفرحة
اما سؤالك عن عنوان البوست احبك لا قدر مكتوب ولا دمعا سقى المنديل نعم هى رائعة وردى والشاعر الثورى محجوب شريف وهى تعبر عن حب ثورى لا يرتبط بالانفعال ولا الخيال.. انما يستمد قوته من قوة العلاقات الانسانية البسيطة....حب واقعى فهو لم يكن قدرا بل كان شكل علاقة تولدت من صلب الانفعال وتسامت بقت فى حلبة الصراع اليومى من اجل الحياة..تستمد عافيتها من صفوف رغيف العيش وترتوى بحبات العرق فى هجير يوم العمل فى المزارع او المصانع.. نوع حب يكبر مع الايام ويصلق بالتجربة ...
واتوسدضراعى
لا ادرى هل اشكرك لاثارتك حفيظة الكتابة ام الومك لايقاظك لما النعاس يغالبه وكان على شفى حفرة من النوم
|
Post: #28
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-14-2003, 01:54 PM
Parent: #1
رنين الصدى لكلمة احبك من حنجرة المبدع ابو عركى
كرزاز المطر فى غفر الصحراء الكبرى.. يولد فى دواخلى تموجات احساس تلتف حول قلبى وتعصر ما تبقى من منه
ومازالت هايما منتشيا وطبلة اذنى لا تريد ان تسكن بل ما زالت فى تموجاتها الصوتية مع النغم الرخيم
واحبك
|
Post: #30
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-20-2003, 01:51 AM
Parent: #1
رسم خاطر الشمس اطول
وخلاك
فجأة انتبه ان المغيب لحظة حلت... وكان مغشى عليه فى زقاق يفترش الارض ويتوسد ذراعه العظم... باقى حيل متلاشى وبقى يأمل فى الشمس الكبرت حجما وقلت قوة اشعاع.. واتعجب على الخلق والخالق.. كان لعابه يسيل وحمرة عيناه ما حجبها عن الرؤيا الا حمرة مغيب اليوم... وحاول ان يتعمق فى التأمل.. رفع راسه واتكأ على ذراعه الايمن وعين مطفية وعين يا داب تتاوق فى الظلال وسط جريد النخل.. .. وحياتك... حليفة قوية.. فى عين الشمس شافك بين السحاب والحمرة بتطلى وهج حاضر... ورسم خاطر الشمس اطول
وخلاك
وبحبك
|
Post: #31
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-20-2003, 04:30 AM
Parent: #1
ومتين تضحك سماء الخرطوم
حبيبتنا
ومتين
رغم الاسى والجراح
نحمل احزان وطن فى البطين الايسر واحزان خاصة فى الاذين الايمن
ونبكى على النغم ونتمنى سماء الخرطوم تكون صافية وترحل عنها الغيوم السوداء ويبقى وطن حدادى مدادى
|
Post: #32
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 03-20-2003, 04:46 AM
Parent: #1
باحبك
احمد فؤاد نجم
بصوت سودانى
باحبك باحبك
باحبك باحبك
باحبك يا وطن
سودان
مسايا وصباحى
اسبح بحبك
وحبك
شفايا وجراحى با سودان
واسافر بحبك
واميل زى ميلك
وتحلا الخطاوى
فى حبك با وطن
واحب اغترابى
فى صبحبك وليلك
واحب الونس بالرفاقة
يا وطن
تنام الدموع
ف عيون الهواجع
وتسهر دموعى
فى حبك يا بلد
تهون السجون والشجون
والمواجع
ويغلا مع القهر حبك
يا بلد
ولو يحبسونى
ولو يشنقونى
ولو فكروا بالعذاب
يبعدونى
ح اقري واقرب
ومش ممكن اهرب
وتنزل دموعى على خدودى
تشرب
تلاقى الرموش والخدود
والمباسم
مراسم
وصورتك عليهم يا وطن
باحبك باحبك
|
Post: #33
Title: Re: حملت تضامن لرفع حالة الحظر عنى
Author: sharnobi
Date: 03-27-2003, 06:20 AM
Parent: #1
نداء
كونوا معى يا رفاق
اناشدكم لترفعوا اصواتكم عالية
لتحمل نغمات
فيها
ان نحطم كل البنادق والمدافع وان تتحول كل السفن الحربية والطائرات الشبح لوسائل سلم تخدم الانسانية
كان اختراع جهاز الكومبيوتر من اجل الحرب
والى آخر الاربعينات كانت وزارة الدفاع الامريكية هى المتحكمة فى اجهزة الكومبيوتر
اليوم اين نحن
الجهاز اصبح اداة للتواصل والعشق
لما لا نرفع النداء
وفى زحمة المشاعر
لى نداء خاص
اطالب منكم ان تآزونى فى حملتى
لرفع الحظر الذى فرضته على حبيبتى
ولكى اكون متحررا من استخدام وسائل كيماوية او بيولوجية او اسلحة اخرى لتحرير
ابسط ما امتلك من نقل احساس
يهيمن على حين يشتد وطيس الحرب
ويتضرم النيران فى داخلى
غنوا معى
|
Post: #34
Title: Re: وبحبك لا قدر مكتوب ولا دمعا سقى المنديل
Author: ود عقاب
Date: 03-27-2003, 07:02 AM
Parent: #1
الاخ المبدع شرنوبى
لك كل الاحترام وانت فى تلك البقه النايه
لكن رغم البعد تظل نبراس وشمعه تحترق ابداعا
والى الامام
شرنوبى طولت ما رديت
ودعقاب
|
Post: #35
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 04-08-2003, 11:20 PM
Parent: #1
اتحللت غلبنى الصبر
مما ممكن ابوح
ما ممكن اصرح
ليغتلنى ما احمله
انها سممت كل احاسيسى وعطلت مقدرتى فى التركيز
جسمى انتحل!!!
ايه العمل!!!
|
Post: #36
Title: Re: وبحبك لا قدر مكتوب ولا دمعا سقى المنديل
Author: sharnobi
Date: 04-08-2003, 11:30 PM
Parent: #1
كان على ظهر دابته يخلف رجل فوق رجل
وفى لحظة كان قدام قضبان السكة حديد والنور الاحمر يلمع والطريق مسدود
الحمارة ما قدرت تفهم
وهو كان فى خيال
احبك
وقداموه السفر للموت
وكل المستحيل
|
Post: #37
Title: Re: وبحبك لا قدر مكتوب ولا دمعا سقى المنديل
Author: sari_alail
Date: 04-09-2003, 03:06 PM
Parent: #1
لسة يا أستاذ
بحبك لاقدر مكتوب ولا دمعا سقى المنديل
|
Post: #38
Title: Re: وبحبك لا قدر مكتوب ولا دمعا سقى المنديل
Author: solara
Date: 04-09-2003, 11:03 PM
Parent: #1
*
|
|