من منا لم يمارس النقه يوما؟؟
شخصيا احيانا اضبط نفسي انق في حاجه حارقاني شديد…لكن الشخصيه التي اقصدها هي الشخصيه التي تتخذ النقه سلوك اساسي عندها كالاكل والشرب.. واحيانا التنفس….النقه كشئ ضروري لا تحلو حياتها من غيرها
واعتقد ايضا يا احباب ان النقه ليست سلوك نسائي بحت كما هو شائع….ياما وياما رجال نقناقين….عشان كدا انا بقترح اختراع غنيه وطنيه لاخواننا النقناقيه من وزن نقناقه تنقنقي ومافي حل زي تطلقي….مثلا …نقناق تنقنق تقول بالع ليك راديو معلق
وللشخصيه النقناقه سمات اخري..حتى تكون شخصيه نقناقه من نوع ابو كديس….زي حب التنظير الشديد..والاستعداد للبري المتواصل ساعات وساعات….وسعه الصدروالصبر على المجهود الخرافي الذي تبذله في النقه والعجن واللت لساعات وساعات في حاجه ما بستاهل
اما لماذا تمارس تلك الشخصيه النقه؟ واي متعه تجدها في تكرار العبارات والحكايات ؟ فهاذا ما لا استطيع الافتاء فيه…ولكن اغلب ظني انها لا تدرك حينها انها تنق…بل هدفها يكون غالبا النصح والارشاد وتاديب العيال او الزوج
واذا الله لا وقعك وغلطت مع الشخصيه دي فانه في هذه الحاله تستمر النقه لايام وايام … ويتم فيها تقليب الدفاتر القديمه كلها وسردها من اولها لاخرها
مثال بسيط؟
_ محمد يا ولد يا محمد؟
ايوه يا امي
جبت البيض من عمك حسن؟
لا والله يا امي …لسه
_ليه يا ولدي؟….مالك؟….ما قلنا ليك من الصباح…انتو يا جماعه طيور كدا مالكم؟….لمتين اربي انا واعلم؟….شوفو جنس الحاله دي يا اخواني؟
_ معليش يا امي ..كنت مشغول شويه؟؟؟حسه دي بمشي اجيبو
_ ما لكن بعد شنو؟؟بعد ما اكلمك ستين مره؟….انتو متين تبقو ناس…. الراجل قلت ليك بيضو رخيص وسمح….حسي يكون خلص من الصباح…احنا دايما حالنا مكشوف وقروشنا ضايعه…دا كلو من بلادتكم
…حسي الناس يكونو نقو البيض الكباركبار…تمشي تجيب لي العواليق التشبهك….انا عارفاك…لكن انا الاستاهل ..قايلاكم ناس بتفهمو….حسبي الله ونعم الوكيل
وطبعا لا ينتهي الحوار عند هذه المرحله.بل تاخذ المسكينه في ندب حظها العاثر الذي اعطاها اولاد خلوفين كدا
…وتقوم الدنيا ولا تقعد بسيبب بيض عمي حسن..ولا يسلم محمد من اللعنات حتى لو مشي وجاب بيض نعام عديل….كيفن عاد ماهو موضوع الليله
وربما تنتهي من النقه اذا لم تجد من يتفاعل معها ..لكن اذا مدت حليمه راسها ….ووووب الليله ما حنخلص كلو كلو
_ اعمل شنو يا حليمه يا اختي… السجمان دا من الصباح بقول ليهو امشي اتناول لي بيض من دكان حسن…قاعد يتخايب هنا وهناك ..امس الدلاهه التانيه فرشت احسن ملايات في الدولاب لاولاد امال ..زكبو الكركدي فيها….تقول ابونا صلاح ادريس….لاقين القرش دا هين …بلاده بلاده من ما الله خلقني يا حليمه يا اختي ما شفت زيها……..
وبما انني اعتقد زي ما قلت ليكم انو الهدف يكون النصح.. فبالليل لمن يجي ابو محمد تتم روايه الحكايه له باسلوب تاني
_ شفت ..الولد من الصباح بقول ليهو يا محمد يا ولدي علييييييك الله لمن تلقى وقت اختف رجلك لدكان عمي حسن جيب لينا بيض….الولد قال نسى…ينسي كيف وهو شحطه قدر دا؟…الاولاد ديل احنا الليله بنعلمهم…بكره بطرطشتهم دي يعملو شنو؟
ويوافقها ابو محمد مش لانو مقتنع بكلامها..بل لانو داير يريح راسو عشان ما تساهر بيهو للصباح…وامكن كمان تقلب عليهو كان حاول يناقشها وتتهمو بتدليل العيال …او التقصير في المصاريف..او التوب الاخدر داك وينو…وعرس نفيسه قرب….عمر طلق مرتو….او غيرها من المواضيع التي لن تغلب في اختراعها وممارسه هوايتها فيها
اها يا اخوانا….زي دي نعمل معاها شنو؟
نتجاهلها….نحنسها…نتفاهم معاها….نتعايش معاها..نطفش منها….نسمع ونسكت….ن….ن…..ن….نق .نق…..نق…نق.،ق

ما شــــــاء الله يا حنين والله ابداع بس اوعا تكونى انتى بتحبى النقه والله تكونى با لغتى عديل كده سميييييينه ونقاقه ها هاهاهاهاهاها باااااااى ودالجزيره

الاخت حنين موضوعك روووووعة00
وانا شخصيا من انصار اسمع واسكت 00على امل انو البينق يتعب ويسكت00
بس انا بعتقد انو الرجال نقاقين اكتر بالذات في فترة معينه من العمر 00يعني المعروف انو الراجل لما يكبر بيبقا نقاق بطريقه فظيعه وما بيعجبو شي وبيتعب المرة والاولاد00فانا ما عارفه حكاية انو المرة هي النقاقه دي جابوها من وين 00الا اذا كانو الزوجين بيتبادلو الادوار في حكاية النقه دي يعني المرة في الاول بتكون نقاقه والراجل ساكت وبعدين لما يكبر بيرد الصاع صاعين00
سكرة00

النقه ..... اساليني انا منها
والله يا حنين تساليني كرهتك شنو في الدنيل اقول ليك:النقه....
لكن و الله بعد ده النقه لزيزه.. لكن ما في اي زوووول......
..الشافع انقنق ..الراجل انقنق.. المره تنقنق ..حتى حنين تنقنق..........
هسه كان سالتك سبب النقه ده شنو؟؟؟؟وجات من وين.ماتعرفي..ربك كريم يا زوووله و الله اكفينا شر النقه

تحياتي
Solara...

نقناقه تنقنقى مافى حل غير تطلقى

لكن النقة ما عندك يا حنين
هو حنين دا/دي راجل ولاّ حرمة
يعني لو حرمة حقو تكون حنينة أو نقناقة برضو أحسن
لك النقة يا حنين حتّى ترضين

لاعزاء ود الجزيره
سكره
solara
ويلي
cantona 1
كم جزيل الشكر
يا سكره والله يا اختي ما عارفه الناس ديل ليه بقولو النسوان براهم نقناقات؟ غايتو عندنا راجل جيرانا بجاي...الله لا وراكي حاجه عجيبه خلاص مستعد يفتح خشمو من الصباح وينق وينق وينق لبليل عشان بتاع ما عاجبو اللبن بتاع اللبان..
سولارا:
قلت لي النقه كيف؟ حلوه مش كدا...لووووول
والله يا contanaيا اخوي انا ما نقناقه لكن اتعلمت النقه من مراقبه وسماع النقناقين والنقناقات وغايتو عندي احساس كدا انو حيكون لي فيها مستقبل باهر لوووول

ما بالغت عدييل يا حنين
لكن لقيتك عسل
عليك الله الكلام دا حفظتي كيف
بس جد النقة موترة
تخيلي انك عقلك مرهق و في غرفة مظلمة وفي ماسورة بتنقط نقطة ......نقطة....نقطة ....نقطة لي الصباح
غايتو بجيك انهيار
على فكرة دي وسيلة تعذيب

حنين
بالمنطق كده , الله سبحانه وتعالى اداك اضانين ولسان واحد يعنى تسمعى اكتر مما تتكلمى , واهلنا قالو النقة كسرت الحجر

حسنا ، ساتحدث هنا عن أنق شخصية عرفتها فىالتاريخ المعاصر الا وهى موظفأمن سودانى جلب الى مكتبنا مؤخرا. هذا الشخص لديه القدرة فى ان يتحدث عن اى شيئ فى العالم وفى احلك الظروف حيث يستمد حياته من النقة كما اعتقد وكذلك يغضب من اى شيئ ولا .. لكن يبدو انه براى اكثر من انه نقاق ولفظ نقاق هذا يزكرنى بالضفادع حيث انها تسهر الليالى كى تؤلف هذه الالحان الرائعة فى هدأت الليل الوديع ويبدو انها استمدت قدرتها على النقيق من هذا الشخص فاصبح كلاهما وجهان لعملة واحدة . العجيب فى الامر ان الضفادع تتميز بعزفها المتبادل مما يندرج تحت مسمى الموسيقى لان الاخيرة عبارة عن مجموعة من الانغام المتبادلة فى اوقات محددة تشكل فى مجمولها القطعة الموسيقية لذا قد لا تختلف الموسيقى فى فكرتها عن فكرة الضفدع عنها ولم يرد فىتاريخ الموسيقى ما يشير الى علاقة هذه الكائنات بالموسيقى واسهاماتهم المبكرة فى تنميتها وتتطويرها. لكن اذا تأملنا الامر بصورة عامة نجد ان هناك ظلما تاريخيا وقع على الضفادع وهو تحاول تأسيس قالب موسيقى واحد وحديث تماشيا مع عصر العولمة والبريد . فى السودان وفى جامعة الخرطوم تحديدا وفى امسية ناعمة بعد ان وردنا الداخلية والظلام حالك سالنى زميلى اين هو موضع الماسورة حيث انه كان يريد الوضوء لاداء صلاة العشاء فقلت له ان الامر ليس بهذه الصعوبة يمكننى تحديد مكانها الان فما كان منى الا ان نققت نقة واحدة فاذا بزملائى من الضفادع ترد على فى صوت جهورى واحد قاااااااااااق وكانت الاصوات صادرة بالطبع من مكان الماسورة فتوضى زميلى وصلى العشاء ودعى للضفادع بطول العمر والسعادة. هذا جزء صغير مما يمكن ان تؤديه الضفادع فى حياتنا اليومية نرجوا ان نستفيد منه ويكون لنا دافعا نحو مذيد من التقدم والابتكار.
ووو شكرا سينتمنال ..

والله يا عزه يا اختي الكلام دا اتعلمتو من مراقبه النقناقين والنقناقات والتامل في هذه النو عيه الفريده من الناس واظن انو بدات اكتسب الموهبه دي بالتدريج لووووول
والله انا نفسي انو اسجل لاي زول نقناق نقتو في شريط ولمن
القاهو يوم متكيف ورايق اشغل ليهو نقتو اشوفو بعمل شنو




العزيز ازرق:
في ناس ما بتفقو معاك في حكايه الاضنين ديل
اظنهم قايلنها لسند العمه او تركيب النظاره
من نوع الشافع النقناق بتاع:
لكن هو مااااااالو


الغالي سنتمنتال
عليك الله موضوع الضفدع دا صح واللا سطحت بي لانو انا من قبيل ميته من الضحك
يعني جد الضفادع ديل ردت عليك ؟ يعني كلو كلو ما قادره اتخيل
غايتو يا سنتمنتال انا من الناس اللي جبرتني الظروف انو اعيش مع ناس نقناقين فتره من الزمن
يا زول حكايه عجيبه شفت مرات لمن من غير مبالغه عيوني تطشش عديل من الكلام

حنين
انت اصبرى وشوفى القصة ما انتهت لحدى هنا لانو بقت عادة عند معظم طلاب الجامعة لمن يجيهم ضيف ويقول ليهم وين الماسورة بقولوا ليه امشى بره فى اى مكان فى الداخلية وقول غاااااااااااااااااااااااااااااااااااااااغ بعدك بتفهم الموضوع وبتلقى الماسورة . قبل كده ضيف ودينا المستشفى من الضحك جاه وجع ضحك لمن قرب اتلحس . وغايتوو لكن هى قصة والله واقعية... الله يخلى القعونجات

الشخصية النقناقة حاجة خطيرة

سبحان الله عشنا وشفنا
غااااااغ يا سنتمنتال

والله زى ما سامع يا حنين غاااااااغ

شخصية العام

ما هى (أنق) شخصية بالبورد

مرشحة أولى: حنين
بعدها: شنتير صاحب الطير
بعدو: سينتمنتال الغلباوى
بعدو: قرجة الهمباتى
بعدو: صاحبى عامر الدويحى
بعدو: تونى بلير السودانى
بعدهم: لم يحدد بعد

لووووووووول يا سنتمنتال البوست دا نكتو من وين.....ما قلت ليك انا الايام دي عايشه في عالم تاني بعيد النقه...عارف مع منو....لا لا ماتسرح شديد...انا مشغوله في مراقيه اخوانا الشمشارين
ما في زول سبغني ليها دي مش
قمه الشمار مراقبه الزول الشمشار
بعيدين تعال هنا.....ايوووووو قلت شنو نقناقه انا نقناقه الليله ما وقعت معاي يا يابا...الليله الليله ما سجمك وسجم امك والرماد في خشمك....
الزول في الدنيا دي ما يرتاح....يجي المسلط دا يقول عليو نقناق....اااااااح انت شفت النقه وين واللا بتعرفها وين

لوووووول ايه رايك في العينه البسيطه دي
تحب اديك دروس؟

حنين

ان تكون شمشارا فهذا شيى سودانى عادى ولكن أن تراقبى الشمشارين لتتعلمى منهم مذيد من الشمشرة فهذا لعمرى عجيب من نوعه. لذا أمنحك لقب أميرة الشمشارين والشمشارات وقيل لفظ جمجمرة هو الافضل.



والعينة بينة يا ناس

يا جماعة لكم التحية جميعاً ويبعدنا والسامعين من أهل النقة والنقاقين
وبمناسبة النقة بحكي ليكم نكتة ظريفة ما عارف إذا اتحكت في نفس البوست أن لا
الحاصل قالوا في مرة نقناقة نقة شينة زهجت زوجها من الصباح للمساء نقة
أنت يا راجل عيالك وأنت يا راجل جبت وأنت يا راجل ما جبت وأنت يا راجل هدومك وأنت يا راجل ......طول اليوم
الحاصل زهج منها وأشتكاها لأبوها ما نفع لأخوها ما نفع لأمها برضو ما نفع
في النهاية أشتكاها عند شيخ البلد وعمل ليهم حل يرضي الطرفين
والحل إنها تنق يوم وتبطل يوم والراجل وافق قال أخير من نقة كل يوم
جات اختنا دي نقت زين اليوم الاول ومن صباح تاني يوم صحت من النوم وشبكت هي يا راجل بكرة النقة ما تنسى بكرة النقة ما تنسى لمن أمست
وأرجو أن تكون عجبتكم النكتة رغم طولها

النقة وقفت ليه