سؤال للرجال:-اذا عاد الزمن الي الوراء...هل ستختار زوجتك مرة اخري؟

كيف ستكون ردة فعلك اذا عاد بك الزمن الي الوراء..اي الي مرحلة
ماقبل زواجك..وطلبنا منك ان تعيد النظر في حياتك الزوجيةوسألناك
هل ستختار نفس الزوجة؟
انها دراسةقامت بها د.دايان جيبسون خبيرة العلاقات الزوجية الأمريكية
وشملت ما يقارب من خمسة الاف زوج وزوجة يمثلون كافة الاتجاهات والثقافات-وقد اكدت النتائج أن 28% فقط من الرجال فضلوا اختيار زوجة جديدة- بينما معظم النساء اللاتي اشتركن في الدراسة قلن(لا) وبنسبة بلغت 87% اي اكثر من ثلاثة أضعاف الرجال

فما هي اسباب رفض الزوجات
تقول الدراسة ان اهم اسباب الرفض انحصرت في
انعدام الرومانسية,تحطم الأحلام وجبروت الرجل وافتقاره الي اسلوب المعاملة الصحيحة والرقيقة التي تحتاجها المرأة

السؤال موجه الي كافة الاخوة المتزوجين ونرجو الاجابة بصراحة
هل ستختار زوجتك مرة اخري اذا عاد الزمن الي الوراء


تنويه: الي الاخوة الذين تشارك زوجاتهم في البورد يمكنهم الامتناع عن التصويت
الف شكر

سلامى يا رقيق الطلة عودا حميدا
قالوا محمد أحمد حسن كان بيدرس فى حريم كبار من حريم الشوايقة وأغلبهن فاقت أعمارهن الستين.. قال لهن بلهجته المعروفة - لمن ندخل الجنى بإذن الله إن بقت الواحدى ما متزوجى بيزوجوها من الحور العين أها وإن بقت كمان معرسى يشاوروها تختار راجلها القديم ولا يدوها البطلبو من الرجال.. نطت واحدة منهن وقالت بسرعة أنا سيد أحمد مانى دايراه أنا دايرى يوسف شعبان.

وهسى يا أبوعثمان أنا داير مادلين طبر

قال مادلين طبر قال

طيب نحن معاكم
يعني الواحد لو كان خاطب مثلاً ورجع بيهو الزمن للوراء هل سيختار الخطيبة دي مرة تانية ؟؟

آسف جداً اخي ابوعفان على ادخال المرح في البوست
حقيقة بوست مهم جداً وجدير بالمناقشة
ولكنه يحتاج للمزيد من الجرأة
انا طبعاً اسمي الحقيقي عثمان
وبنت خالتي متزوجة من واحد كريه جداً يحمل نفس الاسم
المشكلة حالياً بنت خالتي بتكرهني كراهية بطالة جداً
كل ذنبي ياحبيبي عشان اسمي زي اسم زوجها
غايتو دي لو سألتوها السؤال دا حاتشوفوا العجايب منها

حلوة يا ود العجمى

اهاااااااااااااا
و
مع الملاحظ شوية اختلاف المجتمعات
و الرسول ذاتو قال اكثر اهل النار يكثرن و يكفرن العشير
يكفرن العشير دي تحتا خطين
الموضوع دا عشان نرد عليه داير دراسة اكتر
و داير الجندرية شخصيا
لكن لي عودة جادة

ودالعجمي
الله يجازيك
وقريبتك الشايقية كلامها منطقي جدا وهذا لا يدل علي عدم وفائها
وقديكون نوع من الملل أو حب التغيير وكا هو معلوم فان الملل يصيب الرجال اكثر من النساء
الاخوان
ودعازه
عزه
شكرا
ننتظر المزيد
الف شكر

تستاهل يا ابو حراز فطووووووووك

قال خاطب قال

الحبيب ابو حراز
لا ادري من اين اتيت بودعازه وانا
كنت اعنيك انت يا ابوحراز
والظاهر كبرنا
لك العتبي وبعدين ياخي الخطيبة دي ما فيها مشكله ممكن تتغير
بدون مشاكل وما زي شبك الحديد التاني
الف شكر

تعرف بعض شبك الحديد
الا كان تجيب ليهو حداد ماهر يفكك منو

أبوعثمان

سلام يالذيذ يارايق

ونحن ! خارج المنافسة يعنى !؟

أبوعثمان

سلام يالذيذ يارايق

ونحن ! خارج المنافسة يعنى !؟

ابو عثمان
بالله ده انت؟ يخرب مطنك زي ما بقولوا المصريين
تعرف لو ما رسالت الليلة عمري ما كنت حا اقوم اعرف ده انت
والغربية ابو يسرا اصله ما جاب لي سيرة
مؤامرة يعني؟
اما عن الموضوع انت رايك شنو؟؟؟؟؟؟؟؟؟؟؟؟
وعلني؟؟؟؟

أبو عثمان

شنو كمان ما تقول لي العطبراوي دا هوولكم

بقي عنوانكم البورد - مركز مروي


أما عن حكاية الإختيار فأخوك إنت عارفو رياد ووفي ولهذا لن أرضى بغير الأبنوسة

الجميل / نادوس
الوفاء ليس بغريب عليك وشكرا علي اجابتك ..... رغم اننا حذرنا الاخوه الذين زوجاتهم اعضاء بالبورد من المشاركة
والله انا خايف تكون حاصله عليك حكاية جدك زايد؟
العطبرواي هوولنا بعد ان منحناه التابعية
الف شكر

تابعية الشوايقة ولا تابعية آل سعود؟؟؟؟
لو تابعية الشوايقة ده صحيح لاني ولدت وترعرعت في حي الشوايقة بعطبرة "حي امبكول" وكنا الاسرة الوحيدة الما شايقية في الحي الصغير ده0 اما اذا كنت تتحدث عن تابعية آل سعود فقد قذفت بها في وجهكم منذ زمن بعيد واظنك سيد العارفين0

ههههههههههه نتمني ان نسمع راي صاحب البوست اولاً
بالنسبةلي لااستطيع كتابة الرد لأن خال يسرا معنا في المنتدي

الحكاية كلها بقت مروى وعطبرة وأبنوسة وخال يسرا . رأيكم شنو ما نرجع البلد ونسوق الجراولة . وبرضو سوقوا الاتبراوى معاكم. أبوعثمان موضوعك طرشق. شفت أهلك يدمروا أى جاحة.... هوووووى الكلام دا ونسة والحكاية اصلها بايظة .. عودوا الى موضوعكم وأنا طالع منها..أبوعثمان داير أرفع البوست لأنو حقيقى يستحق المداخلات

انا بعرف مرة راجلها اسمو عبد الفضيل بتقول ليه عبد القشير

كان قاعد يصلى امام، لما الدور عليها تقول امين، ما بتقول آمين، بتقنت.
وكان بدا سورة الكافرون ، تبدا النقة، هى ما بتعرفلها بتخلبتها ساكت شوفلك واحدة غيرها، شن خبرك بيها


اعا المرة دى تجى الاستفتا دة ولا تتخلف؟؟؟

ياجماعه شووفوا انا قريت البوست ده كم مره وكنته مقرر ما اعلق خالص بس بعد القريته من الاخوان والاخوات وصلته لقناعه يعني الواحد ما بعرف قيمة الشي الفي ايده الا لما يفقده والحقيقه التانيه انو الانسان سريع الملل ويمكن تصل لدرجة التغير بس زي ماقالوا اهلنا جن تعرفه ........................ ودمتم يا صحاب التغير

سلام يا ابوعثمان ياناس
الحقيقه الموضوع ظريف
ودموا خفيف ياناس
اه انا حسب خبرتي البسيطه
بعرف حاجه واحده زي ماقال الفنان
العندي انا ما بديولا ببدل في شي
والعند الناس ما بقالع في
ولو رجع العمر بينا 1000 سنة ياناس
اختك سوويت ياناس

تماضر
وليم
سويت
اللورد
ابويسرا
شكرا لمداخلاتكم ونتوقع المزيد
ويا ابويسرا زوغتك كانت ظريفه واستخدمت دهاءك في الهروب
الف شكر للجميع

ابوعثمان لك تحيتي
عندي سؤالين في الموضوع دا
اولا لم وجهت السؤال للرجال فقط مع انك ذكرت انه الدراسه اجريت علي الطرفين ولا تكون خفت اجابات النساء تطلع زي نتيجة البحث
الشئ التاني انا شايفه الجماعه بيكونوا عايزين يردوا لكن ماعايزين يقولوها صراحه عشان كده اعمل ليهم شفره بدون ذكر الاسماء عشان نعرف الاجابات

اما انا غايتو كان سألوني مع انه السؤال ماموجه لينا لكن بقول ماعايزه زوجي عايزه جورج قرداحي زي ماقالت الشايقيه قريبة ود العجمي
لكم تحياتي

يا بت الجزيرة سلام
السؤال موجه للناس الماشين الجنة ولاّ إنت ما ماشه معانا.. جورج قرداحي البجيبوا مع ناس أبوبكر الصديق وخالد بن الوليد شنو؟

سلام يابن خالي

أكيد وأكيد حـأختار أم العيال ذاتها..طبعا دا من باب جنا تعرفوا ولا جنا ما بتعرفوا...بس خليها في سرك....ود العجمي رايو شنو؟؟؟؟؟؟؟

يا نيل1

أقرأ بداية البوست ياخى


قلنا مادلين طبر ياخى قلنا مادليييين طباااااار

بعدين يا خوى جن مادلين أريتو جنك بعد الحالة دى

سلام يابن خالتي

رأيك قريتو؟؟؟؟؟أنا قصدي رأيك في حكاية جنا تعرفوا دي؟؟؟مش اخير الواحد يبقى على فرد جن؟؟؟؟كمان تبقي دنيا وآخره؟؟؟..وبرضو خليها في سرك

انا غايتو حاختار ام السمحات واحمد الله علي احلي ايام العمر!!!!!

يا ابو عثمان .. كيف حالك .. و شكراُ على سؤالك
و الله دخلت هنا تحشر مني ساكت .. و شجعني اللواء عزاب حرب ابو حراز.. لكن عاجباني حكاية ارجاع الزمان الى الوراء .. بس ورينا برجع كيف و تاني ليك علي اوريك جنس خمج

هناك اسماء فى كل البوستات لها عداء شخصى لأسماء معينة شئ غير جميل فعلا

يا بكرى أبوبكر ما هذا ؟؟؟؟؟؟؟؟؟؟؟؟؟

الأخ ود العجمي لا اري داعي لمداخلتك الآخيرة

ولااعتقد ان هناك من خرج علي قوانيين المنتدي

أبوعثمان أنت كتبت موضوعين مميزين فعلا وعدد الزوار والمداخلات فيها من أكبر البوستات وتمتاز بوستاتك بخفة الدم وروعة المضمون .. صدقنى اذا قلت لك انت محترم فلا يهمك هذا السخف

الاخ ود العجمي .. اسمح لي ان اقول لك انك انت الوحيد الخرجت عن النص

و بما أن تعليقك كان مباشرة بعد تعليقي .. فقد فهمت شيئاً لم يعجبني .. رغم أن تعليقك قد تم مسح جزء منه لا ادري ما هو. المهم ارجو أن اكون مخطئاً. فاذا كنت تقصد تعليقي انا .. فالرجاء أن تسأل ابو عثمان شخصياً عني و عن علاقتي به .. و اذا كنت تقصد تعليق آخر .. فلك ما شئت

و لك التقدير

شنتير اخوى
مداخلتى اتعدلت لأسباب تحريرية فقط فأخوك ما بيعرف الخاء من الجيم واللام من التاء.. لأنو النظارة مكسورة والواحد عميان شوية
أبوعثمان حبيبنا كلنا..

لا عليك

الاخ ود العجمي . . من السهل جداً الوقوع في سوء الفهم اذا كان النقاش غير مباشر .. لذلك احاول ترويض نفسي على عدم تاويل كلام الاخرين بشكل مجحف و غاية مبتغاي أن يكون التواصل فيه شيء من الدعابة و شيء من الجدية أيضاً. لست من فرسان حروب الانترنت إطلاقاً و لا اؤيدها .. و لا استطيع التلفظ بنابئ القول إلا أن سقت اليه سوقاً .. و عندها يا اخي ود العجمي سوف أحمل مخلايتي فوق كتفي .. و ارض الله واسعة .. و زي ما بيقول البعض، لو ابتك دار فلله ديار و لو ابتك قريش فلله انصار. كلام حكمة ما بعدها

الحمد لله اني فهمت انك قاصدني بتعليقك الذي قلت انه تم مسح جزء منه لاسباب تحريرية .. و لا يمسح شيئ لاسباب تحريرية الا اذا متطرفا في مفرداته .. و خرج عن المالوف و الادب. و أربأ باي مشارك هنا أن يخرج عن حدود الادب .. و أنا لم اخرج حتى الان عن هذه الحدود. و لو قدر لي ان اخرج عنها فسوف لن امارس ذلك على الفضاء الاثيري او عن طريق التلفون .. فهذه عادة غير لائقة بي .. و لا بك كما احسب

كما قلت انت .. ابو عثمان حبيبنا كلنا .. انا على اتصال به .. و قد كان هو اكثر منك حصافة اذ فهم ما رميت اليه من تعليقاتي على موضوعه السابق .. و هو صديقي جداً .. و من طينتي أيضاً

الرجاء يا اخي ود العجمي .. الرجاء التريث قبل الاندفاع .. و أنت انسان راشد .. و لا تحتاج لمن ينصحك .. فكلنا هنا اخوة - كما اعتقد انا صادقاً - و ربما أعداء بحسب اعتقادك انت الذي تشي به رسالتك

على كل حال .. ابو عثمان صديقي .. و أنت بادرتني بما لا اطيق .. و عذرك معاك لاننا لم نلتق و انت اطلقت العنان لاحساسيس غير مبنية على منطق

هترشة: ياخوي نظارتك لو ما لاقي ليها دكتور .. واقع علي حلف الا اتكفل بيها .. اتلومت معاك؟
شنتير .. المو تاجر حمير

احييك أخي شانتير وانا قلت لود العجمي ان مداخلته غير لائقة شكراً على شفافيتك اخي شانتير ونرجو من الاخوة كوكي واللورد ان يوضحوا لنا الحاصل لان مداخلة شانتير مابها شي يدعو لهذا الهجوم الغير مبرر

بإعتباري عريس جديد فأقول لكم حتى الان الاجابة ستكون نفس الاختيار وأكرر حتى الآن .

الأخ أوسمازيو

ألف مبروك جعل الله حياتكم كلها أفراح وسعاده...وإنشاء الله تغلبها بالمال وتغلبك بالعيال وإن كانت جميع الشواهد تقول أن من قبلك غلبوا بالعيال..والعيال..والعيال..أما المال..فغلب أعتي الراكضين خلفه...عموما أبقي قابلني بعد كم سنه كدا وقول كلامك دا تاني...أكرر لك ولها تهاني القلبية الصادقه

رغم ان السؤال موجه للمتزوجين فقط، الا ان من المفترض ان يوجه للمتزوجات ايضا ولا شنو


ام واصل ومرافىء

شنتير يا عفيف يا راقى سلام

لك العتبى حتى ترضى .. والحكاية كلها سوء فهم والحمد لله الجات فى زول صدره رحب زيك .. اللوم راكبنا من ساسنا لى راسنا فألف معزرة .. نسوى شنو والواحد بقى ما عارف الصاح من الغلط مع هذه الضغوط .. والروح العدائية بقت مصاحبة لحالات القرف النحن فيهو دا
يا جميل لك إعتزاراتى ولو أنها ما بتكفى
وبرضو خليها مستورة
بريدى هو
[email protected]

اذا حبيت تكاتبنى.. لأنى سأشد الرحال من هذا البورد وأنا بهذه الحالة

سلامى

I wish one can go back in time to the moment he/she was in the mother's womb and asked what gender he or she wants to be. Men today are victims and yesterday were preditors. Women today accuse men of being controlling, abusive, selfish and adulters. Men feel shame to complain about the hard time their women given them. It seems everything is turning upside down nowadays.

الموضوع جميل وبحتاج لمداخله وبما انو الواحد خشه دنيا جديده وحدد موقفو
بالنسبه لي هو اختيار واحد وموسس ومبنى على علاقة جميلة وتفاهم تام
فهى شريكة حياتى فى الحلوه والمره ولو رجع الزمن مليون سنة لورا او لقدام
ثابت ومنهجنا واحد ما بنغيرو دى حياة وعشره طويله ومليانه
رومانسيات
الكلام ده طبعا ما بفشك ياود العجمى

الدنيا منى واحلام يا سلام

كدي الزمن اليرجع لى ورا أول حاجة وشوفو منو البعملها تاني مرة

انــا خـــارج المناســـبة لعــدم إســتيفائي شروطها
(بصفتـــي متزوجــة ولســت متـــزوج) هاها

فقط ســـأرد على أبــو حراز ومن معه في مــرحلة الخطوبـــة واقــول ليهم استـــنو شوية
دي لســـة المنـــاظر

لكــن أنا خايفــة لو عــدنا للوراء هل سينصلــح الحــال؟؟؟؟
ســؤال يستحـــق التــأمل ....
لكــم التحيـــة

الف شكر
لكل الاحبه الذين اثروا هذا البوست بمداخلاتهم
وقفشاتهم المبهجة
الشكر للجميع
وانا شخصيا
لوعاد الزمن للوراء
سوف اختار العوده الي.....صدر امي منبع الحنان الحقيقي
فتناكم بعافية

أنا ماعارفه ليه وجه السؤال للرجال هل خوفا من السنة النساء ام ماذا .على اية حال من المفترض على الزوج او الزوجة ان يتحملا نتيجة إختيارهما حتى لو فرض انه إختيار خطأ لازم يتحمل كل واحد نتيجة غلطه او غلطها وليس الغير
اتمنى التوفيق لكل الزيجات
الأمدرمانية

الأخت امدرمانية
شكرا
اما بخصوص عدم سؤالنا للنساء ؟ ذلك يرجع لان النساء كانت اجابتهن
واضحة بالبحث المذكور في صدر هذا البوست وليس خوفا منهم كما زكرتي
فقد اردنا اتاحة الفرصة للرجال ولكن صدقي كلهم زاغو
ما عدا القيل
متع الله الجميع بزواج سعيد
والامر لايعدو اكثر من مداعبه ظريفه
الف شكر

فوق