قال لزوجته كل عام وانتى حبيبتى ..... فتعرض للتحقيق فى السودان

فى برنامج كفر ووتر الذى تقدمه المزيعه المتمكنه عفاف حسن امين
وفى احدى حلقاته اتيحت الفرصه لاحد المستضافين فى البرنامج فتقدم بالتهانى للشعب السودانى بعيد الفطر وقال لزوجته وهى مستضافه معه على نفس البرنامج


كل عام وانتى حبيبتى


الى هنا وكل شئ طبيعى ولكن المدهش ان مخرج ومقدمى البرنامج والشخص
نفسه تعرضوا للتحقيق من قبل الهيئة القوميه للتلفزيون وتناولت
الصحف السياره الموضوع مابين مؤيد ومعارض لتجرؤ الرجل ولفظه
كل عام وانتى حبيبتى امام الملأ لزوجته؟؟؟؟؟

كل هذا لانه قال لزوجته كل سنه وانتى حبيبتى


السؤال

هل اصبح لفظ كلمة ( حب ) فى عهد الانقاذيون حراما
وجرما يعاقب عليه القانون ؟؟؟؟


ولكم الاحترام من قبل ومن بعد


ديك الجن

ديكو لا اصدق ان ما قلته حقيقي

وان كان كذلك فلا اقول غير
لاحوله ولا قوة الا بالله

دا تخلف عدييييييل كده

دي من وجهة نظر الكيزان جرم وخطيئة يعاقب عليها قانونهم الذي يُنفذ على كل من تسول له نفسه أن يكون نزيهاً صريحاً وواضحاً

هؤلاء الناس لا يعرفون معنى الحب و لقد نشروا الكراهيه و البغض و الكراهيه اوقدوا نار الحرب و زادوها اشتعالايريدون التفرقه حتي بين المرء و زوجه لان الحب اذا عم بين الناس فلن يجدوا مكانا يعيشون فيه ما اقبحهم

طبعا يا ديك الجن كلامك ده ضحكني جدا و رجعني لموضوع مقال قديم اثيرت حيثياته في بوستات سودان.نت و هي اننا شعب يفتقر الي الكلمات الرقيقة في الممارسات اليومية و حيث ان المسألة ليست في كلمة حب ذاتها لانها و في اعتقاد الكثيرين كلمة دخيلة علي الموتور اليومي و علي الاصح مستجلبة من المسلسلات المصرية...السودانيون يستعملون كلمة "الريد" كبدل ليس فيه غير الحياء الذي يستلزم الفتاة لتغطية ادني الانف مع العين الي الفم حين سماعها. و الناس يقولون فلان "بريد" فلانة و لا يثير ذلك غير غضب الغايرين...أما كلمة الحب فانها تثير امتعاض الكثيرين و ما استعملت ابدا الا في وصف حب العبد لربه و لرسوله الكريم

و علي العموم تلمس في خطاوينا اليومية فستجد جفاف الروح الا عند الحبوبات فكلماتهم تبل ريق العطشان و الملتاع" جني حشاي" و ما شابهها من المفردات الحنينة

جيل اليوم اختلف عن جيا الامس فدخلت علي حياتنا اليومية مفردات جديدة بعضها مجلوب و بعضها استحدث و اصبحت متداولة في جيل معين و لاجيال عمرية متقاربه...و علي ذكر ذلك فان احد اصدقائي كان يقول لي " تصبح علي خير" و لو ابوي سمعني بقول الكلمة دي كان قطع لساني

اننا حقا في مرحلة صراع الاجيال التي طالما كتبنا عنها، تغيرت مفاهيم كثيرة نراها في جيلنا من الكلمات المستباحه و تري عند البعض ممن سبقونا بانها مسخرة فاضية لا معني لها


سنقابل الكثير من هذه المفاهيم المتغيرة بكثرة تبادلها

عزيزى ديكو
الظلام وكت يتمدد يعم...
وما غريبة لو حصلت...حتى لو عسس الليل وقفوا اتصنتوا فى ابواب الناس وغرف نومهم...وقدموهم للمحاكم تحت تهمة الهمس والعشق آخر الليل


تحياتى
ودعزة

عزيزى ذو الرقم الصعب
تحياتى


انه زمن مصادره الحلم وكتم الهمسه وتزوير الاحساس


صدق ياعزيزى ولقد نشر الخبر على صفحات جريدة الخرطوم


ولك التحايا مرة اخرى

ديكو

-

الأخوة الكرام
DEEK ALJIN ، رقم صفر ، 3asola ، bit alneel ، hasan 6 ، MOHDY

يا أخوانا ما تهاجموا الجماعة ديل ساكت ، وتبقى شغلتكم بس هجوم دون علم.
الجماعة ديل يا سادة ما بيؤمنوا بالرومانسيات القاعدين تحلموا وتتكلموا عنها، ناس حب وحبيبي وحبيبتي نور عيني وشايفة القمر يا ليلى.
ده كله مضيعة للوقت ساكت
لازم في العصر ده تكون عملي، عارف كيف؟
الناس ديل عمليين جداً....
!!!!!ديل ناس أمسك لي وأقطع ليك
!!!!ديل ناس السكرتيرة السمحة التي تقوم بمهام لسعادة المدير غير مهام السكرتارية
وإن دخلت المزاج واستعصت ،،، فلا مانع من رمي الحبل عليها ،،، أي حبل إنشاء الله حبل بلاستك.

حكاية على ذمة الراوي الذي هو من الجماعة وموظف بذات الجهة التي وقعت فيها هذه الواقعة التي قصها لي وهو مشمئز.
في أحد البنوك
كل اللإدارة العليا وجل الموظفين من الجماعة.
المستشارة القانونية أمرأة فاضلة متدينة دخلت مكتب نائب المدير وهو إبن عم رأس كبير في النظام فوجدت السكرتيرة الحسناء مسترخية بحجر نائب المدير وفي وضع غير لآئق.
خرجت المستشارة فوراً على مكتب سعادة المدير وروت له ما شاهدت مطالبة بمنع مثل هذا السلوك !!! المشين في مكاتب وأروقةالبنك
ماذا كان رد سعادته ؟؟
هل لديك أربعة شهود عدول؟
بالطبع ... لا
!!!!!في هذه الحالة إذا فتحتي فمك بكلمة سنطبق عليك حد القذف بحق سعادة النائب
استقالت المستشارة !!!!!

والله أعلم ،،،

القصص والروايات كثيرة وعلى ذمة رواتها ،،،
ويا للعجب ...


-

فاقد الشئ لا يعطيه

طالما انهم ما بحسوا الحب يبقى ما ح يعرفوا معناه


ولا ياربى يكونوا حسدانين وبغرانين!!؟


وسلامات كتار يا ديكو

كلمة بحبك..الحب...من الكلمات او المصطلحات المفقودة فعلا في الحوار اليومي لكل اسرة...عمري ما سمعتى ابوي قالها لي امي او العكس....في استنكار لاستعمالها....حتى الام لاولادها الصغار يمكن ما بتقولها ...يمكن حسي الجيل الجديد شوية بسبب الدش و الانفتاح الحاصل في العالم ممكن تكون بقت مستعملى بشكل اوسع....اذا الموضوع تربية....و ناس الحكومة ديل سودانين...اندهشوا و استنكروا الكلمة دي لانها مافي قاموسهم الكلماتي ....لكن دبقى حاجة مضحكة جد اذا حققوا مع طاقم البرنامج لانو ضيف في البرنامج قال لزوجته بحبك...هل يجب ان يكون هناك كنترول على كلام الناس ‍‍‍‍.....جد حاجة غريبة استنكار الحب دا كمان....

حاجة غريبة و عجيبة‍‍

كنت بتكلم عن الموضوع دة فى البالتوك،
لما مشيت السودان وبعد سنين الحنكشة فى امريكا لاحظت انو الناس ما بتعاطوا كلمات شكرا والسلام عليكم ولما العاطس يعطس مخير يشيل شلتو ولما يطقشك بكتفو انت الجابك بى جاى شنو ولو عفصك، شيل كراعك من رجلى وحالة مسيخة لشكل؟؟

جربت امارس تهذيبى ولقيت الاستنكار من كل العيون، ناس شكرا ولو سمحت دى بعدها حدرة طوالى
حتى الشفع ما بستحملوها

الراجل جة مهذب من الخارج وجاى يشترى احتياجات البيت من سيد البقالة وشبكو ليك لوسمحت ادينى نص رطل شاى ولو امكن ادينى 5 اركطال سكر، ولوسمحت ولو امكن

قام سيد البقالة قال ليه يازول انت ماعندك قروش ولا شنو؟؟
قال ليه لا عندى قاليه خلاص مدام انت بقروشك وانا بى بضاعتى نتبايع بيع رجال ولا تقعد تسوى لى لو سمحت؟؟؟؟

اها ناس اربعة عدول ديل المسالة بيع رجال، المراة عندهم للمتعة الحسية، والحب مؤشرللشروع فى العمل الفاضح وما بعرفو غير كدة والرومانسية كلها مفاتيح للفعل الشيطانى

عشان كدة ممنوعة،
العلاقات الانسانية دى تقعد فى الكنبة الورا
يعنى دايرة شرح كمان؟؟؟؟
ياجماعة ما تخليكم عاقلين...


وتقول لى الفن فى السودان مالو؟؟؟

هذه الكلمة ضد خطط الانقاذ الفاشية التي تسعي الي زرع الأحقاد بين الأحباء و بين أبناء الوطن الواحد
لكن الثورة دوما بتنبع من رحم الاحزان ... و دي بالمناسبة من مؤشرات سقوطهم .. الخوف الزائد من الفعل الذي لا يجيدونه .. الحب

لكم كل ودي

محمد

وبالمناسبة يامحمد انا كلمتك قلت ليك بحبك؟؟؟؟


لو ما كلمتك تانى بكلمك

انا بحبك

وعشان الكلام القلتو دة بدعونى لحبك اكتر

ده شعور متبادل بيناتنا يا تماضر الرائعة .. أنا نفسي ما عارف سببو لكن هو نوع جديد من الحب ممكن تسميهو :
Long Distance Love
Or
Love without meeting ..

ان صح التعبير
لكن أنا أصلا عندي اعتقاد ان الأرواح بتتعارف علي بعضها ... يعني الأرواح الجميلة بتعرف بعضهابدون وسيط بالتالي من المستحيل وضع قاعدة معينة لفكرة الحب

لكن بس أعرفي اني فخور بحبك .. و اني بتمني لو كان شيئ مادي عشان أضعه كوسام في صدري .. أنا فعلا وضعته كوسام .. لكن الناس بس ما شايفينو .. بيكفي اني أنا شايفو
لك كل حبي
Modic ..

اهداء الي الجميع و خاصة الرائعة تماضر ( عندك رد مني فوق شوية ) شوفيهو

هدية من ايدك مقبولة معناها انى على بالك

غنية قديمة لسيد خليفة بتكون ما حاضرها

أول مرة أسمع بيها .. لكن جميلة ما دامت منك يا تماضر
تسلمي

Modic ..

شئ لا يصدقه عقل
هل صحيح موضوع التهذيب أصبح أحد الفروق؟
أنا مرة من المرات دار حوار بيني وبين أحد الشباب
وفي نهاية الحديث وجه لي سؤال انت جاي من برة؟
قلت ليه أكيد واضح من شكلي
قال لي ابدا
شكلك ده في ناس كتير ظاهرهم أحسن منه
لكن احساسي بأنك مهذب وكلامك مركز هو سبب سؤالي
لم اصدقه في لحظتها
من كلماتكم هذه تذكرت الرجل وتذكرت احساسه
ربما كان يحس بالمرارة من فقدان التهذيب عند الكثير من الناس

الاخ ديك الجن تحياتي,,وين الغيبة دي ..اشتقنا ليك...والله الانقاذيون دييل ..ولا بلاش ..مالك علينا يا ديك الجن الناس ديل انا راجعة ليهم قرييييب بقابلوني في المطار,,أجدع ناس,,,وكيف الراجل يقول لي مرته كل عام وانتي حبيبتي,,لو كانت واحدة تانية كنا قلنا معليشي بس العيبة ما تجيش الا من القريب....

ودمتم

لا ازيد على الردود الفائتة و الخلاصة بان ذلك مردة للشح فى البوح بالعواطف و طالمانحن متفقين على ذلك لماذا لا نبدا نحن بالتغيير من الان و نمارس الحب بوحا و عملا من الان لكى يكون نتاجة شعب محبة
و ليبدا كل واحد منا فى بيتة و النتيجة حاتكون فى الاجيال القادمة
و اللة اية رائكم

ابواحمد

للمعلوميه


ضيوف البرنامج هم


د . معز عمر بخيت وزوجته المزيعه جديه
طارق كبلو وزوجته اسراء زين العابدين
لقمان حسن همام وزوجته



فهل اناس فى قامة هؤلاء يحتاجون الى وصايه فيما يقولون؟؟؟


ديكو

يكـــون حب الرجـــل لزوجتـــه فتنـــــــــــــة حســـب شريعة
الكيـــزان وعنــدها يحـــب أحـــدهم غيــــرها ويتزوجــــها خـــوف الفتنـــــة وهـــذا عيـــن الأخـــــلاق
عجبــــــــــــــــــــــــــــــــــــــــــــي !!!! يا ديــك الجن

يا سلام

يا ديك الجن

استمتعنا أنا وزوجتي بكل المداخلات الظريفة على الخبر الغير ظريف.

تذكرت قول الطيب صالح في رواية موسم الهجرة إلى الشمال عندما جاء مصطفى ليزور رواي القصة الذي عاد إلى قريته من خارج السودان بعد سنوات طويلة:


بعد هذا بيومين، كنت وحدي اقرأ وقت القيلولة. كانت أمي وأختي تلغطان مع بعض النسوة في أقصى البيت، وكان أبي نائما، وقد خرج أخواي لشأن ما، فخلوت بنفسي. سمعت نحنحة خارج البيت، فقمت، فإذا هو مصطفى، يحمل بطيخة كبيرة، وزنبيلا مملوءا برتقالا. ولعله رأى الدهشة على وجهي، فقال: "ارجو ألا أكون ايقظتك من نوم. لكنني قلت أجيئك بعينة من ثمر الحقل، تذوقهز كذلك أحب ان أتعرف إليكز وقت الظهيرة ليس وقت زيارة. أعذرني".

لم يغب عني أدبه الجم، فأهل بلدنا لا يبالون بعبارات المجاملة. يدخلون في الموضوع دفعة واحدة، يزورونك ظهراً كانت أو عصرا، لا يهمهم أن يقدموا المعاذير. رددت الود بالود، ثم جيء بالشاي.

دققت النظر في وجهه، وهو مطرق. إنه رجل وسيم دون شك، جبهته عريضة رحبةن وحاجباه متباعدان، يقومان أهلة فوق عينيه، ورأسه بشعره الغزيز الأسيب متناسق تماماً مع رقبته وكتفيه، وأفه حاد منخاراه مليئان بالشعر. ولما رفع وجهه اثناء الحديث، نظرت غلى فمه وعينيه، فأحسست بالمزيج الغريب من القوة والضعف في وجه الرجل. كان فمه رخواً، وكانت عيناه ناعستين، تجعلان وجهه أقرب إلى الجمال منه إلى الوسامةز ويتحدث بهدوء، لكن صوته واضح قاطع. حسن يسكن وجهه يقوى. وحين يضحك يغلب الضعف على القوة. ونظرت إلى ذراعيه، فكانتا قويتين، عروقهما نافرة، لكن أصابعه كانت طويلة رشيقة، حين يصل النظر إليهما بعد تأمل الذراع واليد، تحس بغتة كأنك انحدرت من الجبل إلى الواديز

قلت أدعه يتحدث، فهو لم يجيء إليّ في حمأة القيظ إلا ليقول لي شيئاً. ولعله من ناحية أخرى جاء بوازع من حسن النية. لكنه قطع علي حدسي. فقال: "لعلك الوحيد من أهل البلد، الذي لم أسعد بالتعرف عليه من قبل". لماذا لا يترك هذا الأدب، ونحن في بلد إذا غضب فيها الرجال، قال بعضهم لبعض: يا ابن الكلب.


انتهى

أردت فقط أن يشارك الناس التفكير معي في عبارة الشيخ الطيب الصالح عندما علق على ناس الجبهة قائلا:
من اين أتى هؤلاء الناس

وأتبرع فأقول بأننا درسنا في الأدب اقوال مثل

ونشرب إن وردنا الماء صفوا
ويشرب غيرنا كدرا وطيبا

لا حول ولا قوة إلا بالله

هناك عوامل كثيرة صاغت الشخصية السودانية العادية تستحق الدراسة بحق

عُذراً.. مكرر كالعادة

بدون أى دهشة .. دى نتيجة حتمية وأكيدة
طالما أن الحكم فى يد هولاكو وعصابته ، فإن قُبحهم يطال كل شئ لامحالة
أخونا بكرى ابوبكر.. شايفك عندك اقتراح لحفل البورد السنة الجاية فى الخرطوم !؟ إنت بتتكلم جد !!؟

الأخ ديك الجن.. ممكن لو تكرمت تورينى ألقى الكلام ده بمراجعه وين !؟ أناعاوز أترجمه عشان الأمم التانية تشوف مصيبتنا قدر شنو .. ويعذرونا تانى فى كل شئ

احنا فعلا ممكن نكون شعب جاف وما رقيق في كلامه ومسالة التعبير بكلمات الحب دي مسالة ما بتكون واضحة يعني عشان واحد يقول لي لزوجته او خطيبته انه بيحبها تلقاه يتلفت شمال ويمين ويطمئن ان ما في زول بيسمعه عشان ممكن تكون مسالة محرجة بالنسبة ليه قدام الناس وابسط مثل لما السوداني تكون زوجته جاية من السفر وهو منتظرها في المطار حتى لو غايبة عنه سنين بيسلم عليها كأنوا شافها امبارح ، يمكن المسالة دي نتيجة للتربية لكن كم يكون شيئا عظيما عندما يتمكن الشخص من التعبير عن مشاعره بدون خجل وخاصة لزوجته او حبيبته او خطيبته يعني بالعكس نحن في زمن زي ده محتاجين للعواطف اكثر لكن الحصل للضيف في التلفزيون هو احدى سخف ناس الجبهة لانهم ناس ما نضيفين وما يفعلوه خلف الستار شي عجيب واكيد هم اخدوا المسألة وفق لمفهمومهم الحاكمين به السودان
واصغر طفل في السودان ما عاوز الناس ديل يكونوا حكامنا
ولديهم الكثير من مثل هذه المواقف
مايا