مسيخ ، وكريه ـ لكن بتنقط عسل - ياخ اصلو شنو؟؟؟؟؟؟؟؟؟

مسيــخ ، يخ...سي ، لميــض ، بـسس، لديــح ، عمـا، كريــه
.. لغه حقتن براهن بيعرفوها .. جابوها من وين ما تعرف ؟!!
المهم هي بتتقال ليك وكمان مرات في صمة خشمك- حتي لو كنته بتنقط عسل .

مسيــــــــخ
والمسيخ من المساخه .. وهي عكس طاعم ، الفول ده مسيخ يعني ناقص ملح ، الشاي مسيخ يعني ناقص سكر
ملحوظه:-
الفسيخ ما مع الجماعة ديل
طيب فلان أو هناي ده مسيخ ـ يعني شنو؟؟؟؟! مع العلم أنو هناي ده زول لا هو شاي بتشرب ولا فول بتاكل .

لميـــــــض
واللماضه دي لما تكون داخل ليك مع واحده في مشروع مناقره كلمه وغطايته، او الكمده بالرمده.. يعني قطع ،، وفي النهايه طلعت مغلوبه 1/صفر وأفلست واتورطت ودي عادة ما بتحصل قدام لمه من الناس زي في البص كده .. لما تكون راكب في العشرة الأوائل ، وجات فلانه وقفت ليك في راسك وماسكه في الحديدة بتاعة الكرسي نظام قوم لي يعني من كرسيني، وانته ما هببتو ليها لانك قاعد تعاين بالشباك .. ومرخم، ومخدر وحالتك بالبلا لانك سافي..اها اذا كانت من النوع العندو جرآة كافيه بتقول ليك : اسمع اذا سمحته .. الكراسي دي سووها للنسوان أرجع وراء هناك محل الرجال .. طبعا بتطنش زي الما قاعده تتكلم معاك بعد شويه المسألة بتجيب ليها جديع كلام .. بعد داك تبدا المناقره ..في الجماعة القاعدين بعد الكرسي رقم حداشر فيهم واحدين بتاعين شمارات بيكونو مستمتعين وما د######ين الحكاية تنتهي علي خير - في نوع بيقول ليها : كان ما عجبك انزلي - في نوع بيضحك ضحك شديد مع أي جمله طالعه إذا في بوليس بيقول ليك : أسمع يا اخينا .. أرجع لينا وراء بلاي -وإذا مافي ،، الكمساري ما بتتدخل والسواق خشمو عندو .. وشريط جمال فرفور شغال في النهايه الزوله دي بتقول ليك لميض يعني خلاص .. عرفت انها واقفه .. واقفه ، وبتجي معاها طوالي لديح لكن بتكون في مسافه بين الجملتين .. وعادة بتقوله بعدما توصل المحطه النازله فيها .. ومع آخر عتبه من سلم البص ...

يخ .. سي
وانا اشك انها تكون جمله فرنسية الأصل علي وزن ميرسي أو أحدي أخواتها .. او أحتمال ليها علاقة بالمزيكا إذا أفترضنا أنو ( السي ) هي الدرجه السابعه في المدرج الموسيقي ، أو الوتر التاني في الة الجيتار ..أو الساكسفون الصوتو لزيز .. يا أما كمان الحرف التالت في من حروف اللغة الإنجليزية .. اما ( يخ ) فهي مشتقه من اليوخ واليوخ ده انا ما عارفو شنو .. ولا د###### اعرفو ، والجملة المركبه دي بتتقال احيانا مجرورة يخسييييييييييي . ودي لما تكون اتيخسته خالص وعملتها شينه .. ويخس ( حاف ) من غير ( سي ) " يخس عليك يعني ما تقدمني" ودي فيها نوع من الحنية المشفوعه بي غزل زي بداية ريده تحت تحت كده ودي دايما بتكون من صاحبة أخت الواحد . والآ تكون انته متغابي .. او غتيت..

بســـٍس..
والبس دي بتتقال لي الكديسه لما تكون عينه علي اللبن الفوقو الجماده .. المطفحه بي فوق .. وهي بمثابة تحزير لاول وآخر مرة إنها ما تتجاوز حدوده الآ والعقاب الصارم ومعالجه فوريه بخبطه علي الراس من المفراكه الخشبية يا اما كمان فردة الشبشب وفي الحالتين الكديسهه هي الضايعه و مغلوب علي امرهاوبتتقال المفرده دي لما الواحده تكون مليانه نشوة من الكلام المعسول السمعتو منك قبل دقايق بس وهي ماشه مع صاحباته .. طيب علاقة الكديسه الضربوها قبيل دي مع صاحبات الزولـــــه دي شنو؟؟؟؟؟؟؟؟؟
عمــــــــــي
العمي طبعا متعكم الله بنعمة البصر طبعا معروف وفي منو انواع في عمي الكباسه .. والعمي (اللايسك) هه هه والله كان يلايسك ما عارف - حسع يلايسك دي شنو ؟؟؟ دي انغليزي عديل كده ..

كريــــــــــــــــــــــه
وكريه دي أحلي واحده في الناس ديل كلهم وانا غايتو عاجباني وكريه دي لما الواحد يكون قاشر قشره جد .. وحالق جديد .. زي الساعه خمسة قبال صلاة المغرب والشمس دوامه انتهي ..وانته بي قشرتك دي واقف تحت العمود بتاع خضر اها بتجي فلانه دي كاسحه .ز ماشا وين ما تعرف .. بتعاين ليك المره الأولي بسرعه كده وتاني تعاين ليك والمره دي الحواجبين بيكونوا قربو يجو الواطه مع ابتسامه واضحه وانته ما سألتها ، لاحظ ما سألتها وما شغال بيها الشغله كل ذنبك إنك مكسره حته حته .. .. وقاطع نفسه .. ود######ه معاك .. والله جنس خفه

tmbis
حقيقي رائع رائع وبوست أو إتنين زي ده أرشحك لمنافسة فاكهة البورد أبو حراز

ورمضان كريم

بركات

ابو حراز ده خطير جدا


وراجل ظريف خالص




رمضان كريم يا بركات

أحسب أن الموضوع مجازي يتعلق بطباع البشر وربما يطلق التعبير ويراد عكسه تماماً وهو في واقع الحال تشبيه بليغ فالمساخة كما شرحت هي خلو الطعام من الملح أو الشراب من السكر وإن كان الأخير مقدور عليه حيث أن الشاي بدون سكر أو القهوة بدون سكر لها نكهة خاصة أما الفول بدون ملح فيصعب إستساغته ، وإطلاق صفة المساخة على شخص معين تقفز مباشرة إلى أفعاله وردود أفعاله لا شكله أو لونه لأن المساخة لا لون لها ولا طعم إلا إذا كان السكر شديد العكر وبالتالي يقوم بتعكير الشاي ويعطيه اللون المائل إلى لون النيل الأزرق في الدميرة أو الفيضان.
كلمة يخ مفردة أو يخ مقرونة بسي هي ليست فرنسية الأصل كما تفضلت ولا لها علاقة بالسلالم ولا العتبات الموسيقية حتى وهي في تقديري علامة من علامات طمام البطن نتيجة لإصطدام أحد الحواس الخمس بأي شئ قبيح أو قذر أو حتى نتن كأن تكون مثلا في إحدى الحارات الشعبية وتتأذي بفعل الروائح المنبعثة من البالوعات التبقبق أو براميل الزبالة أيام كان في زبالة أو ربما رائحة اسطبلات السواري لكل من جاور قشلاق البوليس أو أسواق الخضار في صباح يوم ممطر أو حتى المصانع وبخاصة الصابون. أو أن يكون جاركم سامحه الله يربي فيه بيته كمية معتبرة من الماعز والدجاج والحمام إضافة إلى أفراد أسرته. وأشاطرك الرأي في أن خلف الأمور أمور في هذه اليخسي فهي وإن كانت مقترنة بطمام البطن ومقدماته إلا أن أغلب الظن المراد بها شئ من العتاب المعسول إن جاز التعبير.
كلمة بس هي فعلاً للزجر وإحتقار الفعل أو القول الصادر من الطرف الآخر وإن كانت أقل حدة من اليخ سي وهي تفسر بحسب موضوع بسبستها.
العمي كما تعلم هي دعوة صعبة خلاص بأن يحرم الإنسان من نعمة البصر وهي مرحلة يكون فيها الطرف الذي يدعو عليك قد وصل به الأمر حداً يتمنى لك فيه العمى. والعمى في حد ذاته درجات فهناك العمى البليس وهناك العمى البعمى وهنا ربما تأتي كلمة العمى مقرونة بالشكل ، عمى في شكلك أو خلقتك مثلا.
أما كلمة يلايسك فهي صيغة المبالغة في كلمة ليس بتشديد الياء لمن تقرب تقطم مساميرها يعنى منتهى التقريط يليس تلييساً فهو مليس وهي مليسة وهي أن تقوم بعمل مسح أو جلبطه للجدار بالأسمنت مستعيناً في ذلك بالمحارة والمسطرين أو ربما تزبيل الحيطة بالزبالة في بيوت الجالوص والفكرة واحدة وإن إختلفت المواد والروائح. وهي تعميم بالويل والبلاء فإذا لايسك العمى أو المرض أى أنه أجهز عليك ولم يعد هناك شيخ أو وصفة بلدية أو طبية بقادرة على مداواتك وعلاجك. يعني تصبح بفضل وبركات هذه الدعوة ميئوس منك.
وأجمل ما سمعته من هذه العبارات عبارة أمشي يمش شترك ويمش هذه بكسر الياء وتشديد الميم لأربعة حركات يعني أربعة ميمات يممممش وتكسين الشين ولو عشوائياً وأحسب أن الموضوع متعلق بمسائل المشي والسير وبالتالي فهو يخاطب الركب والكرعين بإعتبار أنها أعضاء الحركة والمشي لدى الإنسان وهي في تقديري تعني أن تسير سيراً أشتراً أو مشاتراً أو غير متجانس لعرج أو كلوجة أو تقوس في الأرجل ولا علاقة للكسيح بالأمر لأن له دعوة حرة مباشرة.

almulaomar

سلامات

رديت لي بي بوست ... وفي نفس الزمن الداخل فيهو انا


ارجو ان نتواصل

ورايك شنو لو تواصل معاي في البحث عن مفردات مرادفه

لك حبي

تمبس

يا استاذه تماضر


الرقشات دي .. برضو فيها مساخه

بس

يا تمبس

موضوعك سكر وبس

لووووووووول

ليه كتاباتك انقطعت