لمن يجى الزمن الفلانى

أغنيات أتت قبل أن يأتي زمانها، لتبشر بزمن فلاني منتظر
----------------------------------------------------------

الزمن الفلانـى


نجاة عثما ن محمد سعيد



لمن يجى الزمن الفلانى

سمانا بتقطر مطر درى وتمازج برتقانى

نسطر اسمك يا حبيبنا

برموش غيم ارجوانى

ندمن الضحك المعافى

ونحيا الفرح المورد ياسمينى واقحوانى

يا حبيبنا جوه عينيك عايش أنا

بنسج الأيام أغانى

والطريق ما ببقى ساهل

ليك بالمعنى لامكانى

لما يتحقق زمانى

نمسح الحزن المعشعش فى عيونك أسمرانى

يا حبيبنا تحيا فى حلم الترابله

فى العلاقات المعانى

فى البقاسى شقى المسافه

عايشه فى داخله وبيعانى

لما يتحقق زمانى

بيشرق الفجر الحقيقه

والصباح الأبيضانى

إحساس بالأمل

أدينى إحساس بالأمل فى كل .. رحلة شوق تطول

ودى الخطاوى الراجعة ليك .. فى سكتك وأمل وصول

ما الدنيا كلها إنتظار .. و ألارتحال قدر الفصول

الموجة تحلم بالضفاف .. والغيمة تحلم بالهطول

راحل معاى ضى الآمانى وذكرة فى الآيام هناك

لحظات بتذخر بالمعانى .. وكيف أنسى تذكارات هواك

نتحمل الغربة ونعانى و نصبر عشان نكسب رضاك

ونغنى لو زاد الحنين .. ويارتيو كان سفرا معاك
___

أقراك مرة صاح

* عاطف خيري *
خليني أقراك مرة صاح
عكس إحتشادك في الحروف
لا غاب معاك وعي الطريق
ولا بيك زكاني الزمن
ماشيك وعارفك يا حريق
في يوم غماماتك بجن
فرهد غيابك أغنيات
وظلت أراضي اللقيا بور
بلقاكي يا كل الطيور
مسجونة والحرية سور
بلقاكي بيناتنا الثبات
بيناتنا شمس البكرة في لحظة مخاض
طول الوجع رشّح مواطن العافية فيك
خلاني أرجع وأبتديك
وأقراك من كل الجهات
وما بين أقابلك ومشتهيك
كان حلمك الأول ترف
وكنتي الصبية الغايبة في زحمة حجا .. وكلمة شرف
وكنت الزوايا الميتة في متحف خزف
وكنت الوصايا العشرة واللون الشحيح
سميت مساحاتك حكر كل البيحلمو بالشمس
هاجرت من واقعك عبث
وسكنت فيك ضد السكون
كل الكان ممكن يكون
طارت ضفيرتك ليل غنا
جدلة صبر وطولة نفس
وما بين أقابلك وجيت عليك

كان عندي بس
نحن والجرح الثري وخيبة أمل
أم الشهيد
في الكلمة والوجه الجديد
وكان إحتقان نبض الزمن
ونوم الطفل فوق للدمن
يا صاحية بالحاصل علي
يا نايمة عن فقري البليد
سميت منافيك الوطن
وصبحت مناحاتك نشيد

***


______________

طيبة
* محمد الحسن سالم حميد *


كل ما تباعد بينا عوارض
كل ما هواك يا طيبة مكني
تلد الغربة القرب الواحد
بيك أسمي الشوق وأكني
لما أفوتك من دون خاطر
أو دون خاطر مني تفوتي
بلقى حبايب في كل حتة
وكل بيوت الفقراء بيوتي
لا غيرت وراك الجتة
لا بدلت ملامح صوتي
لاغافلني وهادن فني
غامل المدن الما عرفتني
تبن الشوق الصبرو مصوبر
للأرياف الكم وفتني
وللأطفال الناشفة ضلوعا ونازفة بغني
أهدّي دموعها وأطمن روعها
بي بسمة بكرة اللاها تمني
ولا مصنوعة
أغني لشعبي ومين يمنعني
أغني لقلبي إذا لوعني
مخير دربي الما رجعني
إذا طلعني نخلة القرب
ولا الغربة الكدرومية
تنزل غنوتي بي قمرية

أو وقعني في بطن الجب
بطلع يوسف بالأغنية
أغني الناس الما بتسمعني
المنى بعيدة .. المبعدة عني
النادى نشيدها .. وكنت المعني
الإيدي في إيدا ..
وإيدها بتبنى
في دنيا جديدة ..
اليوم راح تدني
وأريت غنواتي في ناس شغالة
تكون سندالة وعود طورية
ضراع رجالة
كتاب أطفالها وجملة ياها
الما مكرية
بَقة فالا .. وسدة مالا
في ليلة الدخلة
على أسمى قضية
حبيبة قلبي يا سودانية
يا أسمى معاني
في زول بيعاني
يا ود ضكران
يا بت دغرية
وأنا إن سامعاني
فضلت أغاني غبش فقرية
وروح غانياني
حويتك مني يا دافعاني
براحة إيديا كما الأشواق
ويا جابداني برفق عليا

وما بتحير بين الفوق
وبين الناس التحتانية
إلا مغير ولا عقوق
ولا كفيف الإنسانية
ومنك وين يا كاشفة عيني
بنور الإلفة ضيا الحنية
وحلم العالم ناس تتسالم
والبني آدم صافي النية
والأطفال الناشفة ضلوعها
أطمن روعها
وتبدأ تغني غناوي البكرة
الكم مسموعة
حسيس طمبارة مع نقارة
صفِقةً حارة ودارة تغني
فيا حلتنا عليك ترابك
وإنت شبابك زينة الجنة
أحلى عروس البلد اللتنا
والا الغبش الرابة تهني
والا هدير المدن التصحى
وتمحى ظلام الحاصل عني

***
______________

وإلى خزنتها
هل من مزيد

لأنك عندي

لأنك عندي كل الخير ..
وجيهك فرحة الدنيا ..
ودواخلك زي شعاع النور ..

عرفتك وكنت زي شفتك قبل ألقاك ..
وزي إنك بتنبعي من فرح جواي ..
وتمسحي عن رؤاي الضيم ..
وتضحكي للزمان الجاي ..
وتتفجر مسامك ضيء ..
مع الصبح الغشانا شوي ..

كأني معاك كائن حي ..
وكان صفاك كأنه الحل ..

بفارقك والعمر عندك ..
زهيراتاً غشاها الطل ..
وأحاسيسك بتتكمل ..
غنيواتك بتتبارك مع الأيام وتتجمل ..

بفارقك والزمان أجمل ..
عشان تشعل ملامحي غياب ..
كل ما نجيمة تتحول ..
وشان تفضل ملامحك في ..
زي ما كنت في الأول ..

***

أداء : مجموعة عقد الجلاد

ابنوسة انتى عظيمة
واحساسك بالشعر عالى
واختياراتك دقيقة وجميلة
وانا دايما بستمتع ببوستاتك وبقراها من الفها حتى يائها ودايما بستفيد من البقراهو منك

ودى انحناءة تبجيل وشكر لمجهودك الجبار،

شكرا

اختي و عزيتزتي ابنوسه
قبيل شاغلتك في البوست بتاع الونسه وقلتا ليك شكلك كدا حا تتحفينا بي حاجه دسمه
فاذا بك تاتين بالدسم كله
هسه كلو واحده في ديل بوست ما بكفيها
بعد دا الغداء مافي طريقه

شكرا على الامتاع
تحياتي
ياخي دقيقه هسه لو قلتا ليك عاجباك ياتو واحده في ديل اكتر حا تقولي شنو

المبدعة سليلة الإبداع تماضر

شكرا لهذا الإطراء، والآن حق لي أن أزهو .... وأنا اعلق شهادتك هذه.
وساما


الأخ الصديق إيهاب

شكرا ...وأتمنى أن يكون الوالد قد بلغ الصحة ونحن عند وعدنا...بس ظروف نادوس

أما حكاية الإختيار فهي أمر أتركه لك وللإخوة والأخوات

تسلمي يا ابنوسه و ما بتقصرو و ربنا يكون في العون واكيد الحاله واحده والمهم الوعد التاني متزكراهو و لا لا
تحياتي لي نادوس شايفو منقطععن البورد ربنا يديهو العافيه
بالنسبه للاختيار انا عارفو مستحيل
بس سالتك عشان اثني على اختيارك الرائع
تحياتي

سلام ابنوسه


متى ياتى الزمن الفلانى


لك التحية واختيارك جميل


قرنفل

العزيزة ابنوسة

اعترف ان العنوان جذبنى من اول وهلة

واختيرا الاغنيات جميل

واذكر ان لدى تسجيل جيد لاغنية الزمن الفلانى فى حفل مصطفى قاعة الصداقة 1990 بمصاحبة الاوركسترا ساحاول انزاله لكم فى هذا البوست

والاهداء لك ابنوسة
الزمن الفلانى كلمات الشاعرة نجاة عثمان محمد سعيد وهى بالمناسبة شقيقة محمد عثمان محمد سعيد
الذى كان واليا للخرطوم فى اول عهد حكومة الانقاذ وكان نائبة انذاك يوسف عبد الفتاح
اهداء لكم جميعا ولكل عشاق مصطفى واهداء خاص الى العزيزة ابنوسة
التسجيل الى نقوم بانزاله هو تسجيل نادر اقيم فى حفل قاعة الصداقة 1990 بمصاحبة الفرقة الموسيقية وكان اخر حفل عام لمصطفى بالسودان




كما لدى تسجيل لاغنية ادينى احساس بالامل وهى من كلمات الشاعر الرقيق مدنى النخلى

فى حفل ليبيا1992 بمصاحبة الاوركسترا ايضا

لكم الود

العزيز شيبا
تحياتي

وأنت توثق للراحل الجميل ولي حديث معك في هذا الشأن
فقد تشارك هو ونادوس السكن والألم



وللقرنفل بهجته وعبقه

شكرا وأنت تغوص لتأتي بهذا البوست من غياهب النسيان

بعد يوم مغبر وساخن بدأت دواما أغبر وأسخن ولكن كان لهذا البوست فعل السحر
والآن أعمل على أنغامه ... لك التحية ولكل المبدعين