ركبتي المست غرورك

بسم الله الرحمن الرحيم

غايتو الخواجة العندنا في الشركة دا شدة ما عجوز لمن الشعر قايم ليهو في إضنيهو وضراعاتو يرجفن برا شغلة والقدرو في السودان يطلعوهو ويدخلوهو زي التلفزيون وسبحان الله بعد دا شغال زي الحصان .. أها طبعاً عندهم السؤال التقليدي كيفك هذا الصباح؟ فقمت شكيت ليهو قلت ليهو والله عندي ألم في ركبتي دي .. قال لي تعرف يا بدرالدين أنا وإنت كبرنا خلاص .. بالله عليك الله شوف الخواجة العيفة دا.. المهم سواها شغلة كل يوم يقول لي كيف ركبتك؟ ويحدثني عن آلام ركبته.. أها يوم سألني قلت ليهو والله ركبتي كويسة بس بتألمني في الصلاة فرد علي قائلاً .. الحمد لله أنا ما مسلم .. قلت ليهو شوف نحن الإسلام عندنا بقول لو ماقدرت تصلي واقف ممكن تصلي قاعد ..ولو ما قدرت .. ولو ما قدرت .. ولو ماقدرت ممكن تصلي بقلبك وإنت راقد.. فبُهت الذي كفر

عاطر التحايا
بدرالدين شنا

بدر الدين وينك ..فقدناك والله ..البورد نور الليله والله..
اها كيف الركبه الليله ؟شكيناها لى الله الركبه..ما تمشى للخواجه المابصلى ده لووول
يديك الف عافيه

هاهاهاهاها..لووووول..والله انت مبالغه يا بدر الدين
بالمناسبه انا زي الاتذكرت شكلك ده
زمااااااان..زمااااااااان يعني..واخوك ابن سته او سبعه سنين كده..قدمتو اسكتش في المحطه الاهليه..واظنو كان عن برنامج حقيبه .في الاذاعه..والفنان المستضاف..يتأخر..يقوم مقدم البرنامج يجيبك انت..ولا واحد شبهك..اللي هو كان الغفير ..عشان يغني بدل الفنان..
الاسكتش ده لسه عالق بي ذهني..لأنو فقع مرارتي بالضحك
بعد داك..جاء الغبار العالق ..فقع عيوني بالرمد
والناس العواليق فقعوا قلبي بالاسي
والكيزان..العولاق فقعوا ..الباقي مني
فاصبحت انسان مفقوع
حتي انفقعت بره البلد..الفقعه الياها
يديك العافيه
ما تنقطع يا لذيذ

يا دافى سلام..
اياهوووووو زاتو بدر الدين.. لانه انا عندى الشريط ده وفعلا بفقع بالضحك

سلام يا سوما.يا شبه..هوما اختي
بالله التقول تومتك!!!!
لكن الغريبه..بدر الدين ده مشيب من الزمن داك..يعني هسه شيبو ده مفروض يقلب بني ولا بنفسجي..لووووووووول..لكن كان شخصيه لطيفه..ولذيذه..ولا نحن الكان بالنا رايق والذهن صافي وقابل للضحك غير المحظور!!؟

شكرا ليك يا دافى يا ذوق..
بالله لمنى فى تومتى دى .. ما تقول انا ما عندى اخت كبيره ..فاقده حنـــــــــان اخت عديــــل كده
بدر الدين شخصيه تلقائيه ..زكيه ..سريع البديهه ..نكتـــــــــــــــــه ومتواضع جدا . وعنده مواهب لا حصر لها والله
راجل مرهف ..حساس ..شاعر ..
اما قصة شعره دى فيها نكته برضو لوووووول بينى ما بينك يعنى ..
مقلبوه فيها لكن ما بقولا ليك يقوم يجينى ناطى هسه لوووول ..بعدين قالوا سمح الغنى فى خشم سيدو .. بالمناسبه كمان عنده موهبة الغنا بصوره ما شاء الله عليه فيها بقلد الاصوات بشكل ما عادى .ما شاء الله يا البدرى ..ما يقوم حلقومك يوجعك زى الركبه كمان وتقول سومه سحرتنى ..
اها عليك الله يا البدرى احكى لى دافى اخوى ده قصة الشيب لول
سلام

هاهاهاهاهاهاهاه..لوووووووول
والله يا سوما..ضحكتيني اكتر من بدر الدين..لوووووول
طبعا مليون..زول قايلين صورة ابونا الشيخ البرعي المعلقها دي..ياها صورتي
عشان كده ..انا ضحكت شديد لما قلت ..عايزه ليك (اخت كبيره) هاهاهاهاه..غايتو هي مواليد 76 ما كبيره شديد يعني
وفي انتظار بدر الدين يدينا حكاية الشيب دي

صورة ابونا البرعى تفتح النفس وتسر البال وتشرح الصدر ..ما اظن فى زول ما بعرفو يا دافى..
الا يكون زول قاصد يكبرك ساااااااااى..
لكن انت مهما تكون كبير..ما اظن يكون عندك شيب زىالبدرى لووول
اهلا بى اختك حتى لو كانت مواليد اليوم حبابكم كلكم
يديك الف عافيه

بسم الله الرحمن الرحيم

الأعزاء/ سوما ودافئ
سلام كتير كتير زي الريحة في الفتيل.. سلام أردام أردام زي العافية في العضام
مرحب بيكم ومرحب بالشيخ البرعي الله يديهو العافية .. أريتني كان لقيتو عزم لي في ركبتي دي
أشكرك يا سوما على كل ماقلتيه عني من ثناء وتوضيح للصغير دافئ أخو الصغيرة تومتك وإنشاء الله ربنايحفظكم من كل بلاء .. آمين يارب العالمين
كنت بحكي ليك قصة الشيب يا دافئ لكن النتّاحة الفي ركبتي دي ما مريحاني .. كدي ناولني العصاية دي النقوم أسوي ليكم شربات .. أسع يا جماعة أنا الخواجة العيفة دا كان وديتو السودان وبعتو للهلال ولا المريخ ما بلقى لي فيه قريشات أداوي بيهن ركبتي دي؟

عاطر التحايا
بدرالدين شنا

كان ما القى الخواجه العيفة دا خلي سوما في الوقت دا تحكي ليك

شكرا جزيلا يا بحر

شكرا جزيلا يا بحر

يا بدر
ما قلنا ليك اصلو بعد الاربعين الزول بتكون قصتو بايظة
الله يكون في عونك

الاستاذ بدر الدين
أنا قايل خويويجك ما زول هلال ومريخ
الزول عب شهرية ساااي
اقع الجزيرة

اخونا الفاضل بدر الدين

يا اخوى قالوا من علامات الكبر انو الواحد توجعو الركبه شكلك انت لحقت الخواجه حقك ده بس انصحك انو تدبل قالوا الزواج التانى يرجعك تانى 18سنه هاهاها بس اوع وزارتك تكون متابعه مواضيعك تقوم تعمل ليك حظر زى حظر العراق وتانى تشم البورد قدحه





بكاش

قلت ليك اصلو بعد التلتاوى وجع الركب النحدثك
وعميش العيون
والشراشيف بتقع من المساسقا؟
علا عندى ليك طب دواين مو خمج
امش على شدر شكيره فيهو حطب نال اها شيل ليك ربطه كبيره
اكان بى 10 والله ميه جنيه
والخواجه ده قول ليهو
قهرتك بى القاهر والنبى الطاهر
ممكن يتعاقد مع الاتحاد العام
دحين شفت جدك موزيك مدرب القومى
والله اظنو اكبر من جدى مختار
اها ودعتك الله انا ماشى الطاحونه
الابت تقيف دى؟؟؟

بسم الله الرحمن الرحيم
الأفاضل/ياسر حنا.. أهل العوض.. باكاش
سلالالالالالالالالالالالالالام
ياسر حنا إنت وكت كان عندك وجع الضهر داك كان اليوبيل الفضي بتاعك؟ قال عمر الأربعين قال

أهل العوض صديقي وحبيبي
لكن بالغت في زول الشهرية دي عجبتني عديل كدا هاهاهاهاها
وطبعاً زي ياسر حنا دا عمره ماسمع بيها ديل ناس يما أحشي لي.. كدي إتخيل معاي الخواجة دا لابس ليهو سروال أبو تكة ورابط فيهو حكاكة عشان ينضف بيها الملود .. بالغت يا أهل العوض

عزيزي باكاش
أفقتدتك كثيراً لك التحية
هو أنا وزارتي دي لقيتها بي هين عشان أدبل فيها وبعدين دي عاشت معاي أيام الشنا دحين بعد مابقيت سمح أدبل فيها؟ والله مش لو ركبتي وجعتني كان إنقطعت فت ما بدبل فيها

عاطر التحايا
بدرالدين شنا

الرائع الأستاذ بدر الدين أبو العروسة الصغيرة
كيف حالك يا حبيبنا
وكفارة لركبتك التي مست غرور الخواجة
زمان أهلنا بيقولوا الكبر يبدا بالشيب لكن بيداوهو بالصبغة
وبعد داك بيجي على الركبة من الام الرطوبة والواحد يبقى زي فرامة الخدرة وهنا ماعنده اي علاج
اها يا اخوي انت الاول (الشيب) ما قدرت عليهو بتقدر على الثانية دي
لووووووووووول
الجعلي

بدر الدين لازلت اضحك من العنوان , الله يجازيك
لك خالص الود والحقنى كان ركبتك بالصح كويسة في البوست
بتاع العزاء

ســــــــــلام بدرالدين
انتا يا خوى لمن تشكى تشكى لخواجة
وثا نيا انتا هسى ما كبرت لكن ساى من علامات الكبر وجع الركبة
وانتا هسى ركبتك كيف كان لسة موجعاك ارح نوديك الاستبا لية لوووووول

البدرى ماك طيب
عمنها الركب مى قايمه عليك؟

بسم الله الرحمن الرحيم
حبايبي الحلوين أهلاً جوني.. وأنا ما قايل حلوين زي ديل بزوروني

الشفيف أنور
لك التحية والود
إنت وصّفت لي مكان الشدر في شكيرة لكن ما وصفت طريقة الإستعمال يعني مثلاً .. كم قعدة في اليوم؟

الغالي الجعلي
سلام يحمل كلام مضمونه حبي
المثل بيقول علي شناتها.. قامت ليها سن في لهاتها
شيب ووجع ركب .. والحمد لله على كل حال

العزيز زمراوي
سلام يحمل كلام علاهو ربي
والله بعد شوية حقو أعمل لي موقع في الإنترنت أسميهو أبو ركبة ضت كوم.. إنشاء الله ألقى لي زول يتكّلني لغاية بوست العزاء عشان الاقيك حبيبي زمراوي

المحبوب ود الجزيرة
سلام يحمل كلام من جوا قلبي
كلنا أولاد جزيرة .. ربنا يديك العافية .. دحين علي حلتكن غادي مافي زول بداوي الركب؟

عاطر التحايا
بدرالدين شنا

بدر
الخواجة ده كاسر ركبه...

تحياتى
ودعزة

اصيل يا بدر الدين والله وربنا يخليكم ويسعدكم






بكاش

يا بدر يا اخوي
القطيعة شنو؟ هسع ياسر حنا الدخلو شنو هنا؟ الزول ده اداك وصفة امش سويها ساكت ومتنسى وصفت محمد الظاهر عليك ما عملت بيها

وبعدين منو القال ليك داك كان يوبيلي الفضي وحاتك انا العشرين ما قفلتها تذكر لما جيتنا السنة الفاتت في صلالها داك ما كان عيدميلادي ال 19 ياداب

وبعدين وجع الضهر ده منو القال ليك كان من الكبر ده كان لأسباب فنية بحتة والتقارير الطبية قاعدة كان عايزها بنشرها ليك في البورده ده اها شن قولك
انتو بس الواحد فيكم عجز وماعايز يعترف ساكت السن دي ما ليها احكام

اتحداك كان تقدر تعمل الحركة دي

أخي بدر الدين
وأنا أبحت في الجحار والحفر القديمة لقيت المقال الظريف ده أها قمت قلت يا ربي الخواجه بدل ما ينبهت بإجابة بدر الدين ما كان يسلم ونان أهلك يا البدري سموك بدر الدين ليه ما عشان يهدي الله به خواجة ضال أو حتى كلب ضال بس أبعد من كلاب الغفير وبيوت البوليس والمصانع ، وإنت قايله يعني حاجه ساهله وفي الدين بدر كمان لكين طالما الخواجه العجيز ده ما قدرت ليهو تبقى يا أخوى بدر الفي كتاب المطالعه وبالتأكيد إنت ما حضرتو ده لأنو زمنكم المطالعة كانت في عهد ما قبل مسعود ذبح الخروف والخروف ذبح مسعود ، وتحت تحت قالو مسعود ده جد أحمد شاه مسعود بتاع أفغانستان أها شوف ليك جنس كلام ، وأكيد يا بدر الدين إنت أكبر من الخواجة بي حولين وطبعاً الحول حق زمان يساوي ستة وثلاثون شهراً يعني ثلاث سنوات على مقياس ريختر عفواً بحسابات الزمن ده.

بسم الله الرحمن الرحيم

الصديق ود عزة
سلام وإعتذار لتأخير الرد

والله الخواجة دا مش كاسر ركبة بس دا حقوا يكتبوا في ضهرو عبارات زي لواري التراب ( يا أبو مروّة .. يا ود المكاشفي .. يا سيدي ود حسونة) لك التحية حبيبي ود عزة


الأصيل/ باكاش
شوق وريدة ليك يا حبيب
أشكرك على المداخلة والكلمات الطيبة



الصغير ياسر حنا
سلام وإحترام لمن رأى الشمس قبلي

و 19 سنة دي إنت قضيتها غربة بس وما في داعي ندق الصفائح ونطلّع الفضائح


الملا عمر

مسعود ذبح الخروف والخروف ذبح مسعود ، وتحت تحت قالو مسعود ده جد أحمد شاه مسعود بتاع أفغانستان

ياخي إنت إنسان ما طبيعي .. إنت مبالغة ..إنت الكلام الحلو دا بتجيبو من وين .. بالمناسبة دا مستوى عالى جداً من الكوميديا

طبعاً زمان مسعود فعلاً بذبح الخروف لكن في الوقت الحالي الخروف بذبح مليون زي مسعود .. أها ودعتك الله شايف لي خروف جاي علينا

بدرالدين شنا

الملا عمر

أحييك وأزكن على كلام البدري .. العبد الفقير أسعد الناس بهذا البوست ، وبدر الدين عندو بوست تاني في موقف الحافلات ، لو لقيتو لينا يكون جوزيت خيرا وزوجت بكرا .. بدر الدين كاتب سيناريو متقاعد وحريف دراما ضل طريقه إلى شي حشيش

بسم الله الرحمن الرحيم

أهل العوض والجمال
من الأعماق يا حبيبي يا غالي

أشكرك على الكلمات الطيبات يا رقيق

هو الملا عمر دا وكت أصلو ما تزوج وتكوس ليهو في البكر (الملالة) ليهو شنو؟ ما تخليهو عمر ساكت (الملالة دي كترتوا ليها الشطة) حبي وتقديري

بدرالدين شنا

البدري .. يبدو إنك إنت الـ كترت الشطة المرة دي .. الملاعمر من تالا العرس معرس طب .. وجايب الجنا .. لكن الملالة إلا كان تكون من شيتن آخر شيتن اشتر ..

بس إن شاالله الركبة ما تكون تاورتك تاني ، عليك بي دهن النعام

أخي أهل العوض أشكرك على هذه الدعوات الطيبات المباركات لكين يا أخوي إنت ما عديل كده داير يوم شكري يجي ده إذا ما جاء يعني كمان أتزوج بكراً مش سكند هاند وإنت ما عارف أحمد إبن الملا أصبح يحمل الحزام الأسود في الكونفو وكان لي الدريفين محمد أسكت ساكت باك وفي الباكات شمال وفي رابطة ديوم بحري كمان تصور يعني النوع اليطلع الكورة أوت ويشلت الجناح ويكتح الجمهور ويسف كمان. مالك على يا أهل العوض وديل جند المدام وفي صفها فخليني في شجوني يمكن قلبي يقسي.
وبعدين ركبة السيد البدري لا ينفع فيها دهن نعام لا دهن كركار لأنها عاضه ولو فكرت تفكها للصيانة حا تطلع بي بلاوي أكتر من مجرد ركبه عاضه وأنا ما شايف ليهو علاج غير الكي لأنو يعتبر آخر الدواء. وكان خايف من الشيخ أبو مكوه نوديهو للشيخه أم جمره

يا ملا عمر

وجعلناهن أبكارا (*) عربا أترابا (*) لأصحاب اليمين

بالله الكلام دا ما وااااضح - حتى انت يشرحو ليك ؟ خلي البدري دا قايم عليه الدبس الليام دي ..

وبعدين بيني وبينك - بدر الدين ركبتو راحت (أعني وجعها) لأن كان في السودان

أهل العوض يا أخوي اللولوة ما بتنفع لا تقول لي أصحاب اليمين أوأصحاب الفيل ولا أصحاب الأخدود حتى موضوعك ظاهر يعني دايرني أعمل دبل كيك وأقع على حمير قفاي ويجيني ديسك أوبريتنق سيستم والله يا هو الفضل كمان ولمن إنزريت تقوم تقول لى أصحاب اليمين وما دايره شرح لا دايره شرح وبي سند صحيح كمان.
وبدر الدين لو ركبتو راحت كان الخواجه أسلم عديل كده والركبة يا أخوي أهل العوض أفسدها الدهر وإنت عارف إنو العطار لا يصلح ما أفسده الدهر ولا النجار حتى.

بسم الله الرحمن الرحيم

أهل العوض والروعة

أنا تاني ركبتي لا بنفعها دهن النعام ولا فزلين بلاّص


الملا أبو أحمد

الدريفين محمد أسكت ساكت باك وفي الباكات شمال وفي رابطة ديوم بحري كمان تصور يعني النوع اليطلع الكورة أوت ويشلت الجناح ويكتح الجمهور

إنت ولدك دا إسمو محمد ولا صالح سنار؟

ياخوي وكت جابت ليها كي أخير أبو مكوة عشان كان حصل شئ ما يكون قدام أم جمرة

بدرالدين شنا

ياملا عمر
سؤال عرضي
انت لسة رابطة ديوم بحري شغالة
و فرق الفجر و الاحرار و الاخوة و الاتفاقية
بلعبو في ميدان المولد؟؟

يا فالكون يا أخوي
كان زمان قبال سنين ، الرابطة يعلبو فيها كيف يوم الجمعه دلالة عربات وهل تصدق من المولد شهر ربيع الثاني السنة الفاتت يعني قبل عشرة شهور تقريبا لي هسع في باقي دكاكين حلاوة مولد وعشان أكون أكتر صدقاً باقي دكانين أها يلعبو وين.
أما الفجر والأحرار والجوهرة فحليل زمن الحنان يابا، وكان للأخوة فكل إثنين محاربين بعض وحتى عصبه خلى الكورة وبقى فنان كابتن أنور وفريق الإتفاقية نصها رجع الغابة مع التمرد والنص الباقي ترزية في سعد قشرة لكين أنا المحيرني ناس التحرير وفريق الوادي وعقرب.

أهل العوض
نسخة الي الملا عمر


تعرف جداً لي بدر الدين اسمو على ود السني الله يرحموا
كان قد أوتى بسطتة في الجسم ، وكان بيشتغل قصاباً ، وقصاب دي أظنها بالعرب جزار ، المهم راودته نفسه في عسرة أخرى ، كما تمنى أهل العوض لأخينا الملا عمر ، والذي بدأت عليه الجهجهة والتنصل

الجماعة بدوا يقرقوا على عمك على وقالوا ليهو آزول ها ات خلاص فات فيك الفوات

قاليهون هوي آآناس التور دا أنا ما بمسكوا من قريناتو دي
وكع أجيبو الواطة ، قالوا ليهم نعم بالحيل

قاليهم آها ناني كيفين ؟؟؟

ولسه أنا ما عارفة علاقة رمية التور في الواطة بي العرسة التانية شنو؟؟؟

الرحمابي

دي يفتي فيها الملا عمر ، أما أنا فبعيد ، إلا كان اسعل ليكن ابوي حيث أنه معرس مرتين .. والتانية هي وبعلها تشرب الجبنة من يد الوالدة الله يسعدها

على فكرة كنت أسمع برنامجا في إذاعتنا الحبيية يقدمه د. عون الشريف ، وفي ظني أن نصيبا كبيرا من الدراجة السودانية هو رطانة ، فمثلا كلمة نان هذه قال إن أصلها من اللغة الفرعونية القديمة - يجازيها الله الفرعونية دي ما بتجيب لينا إلا الحاجات الخترية ..
ومن الكلمات الفرعونية أيضا - المسور ، الدرت ، الفندك ، الطورية وعيييك
أما من لغة البجا فقال
محريب
حمريب
مرفعين وفي قراءة مرعفيب
بعشوم
دعاش
همبريب
وعييييك أخرى

أخي الكريم الرحمابي
رحمة الله على جد بدر الدين وعيب عليه والله يا رحمابي ما تكلمنا بموت الراجل ، أها يا بدر الدين الفاتحة ، وأعمل حسابك يا بدر الدين لو طنشت ما تشيل الفاتحة وضربتني الشعبة إنت براك عارف الباقي شنو!

أخي الرحمابي حاشا لله لم أتنصل أو أتهرب أو أدفن دقن كل ما في الأمر أنني تريت ترة واحدة لأن الحرب كر وفر وتر أيضاً.

أهل العوض لي حدهم العاربة والمستعربة ، أشكرك على حسن ظنك بي إلا أنني لا أفهم كثير في فقه مصارعة الثيران فلو كان الموضوع متعلقاً بأمور البيسبول أو الباكستبول أو حتى الهول والجول ومطر الشتا الببكي الزول كان لنا رأى في الموضوع.
سلمت أخي وسلم أهل العوض بشقيهم العلمي والأدبي

أهل العوض

هههههههه

يجازيها الله الفرعونية دي ما بتجيب لينا إلا الحاجات الخترية

لكن الحاجات الخترية ما قالوا سولها قانون منع .. يمنع منعاً باتا الإقتراب أو التصوير ؟؟


حبيبنا الملا عمر

النكتة بتاعت الفاتحة دي قطعت مصاريني .. والله بقيت كل ما أمشي لي فاتحة أول حاجة أفتش للشبع / الشعب بي وين ؟؟ الواحد كمان تقوم تفلقو شعبة ولا حاجة يعني ..

بعدين أحسن تقول انسحاب تكتيكي ، لكن يا شيخنا الشي دا ما فيهو تردد ، عبدالرحمن ود حاج حماد قال لما عرس المرة التانية الجماعة سألوا .. عملتها كيف ، قال ليهون والله الشي دا داير ليهو قوة قلب ساكت ،

واحداً لينا كان في بكانات أهل العوض في سيوح السعودية ، خمش القريشات وبقي زول عرس ساي ، قالولو اها ات محدد ولا نختارلك ، قال ليهون ، أختاروا اتو .. الفحل مو عواف ؟؟ البدري عندو أخوه ممسوخ زيو .. قال والله أمش اخطب ليهو فلانة ديك والله يعاف عوف ؟؟ والغريب في الأمر الراجل دا كان كلو همو الحنة .. كلامو كلو كان في الحنة .. قال ليهون ياجماعة هوي كلموا النسوان ( إمتنو ) الحنة – وجمع يديه هكذا – لكن عاد كان حنة بي زبادي ولا ملاح ورق ما عارف غايتو .





رحمابي

يا ياسر حنا ويا الملا عمر ويا د. أبكر ويا بكري زاتو ، يا صالحي المنتدى والبورد أجمعين أخوكم بدر الدين شنا أصيب في كاحله الأيمن تحت عضم الشيطان بالضبط ويقول مراسلنا في السلطنة أن الراجل راقد وما لاقي ما يمد له كورة المديدة .. فرجاء الفزعة .. أقرأوا له المعوذات وآيات الشفاء السبع وكل آيات نزع الخافض . يزعم أهل العوض أنه مصاب بعين إمرأة بكر بت بكر وأن شفاءه منها سيكون بذبح بوست أسود في يوم أبيض بعد الزوال تحضره صاحبة الشأن التي حسدته في مشيته أو في طريقة ترجيله لشعره ، التسريحة كانت إبراهيم عوض أو صفوط التمياط ، والعهدة على الرائي .. لكني أعتقد أن الحكاية أكبر من مجرد مشية ، فقد يكون مؤامرة أو مخالفة للشرعية الدولية أو موضوع البوست الذي لطشه هو من تلك البت التي هي بكر بت بكر .

إيدكم معانا يا ناس ، ويا ياسر حنا طمنونا على صحة هذا المناضل الهمام .