موضوع للنقاش رجاء المشاركه

السلام عليكم والرحمه والبركه[Automated by GetSmile]

الموضوع عن ( كسل ) السودانين

اخواني هل السوداني كسول؟
هل نعتمد على الغير ؟
اتكالين يعني

انا اول واحد يدلي بالراي
اولا
نحن كساله جدا جدا ...................واتكالين 0/maniac.gif[/img]

سلام امدرمان
لك تحية نشطة
جميل ان نمارس نقد الزات حتى نجد معالجات لمسالبناونعد الحال المايل, لكن يجب ان نكون منهجيين فى نقدنا و لا نقع فريسة للاسقاطات السلبية الغالبة على واقعنا فنبعزق زواتنا بدلاَ من ان نعدلها. فالنفرق بين نقد الزات وجلدها.
اقول لك اننا ننتمى الى واقع كسول, فترد نحن الذين خلقنا هذا الواقع فنصل الى النقطة الجوهرية فى النقاش.
لابد من تفكيك هذه النحن لنصل الى الخلل الذى انتج هذا الواقع المسترخى, فالمجتمع ,اى مجتمع يرتب نفسه فى حركه زاتيه حسب الادوار المناطة على كل افراده و مجموعاته اعتمادا على المعرفه و القدرة و الاستعداد الفطرى و الارادى.
نجد ان قاعدة المجتمع تمارس حياتها حسب المتاح و تنتظر من البناء الاجتماعى القائم عليها(اهل المكاسب المعرفية) ان يجانسوا بين الموروث و المكتسب لخلق واقع حياتى افضل. لكن الذى حدث ان الطليعة استأثرت بعلمها لنفسها و أتخذته وسيلة للتميز على الاخرين و تحقيق و جاهة اجتماعية(حلول زاتية ).
لذا كان من صالح هذة الفئة ابقاء الحال على ما هو عليه حتى انهم اخططفوا نضالات الشعب ضد الاستعمار و ثوراته فى و جه الطغاة ليضمنوا عدم اكتمالها فى شكل تحول اجتماعى كامل تضيع معه مكاسبهم التى سطوا عليها بليل و بتحالفاتهم مع الانظمة المعادية لمصالح الشعب.
يبقى ان اقول, انه ليس من شعب ينطوى على دفع زاتى يغنيه من التحفيز فى صورة العائد المجزى و الضبط القانونى الذى يعطى كل صاحب حق حقه و يلزم الجميع بالقيام بواجباتهم.
فمن لا يُعطى حق و لا يُلزم بواجب لا تتوقع منه سوى السعى الكافى للبقاء.

السلام الاخ العزيز :- نصار

طبعا انا كنت متوقع منك رد علي هذا الموضوع.

هنا انا معاك في نقد الذات وبي نمارس فيهو.
*وكيف نحن الذين خلقنا هذا الواقع؟؟؟
* طيب انا معاك نبداء التفكيك.
*بتقصد بي الموروث نحنا ورثنا الكسل يعني.

*وما المقصود بهذه الفئه؟؟؟؟؟

*وبرضو انا معاك حتى اصخاب الحقوق هم معنا في دائرة الكسل.

انا غايتو ماشايف انو السودانيين كسلانين
اعتقد في السودان بالذات الظروف المناخيه والسياسيه
كمان بتساعد الناس علي التراخي
لكن عاين بره والله هم اساس كتير من الدول بالذات في الخليج

لا والله السودانيين ما كسولين لكن الاعلام فرض علينا الكسل



بكاش

والله يا شباب من نا حية الكسل ما فى زول كسلان فى واحد مهمل
والشعب السودانى غير كسول
وانا شخصيا اذا فى احد من اخوننا فى الخليج العربى قا لى انتا يا زول كسول طوالى بشا كلو ما برضا ها قط

ود الجزيره سلام
يعني انحنا ما كساله لاكن مهملين صاح

كده انا اضيف ليكم وحده تانب الاهمال ....الكسل... الاتكاليه..

السلام عليكم الاخ BAKASH
انا ما عارفك بتقصد شنو بي الاعلام

وده ياتو اعلام ده؟؟؟

يعني انت هنا نفيت انو نحنا ما كساله

الستاذ الموصلي لك التحيه

يعني قصدك انو نحنا في السودان كساله وخارج السودان
ما كساله.
مش كده
علي اي حال اذا كان الظروف المناخيه. طبعا في دول كتيره تتشابه في المناخ مع السودان . وهم ما مشهورين بي الكسل

هو من ناحية كسل فى كسل
لكن انا بفتكر انو دا حاصل لانو مافى اى حافز او حوافز كفاية ولا اعنى هنا الماديات فقط
الاحباط ايضا يلعب دور اساسى فى مسالة الكسل دى
اضف الى ذلك واقع الحال المعاش فى السودان من فترة نميرى الى الان
هذه عوامل مؤثرة جدا و با الخلاص منها و من غيرها يمكن ان نصبح نشطين جدا
و البداية فى ظنى تكمن فى تحقيق حلم تماضر فالى هناك
و دمتم

السلام عليمك الاخ اسامه الخاتم


ابداء ليك من الاخر موضوع تماضر بعيد المنال لي اسباب لبعض السودانين الذين يشتهرون بالانانيه.

والله ما بفتكر انو بي الحافز ممكن نكون ما كساله ونحنا مننا (ودابزهانه)

امدمان يديك العافية
لا يا حبيب الموروث يقد به ما يكتسب بالتواتر من غير تأثر بمؤثرات خارجية... شنو يا زول الظاهر جرابك مليان بالتهم شايف جابت ليها انانية و ود اب زهانة ههههههههههه هون عليك يا رجول الحكاية ما بالسوء دا كوله... واقعنا الرسمى اقيم على رأسه من البداية. فيجب ان نتسلح بالمعرف و الاراده حتى نوقفه على قدميه حتى ينطلق الى الامام. ما ممكن ترمى الشعب المغلوب على امره فى اليم وتقول له اياك اياك ان تبتل
ودى

الاخ العزيز نصار
والله طبعا الجراب ما ملان بي التهم الكن انحنا لازم نشوف عوجت رقبتنا)
اذا فعلا انحنا عندنا اراده نرضى بي النقد ونشوف نحنا بعمل في شنو
يعني عايزين ناس تقول لينا يا سودانين انتو ماشين غلط وفي نفس الوقت نشوف غلطنا وين مش نقول لا انحنا ما غلط تعرف حا ازيد ليك وحدي كمان متكبرين كمان
وانا ما برمي الشعب لا انا داير الناس تشوف الصاح وتعرف الغلط

حبيبنا نصار سلام

والله يا اخ امدرمانى موضوعك موضوع مهم جدا ..لكن من الكسل الحاصل اكيد ما حاتشوف ردود كتيره لووووووووووول
دى اول حاجه لكن انا معاك معظمنا كسلانين وبنعتمد على الغير ..ده ما بمنع انه فى غيرنا نشيطين لكن الغالبيه
مع انه عندنا ماشاء الله كفاءات عاليه واذكياء جدا ممكن نستفيد من الحاجه دى فى مصادر دخل نستفيد منها بالزات فى زمنا ده ..
يعنى احكى ليك موقف طريف حصل هنا فى الخليج
فى واحد شامى بالتحديد لبنانى .. وهو رجل اعمال .كان بتكلم مع مجموعه من السودانيين .قال ليهم انتو يا السودانيين احسن مننا فى اى شى امينين ومخلصين ونزيهين فى عملكم وغير كده اذكياء جدا .ومكن تكونوا كلكم تجار. لوما رجال اعمال ..بالاضافه لى عملكم الثابت .. وفوق لى ده كلو جيتو الخليج قبلنا .. وبرضو ما استفدتو من الحاجات العندكم دى كلها ..عارفين ليه ؟؟ قالو ليه ليه ؟
قال ليهم لانكم فى حاجتين ماممكن تتخلوا عنهم مهما حصل ..نومة العصر ولعب الكوتشينه ... لووووووول
وبصراحه ديل الاتنين خماله عديل كده مش كسل ..
ومش لى حق اوافقك يا امدرمانى
يديكم العافيه

الاخت سوووومه كيف الحوال

لووووووووووووووووووووووووووووووووووووك@نوم العصر ولعب الكوتشينه(الكونكان)


والله انا معاك يا سومه انو في السوداني النشيط لاكن المشكله انو نحنا برضو كمان ما حا نعترف انو هناك في سوداني كسلان لا .. وكمان كسلان جده يعني
والله يا ريت نسمع كلام اللبناني ده

انتي عارفه يا سومه طبعا السوداني بطبيعتو دمو حار ما بيرضى الحقاره عشان كده اللبناني عارف طبيعة السودانين بدل ما يقول ليهم انتوا كساله قال ليهم بي طريقه تاني بتنوموا بالعصر .
ولو انا برضو فتحته الموضوع ده امام جمع من السودانين طبعا ما حا اسلم برضو ودي برضو مشكله
والسلام

مساء الخير ايها الاحباب يعني الفكره اني اشارك بالمداخله دي قالوا اتنين من ناس الخليج بيتكلموا عن كسل السوداني بصفه عامه واحتدم النقاش بينهم ما بين مكذب ومؤيد ولما احتدم الامر بصاحب النظريه قال لاخو ياخي ديل شدت ما كساله عندهم مدينه باسم كسلا تصورررررررررررر بس انا وجهة نظري في الموضوع يعني وبصفه عامه يعني طموحنا محدود وانا بتكلم عن السواد الاعظم حتي المغترب او المغتربه ياررررررررربي بتتعده الاشياء الاستهلاكيه ...او عمل بيت وشراء عربيه وبس ... ارجو من الكل شحذ الهمم وتبادل الراي والخبرات لنخرج من انطباع الاخيرين فينا لانو نحن ليس بالكساله بالعكس عندنا طاقه وعزم محتاجه دائما وابدا للتحفيز ودمتم احبتي

وليم سلام

وين الطاقه دي ما شفناه
ولو عندك طريقه ممكن نطلع بيها من دائرة الكسل والخمول والاعتماد على الغير
وانا بقول كلامي ده عشان نتصلح والله يا شباب

يا ناس حرام عليكم الموضوع ده فاكنو فينا اخوانا المصريين الله يسامحهم ،ياناس عالم تزرع بالقمر تقرع بالنجوم زي ما قال حميد
يبقوا كسالى كيف !!!اي واحد يتفاصح حقو تقطعوا ليه تذكره على حسابكم ويمشي اشماليه والجزيره ويزور عمال الشحن والتفريغ في الميناء وبعدين يحكم ،

يا ريت ما نزعل ya fidyas الموضوع ما بحمل زعل عم عبدالرحيم برضو ما بيحمل زحل
بس امش المواني والشماليه والجزيره كده خلاص ده السودان في نظرك

واقول ليك الموضوع ما عايز زعل والله والله والله جليك من المصري خليك من باقي الجنسيات انتا نظرتك شنو في السوداني وبس

لكم التحايا جميعا
بالنسبه للموضوع الاساسي فردي يتكون من جميع الاسباب المذكوره واحب اضيف انو انحنا فعلا شعب ممكن ان نطلق عليه كسلان ولكن ليس لدرجة ان نصبح المميزين بذلك لانو جميع الدول المتشدقه بعروبيتها واسلامها لا ينقصون عنا في شئ
وتعقيبا لكلام سوما فيا بت امي معاك في انو الكشتينه بتصيب بالخماله وانا من مدمنيها لكن اختلف معك في نوم العصريه او القيلوله فالرسول عليه الصلاة والسلام كان يغفو اثناء تلك الفتره ويوصي بها اصحابه ولقد اثبت العلم انه في وقت القيلوله لو اخد الجسم راحتو واسترخى فان ذلك من دواعي تجديد وتنشيط الدماغ ولا يخفى عليك نتائج ذلك على مستوى الانتاج في جميع جوانبه

السلام اخونا:-abcde
طبعا الاخت سومه او الاخ اللبناني القال بس لو ما بنوم بي العصريات
القصد هو الكسل بس خوف من الدم الحامي انحنا طبعا عشان كده قال نوووووووووووووم العصريات
بعدين الحمدلله انك برضو اعترفته بانو انحنا شعب كسلان

ام درمان
لك التحية
كما معلوم فان الانسان هو ابن بيئته , وبيئة السودان قاسية ومناخه حار والجو الحار هو خميرة الكسل .نعم السودانى كسول مقارنة باجناس اخرى, اما اذا كان المقصود هو الكسل المتعمد فالمسألة نسبية

السلام عليكم اخونا:-ازرق

انا ما قصدي الكسل المتعمد لو كان في حتى كسل متعمد كان يكون احسن كنا بنقول الشعب السوداني شعب متمرد

I thhink we only missing the motivation, if every single sudanese individual finds the right motivation factor for what they need to get accompolished, then we wouldn't have any problems such as calling ourselves slackers!!!!!!!!!!!!11

ثلاثة اسباب فى الاعتبار
شكل الاسرة الممتد يضعف حس الاعتماد على الذات
مثال نحن نتواجد فى منازل اهلنا دون الانتباه الى حجم الموارد المتاحة للاسرة والمساهمة فى توسعة هذه المواردلانه من العيب بالنسبة للسودانيين التذمر من الانفاق مما يدفع البعض عند توفر لقمة العيش دونما مقابل ادنى جهد الركون الى تلك الحالة
بيوت العذابة فى الحليج
بيوت اهلنا واقرباءنا فى المدن فى السودان
ثانيا
بذل جهد خارق دون فايدة ترجى
مزارعى مشاريع الاعاشة فى النيل الابيض وجميعالمزارعات الممولة من قبل الدولة او البنوك
وعدم وجود عائد محفز عموما
مناهجنا لم ترسخ تاريخيا لقيمة العمل واهميته فى صياغة الفرد والترفع والتعالى على العمل اليدوى وسيادة روح الافندية بعد الاستقلال

السلام عليكم ابو خالد

انا اقول ليك ايضا من العيب ان ننفق ..وان لا ننصح. يعني باقي ناس البيت الاهل بي الاعتماد علي النفس
وهنا من الطبيعي ان يكون الجهد بدون فائده

وجودعائد بدون فايده
ده يترتب على الوضع الحالي في السودان .
اما انا بتكلم عن السودان من قبل الوضع الحالي .

وانا معاك في مناهجنا لم ترسخ لقيمة العمل واهميته . هنا دي النقطه الاساسيه
اذا وجدنا من يرسخ فينا اهمية العمل وحس باقي الاخوان علي العمل ايضا لذهب الكسل والاتكاليه
معليش الحاجه دي عايزه تضحيات كبيره من كل الاخوان وخاصه الموجودين خارج السودان
ولك التحيه ابو خالد

السلام بالاخ kweli
والله نحنا نفقد الاصرار علي عمل الشئ
اذا وجد الاصرار ذهب الكسل ومافي شئ مستحيل علينا بي الاصرار

تحية امدرماني وجميع المشاركين ، مشاركات قيمة جداً .. أعجبت أشد العجب بالنقاط الثلاث التي لخص بها الاستاذ أبوخالد كسلنا ، وتدعيما لهذه النظرة أذكر موروثاتنا الآتية من أدوات المعاش وفض النزاع واختلاف الرؤى :

فمثلاً نحن لا نعير المواعيد كثير اهتمام . فنتواعد مثلا بكرة الصباح أو العصر أو بعد العشاء ولا يدري أحد المدة الزمنية المحددة لتلك الأوقات ، ثم إننا بكل بساطة نخالف تلك المواعيد لأي سبب من الأسباب ، ياخ والله نسيت ، جونا جماعة ، مشينا المستشفى . وإذا غضبت يقال لك : ياخ انت محبكا كدى مالك؟ الدنيا طاير؟ الأيام راااقدة .. وهكذا .

من ناحية الأسرة الممتدة نأخذ البيت الكبير ، الحوش الواسع ، الصينية نفسها ، الجلابية . كلها أشياء مبهولة ، لا تعرف الحدود والفواصل .. الله يوسعا علينا ، وكما تفضل أبوخالد فكل الأسرة تعتمد على شخص واحد في مقابلة تكاليف السكن والاعاشة والكساء والدواء والدراسة ، ذلك حتى عهد قريب أو قل حتى الآن في كثير من الأسر .

كما أنك إذا عندك ملابس عند الغسال أو الترزي أو خلافه فتأتيك المواعيد بكرة ، ثم بكرة ، ثم ياخ انت مالك .. عريان؟

وفي فض الاشتباك في اختلاف وجهات النظر .. ياخوانا باركوها (دون تحديد اللجوء إلى نقاط الخلاف أو البحث عن نقاط التقاء) ياخوانا خلوها في الله ، ياخ المسامح كريم ، عفا الله عما سلف ..
نحن ناس طيبين (بالمعنى المصري) وللا مش؟

أعتقد أنه يمكن أن نضيف إلى الأسباب الذي ذكرها ، طبيعة بلدنا الجغرافية ، فنحن نعيش في بلد عبارة عن سهل واحد منبسط مترامي الاطراف ، عدد الافراد في الكيلومتر الواحد تقل في بعض الأماكن عن عشرة أشخاص . إنطروا إلى الناس الذي يعيشون في مناطق جبلية كاليمن أو مزدحمة بكثافة بشرية عالية كالهند ، فلا تكاد تجد مكانا لأنسان لا ينتج .

اهل العوض سلام

تعرف اذا حسبنا السلبيات بتاعتنا نحنا السودانين
حدث ولا حرج
الاتكاليه الكسل عدم المواعيد عدم النظام الخ الخ
بي مناسبت المواعيد تعرف السودانين وخاصه داخل السودان .

الواحد بيقول ليك المواعيد الساعه كده بس زيادت كلام ما من اجل المواعيد
طبعا احكي ليك موقف حصل ليه في السودان بعد غيبه
دامت 13 سنه من السودان
المهم عملته مواعيد مع واحد من اصحابي علي اساس هو بيعرف في السودان احسن مني هوقال لي بوكره بكون معاك (كده بدون تحديد الساعه)
طبعا انا قلت ليهو الساعه كم يعني بكره
طبعا بعد داك يقوم صحبك يحدد الساعه وكان المواعيد الساعه 8 صباحا
صبح اليوم التاني واخوك منتظر من الساعه 8 الي 9 صباحا وحياتك جاني اليوم التاني وبعد تلفون مني
الغريب في الامر انو بيحمل تلفون جوال وانا عندي تلفون البت يعني مافي اي اعتزار عن المواعيد
علي اي حال اخوك طلع بي قرار انو انا لازم اتم اي شي بي نفسي ونزلت ادافر في المواصلات


لاكن الواحد هنا برضو يقيف شويه هل عدم المواعيد يندرج تحت الكسل او الاتكاليه او عدم الاهتمام او عدم النظام

وانا من هنا احي كل من يقف وقفت رجل واحد زي ما بنقول ندق صدرنا ونتحمل مصاريف البيت الواحد
زي ما انا واقف وبصرف علي اخوي كمان احس اخوي علي عدم الكسل يعمل اي شي حتى ولو كان بدون مقابل
وبي مرور الزمن ناصل لي الامل المنشود


ويا اهل العوض عشان ما نكون طيبين بي المعنى المصري لازم نتحزم ونواجه ونشوف غلطنا وين ونبداء نصلح وبعدين نمشي الخطوى البعديها
ولك الود العوض فميلي

فعلا الموضوع كسلان
يا شباب معقول بس في ناس كده
يا ناس يا ناس
وين المشاركه[Automated by GetSmile][Automated by GetSmile]

______________