برقص ... ما ترقصي..... برقص .... ما ترقصي.......

استوقفني هذا الخبر في إحدى الصحف الإماراتيه :

أقدم عريس سوداني يقطن مدينة الثورة في أمدرمان على تطليق زوجته قبل انتهاء حفل الزفاف بعد إصرارها هي و شقيقتها على أن ترقص ( رقصة العروس ) . وتعود تفاصيل القصة إلى أن العروس طلبت من عريسها أن ترقص رقصة العروس المعروفه بعد نهاية الحفل إلا أنه رفض هذا الطلب ، و لكن العروس أصرت على موقفها ( فرمى ) عليها ( يمين الطلاق ) و سط دهشه الحاضرين وخاصة العروس و والدتها اللتين أصابتهما حالة إغماء ، و رفض العريس الرجوع عن موقفه رغم الوساطات و رغم المبالغ الطائله التي أنفقها لإتمام الزواج لا سيما أنه مغترب في إحدى الدول العربيه .
عن جريدة الخليج الإماراتيه

هذا الخبر أثار لدي العديد من التساؤلات وقبل كل هذا أثار لدي الكثير من الحزن على هذا الزواج الذي انتهى قبل أن يبدأ و لسبب كهذا .
كل هذا وإن دل على شيء إنما يدل على هشاشة الأسس التي بني عليها هذا الزواج ، بحيث لم يشفع أي شيء لإنقاذ زيجه بهذا الشكل المؤسف ، أليس من الغريب ألا يكون الطرفان قد اتفقا منذ البداية على نقطة كهذه ( الرقص من عدمه ) و تكون هي السبب في هدم هذا الزواج ؟؟. و المؤسف حقا في هذه الأيام زيادة حالات الطلاق لأسباب تدل على إغفال الطرفين عند الإختيار لأهميه النركيز على المواصفات العقلانية المؤهلة لزواج ناجح لا تهدمه لحظ حماقة او تسرع أو عناد أو تكبر ، وهذا يشمل أيضا حالات زواج تمت عن حب .
ولكن بعيدا عن كل هذا الكلام الجاد والله زعلت للعروسه جدا مسكينه تكون تعبت تعب شديد في التعليمه و تفصيل فساتين الرقيص ، ويجي بعد ده كلو العريس راسه وألف سيف ما ترقص و هي و أختها راسهم و مليون سيف ترقص ….. حأرقص…… ما ….. حأرقص …..ما ترقصي ……… طييييييييب أرقصي بس انتي طالق .
لاحظتو حاجة (المبالغ التي صرفت طائلة ، والعريس مغترب في إحدى الدول العربية ، يا ربي وين ؟؟ ! وصرف كم مليون من دم قلبه ؟؟؟؟ )

رايكم شنو يا جماعه ؟
ودمتم في حفظ الله

woooob 3alay wob 3alay wob 3alayyyyyy aryto ma 7aly wo 7alkn kant janaza dy mosh jawaza loooooooooooooool walay this is very sad lakin 7ajat zay dy almafroo'd takoon planned already wala ma kida???
3ala goolik ya Rose yakoon mo'3tarib wain????? mmmmmmmmm lol

أختي روز لك التحية والتقدير
هذه القصة أو قصة مشابهة لها حدثت هنا في الرياض بالمملكة العربية السعودية
ولم يكن السبب رقصة العروس ولكن الخلاف كان في لبس العروس الخليع إذ كانت تلبس فستلن زفاف يغطي كل المساحة حواليها على الارض ما عدا حسدها إذ كان جزء كبير من صدرها مكشوف وكذلك ظهرها
ولم يكن العريس راضيا بلبس عروسته وبدأ النقاش خافتاً بينه وبين عروسه
وأنتقل النقاش إلى والدة العروس
المهم أنهى حفل العرس بالطلاق
ولكن وصلتني أنباء بأنه تم تدارك الموقف ورجعت المياه إلى مجاريها بمجهودات بعض الاجاويد

أها زولك دا النوريهو العوارة الما شافها قبل كدا
انا بعد ما اعرس حا أخليها ترقص للصباح
والباقي بنتمو في الفندق

قال ما ترقصي قال
هي كان مارقصت يعرفوها العروس كيف ؟؟؟

والله قصة غريبة فعلا لكن هي زاته رقيص شنو العليها ماخلاص لو دايره ترقص تمشي ترقص ليهو في البيت هههههههههههه يكه مافي داعي طالما زوجها رافض الرقيص خلاص ماممكن من اول يوم دايره تمشي رايها هههههههههه يكه اها انشاء الله بعد داك تكون رقصت للصباااح زاتووو
اللهم لا شماته لكن العروس وامها غلطانين والله زعلو العريس ساااكت ياحليلو كمان من حلتنا
زاتوووووو

والله انا بشوف انو العريس على حق المفروض يطلقها طلاق بائن بينونه كبرى حتى لايرجع ليها تانى وبعدين رقبص شنو ال عليكم ده تلبس ضيق وترقص قدام الحضور ما ترقص فى البيت زى ماقال الزول زاتو انا لو محل العريس اطلقهاواطلق امها كمان واتزوج واحده تانيه فى نفس الحفله

اخونا الفاضل اب حراز



يا اخوى انت الا ترقصها براك لكن ناسك ديل انا عارفهم ما ناس رقيص انا غايتو عروستى الجن مايشوفها الا انا بس


باكاش

عسوله /
والله عدم التخطيط ده زاتو سبب المشكله

حبيب بلدو /

اعتقد لو كان النقاش استمر خافتا بين العريس و العروس كان الأمور مشت بسلام ولكن اللي زاد الطين بله انو انتقل النقاش إلى والدة العروس و دي المصيبه زااااااااااتها .

أبو حراز /
والله يا أخوي ما دي العوارة زااااااتها الودت العروس في خبر كان ، عليك الله كان ما عويره تخرب على نفسها و تحكم راسها إلا ترقص ؟؟ أها استفادت شنو ؟ لا رقصت ولا عرست !!

الزول زاتو /
لسانك الطويل ده لكن ما بنقط درر ، ده الكلام الصح ما دام العريس عصلج معاها و ما دايرها ترقص ، ما ترقص في بيتها أحسن ليها.

بكاش /
مالك يا اخوي داير تخربها على ام العروس كمان ، المرة اغمى عليها وحالتها بالبلى ، الناس المفروض ما تتحامق وتاأخد الأمور بالهداوة. و كلامك صح والله ، ما نراه الأيام دي في رقيص العروس اللي بيحضرها كل من هب و دب من الرجال دي المصيبه زاتها، والستر فعلا انو ما ترقص او ترقص للنساء فقط .

حبابك روز
ده بسموها شنو حسي عوارة ، هبالة، عدم مسؤلية، لازم تصر لحد ما تصل مرحلة طلاق دي كتيرة ، ورأي احسن الطلاق من حسي ولا عيشة نكد بعدين والقروش في ستين داهية تجي غيرها
اها انشاء الله رقصت بعد داك لووووووووووول،،، بكاش يا خطير

بسم الله الرحمن الرحيم
الاخت روز
ازيك يا عسلنا
يعني لما قريت البوست ده ضحكت لما قلت بس وشر البرية ما يضحك لكن العريس ده من عندينا ولا شنو؟؟؟؟؟
في عرس بت عمتي كان المصور يصور الحناء في رجلها قام زوجها اعترض وليه ودخلي رجلك تحت فستان الزفاف والنقاش طبعا بصوت خافت تصحبو ابتسامة بعد شوية الموضوع اخد صرة وانتقلت لابي واعمامي وخيلاني في النهاية المصور المسكين اتبهدل واتلغت مهمتو بصورة بشعة والله وفاتنا الكثير من حفل الزفاف لكن طبعا ما قدرنا نفتح خشمنا ولا بنقدر
وكان وحدة عاوزة يقطعوها تجيب فكرة رقيص دي ساااااااااااااكت كدي ياها الماتت
اختي روز اعتقد انو اساسا في حاجات هامشية ما بتستاهل انو الزول يقيف عندها وببعض من المرونة كان الموضوع اتحل لكنها حماقتنا كسودانين ومحاولة لفرض كل طرف عضلاتو ويلا الجوازة اتقلبت جنازة
وان شاء الله ما تحصل لزول منكم
تحياتي يا رائعة

على الطلاق الراجل دة ما قصر اصلة
حررررررررررررم زول عندة مبداء
وملعون ابو القروش بنت الكلب اكان حا تخلية يتنازل ويرضى لى زوجتوا انها تسوى كدى

والله كلكم ما أنصفتو العروس والعريس أبدا ما ليه حق والله بالله العروس كان مارقصت يوم زفافا ويوم سعدا ترقص متين تانى عليكم الله خليكم واقعيين والله لو يطلقها 100 مرة أحسن لها وبعدين دى أهم حاجة فى العرس لكل الناس مش للعروس بس لكن أكيد يكون
مغترب فى.............أصلو ما بجينا منها إلا الدجل
والخوذقة اللهم لا تهينا وزى دى زاتا أحسن لها يديها
عرض أكتافو وأكيد حا تلقى أحسن منو

زى ما إتفقوا كل الناس كان لازم يكون فى إتفاق مسبق على الحاجات الصغيرة صغيرة دى بس إصرار العروس كمان تشوف فيه تحدى،اكتر من إنو يكون فرض رأى والعين الحمراء من اول يوم، وكمان القصة لمن تكون فيها أم العروس واخت العروس تكون جاطت ، ويلا يا تحدى وانشا الله حد ما عرس.

ود الجعلي صباح الخير عليك يازهور
يازول الشغلانة تفاهم بين طرفين والتالت بره انت لو موافق لي رقيص عروسك وجاك اخوها قال ليك ماترقص ح تعمل شنو ههههههه يكه
زاتوووووو

يا جماعه انا عندي سوال
انتو الحكايه دي موش كانت عاديه زمان و كمان كانت مفتوحه للجميع
موش نسوان وبس
ليه زمان كانت مقبلوه و هسه كتر فيها الكلام
هل الناس اصبحو اكتر التزاما؟ما اعتقدبالشي الحاصل في السودان حاليا والكلنا عارفنو
اها السبب شنو

إنتو عارفين أسي العروس ما بتكون زعلانة على العريس الطار لكن بتكون زعلانة على الرقصة الطارت منها وعدم تمكينا من استعراض الدهب الصحي والمغشوش والحنة والفستان لصاحباتا وخاصة أن العريس مغترب.

لكن أنا استغرب العريس الداقس دا أصلو هي ما كلمتو قبل العرس بأنها عايزة تكشف وتحتو وللا لا.
غايتو البخلي عروسو ترقص قدام الرجال دا راجل دلدول ساكت.

إنتو عارفين أسي العروس ما بتكون زعلانة على العريس الطار لكن بتكون زعلانة على الرقصة الطارت منها وعدم تمكينا من استعراض الدهب الصحي والمغشوش والحنة والفستان لصاحباتا وخاصة أن العريس مغترب.

لكن أنا استغرب العريس الداقس دا أصلو هي ما كلمتو قبل العرس بأنها عايزة تكشف وتحتو وللا لا.
غايتو البخلي عروسو ترقص قدام الرجال دا راجل دلدول ساكت.

الاتنين غلطانين

اولا لانهم ما اتفقوا على التفاصيل دي

ومفروض هي عارفه طبعه

ثانيا هي كان تتنازل لما قال لا

وهو غلطان كونه يحكم بالطلاق كون الامر في يده

تصرف غير شهم منه خاصه وسط الناس وفي حفلة زفافهما

تحياتي

اؤيد شماسى الرأى فيما ذهب اليه والمسألة هى استعراض واضيف للاستعراضات التى قالها استعراض لمفاتن المرأة ولجسمها ويجب ان تحارب هذه العادة بالذات فى الاعراس .

أعارض العريس بشده على ما انتهى اليه لانها لحظة حماقة وبتصرفه هذا قام بقتل كل احساس فرحة فى داخله وفى داخل العروس المسكينة المغلوب على امرها لانه فى اعتقادى لولا تدخل اختها والاجاويد من بنات الحى لما انتهى بها الوضع لهذا فهى اكيد راغبة فى ان تلبى رغبات شريك حياتها ولكن الضغوط الخارجية كانت أقوى من ان تصمد امامها ..

نصيحة لكل الاخوات المقبلات على زواج ان يتصدوا لكل المحاولات من الاهل للتدخل بينهم وبين ازواج المستقبل ولكم التحية ...

[email protected]

العزيزه روز

الكل رمي المسؤوليه علي العروس
طيب كان ياخده علي قدر عقله ويقول ليها ترقص بس الحضور
يكون نساء فقط....بس دي اذا دل يدل علي انو اسهل كلمه ينطقه
الرجل السوداني انتي طالق
الدليل علي كده انو حصلت قصه مشابه والله حقيقيه
تم في البدايه العقد والعرس بعد مايجهزو البيت
لم جو يجهزو البيت اختلفو علي شكل الموكيت العروس تقول ساده والعريس يقول مشجر ساده..مشجر..ساده ..مشجر قال ليه لا ساده لا مشجر انتى طالق ..دي العروس الاولي ..الثانيه اختالفو علي العشاء كيف يكون كوكتيل ولا وصواني العريس يقول صواني والعروس تقول كوكتيل...كوكتيل ..صواني..كوكتيل..صواني قال ليه لا كوكتيل لا صواني انتي طالق................شوفتو مااسهل الكلمه عند الرجل السوداني

تحياتي{b}

التحية ليك يا بت الغالى

المشكلة انو فى بعض الاحيان يجد الرجل شخصيته مهزوزه ولا اظنك تؤيدين ان يكون الشخص مهزوز عديم الرأى فى أول ليله زواجه ... واكيد الدوافع اكبر من ان (عايزة ارقص ... لا ماترقصى) لانو مافى عاقل فى الدنيا يمكنه ان ينهى بداية حياته الاسرية بهذه الطريقة المأساوية ولاشنو رأيكم ياجماعة الخير ....



[email protected]

celeconمرحب
انت شايف انو الواحد لوكبر عقلو شويه بتكون شخصيتو ضعيفه او مهزوز
الحياه مابتمشي كده لو في ترطرف شدي الحبل لازم الطرف الخر يرخي شوي ولا الحياة ماحتمشي كده
تحياتي

والفى الكوفى شوب
القالت سكرى معلقتين..راجلا قال تلاتة
قالتى لى..معناها من هسى مافى اتفاق...انت طالق..

والعايزة تسال راجلا قالت لى : انت...كان عايزة تقولى انت نسيت الجزلان واللا شايلو
والراجل كان على الهبشة وقاليها..
تميها...انت شنو؟
وقعد يطنطن
قالت لى انت طالق...
وماخلاها كملت قاليها بركة الجات منك
كانت عايزة تقولى انت طالق لسانك هسى مالك؟

الموضوع كلو انو الاساس ضعيف..و الزوج غير مقتنع مية في المية او ممكن يكون احمق و اخدته الجعلية...لكن العروس برضو غلطانة لانو دا زوجها و لازم تطيعو و خاصة انو الموضوع تافه و مامهم ...ولو هي نفسها ترقص و امنية حياتها تستعرض..كانت تجس نبضو من الاول و تحاول اقناعو واحدة واحدة مش يوم العرس و تضعه امام الامر الواقع..دي ذاتها ما طريقة سليمة لبداية حياة زوجية مشتركة

الشكر للجميع دون فرز على ابداء الرأي ، وبالفعل حادثه كهذه تقودنا الى استخلاص الكثير من السلبيات في حياتنا و في كيفية اتخاذنا لقراراتنا منها :
-الحماقة والتسرع في إتخاذ القرارات المصيريه
- تدخل الأهل بين الزوجين يفسد الكثير ، فعروسنا دخلت اختها في الموضوع و فزادت الطين بله .
- البذخ و المبالغة في الأعراس و حفلاتها
- انتشار حالات الزواج السريعTake away ( زواج المغتربين), وما ينجم عنه من انهيار سريع .
و ..... و...... و الكثير الكثير .

بس عندي رد خاص للأخ إيهاب ، نعم يا أخي رقصة العروس موجودة منذ القديم كإحدى التقاليد الموروثه في العرس السوداني،وما أجمل عرسنا السوداني و تميزه عن كافة الأعراس الأخرى لدى الجاليات الأخرى ، و لكن ليس كل ما ورثناه من عادات وتقاليد خال من السلبيات والأخطاء ، و الظروف التي كانت تؤدي فيها رقصة العروس في القديم أمام الملأ من الرجال و النساء و في الصيوان في الشارع بحيث يتفرج حتى عابري السبيل بالتأكيد لا يؤيدها شرع و لا دين ، ولا ترتضيها الفطرة السليمه ولا الرجوله الحقه . على كل حال انا رأيي الشخصي انه رقص العروس من طقوس العرس السوداني المميزه له وليس من السهل إلغائها ولكن أمام النساء فقط وبدون رجال ( ما عدا صاحب الحق طبعا ، العريس يعني ) .

ودمتم في رعاية الله

الاخت روز

تعرفى العريس ده الله بحبو

لو العريس فوّت حكاية الرقيص دى كان خلاص بى موية وكملت والله تخليه طرطور فى البيت وما تشتغل بيه الشغلة ثانى
كويس انه حسم المسألة منذ البداية وده حايكون ليها درس كويس للعرس القادم

يا رب ربنا يرسل ليها واحد سريع ثانى

والله يا جماعه العريس عنده حق فى انه العروس ما ترقص قدام خلق الله والمعازيم والما معزومين والجايبهم الطريق .. المهم لكن برضو غلطان الحاجات دى كان يتفق عليها من بدرى .. ثم تانى مش هى عايزه ترقص يقفلوها فى اوضه براها ويخلوها تفنجط لى الصباح هى وامها وصاحباتها .. والعريس حر يتفرج .. ولا .. لا.. لكن لو جيتو لى العواره زى ما قال ابو حراز .. كلهم عوره .. مع احترامى للاسره دى .. ما فى اى واحد فيهم يقدر على البت دى .. ولا يعالج الموقف ده من الجانبين ؟؟ اها فضيحتهم وصلت الخليج .. مسكين يا زاتو من حلتكم زاتها .. لكن قول .انا براااااااااااا
تحياتى وحبى لكم جميعا

الاخت روز شكرا على الاهتمام والرد
عندي سوال تاني و بعدو في سوال تالت لو سمحتي لي
طيب وسط الاهل كيف من الجنسين

تحياتي إيهاب وشكرا

أرد على سؤالك : احنا قلنا نسوان وبس ومافي أيييي رجال ، ولا حتى الأهل لأنو رقص العريس من الطقوس النسائيه وما في داعي الرجال يتحشرو فيها ، بسسسسس العريس .
اتخيل لي انت عندك راي تاني ولا شنو ؟

لالالالا،دا عريس خرخار وكان خائف من الاقوان وعروسم حريفة في الرقيص،ههههالا واللهي دي عندية من اولة،وبصراحة العريس عندو الف حق،لكن واللهي خايفو يكون طلع عوير وقام بعد ما شاف نسيبته غمرة راح قال ليها(معاك الكمرة الخفية

Hi manubia


والله احتمال وارد برضو يكون خاف من الغلب ، والغلب حار صراحة

و الله العريس دا زي ما قالوا علي الهبشة
و في قصة مشابة ليها حصلت هنا في جدة
واحد نزل اجازة و ازوج و رجع لجدة علي امل
ان يجهز للعروس الشقة و يرسل ليها
اها اخينا رسل للعروس الاوراق اللازمة لحضورها
يوم و هو جالس في البيت التلفون يضرب
من المطار تعال استلم زوجتك
اخينا ما صدق و قال كيف تخلص الاجراءات و تجحز و تسافر
و ما تكلمني
علي بالطلاق ما تدخل البلد دي و ترجع لابوها بالطيارة الجابتةو معاها ورقتها؟؟؟

الاخت روز شكرا مره اخري
طيب السوال التالتوالاخير هل النفوس كانت اطيب زمان ام ماذا
على فكره نا لا اخالفكم الراي في شي
هي مجرد تساؤلات
وانا شخصيا لن يحدث ذلك في عرسي
فابلاضافه الى ذلك اري ان دور العريس في ذلك المشهد سخيف جدا
لك التحايا

الأخ إيهاب /
حكاية انو الناس كانت نفوسها أطيب دي ما فيها شك سواء في موضوعنا ده أو غيره ، و لكن المشكلة انو الناس كان عندها شويه جهل في هذه النقطة ولا ترى فيها ما يعيب او ما يخالف الدين فهي من طقوس الزواج المعتادة و المتعارف عليها ، وهذا لا يعني أن الجهل قد انتفى عن ناس اليوم فمازال الجهل يكتنف الكثير من أمور حياتنا فلكل زمان جهله .
و كلامك صحي والله يا إيهاب ، منظر العريس في ذلك المشهد ما حلو ، خاصة إذا كان مسكين و متلخبط و ما عارف يعمل شنو ، وكمان لو دخل فيهو كم قون و بدا الجمهور من حوله يغنو ليهو (الغلبو منو يا ناس الغلبو منو ؟ ) مشكلتو مشكله .

شكرا على التعقيب و الرد ، والحمد لله أسئلتك خلصت

الاخت روز شكرا للمره التالته
تعبتك معاي الليله
يعني الزول ما يسال تاني
هههههههههههه
سوال اخير ونهائي
كلامك معناهو انو في وعي ديني حاليا اكتر من زمان
طيب تفسري بي شنو انحطاط الاخلاق ماممكن يكون في وعي ديني و في نفس الوقت تدني ملاحظ في الاخلاق موش دا تناغض غريب يعني الرشوه اكتر و السرقه اكتروالترابط اقل و حا جات تانيه كدا يعني ما كان نادرا ومستهجنا قديما اصبح عادي و منتشر حاليا في اعتقادي الشخضي انو المجتمع السوداني تحكمه عادات وتقاليد متوارثه قد لا يكون لها اي شان بالدين

ولا انتي رايك شنو
و الشكر مقدما

عليكم الله عريس الغفله ده لو جاكم
وروهو في واحده اسمها جيهان ما حترقص الا لعريسها
بس لو جا قولوا لي عوووووووك





am juuuuuusssst kidddding

سلاااااااام يابورداب
انتو شنو لميتو في الموضوع غلطو العريس والعروس بس الغلط غلط قبيلة بي حالة لانو لو سبب زي بينهي بداية علاقة مفروض الديمومة تكون اساسا دا بيعني انو العرس كلو كان هبتلي ساااكت معقولة بس ان مرتي اكون ماعارف ح ترقص في العرس والا لا لكن العيب لا علي العروس ولاالعريس العيب علي اللموهم مع بعض واكيد بتكون خالت العريس
المهم ياجماعة منطقيا كدا رقيص العروس دا كلام فارغ لانو في الحقيقة العروس في اللحظة دي بتلبس لبس والله الخواجات يخلعم وتخيلو مرتي في نص الدايرة وزي ماقالت سومة الغاشي والماشي يكشف لي محاسنا وتكون في اول ليلة بينا اكتشف انو ملامح جسد زوجتي المكنيكي والسواق وبتاع الترلة بيعرفا ياجماعة كدي وروني شن الداعي لي الشتات بي الصورة دي وحتي ولو كان رقيص العروس للبنات فقط برضو غلط مابرضو البنات بيكشفو يعني هم عاوزين يحضرو الرقيص عشان يحلو خلال الجوطة دي كلمات متقاطعة
الكلام كلو غلط في غلط ومن هسي رقيص عروس ماداير عشان مانخش في زيطة وزمبريطة
.............
جيهان انتي عارفة انو العريس دا انا
امشي نطي كدا والاكدا عشان مااطلقك هههههههههههههه

في واحدة حصلت قبل كم سنة قريبة من دي
قالوا الحفلة مدورة والناس بترقص والعريس والعروس جالسين في الكوشة واًخر إنبساط . بعد شوية جابو ليك كاسين من العصير للعرسان ، العريس رايح مادي كاس العصير للعروس في اللحظة دي يدو رجفت وقام العصير إندفق في فستان العروس ، العروس زعلت ومن غير ما تحس رايحة ناهرة ليك العريس ( انت ما بتشوف؟؟) صاحبنا العريس أتلفت جاي وجاي حسي إنو في ناس سمعو نهرة العروس ليهو
طوالي قام من كرسيهو ومشي علي الفنان وشال ليك منو المايكروفون وبدأ بتكلم
يا جماعة والله أنا أشكر لكم حضوركم ومشاركتنا حفلنا هذا
ولكن زوي ما شايفين عروستنا الحلوة ذات الفستان الأبيض المذركش بلون العصير الأحمر طالق بالتلاتة

روز
بتذكر زمان كان عندنا صاحبتنا بتحب موضوع رقص العروس ده جدا وكل مراسيم الزواج العادية بس عندها وجهة نظر في رقص البنت بعد ما تتخرج من الجامعة أو تشتغل قامت قالت هي بتفتكر انه الواحدة قبل ما تفوت سن تمنتاشر وتدخل الجامعة تقوم تعمل التعليمة والرقيص والجرتق والذي منه ...زي ما تحب... وبعد داك تدخل جامعتها وتشتغل شغلها لحد ما تلقى ود الحلال تتزوجه سكيتي بدون مراسيم لأنه شين شكل الواحدة وهي اكبر من تمنتاشر سنة وهي بتمارس في زواجها نفس الطقوس اللي بتزوجوا بيها البنات الصغار....وصحي تخيلي واحد موظف برلوم يحكي في المكتب تاني يوم عن رقيص رئسته المباشرة في القسم أو متقاضي يقول والله مولانا فلانة رقاصة ويبتدي يوصف في اللي ما مفروض يوصف
وعلى فكرة يا ايهاب
أهلنا حكوا لينا انه الناس زمااااان كانو برقصو بالرحط ....وبس. يا ربي الفساد عندهم كان أكتر من هسه ولا الوعي كان أقل؟

حساني
لكن عريسكم ده وعروسه الاتنين حميقات شديد خلاص
معقول الناس يوم زفافهم يكونوا بخربشوا في وجوه بعض؟

الحساني

لا انا دا ما معاهو..العروسة طبيعي بتكون متوترة يوم عرسها..فاذا انفعلت فدي طبيعة بشرية عادي يعني..

زواج صور واشرطة عرس
ليس فيه اساس
فذهبت به اول نسمة هواء

ودة في نظري احسن لهما الاثنين
فلتحمد هذه الفتاة ربها على ذلك
وليذهب هو ليتفرج على الشريط رقم 2

salam
what is the issue? why she should dance? it is sort of a bad tradition which is not accepted Islamically?
How a good muslim can accept his wife to dance like ((((a argouz))) with those kind of dresses?
???????????????????

تحياتي مرة أخرى لكل من عقب على الموضوع

بس حبيت أعقب على حكاية العصير السبب المشكلة اللي ذكرها الحساني والله حقو العصير ده يلغوه من بروتوكولات العرس عشان ما تحصل بسببو المآسي ، وعشان العريس و العرسو ريقهم ما ينشف يفضل يسقوهم مويه زرقا سااااااي

الأخ إيهاب
أها جيتك يا إيهاب ، انا بعد ماقلت الحمد لله الزول ده اسألتو كملت تقوم تسأل تااااااني ، ما مشكلة أسأل وإحنا حاضرين ( هو إحنا ورانا إيه ) ،
يا عزيزي إحنا قلنا الناس كانت نفوسها أطيب زمان وكمان المؤثرات الخارجية التي تفسد النفوس والأخلاق لم تكن موجودة كما هو عليه الحال الآن ، ولكن هذا لا ينفي حقيقة انو الوعي الدينيى زمان كان أقل في الكثير من الأمور ، حتى بعض الأمور الدينية كانت تطبق بشكل خاطئ وعندك مثلا الصلاة ، الكثير من حبوباتنا كانو يصلو بطريقة خاطئة ، والآن بعد أن تمت توعيتهن الى الطريقة الصحيحة للصلاة بعضهن يقبلن ذلك بصعوبة شديدة . عندي حبوبتي لغاية الآن تستهزئ لما تسمع النسوان ماشات لدرس ديني تضحك عليهم وتقول ليهم ، انتو الدين ده اختراع جديد يعني إحنا زمان ما كان عندنا دين ولا شنو ؟
يعني الوعي كان ضعيف سواء ديني أو غيره .اليوم الوعي الدينى أكثر من قبل ولكن ما ذكرته من انحطاط في كل شيء و انتشار كل ما هو سيء سببه الابتعاد والانصراف عن تعاليم الدين رغم وجود الوعي (يعني الناس وعت ولكن ابتعدت عن التطبيق الصحيح لما تم توعيتهم إليه نتيجه لمؤثرات عديدة )
نعم المجتمع السوداني تحكمه الكثير من العادات و التقاليد السودانية منها الصالح ومنها الطالح ، منها ما هو مستمد من الدين ومنها ما ليس له علاقة بالدين بتاتا .

مرة أخرى التحية للجميع

يا روز
دى جبتيها من وين؟حكايه تطفش الما بطفش
تعرفى عاده رقصه العروس عاده قديمه جدا.وبدون فلسفه مرتبطه بدور المراه فى المجتمع .زمان كانت وظيفه البنت العمل داخل جدران البيت وانتظار العريس .وطبعا المطلوب منها تكون ست بيت ممتازه وعندها مؤهلات ودى لازم يتم اظهارها فى طقوس الزواج واهمها رقصه العروس _الودت المتعصب بتاع قصتك دى فى ستين دهيه-.الان اختلفت الظروف واصبحت البنت موجوده فى كل مفاصل الحياه الدراسه, والعمل, وحتى الاغتراب .كثير من الطقوس والعادات القديمه فى الزواج ما عادت مناسبه لكن لايمكن التخلص منها على طريقه زولك الخسران ده


واقبلو بينا بى علاتنا

والله . ومن خلال متابعاتي .. لقد لاحظت أن رقصة العروسة قد عادت بعنف .. لكن بطريقة راقيه جدا وتحفظ ماء الوجه وتبعد الفضلاء عن النظر إلي جسد العروسه شبه العاري .. وهو كالتالي
بعد أن تنتهي الحفله الرسميه .. يتم إدخال العروسه إلي داخل البيت أو الصالون ومعها البنات والنساء فقط .. بالإضافه إلي السيد العريس إن رغب .. ثم تبدأ العروسة في تنفيذ كل الرقصات التي تم تدريبها عليها لعدة أيام ماضيه في ما يسمي بالتـعليـمه .. حتي كاميرا الفيديو لا يحملها المصوراتي بل يتم إعطائها إلي واحده من البنات لتصوير الرقصات
وينتهي الأمر بعد ذلك .. ولا من شاف ولا من دري من الرجال أو من الرياييل كما يقول أهل الخليج
لكن الروسه غلطانه .. وهكذا بعض نساء العاصمه اللائي لازالت بعض جهاله تضرب بأطنابها علي عقولهن.. مما أدي إلي هدم بيت الزوجيه بالكامل من أجل إظهار جسد عروستهن أمام خلق الله كنوع من المباهاة غير الراقية بالطبع .. فهذه مسألة لا تقاس بها مدي حضارية أو تقدميه الناس .. فقد أصبحت البنت زوجته شرعاً ,... إذن لماذا وضع الشروط بعد كتب الكتاب .. إنه فعلا الجهل بحقائق الشرع .. حيث يرغب البعض في إرسال تلك الأسس في إجازة مفتوحه .. لا يا سادتي .كل شيء ولا الأسس الشرعية .. فهي ليست ملك للأنظمه ولا للأفراد .. إنها ملك للناس جميعاً
وربنا يلطف .. وأنا حزين علي العروسه التي أضاعوا لها فرحة عمرها علشان الظهور في رقصه
ودمتم .. وربنا يلطف ...
أبو الباشا

يسلم فمك يا ود الباشا

تشكراتي

فرحي خلق الله واتني يا شبه القمرة
وارقصي رشي عبيرك فينا،وفتحي يا زهرة
العريس دا ما سمع رائعة الحلنقي دي

_____________

_____________

رقصة العروس من العادات القديمه فى مناسبة الزفاف ويجب ان تحارب هذه الظاهره لانها تضع المراه السوانيه فى شكل سلعه ونظرت الجميع فى اثناء رقصه العروس يقيمون السلعه بان العريس كسبان ام خسران والموضوع المطروح للنقاش يؤكد علىذلك لان العريس مفهومه بان يعرض هذه السلعه للجميع ويتم التقيم

فهل بمناقشه الجميع يمكن محاربه هذه الظاهره لسببين
اولا تضع المراه فى مرتبه دنيااى اقل من الرجل
ثانيا المشاكل الاجتماعيه التى تسبت فيها رقصة العروس

الاخت / روز تحياتى

الناس قد يختلفون ويتفقون فى اشياء لا تاثير لها اى انها غير ضرورية
يمكن تمريرها دون ان يترك اثر الا ان ترقص على الملا وامام الجميع

والعروس ربما تكون غير محتشمة فى هذه الحالة ،اعتقد بان حياتك

قامت على اساس غير سليم وخاصة اذا كنت من الذين لهم وجهة نظر عن

الرقيص وقامت حياتك كما تحب العروس وليس كما تحب انت ، فالحشمة

لامكانة لها فى حياتك لانك فقدتها من اول يوم فى حياتك الزوجية0

العزيزة روز
الموضوع مخزن جدا جدا وفي اعتقادي ان العريس معة حق وكان على العروس ان تعى حديث رسولنا الكريم لو كنت امرا احد ان يسجد لاحد لامرت الزوجة ان تسجد لزوجها فما بالك بالرقيص وايضا ان العريس صرف مبالغ طائلة فى العرس وهذا معناه انه حاول المستحيل لاقناع العروس لكنه فشل ولم يبقى له الا ما فعل ونتمنى للعروس حظا اوفر والزواج قسمة ونصيب
ويا ريت كل البنات يبقو ذي جيهان

الأخوة الكرام
تحياتي

الموضوع أكبر من أنو رقيص عروس أو خلافه ، ولم يكن رقيص العروس بالمفهوم السوداني القديم مشكلة.
ولكن هل شاهد أحدكم في الفترة الأخيرة رقيص عروس ، وهل يقبل لزوجته أن تظهر بمثل هذه الخلاعة.

هل يعمل الجميع أن أطول فستان يحاك غلي هذه المناسبة يبعد عن الركبة بحوالي الربع متر ، وهل يعلم الجميع أن العرائس يتنافسن في عدد الأعاني التي يرقصون بها ، فمهن من ترقص عشرين ومئتان و..... هكذا

هل هذه الأمور اساسية ولابد منها حتي يعبر عن الفرحة وهل سوف ينتقص هذا من شأن المرأة كونها لم ترقص ولم يشاهدها الجميع وهي تعرض جسدها علي الكل.

هل تقبل أحدهن أن تغير ملابسها مجرد غيار ملابسها أمام الأخرين حتي لو كانو من أهلها؟

كيف لها إذا أن تظهر كاسية عارية وأمام جمع كبير من الناس.

أعتقد أن مثل هذه لا تستحق الطلاق فقط بل أكثر من ذلك.

أرجو أن ينظر إلي الموضوع بشكله الحالي ولا نود به إلي سالف الزمان عندما كان رقيص العروس جزء من الحياء وتعبير عن الخشية وتأتي فيه العروس مغطاة بالقمصيص وتحاول معاندة العريس في فتح يديها وإبعادهم عن وجهه.

ولكن الحال الأن حدث ولا حرج ، فهناك الرقيص الفلاتي ، والهندي والمس عارف ايه يعني كلها حاجات لا تمت إلي رقيص العروس بمفهومه القديم بصلة سوي الأسم.

ولي عودة

كـان يـكـشـــــــــح لــيـهـــا وسـاخـه فـى الـفـســــتـان وخـلاص !!!أهـــا

الاخت روز
سلام واحترام
عوافي عليهو والله العريس دا لان والله كل الامور دي بتتسبب فيها دائما العروس واهل العروس لاني انا متاكد ان كان في اتفاق مسبقا بين العريس والعروس علي كل الترتيبات بتاعة العرس والعروس طيلة فترة الخطوبة بتكون فاهمه العريس وعارفة الشئ البرضيهو والبزعلو لكن البحصل دائماان العروس وقت الزفاف والحفلة بتخطع دائما لافكار اهلها واصحابها وكم مرة اتفق عريس مع عروسه ان لا تكون هنالك حفله من اساسه ولكن العريس لمن احضر مع السيرة يتفاجأبترتيبات الحفلة والفنان واقف في المنصه ومستعد للغناء يعني اسلوب الامر الواقع
يعني انا بفتكر انه كان المفروض اكون في حل احسن من دا بس زي ما قلت ان العروس دائما هي السبب

مع خالص تحياتي