Post: #1
Title: قولوا ما شاء الله
Author: بدرالدين شنا
Date: 09-15-2002, 10:31 AM
ميلادي الحقيقي
*********
يوم فرشو البرش الأحمر أبو زيقتين
وقعدن بنيّات عبدالقادر ال إثنين
آمنة وزينب إشّهدن قرن ياسين
وسوّنلي الضريرة بالعديل والزين
والفنان محمد وليد كمال الدين
سوى الغناوي واطرب الحاضرين
والعمّة مريم قالت دقر يا عين
والبنيّات رقصن رقصة ألوِزّين
وزغاريد الأهل شاقه الحله لي نصين
مبروك يا عشة على جناك بدرالدين
داك اليوم كان ميلادي الحقيقي
كان ميلادي يوم عقد القرانِ
والمدفع ضرب سِمْعُه البعيد والدانيِ
واتكفوا الضيوف والأهل والحبان
والخير الفضل يكفي عرساً تاني
وجات قعدت جنبي الرايدها ورايدانيِ
أشبه بالملاك في صورة الإنسانِ
دي القمره الفي السماء
الليلة نازلة عشاني
ودي الحورية البيها الإله خصاني
عصفورين حلّقوا في سماء العرسانِ
وإحساس بالخوف والفرح جانيِ
ابشر يا أبوي ويا أخوي الثانيِ
ربي أجاب دعاي وبي غرمها حبانيِ
وتحققت كل الأماني بيك يا أماني
كان ميلادي الحقيقي
يوم قلبي ليها أختار
دخلت قليب أهلي
قبال تدخل الدار
محبوبة من الجميع
بتعرف حقوق الجار
لو جبت ليها ضيوف
إنشاء الله عشرة أنفار
تبسم في وجيهم لو حتى خالية الدار
هميمة كريمة عالية المقدار
تلقاها في المطبخ تخدم كبار وصغار
ما بتترفع ما بتتعالى وما بتعرف البوبار
رزينة وصادقة أمينة تحفظ الأسرار
مي نمّامة مي حوّامة عند المغارب توقد النار
تعشي نسيبها أول قبال عشا الأطفال
ولو شفتها مع نسيبتها أحلفلك يمين تحتار
همّهن واحد وشورٍ واحد متطابق الأفكار
وكتير وكتير ما بتوصفه الأشعار
عاطر التحايا
بدرالدين شنا
|
Post: #2
Title: Re: قولوا ما شاء الله
Author: ALZOLZATOO
Date: 09-15-2002, 10:40 AM
Parent: #1
كلماتك رائعة يا بدر الدين بس عندي سعال واحد بس
الشيب ده بعد الكلام ده كلو جاك من وين طيب ههههههههي كه
زاتووووو
|
Post: #3
Title: Re: قولوا ما شاء الله
Author: Yassir7anna
Date: 09-15-2002, 10:54 AM
Parent: #1
سؤال وجيه الل يالزول والله
اها يا بدر جاوبو..جاوبو
|
Post: #4
Title: حبابك ألف
Author: ALHALAWI
Date: 09-15-2002, 11:20 AM
Parent: #1
حبابك يا عشاي ود أمي براي … حبابك وكت الله جابك ،،،
والله البيشوف التحيـة دي يقول الزول دا عضـو مؤسس في البورد دا
حرم أخوكم جديد وبيستاهل الترحيب ، لكن لما شفتا قريبي دا قلتا أسلم عليه بدري بدري .. باقي الدم للدم بيحن
ولا ما كدا يا جنا الأنصاري حبابك عشرة
|
Post: #5
Title: Re: قولوا ما شاء الله
Author: soma
Date: 09-15-2002, 11:54 AM
Parent: #1
البدرى والله ما شاء الله.. وعينا بارده عليك يا ام اواب .. والقالو فيك البدرى ده والله نقطه فى بحر .. وتستاهلى اكتر من ده كلو .. كدى انت قول ما شاء الله وخليك بعيد من البنيه دى .. وجاوب على ناسك الفوق ديل .. براك بتجيبو لى رقبت .. اها اكان نسيت السعال انا بذكرك ليه .. القال ليك منو صبغ شعرك رمادى بى بيجى بى ابيض .. انا ما قلت ليك شغل الموضه ده اختاه ... برااااااك بتجيبو لى رقبتك .
سلام وحبى لكم جميعا
|
Post: #6
Title: Re: قولوا ما شاء الله
Author: AlRa7mabi
Date: 09-15-2002, 01:08 PM
Parent: #1
الحلاوي
يا جماعة دا منو دا
وات مالك الحلاوي دا ما بتشوفو
جاي فايت فينا فو ساكت
ابقى داخل على الماسنجر دي خليني
النأترك
عبدالرحمن / أبو ضحى
|
Post: #7
Title: Re: قولوا ما شاء الله
Author: BAKASH
Date: 09-15-2002, 01:29 PM
Parent: #6
بتعرف حقوق الجار
لو جبت ليها ضيوف
إنشاء الله عشرة أنفار
تبسم في وجيهم لو حتى خالية الدار
هميمة كريمة عالية المقدار
تلقاها في المطبخ تخدم كبار وصغار
ما بتترفع ما بتتعالى وما بتعرف البوبار
رزينة وصادقة أمينة تحفظ الأسرار
مي نمّامة مي حوّامة عند المغارب توقد النار
تعشي نسيبها أول قبال عشا الأطفال
ولو شفتها مع نسيبتها أحلفلك يمين تحتار
همّهن واحد وشورٍ واحد متطابق الأفكار
وكتير وكتير ما بتوصفه الأشعار
اخونا الفاضل بدرالدين
تحياتى لك
وماشاء الله عينى بارده عليكم انت وامانى؟؟ بعدين كيف اخترت العروسه ال فيها كل المواصفات دى ؟؟ دى نادره جدا عايز لى واحده بنفس المواصفاة دى 000 امانى دى ما عندها اخت تشوفها لينا؟؟ وعينى بارده عليكم مره اخرى
الاخت الفاضله سوما
ايه الحركات حقتك دى تغطى على قريبك الراجل شيبو ظاهر وتقولى موضه عايزه بنات البورد يتغشو فيه والا شنو؟؟
الاخ الحلاوى
شنو العنصريه حقتك دى من اول يوم نشوفك طوالى تخلى الناس وترد على قريبك احسن تجى بالباب بدل الشباك تسلم على الناس وبعدين تجى ترد على قريبك
مرحب بيك يا اخونا الحلاوى
|
Post: #10
Title: Re: قولوا ما شاء الله
Author: Yassir7anna
Date: 09-15-2002, 03:45 PM
Parent: #6
أخوي عبده
ما قلنا ليك (أبو...) أخيرلك تختها والله يلمو فيك ناس عمي بوش ديل تكوس لليخارجك ما تلقى، انا هسع جدي الرابع اسموه ابوسارة عديل كده مشيت لي ناس الجوازات قلت قلت ليهم يا اخونا سوري انا نسيت محمد عثمان ديل نفرين ما نفر واحد عشان اخارج ابوسارة ده وابقى على الخليفة
ما لنا ومال دقوه شالو قروشوه
|
Post: #8
Title: Re: قولوا ما شاء الله
Author: ALHALAWI
Date: 09-15-2002, 01:48 PM
Parent: #1
AlRa7mabi
يطيب خاطرك ،،،
والله حكاية الماسنجر دى ما متوفرة حالياً ، علا بعدين ممكن من البيـت
إنشاء الله ألم فوقك بعدين ، والله يا أخوى أنا قايلك في عبي تب
BAKASH
والله لا عنصرية ولا حاجـة .. كل الحكاية إنو الزول دا نشطني أخش توف عليكم ، وحقك علينا..
|
Post: #9
Title: Re: قولوا ما شاء الله
Author: Tumadir
Date: 09-15-2002, 02:12 PM
Parent: #8
زوجتك مثالية
مبروكة عالية
لكن براحة عليها شوية كدة، ظاهر عليها اوفر ويركد
over worked.
مع احترامى لاسرتك و التكافل الاجتماعى
|
Post: #11
Title: Re: قولوا ما شاء الله
Author: محمد سعيد شلى
Date: 09-15-2002, 03:47 PM
Parent: #1
عزيزى بدرالدين وانا أطالع قصيدك - العصماء - تذكرت الشاعر ودالعيلفون الذى تنسب اليه قصيدة - حبيبى كش كشح الوسخ - فهل ياترى قد تأثرت بذلك الشاعر أم انت مدرسة شعرية قائمة بذاتها ؟؟
|
Post: #12
Title: Re: قولوا ما شاء الله
Author: بدرالدين شنا
Date: 09-16-2002, 06:44 AM
Parent: #11
بسم الله الرحمن الرحيم
صديقي الزول ذاتو
لكي أوفق في الحصول على إمرأة كهذه سبب كافي ليجعلني أشيب
عزيزي ياسر حنا
أنا جاوبتو يا حاتم كديس
أخي الحلاوي
غايتو الزول البقول لي ود الأنصاري دا أكيد من شرفت الحلاوين على كل مرحباً بك في البورد
الأصيلة سوما
أنا شعري ما بصبغو لأنو أنا ما شايفو كان أسود ولا تركوازي
ود أختي الرحمابي
هازول ما تخليك غشيم رجع عكازك دا الحلاوي كان شافك معقول ما يسلم عليك وبعدين الزول ود عمك وجديد في البورد وحقو (ترحمب) بيهو
الشفيف باكاش
اشكرك على الثناء على زوجتي والله دي أهلنا زمان يكتلوا فيها عديل كدالكن العلم إطور وبالمناسبة عندها أخت ست بيت تمام
المتفردة تماضر
أيوااااا (أوفر ويركد) لا عليك الله قولي لي إنتهكتو حقوق الإنسان كمان
حبيبي شلي
زي ما بقولوا أخوانا السوريون (هادا اللي طلع معك؟) ..
عاطر التحايا
بدرالدين شنا
|
Post: #13
Title: Re: قولوا ما شاء الله
Author: almulaomar
Date: 05-12-2003, 10:40 AM
Parent: #1
أخي الشين جداً بدر الدين الشين
ماشاء الله تبارك الله وعيني ورجلي وأضاني كلهم عليك باردات وطبعاً ما قلت ليك نخرتي باردة لأنو النخرة الباردة عادة ما تكون نخرة الكلب وهي بالمناسبة بتكون باردة ليه فيها ثيرموستات يا ربي ، إنت يا بدر الدين يا أخوي كنت بتمشي درس العصر ولا شنو والله آمنت بيك كما آمن أهل العوض أجمعين بأنك شاعر وأكيد ناس الرحمابي هم الغاوون متابعنك من السودان لغاية سلطنة عمان.
|
Post: #14
Title: Re: قولوا ما شاء الله
Author: بدرالدين شنا
Date: 05-12-2003, 11:17 AM
Parent: #1
بسم الله الرحمن الرحيم
أخي وصديقي الملا عمر الرجل الثروة
سلام وإحترام
أولاً أشكرك على أعضاءك الباردات كلهن
إنشاء الله ربنا يبستك زي ما قلعت لي بوستي دا
وأشكرك على ثنائك على القصيدة
وفي قصائد للبيع
قصيدة ثناء على الزوجة
قصيدة تفقع بيها مرارة شيري
قصيدة تسكت بيها أهل العوض
وأخر يابسات
يا بسات الريح بالله قوم قوم بينا
|
Post: #15
Title: Re: قولوا ما شاء الله
Author: almulaomar
Date: 05-12-2003, 11:51 AM
Parent: #14
الأستاذ الكريم بدر الدين
بصراحة ما زال السؤال قائماً أو قاعداً أو منبطحاً لا فرق إلا أنك لم تجاوب والإجابة هنا لا يمكن أن تكون بلا أو نعم يعني إجابه مبررة ، وأعيد السؤال عليك وعلى من يريد أن يحشر نفه حشراً في هذا المقام ويتبرع بالرد:
نخرت الكلب ليه بارده ، يا السمحه يا الوارده. وطبعاً عمك أبو الملا يؤمن بأن الملائكة لا تدخل بيت فيه كلب ولا صورة عشان كده تعاملنا مع الكلاب يكون في نطاق الشارع العام أما الصورة فصورة جدي ما زالت معلقة في جدار الصالون عليه رحمة الله والرجل صباح خير وليهو شنبات تقول آية الله العظمي الخميني على جميع أموات المسلمين الرحمة والمغفرة. وطبعاً لن يتجرأ على إنزال الصورة لأنها ببساطة صورة جدي أبو أمي وإنزالها يكون بمثابة إعلان حرب تماماً مثل إنزال العلم الأمريكي من ساريته في قنصلية ماما أمريكا بالقاهرة.
قلت لي لديك كمية قصائد للبيع ، هل هناك قصائد للإيجار طرفكم وماذا إذا لم تعجبني القصيدة هل يمكن إرجاعها وإرجاع نقودي وهل تتعملوا في بيع قصائدكم بالآجل أم أنه يتوجب على المشتري أن يدفع وما هي العملة التي تبيعون القصائد.
|
Post: #16
Title: Re: قولوا ما شاء الله
Author: Ahlalawad
Date: 05-12-2003, 12:11 PM
Parent: #1
قلنا ما شاء الله
بس دايرين قصيدة أنصارية بي زراير برة وكفة برمة
..
ممكن أهدي؟
أهدي للعوض بالدروشاب
وتاني
بزقلونا
وتاني بي سكر الجنيد
|
Post: #26
Title: Re: قولوا ما شاء الله
Author: بدرالدين شنا
Date: 05-13-2003, 10:41 AM
Parent: #16
بسم الله الرحمن الرحيم
الغالي أهل العوض
سلام آزول
ياخوي الأنصار ديل قصايدهم زي جلالبيهم ما فيها زراير بي ورا وقدام واحد زي العربية الفلوكسواجن
|
Post: #17
Title: Re: قولوا ما شاء الله
Author: بدرالدين شنا
Date: 05-12-2003, 12:30 PM
Parent: #1
بسم الله الرحمن الرحيم
الملا عمر الرجل الثروة
سلام بالآناف والآناف دي جميع أنف لكن حارة ما زي حقة الكلب
إنت عايز تحرجني بسؤالك دا ولا شنو؟
طبعاً البيت الفيهو الكلاب لا الملائكة ولا أنا ما بنخشو .. يعيش الملا الكبير ويعيش الجد أبو شنبات
القصائد التي تباع لا ترد وإذا ما عجبيتك ممكن تعدل فيها زي ما عايز ولو عايز حروف زيادة ممكن تجي الورشة وتشيل براك أما العملة فهي الين الياباني والتاباني
|
Post: #18
Title: Re: قولوا ما شاء الله
Author: ebrahim_ali
Date: 05-12-2003, 03:28 PM
Parent: #17
بدر الدين والله مش نقول مشاء الله دي نمشي ليك لأقرب فكي نحصنك بيهو ياخي دا ابداع متناهي وفات الحد تعرف انا بقراء ليك بس لانو محتار الواحد يكتب ليك شنو فبالجد مزيد من الابداع مزيد من هذه الدرر وياريت تظهر لينا معاك كمان سوما
وممكن اقطتف هذه الورده واهديها لاحلي وردة ممكن ولا في مانع انا عارف مافي مانع وتسلم وتسلملك الامورة وعقبالنا كده عشان ننزلها ليكم هنا ونحشش بيها معاكم يارائع
وجات قعدت جنبي الرايدها ورايدانيِ
أشبه بالملاك في صورة الإنسانِ
دي القمره الفي السماء
الليلة نازلة عشاني
ودي الحورية البيها الإله خصاني
عصفورين حلّقوا في سماء العرسانِ
وإحساس بالخوف والفرح جانيِ
ابشر يا أبوي ويا أخوي الثانيِ
ربي أجاب دعاي وبي غرمها حبانيِ
وتحققت كل الأماني بيك يا أماني
كان ميلادي الحقيقي
يوم قلبي ليها أختار
دخلت قليب أهلي
قبال تدخل الدار
محبوبة من الجميع
بتعرف حقوق الجار
|
Post: #19
Title: Re: قولوا ما شاء الله
Author: بدرالدين شنا
Date: 05-13-2003, 07:14 AM
Parent: #1
بسم الله الرحمن الرحيم
صديقي وحبيبي/ إبراهيم علي
سلام يحمل كلام مضمونه حبي
ياخي أشكرك على الثناء وهدية الورد مقبولة إن كانت للمدام أو الأمورة ربى ولك آلاف التحايا يا مهذب
وإنشاء الله إنت كمان تتزوج وتحشحش زي ما قلت ولو ما نزلت قصيدة أنا بنزل ليك واحدة مجان كيتاً على الملا عمر
|
Post: #20
Title: Re: قولوا ما شاء الله
Author: HOPELESS
Date: 05-13-2003, 07:25 AM
Parent: #19
شيخنا ودشنا
Quote: محبوبة من الجميع
بتعرف حقوق الجار
لو جبت ليها ضيوف
إنشاء الله عشرة أنفار
تبسم في وجيهم لو حتى خالية الدار
|
ماشاء الله
ودي جاتك بعد كم دعوه الوليه الصالحه دي..؟
|
Post: #25
Title: Re: قولوا ما شاء الله
Author: بدرالدين شنا
Date: 05-13-2003, 10:41 AM
Parent: #20
بسم الله الرحمن الرحيم
العزيز/ هوب لس
سلام وإحترام
إنت لو شلت (اللس) البعد هوب دي بتلقى أحسن منها
وأنا والحمد لله بعد شناتي دي هوب فل .. إتخيل
|
Post: #21
Title: Re: قولوا ما شاء الله
Author: ebrahim_ali
Date: 05-13-2003, 07:32 AM
Parent: #19
المبدع شنا تاني عائزين تخلني ازوج انا يادوبك كده عريس نصف كم (دي عليييك الله أسال منها أبوحراز لو ظهر) قال عريس قال
مرة تانية ليك التحية ياغالي وللامورة
وقصيدتك مقبولة بس بيني وبينك بديك الاسم وانت بعد داك اتفنن ذي ما عائز
|
Post: #22
Title: Re: قولوا ما شاء الله
Author: بدرالدين شنا
Date: 05-13-2003, 08:32 AM
Parent: #1
بسم الله الرحمن الرحيم
العريس/ ود الحاج
سلام عليك وعلى الحاج والحاجة ومن لفا لفهم زي ما قالت أستاذتنا تماضر
عاد شحت الله يبقيك عريس كم كامل وفيهو حاجات بي فوق كدي زي حقات ناس الطيران ويرزقك من نعيمو يا رائع
|
Post: #23
Title: Re: قولوا ما شاء الله
Author: أم سهى
Date: 05-13-2003, 08:36 AM
Parent: #22
ده كلام بورد ساكت ودي مثالية زيادة عن اللزوم بكرة الكلام دة كله بتقلب صدقني وبتقلبه انت مش هي يا بدر الدين وزي ما قالت ليك تماضر براحة عليها وهي باين عليها علي نياتها (أوي) قلبي معها
|
Post: #24
Title: Re: قولوا ما شاء الله
Author: بدرالدين شنا
Date: 05-13-2003, 10:40 AM
Parent: #1
بسم الله الرحمن الرحيم
المحترمة/ أم سهى
سلام وترحيب بالطلة
ده كلام بورد ساكت ودي مثالية زيادة عن اللزوم بكرة الكلام دة كله بتقلب صدقني
إنت قايلة حنتي لي هسع ما طلعت ولا شنو؟
أنا بتي الكبيرة دخلت السنة دي العالي والقصيدة دي كتبت قبل إنضمامي للبورد
وبعدين ما أنا براي البريدة دي
محبوبة من الجميع بتعرف حقوق الجار
والله والله والله وإشهد الله أني صادق في كل كلمة كتبتها
والله يكون في عون أبو سهى
|
Post: #27
Title: Re: قولوا ما شاء الله
Author: أم سهى
Date: 05-13-2003, 11:36 AM
Parent: #24
شكرا يا بدر الدين - عموما أبو سهى الله يديه العافية تمام بس ناقص الشعر زي بتاعك لكن نحن ما بنقولو عشان ما يطلع في راسنا - انتو معشر الرجال ما بتستحملوا الشكر راسكم بكبر بسرعة وبضو بصغر بسرعة ولا شنو انا زاتي بنتي قربت للعالى ياخوي لكن النصيحة ما بنموت بيها
|
Post: #28
Title: Re: قولوا ما شاء الله
Author: بدرالدين شنا
Date: 05-13-2003, 12:59 PM
Parent: #1
بسم الله الرحمن الرحيم
المحترمة/ أم سهى
سلام عليك وعلى أبو سهى وعلى العيال
ربنا يديكم العافية ويديم المحبة بينكم ويسعدكم دنيا وآخرة قولي آمييييييييييييييييييييييين
|
|