ياسيكو....غنوة شايقية مزيودة موية ......

تجربة الفنان خالد الصحافة للغناء بالشايقي تجربة جميلة وشيقة...
و احلي ما فيها صوت الطمبور البيسرق الهمسة بين البيز جيتار...و الاورغن....و كلمة شايقي مزيود موية كنا ننعت بها لاننا مولودين في المدن .. ....والاغنية في الاصل للفنان الرائع صديق احمد ...من اكتر فنانين الشايقية العملو علي نقل الاغنية ...
الاغنية الشايقية شهدت تطور في مسيرتها ..وما كانت بشكلها الحالي ..
كانت عبارة عن طمباري بيشيل الطمبور و يباري النسوان البيرقصن في الدارة و من الامثلة المرحوم بندة ....ثم عمل علي تطوير هذا الشكل الفنان النعام ادم عليه الرحمة ...ليعطي الاغنية الشايقية هذا الشكل المميز ...عازف الطبل و الكورس ثم الفنان .....و فترة السبعينيات من اخصب الفترات التي مرت بالاغنية الشايقية .....ظهرت فبها اجمل الاصوات ..الفنان محمد كرم الله ...صديق احمد ...محمد جبارة اضافة للنعام ادم..وتميزت بي شعراء افذاذ كحسن الدابي الله يرحمه ..السر عثمان الطيب ..الخ ..
المهم اتمني ان نسمع في يوم شريط للرايع موصلي بالشايقي و بالطمبور

بسم الله الرحمن الرحيم
اخي العزيز الفنجري
جزاك الله كل خير يعني انا الاغنية سمعتها قريب العشرة مرات وما شبعت منها يا رائع
وتحياتي لاهلي الشوايقة في كل مكان
تحياتي

جمييييييييلة

ايه رايك فى حنان النيل بالطمبور... برضو مزيودى مويى.... لكن تمام
جيبا لينا المرة الجاية لوسمحت.... وسمحة الفنجرة.

زمن كايس اراضيهن
وصف لي درب الريد عشان اوصل واراضيهن
يا مرسال
رسائل الشوق انا الضهبان
تعبت كتير ويا ما سالت ما خليت ناس عابرين
وكان زي حالي محتارين
يهزو الراس وما عارفين مراسيهن
وحاتك انت يا مرسال بحب وحدين وما عارف دريبن وين
وبرضو كمان وحاتك انت ما بعرف اسامهين
تجيني حروف من المجهول
وبكتب برضي للمجهول
رسائل تحكي قصة زول
رسائل تروي قصة زول
يحب الطيف
يسافر في هجير الصيف
ومشتاق يوم يلاقيهم
&&&&&&
حبيبي الفنجري
لك الود
الا رحم الله قائل هذه الكلمات الاستاذ اسماعين ود حد الزين/اسماعي حسن
الذي قال
تصور كيف يكون الحال لو ما كنت سوداني واهل الحارة ما اهلي
لو كان ما جيت من زي ديل وا اسفاي وا ماساتي وا زلي
وهي جزء من قصيدة طويلة
اختار منها الاخ المهندس الاستاذ عبد العظيم منصور هذا الجزء وهو الان بالنرويج وقد (وضع له الاخ ديامي اغنية للشاعر حميد باسم مناقيش العدالة في هذا البورد وتعلم الى اي مدى يصعب تلحين كلمات الشاعر حميد)لقد اختار هذا الجزء وقام بتلحينه في نهاية الثمانينات بالخرطوم واسمعنا اياها مرات عديدة وكان من ضمن الحضور صاحب الملكة الصوتية النادرة الاستاذ صديق احمد وطلب من عبد العظيم ان يسمح له بغنائها وبالفعل سمح له فابدع صديق واجاد فيها
وعلى وجه التحديد هذه الجرة الطويلة او التي يسميها البعض بالطلعة في البيت الذي يقول(تجيني حروف من المجهول)فهي من ادخالات الفنان صديق احمد
ووجدت الاغنية رواجا لبساطة الكلمة وجمالها وهو اسلوب عرف به المرحوم اسماعين ود حسن بجانب الاشكال البلاغية التي كان يلجا لها كايس اراضهن ،عشان اوصل واراضيهن) واعلم ان خالد الصحافة قد استاذن من عبد العظيم لاداء هذه الاغنية بهذا الثوب القشيب ولعمري شي جميل بلاشك وعجبتني مقولتك حول سرقة الطنبور للهمسة بين البيز جيتار والارغن فالطنبور آلة حيرت السامعين في تلك الامبراطرية التى كادت ان تغيب عنها الشمس الان او قد غابت ،في بريطانيا حينما عزف عليه الاستاذ محمد جبارة في الثمانينات بلندن
واعتبر تجربة خالد الصحافة تجربة جديدة لنقل الاغنية الشايقية من القوقعة الى العموم وقد سبقته لذلك الفنانة حنان النيل التي كنت تستطيع ان تسمع لها اغنية شايقية كاملة من اول بيت الى نهايتها وانت سائر في السوق العربي او السوق الشعبي حيث كل دكان كان يفتح ذاك الشريط
وكذلك تجربة الاستاذ صلاح بن البادية
وتلك الاغنية الشايقية التي تعزف بجميع الات الموسيقى السودانية والتى تؤديها فرقة شعبيةوهي اجمل الحلوين وين عهودك وين وهو لحن ثنائي العامراب
الحديث يطول
فالتحية لخالد الصحافة وليتني اجد عندك هذا الشريط
وما احلى هذه الخلطة انها بهار جميل ومزة طيبة

بت القبايل .....كلماتك المعبرة تعني نجاح هذه الاغنية و نجاح تجربة خالد محجوب المتميزة ....و تديني دافعا قويا للاستمرار
في عرض نماذج حلوة لغناء الشايقية..
بت البلد الاصيلة تماضر .....تجربة غناءحنان النيل بالطمبور كانت تجربة اكتر من رايعة ...و حنان النيل عملت الشريط كثنائي سيد احمد عبد الحميد ..العازف الماهر للطمبور و الشاعر ذو الكلمات الرقيقة ..و الملحن العذب....يعني تلاتة في واحد...عشان كده طلع انتاج قوي و جميل ....
يقال يا تماضر ان الفنان الشايقي لما يجي للاذاعة كان يجاز صوته والاداء فقط ....صاح الكلام ده؟؟
المهم وعدتينا بي الكتير و راجينك...لسه مشرفين اضنينا..

ياسيكو .....طبعا اتوقعت منك اضافة قيمة ..و ده لشي العملتو لانو الواضح انك تملك ذخيرة كبيرة ....الله يديك الوقت وتملا لينا البورد بوستات ....بالتاكيد اسماعيل حسن ده عاوز ليه بورد براهو...و شكرا لمعلوماتك الثرة عن الاغنية لانو انا طلعت ما عارف اصلها ودي مشكلة كبيرة ..كتير تلقي نفسك بتردد اغاني كتيرة بدون تعرف صاحب الاغنية الحقيقي..و بالمناسبة اغنية اجمل الحلوين دي اعتفد صاحبا الاصلي ود المساعيد الانشاء الله سافرد له مساحة قريبا ...شكرا ود الاراك

شايقيه دا شي واضح الا مزيوده مويه دي انا مافهمتها
هههههههههه
nutech

عزيزي فنجري

لك التحية و الود

تعاتبنا و إنتا ما قبلان تكاتبنا …

كمان زعلان !!!

يا فتنة

يا البعد الله منك كان مخافتنا

أكان حيين و ما متنا

و لو حن القدر و الدنيا لمتنا

و تاني الحلة زي ما كُنّا ضمتنا

بأحلف ليك بذمتنا

إسعادك مهمتنا

و بلاك قامت قيامتنا

و برضو بتعاتبنا ؟

هذه الأغنية سمعت الأستاذ صديق أحمد يشدو بها
فهلا كنت فنجرياً كما سميت و شنفت بها آذاننا

مع إمتناني

ايهاب
سلام
مذيودة موية تعني دخول البيز جيتار والارغن مع الطنبور
وهو بهار وتوابل جميلة

Dear Brother Fanjari,
That was wonderful, i missed this music too much, thanks for doing that for us.
I wonder if you can send me this file, it would be nice of you..and if you can also tell me if there is any website where I can find this kind of music..
Thanks so much...

العزيز ياسيكو
شكرا على التوضيح

احمد العربي
سلام
دونك هذا الرابط
فيه شي بسيط اغنية اخري من خالد وحنان النيل وجبارة
http://www.yusra.host.sk/

العزيز نمر الاغنية دي من اجمل اغاني صديق فعلا ...وتركت فيني انطباع عمري ما انساهو ...و ح اقب سماء ارض عشان القاها و اكون الفنجري اب جيبين البيقولوهو...تحياتي ليك

ايهاب يا سيكو اوفي ليك ...انت جعفري مزيود موية الجزيرة...


احمد العربي انشاء الله ح ارسل ليك الغنية دي و في بوست لاغنية ابوك يا اسامة.....ارجو ان تستمع اليها ...و الاخ ياسيكو سهل علي المهمة لاني بدور علي موقع للغني الشايقي...الله يعينك في غربتك .

راجع البوست ده

...ابوك يا اسامة

Dear brother Yasiko,
Thanks so much for the web link. It is so nice of you...
Regards to you and all the Sudanese up there..
From Japan...Ahmed

فنجري واحمد الصفحة السابق لابو يسرا معنا في هذا البورد
واليك هذه ايضا
http://www.sudanonnet.com/
ويا العربي راجع الايميل بتاعك

الاخ الغالي فنجري لك التحية وانت تعطر سمؤات البورد بالق ونغم اهلنا الشوايقة
الشايقية .....ظهرت فبها اجمل الاصوات ..الفنان محمد كرم الله ...صديق احمد ...محمد جبارة اضافة للنعام ادم..وتميزت بي شعراء افذاذ كحسن الدابي الله يرحمه ..السر عثمان الطيب ..الخ

ايت انت ايها المسكون بهذه الاغنيات الروائع فاين اراضيك يافنجري
اوع تسافر قبل ما نشوفك

الاعزاء ما قصرتو ……… أهلنا الشايقية يملكون حصيلة مفردات متميزة و يجيدون الوصف و يتميز غناهم بالحنين الدافق

و أنا أسعى لجمع ما يسمى ((((بالعابرات للشاعر المرهف محمد أحمد الحبييب)))) و أعتقد أن أي شخص موجود في السودان قادر أن يمدنا بها
عموما أنا أملك حصيلة وافرة من الاشرطة لا تحصى من النعام الى هيثم لكن لا توجد طريقة لأسمعكم اياها

عابرة

أنا بي لقاك مهتم ………بس كيف تلاقيني
يا عابرة عبر الدم ……… شايلاك شرايني

لو عمري إتقدم و أضمن تلاقيني أنا بعدو ما بندم لو مت في حيني
الطيف يزورني أشواك في النوم يناجيني يرحل بلا إشفاق ساعة يصحيني
يا طيفها كان مشتاق لي مين مخليني طفل الغرام العاق ربيتو مابيني

يا عابرة دنيا الجن بي كل أعاصيرها لو سعدي ما ممكن أحسن لي من غيرها
أنا بي لقاك مومن لكني في حيرة يصعب لقاك كيفن و الدنيا بي خيرها

أنا كنت شيئ مجهول يا عابرة لولاك مع أني أول زول من بين ضحاياك
فرشتي عمري الضاع أشعار من أملاكي كانت على الإطلاق أجمل هداياك

يا أماني لي بكرة و اليلة و البارح شايلك معاي ذكرى كان واعي كان سارح
بس يوم تبين سفرة يا عابرة بالواضح في نيتي من بكرة داير أجيك نازح

أنا لو قدرت أجيك رؤياك منى عيني يأسر حياتي وشيك من حزني يشفيني
من إشتياقي اليك يا عابرة دسيني ما بين رموش عينيك شيليني ختيني

كل البسيطة حسان يوم ما ملن عيني غير عابرة مافي انسان يهدمني يبنيني
آه يا جمال فتان قلب موازيني لولا صفا الإيمان يفتني في ديني

مصباحك المسحور جاهرني عاميني سايق خطاي مبهور شقيش يوديني
ما عارف المقدور بالفرقة راجيني خارج نطاق النور حايم حواليني

الاخوة الاعزاء
السلام عليكم ورحمة الله وبركاته
جزاكم الله كل خير علي هذه الاغنيات الشايقية وياريت تكثروا منها




لا شوفتا تبل الشوق ولا رداً يطمن اريتك تبق طيب انا البي كله هين

up

زمن كايس اراضيهن
وصف لي درب الريد عشان اوصل واراضيهن
يا مرسال
رسائل الشوق انا الضهبان
تعبت كتير ويا ما سالت ما خليت ناس عابرين

وينكم ياناس؟؟؟؟

up