في القولد التقيت بالصديق

حاولت أن أتذكر هذه القصيدة بمساعدة أخ عزيز ، لكن الذاكرتين عجزتا عن إكمالها .. هل من ود حلال لديه النص الكامل ..

في القولد التقيت بالصديق أنعم به من فاضل صديق
خرجت معه للساقية يا ليتها من ذكريات باقية
فكم أكلت معه الكابيدا وكم سمعت أور وو ألودة
ودعته والأهل والعشيرة حيث قصدت من هناك ريرة
وكان فيها القرشي مضيفي وكان ذاك في أوان الصيف
وجدته يسقي جموع الإبل من ماء بئر جره بالعجل
ومن هناك قمت للجفيل ذات الهشاب الناضر الجميل

أبيات مفقودة

وجدته وأهله قد رحلوا من كيلك وفي الفضاء نزلوا
في بقعة تسمى بابنوسة حيث اتقوا ذبابة تعيسة

ما زلت في رحلاتي السعيدة حتى وصلت يامبيو البعيدة
منطقة غزيرة الأشجار لما بها من كثرة الامطار
قدم لي منقو طعام البفرة وهو لذيذ كطعام الكسرة

شطر مفقود حتى وصلت محمد قول
وكان فيها صاحب حاج طاهر وهو فتى بفن الصيد ماهر
ذهبت مرة معه للبحر وذقت ماء لا كماء النهر


وسلامتكم

أهل العوض

خليها مستورة..لو تذكرنا الأبيات المفقودة عيرونا بيها
ولو ما تذكرناها برضو المعايرة واصلانا..يعني من شدة ما قدمنا..بقينا ما قادرين نتذكر أناشيد الكتاب..ودجاجي يلقط الحب وهو فرحان

الأخ بناديها لك التحية

كان ما عجبك في نفس الجلسة حاولنا نتذكر قصيدة أنت سوداني وسوداني أنا ضمنا الوادي فمن يفصلنا . تذكرنا فيها ما يقرب من 15 بيت .. وتأملنا تلك الكلمات فهي رصينة متينة معبرة جيدة السبك سهلة الحفظ قوية المعاني .. وتحسرنا على ... على شنو؟؟ الحسرات كتار

اهل العوض
تحياتى وصباخ الخير والسرور
عدت بنا الى ايام المدرسة الاولية ولست ادرى هل ما زالت تلك الاهزوجات التعليمية موجودة ام انها حذفت..

مرة ما وفى يوم ما قابلت احدهم يدعى احمد جعفر وعندما سألته من وين كعادة أهلنا السودانيين اخبرنى انه من القولد حينها تذكرت صديق عبد الرحيم وسردت له الحكاية فقال لى ان صديق هذا ابن عمى وان شخص حقيقى وان الزيارة كانت حقيقية له فى بيته وهو رجل وقتها كان المتعلم الوحيد فى القرية وان الرجل هاجر الى المملكة المتحدة وبقى فى لندن ولعله الان قد توفى كما اذكر اننى عرفت لاحقاً ...

اعود لأن مناهجنا حينها لم تكن من وحى الخيال بل كانت واقع ودراسة لواقع السودان بطريقة محببة جدا..

شكرا لانك صحيت الذكرى ونشطت الذاكرة
وتحياتى للاخ بناديها

باقرشو

صديق عبدالرحيم شخصية حقيقية وبلحمها وشحمها وهو "سفير السودان الدائم في واشنطن" ، يعني مقيم مغترب ومقيم بواشنطن، وكان لحبيبنا شتات صلة مودة به أثناء فترة دراسته بأمريكا، وذكر شتات أنه كان دائما ما يزور صديق عبدالرحيم للحصول منه على المجلات الثقافية العربية

يا جماعة حصل فيكم واحد قابل واحد من ناس الجفيل؟

أنا نفسي أقابل واحد من ناس ريرة. أكثر من أربعين سنة وأنا لم أحقق هذه الأمنية.

يا ناس أهل العوض

منو العوض وليهو العوض فى المخ بتاع أنا ..


بعد ريره .. ودسلفاب ..
لكن قولى أفتكر الأبيات .. أسألنى دبل ..

أنا أتمنى الحصول على كتاب المحفوظاب للسنه الرابعة أولية ..

سؤال: الشاطر يتذكر ماهى أول محفوظة وما هو الموضوع الأخير ؟؟؟

أخوكم العجوز

يـــا بناديهــــــــــــــــــــــــا
صديق عبد الرحيم توفي قبل عامين في أمريكا. رحمه الله رحمة واسعة.

الاخ الحبيب قرشو .. دا جزء قليل مما تتحفنا به من ابداعات يومية وليست موسمية كما نفعل .. أما هذه المشاركة فهي من الأشياء التي تتسرب معصورة من مخابئها في الذاكرة حين تطحنها رحى تناول الماضي في جلسات الاحلام بماضي الايام ولعل الغربة هي المعول الرئيسي في استخراج ذلك .

الأخ كلناكاكول .. تحية لك ولود حد الزين .. أذكر أني كنت في رحلة شلاقة إلى غرب السودان وتعطل بنا القطار في بابنوسة وكان أول ما فكرنا فيه زيارة أحد من أهل محمد ود الفضل .. فتفضل نفر كريم بمصاحبتنا إلى أهله ولم نجده ولكن وجدنا حفلا بمناسبة زواج أحد أفراد الأسرة وكانت تلك الليلة تعرف بـ " السهار " وهي عبارة عن غناء مستمر تقوم به النساء القواعد من أهل العريس .. طبعا هو شخصية حقيقية مافي شك .. وكما تلاحظ فأنا نسيت من صديقنا في الجفيل ماعارف اسمه منو

الاخ العجوز .. دا كلام شنو دا ؟ الجابرك على الكلمة دي شنو؟ ما تصبر لحد ما تبقى ليها وحينها تجد ألف من يقول لك يا عجوز .. على كل حال ما عارف عن أي سنة دراسية تتكلم طبعا نحن الجيل الذي طبق فيه محي الدين صابر السلم التعليمي الجديد .. ناس خامسة وسادسة

لكن ما أفدتونا ؟ وين باقي القصيدة؟

سلام يا أهل العوض
سلام زي عسل أهل العوض

يا أخوي مالك علينا
مهيج أشواقنا
وبتصحي الذكرى المنسية
وتعدي مواسم وتروح
والذكرى بتصبح أبدية

القولد
ريرة
الجفيل
ودسلفاب
عبد الحميد سائق القطار
منقو زمبيري
وكمان ناس آفو في الصين
أحمد في مصر
وقرنتش في سويسرا
ساشو في الأرجنتين
عرفة في بلاد العرب
القائمة ستطول
وأخونا بناديها
سيكشف حالنا
ويقول يلا يا بتاعين السلم التعليمي

أخوي أهل العوض وعدي لك إن طال الزمن أو قصر أن أحضر لك النشيد المطلوب إن شاء المولى . والله يحيينا جمعيا

لك ودي وإحترامي وللجميع

الاخ ولياب ..شكرا على الاستجابة ، لك التحية .. كتر خيرك ونحن في انتظار هذا العمل الابداعي الكبير .

سيدي الرئيس
الاستاذ هشام
ما يزال البحث مستمرا

صديق عبد الرحيم لم يكن سفيرا في واشطن يابناديها، وانما كان عاملا بسيطا في السفارة السودانية بواشنطن، ولم يكن بالمملكة المتحدة يا قرشو، وفعلاً يا كلنكاكول توفي قبل عامين في السوان بعد عودتها النهائية من امريكا، وله ولدان، احدهما درس البحرية في اليونان ثم هاجر الى ابيه من زمن والآخر واسمه يوسف تخرج من كلية الزراعة جامعة الخرطوم وآخر وظيفة له كانت ببنك السودان، ويسكن حاليا الصحافة شرق، المربع اللي غرب مربع 35 ,كان هو وأخوه ينزلان في منزل جيراننا في حي 114 حينما يحضران لمدني، وقد شاهدت منزلهم بالقولد في الماضي البعيد عندما زرتها مع صديق من اهلها، وهو بالطبع قريب صديق عبد الرحيم

أخى أهل العوض
والأعضاء الكرام

فعلا هى أيام مضت ولكنها رسخت فينا قيم ومبادىء ثابتة وحب للسودان نفتقده الآن فى الأجيال الجديدة أما مقولة بناديها أن صديق عبدالرحيم رحمه الله كان سفير السودان فى واشنطن فهو بالطبع يقصد السفير الغير رسمى بحكم طول اغترابه هناك اى سفيرا فخريا لسوداننا الحبيب

وصدقونى يا اخوة من شدة حبنا لهذا الرجل كنا نتعامل معه وكانه قريبنا جميعا وليس مجرد رمز لبلد هى من احلى البلدان القولد علما بانى لم ارها ولم ازرها الا فى تلكم الحصة العجيبة التى جعلتنى اجزم انى قد زرت القولد والجفيل وريرة

كانت لنا ايام

الوقوف علي الاطلال

.

رضا - ذكرك الله بالشهادة ليلة الامدادة

طيب أنقوم نتذكر تاني
والله مسعلة

أهل العوض .. محبتي موصولة

تريان بالتراث لامن ناز .. آآ زول عيني عليك باردة
ونحن نتربت على كتفك عشان نشرب من الجمام الطاعم ده
بس ما تسعلني أكان قريت الشغلة دي ولا لا
لكن خلني أنبحت ليك في ورقي .. بجيبلك أترها
تحياتي

الله العوض

لك تحياتي

موضوعك في الذاكرة ، وقد وعدتك حتى وإن طال الزمن ،، موعدي مع السفر يحين خلال شهر ونصف التالي ،،، وحينما أعود بإذن الله سيكون
كتاب الأناشيد والمحفوظات بيدي ،،، وأين ما كنت سيصلك عبر البريد السريع .

الله يحيينا

سيف كلي !!! أفو ، اللوم القاسي ، هل العين تعلو على الحاجب ، منكم نغترف - ولا نغترف إلا من معين أنتم ساسه وراسه .. هيلكم ملك .

ولياب كتر خيرك كتير ، هذه القصيدة في كتاب سبل كسب العيش في السودان وهو كتاب نسله انقرض زماااان .. يمكن تلقاه في مكتبة وزارة التربية أو دار الوثائق أو متحف السودان . غير كدا إلا مدرس قديييم أو واحد عيان زينا كدا الله يشفينا وإياه والجميع .

بسم الله الرحمن الرحيم

أهل العوض
سلام وعبق

الله يجازي محنك دي نكتها من وين؟

طبعاً لما الأستاذ قال لينا الحصة الجاية حا نزور صديقنا في القولد وبدأ يتكلم عنها أنا فرحت وجيت البيت كلمت أهلي وقلت ليهم يغسلوا لي جلابيتي ويشترو لي شبط جديد وكرشت كرعي من الكشكة عشان نحن ماشين رحلة .. أها يمين بالله لي هسع أنا ما عارف القولد دي في ياتو ولاية

حليل زمن الصبا الماضي
حليل زهر الحيا الزاهر
حليل زمن الحبيب راضي
حليل زمن الهوى اطاهر

اهل العوض والاخوه الاعزاء

والله هذا بوست ظريف جدا واتمنى له دوام الاستمرار , على الاقل لكى يعيدنا الى سنوات كانت بالفعل نضره وسمحه سماحة السودان زمان .. وبالفعل حاولت ان اتذكر باقى ابيات الزيارات لكن للاسف فان الذاكره افرغت كل ذاك الزمن السمح واصبحت فقط محشوة بفارغ الموضوعات من العولمه وما ادراكما فوكامايا ونهاية التاريخ وصراع الحضارات , مرورا بتعقيدات الكمبيوتر وثورة الانترنت , حتى مشاكوس وخريطة الطريق واسلحة الدمار الشامل , وهلمجرا من جنس اللغاويز والحشو الفارغ الذى لايجيب ولا يودى
على العموم يا اهل العوض عندى مساهمه بسيطه على بال ما تتذكروا لينا باقى ابيات تلك الزيارات التى مازالت ذكراها باقيه فى البال .. وهاكم رؤوس المواضيع دى من كتاب المطالعه الملحقه للسنة الثالتة الاولية - الجزء الثانى : الساحر والاطفال , الولد يحاكى اباه , اشعب الاكول , المزارع الحكيم , المذياع , الذئب الازرق , ثلاث قصص عن اطفال صينيين , الحصان الامين , الكناس والصائغ , الطباعه , الراعى والجنيه , مارأيك فى هذه القصه ,الشهامه , المرأة الذكيه , فضل الكرم ,الكريم لايتحدث بكرمه , من نكات العرب , لاتكذب , طمأنينة النفس , الواجب فوق القرابه , عثمان بائع الخضر , الرجل المتسرع , الفتاة الباسلة , الروايات التمثيلية , الهندى والنمر , على بابا واللصوص , نماذج للاسئله

كفايه ولا نزيد
؟ ! , عموما اتمنى استمرار البوست على الاقل حتى اكمال نشيد الزيارات
ولاهل العوض والمساهمين كل الشكر

حسن

يا البدري .. جلابيتك ديك بتكون بقت قصيرة ، أقطع ليك جلابية جديدة وأكويها ، الرحلة السنة الجاية الساعة اطناشر .. بعدين ما أفدتنا بأي شي ، قلنا ليك صديقنا في الجفيل اسمو منو؟ تقول لي الحب الطاهر ، الطاهر دا اسم واحد أنا بعرفو .

الاستاذ حسن الجزولي : لك انحناءة طويلة بطول قامتك السامقة .. وبمناسبة الهندي والنمر ، واحد زميلنا كان يقرأ البيت الأول واحد وخمسين من ظلم الحياة ..
طبعا البيت هو (الكلام لبدرالدين لأنو ما أدوها ليهم)
آه من ظلم الحياة
حانت اليوم وفاتي
قفصي أصبح قبري
ومضى وقت نجاتي

إلى السادة الدفعة
سوداني عجوز.. قرشو.. أهل العوض... بناديها...كلنكاكول ابو الصلاح ويابا.. ولياب.. يازول يازول يا بتاع الأهلية والطيب شبيكة ونورين وفصل إسماعيل..بدر الدين شنا... حسن الجزولي

لكم التحايا العطرة يا بتاعين الأولية .. كنت قايل نفسي الزول الوحيد الكبير وعجوز وسط شلة شباب السلم التعليمي ومافي ناس قروا معاي في وزارة المعارف زمن زيادة ارباب الله يرحمه

صديقنا في الجفيل اسمه سليمان

كدا البوست سمّوه لينا بورد بتاعين وزارة المعارف... عارفين لحد الآن مافي واحد من الشباب والشابات دخلت فيهو... وعشان الحكاية تكون مسبكة حولوا لينا على
White Nile Reader 1, NMP, J.A. Bright and Real Geography

دخلت مكتبة كبيرة في لندن وسالتهم عن
J.A. Bright
رد على واحد إنجليزي عجوز سائلا: إنت من وين؟ قلت من السودان؟
قال لي انه في هذه المكتبة منذ عشرين عاما ولم يسأل احد عن هذا الكتاب
وقد إنتهي من المكتبات ولا يوجد إلا في مكتبة الكونقرس الأمريكي

والله كانت ايام

يا كنتونا ون يا عجوز إنت وبدر الدين - أنا ما قدركم - أنا من ناس السلم التعليمي - لكن مثقف بس

بعدين إن إم بي دي والله سألت منها كم واحد حتى في النهاية لقيت لي واحد عجوز كدا قال لي هي اختصار لي

New Method Practice

عاش محي الدين صابر وقنقليسة بت الريس

سلام وتحية لكل العجائز الذين جارت بهم سبل كسب العيش في السودان
يا ريتنا لو درسنا بالسلم القديم , التحية ليكم يا معتقين

اهل العوض
قديمه انت عايز تكشف الناس القدام
العب غيرها