شعب عظيم ..

08:05 AM January, 15 2019

سودانيز اون لاين
زهير عثمان حمد-السودان الخرطوم
مكتبتى
رابط مختصر

...


اليوم صباحاً كنت قريب المستشفى فى زيارة مريض وخطر لى أشرب شاى وأصلح جزمتى .....

لقيت ستات الشاى بفطروا مع بعضهم وأقصروا علي أفطر معاهم ....وأنا كنت فعلاً جيعان ...
المهم ...

ناديت بتاع البوفيه جاب لى طلب فول من باب للمشاركة معاهم ...

بعد فطرنا مشيت أدفع الحساب رفضن رفض قاطع لحد إنهم نهرو بتاع البوفيه...

وأنابشرب فى الشاى سألت واحدة فيهم :-

إنتى بتطلعى فى المظاهرات دى ؟؟

عاينت لى بى توجس وقالت لى :-

*أيوه...
قلت ليها :
لكن مع رزق اليوم باليوم ده بكون مشكلة مش؟؟

قالت لى :
أبداً والله نحن مقسمين الحكاية .. على أساس القريبة فينا تطلع المظاهرة والباقيات يشتغلن عادى .. وعاملين صندوق يومى نديهو للبتطلع عشان تحل بيهو معيشة بيتها...

في دى أنا حسيت بى تفاهتى جداً لأنو أمس ما طلعت المظاهرة....

بعد اديتهم ضهرى واحدة قالت ليها :
هسى لزومو شنو تكلميهو بالكلام ده؟؟

ردت عليها بحزم :

يا أختى الراجل أكل معانا ملح وملاح ..ما منو خوف...

منقول من سوركتي..

Mohameed Sorkati Sorkati


شعب عظيم ..
شعب معلم..
صباح الثوره صباح الأحرار..