أحزان الجمهوريين: العم الأستاذ مجذوب محمد مجذوب للرحاب العلية

05:51 AM January, 12 2019

سودانيز اون لاين
عبدالله عثمان-
مكتبتى
رابط مختصر

بعد عمر مديد في الذكر والفكر وحب السودان وأهله، رحل عن دنيانا ظهر أمس السبت 12 يناير 2019 العم الأستاذ مجذوب محمد مجذوب
رحل العم مجذوب أثر وعكة طارئة وهو يعمل في مزرعته بالجنيد ووري الثرى بمقابر "ود بشارة" بود مدني مجاورا لخدنه وصنو روحه الوالدة فاطمة عباس سليمان، ولكبار الأخوان والأخوات في ود مدني
الراحل الكريم والد كل من سلمى بجامعة ود مدني الأهلية، صلاح بألباني نيويورك، عماد بالخرطوم (كنانة سابقا)، مريم بمدارس ود مدني الخاصة، وعمر بالجنيد
العزاء لآله وأحبابه وعارفي فضله وبخاصة لأبناءه وبناته الجمهوريين والجمهوريات وأخص منهم (أبناءه بالقانون) بروف عصام البوشي زوج سلمى والباشمهندس سامي حسن محمد الحاج زوج مريم
العزاء موصول لأحفاده وأصهاره وللسودان قاطبة فقد كان الرجل متولها بحب السودان وأخرج في ذلك كتابه (السودان: شعب وفكرة)

بدأ العم الأستاذ مجذوب حياته العملية محاسبا في عطبرة ثم جنوب السودان والخرطوم وكوستي وكناة وختم حياته العامرة مزارعا في الجنيد
العم الأستاذ مجذوب من أوائل مؤسسي حركة الأخوان المسلمين في السودان ولكن نفض يده منها باكرا كما سيجيء ذكره ثم صار من كبار الأخوان الجمهوريين
أسس وقعّد لنظام التأمينات الإجتماعية في كنانة حتى أستوى القسم على سوقه ثم أزالته هذه الطغمة الجاثمة على صدر شعبنا للصالح العام فعاد مزارعا
غرس فينا الكثير من القيم التي نرجو أن نرعاها حق رعايتها

في هذا الكتاب يحكي العم الأستاذ مجذوب محمد مجذوب طرفا من تجربته مع الأستاذ محمود محمد طه
حكى لي منذ حوالي شهرين في "أبو ظبي" شفاهة طرفا من هذه التجربة
أحب أن أجمل هنا بعضا منهاقال لي كنت أخا مسلما، من مؤسسي هذا التنظيم في السودان...
كنت موظفا وأسكن الحلة الجديدة الخرطومسكرتيرنا العم الرشيد الطاهر بكر، بدون ما يستشيرنا،
شارك في انقلاب ناس علي حامد وعبدالبديع علي كرار
لي قدام أحمد التجاني صالح الآلم "العالم" كتب في ذكرياته إنو اصلو الرشيد مولع بالسلطة
وأهلو الكنجارة في دارفوربقولو "سلطة للساق ولا دهبلي الخنّاق" ...أصحابنا عبود أعدمهم ...
كنا شباب متحمسين وعندنا من رأى منكم منكرا فليغيره بيده الخ
ما كان عندي حيلة تغيير باليد... قلت النغير باللسان
مشيت يوم صلاة الجمعة بدري وهي مذاعة ... جلست في الصف الأمامي في مسجد الخرطوم الكبير
أول ما الغبشاوي نزل فت طلعت في المنبر ... كنا نتحمسين وفصحاء بديت بـ :
( ألا إن رحى الإسلام دائرة , فدوروا مع الكتاب حيث دار , ألا إن كتاب الله والسلطان سيختلفان ,
فلا تفارقوا الكتاب , ألا إنه سيكون عليكم أمراء يرضون لأنفسهم ما لا يرضون لكم ,
إن أطعتموهم أضلوكم , وان عصيتموهم قتلوكم ) ، قالوا : وما نفعل يا رسول الله ؟ ، قالّ:
( كما فعل أصحاب موسى , حملوا على الخشب , ونشروا بالمناشير, فوالذي نفس محمد بيده ,
لموت في طاعة خير من حياة في معصيته )
.بلغ الحماس ذروته بين المصلين، ثم عرّجت على "قتّلوا الرجال، ورمّلوا النساء .... الخ"
فإذا بالجامع ينفضلم يبق الا الغبشاوي وثلاثة رجال - فيما بعد تبين أنهم من البوليس السري..
صعد لي الشيخ الغبشاوي وشالني من طولي ونزل بي من المنبر
أستدعوني صباح اليوم التالي للتحقيق .. حقق معي أحد أحفاد الزبير باشا لعل اسمه الزين ...
قلت له كل ما قلتهقال لي الجابرك شنو هسع تقول لي الكلام كدة!!
كأنه كان يريدني أن أغير رأيي أو أنكر فما فعلتكتب افادتي ... أ
توا بالشيخ الغبشاوي فقال في شهادته ان المتحدث لم يقصد عبود ومجلسه العسكري
وإنما يقصد أصحاب عيسى .... طفف لهم الغبشاوي الموضوع ودة الكانو دايرنو ..
تاني ما استجوبوني..أحالوني للإستيداع ...
عندي عجلة بقيت كل يوم من الحلة الجديدة، وأنا صايم، أمشي أقيّل في الجامع الكبير
وأتلو القرآن.... يوم وأنا طالع من الجامع لاقاني واحد كان جاري في الحلة الجديدة
جمهوري اسمو ذا النون جبارة الطيبمن أحفاد الشيخ الطيب ود البشير ....
أقنعني أمشي معاهو أناقش الأستاذ محمود محمد طه في عمارة أبنعوفدخلت عليه....
من أول وهلة طالعني وجه صبوح قلت لنفسي لا يمكن أن يكون هذا الوجه من أهل النار
النقاش مشى كتير... بقيت أتردد عليهو ...
لقيت معاهو عبداللطيف دة ومجموعة من الجمهوريين شباب
يكتبوا من رأسهم في محاضرة القاها الأستاذ محمود في اليوم الماضي ...
كان موضوع ملفت وعجيب بالحيل
شباب زي ديل ناذرين أنفسهم بكليتهم للأمر العجيب دة!!
كان الفطام من الأخوان المسلمين أمر شاق علي شديد ..
نشأت بيني وبينهم علاقة عاطفية متجذرة وكتير منهم
ناس عصام عبدالغفار (فنان من رفاعة كان معاكم في أمريكا وأمو من آل بدري)
ناس عصام ديل وقريبي من الباوقة محمد يوسف محمد وكتيرين كتيرين صعب
علي أفارقهم لكن الحق كان أحب اليما خلوني هم ... برضو في النهاية قاطعوني
وأقاموا علي حصار اجتماعي ودة كان من أشق الأشياء على نفسي

إنا لله وإنا إليه راجعون

نسأل الله أن ينزل العم الأستاذ مجذوب منازل المقربين ويحسن في فقده عزاءنا وعزاء أسرته الصغيرة والأهل والجمهوريين والجمهوريات ويجعل بركته فينا وفيهم، ويلزمنا وإياهم الصبر.

انا لله وانا اليه راجعون
رحم الله العم الأستاذ مجذوب رحمة واسعة
والعزاء لاسرته الصغيرة والأسرة الجمهورية وعموم الأهل بالباوقة

ولا حول ولاقوة الا بالله