الدكتور الشاعرعلي الكوباني يهدي الثوار أهزوجة نتمني أن تجد التلحين #

11:24 AM January, 08 2019 سودانيز اون لاين
زهير عثمان حمد-السودان الخرطوم
مكتبتى
رابط مختصر


وأنا في غرفة انتظار الاشعاع البرتون في معركتي لعلاج السرطان يا أحباب..
وجدتني أردد خاطرة اهزوجة للذين يخوضون المعارك الاكبر والأشرف ضد الطغيان وتجار الدين في بلدنا..
ورغم انها كلمات بسيطة بس مليانة حب للنضال.. أرجو ان تليق بإحساسي ببطولات أهلنا في بري واتبرا ومدني وكل مدن السودان الشريفة الثائرة..
نعم.. اضعف اضعف الايمان لكن ما باليد حيلة..
وقلت : ـ
انا بريد البراري.. بخاطري واختياري
حب من جوه قلبي.. وما بعرف اداري
ـ ـ. ـ ـ.
عشان فيهم شهامة.. بقوا للسودان علامة
قالوا خلاص كفاية.. للفسدة الظلاما
الهدموا عشم بلدنا.. وكتلوا كمان ولدنا
عشانم هم مرقنا.. وما بنرجع نواري
ـ ـ. ـ ـ.
ومن اتبرا انطلقت.. هبت ثورة طلعت
وفي مدني الارادة ..بشاير الفرحة هلت
يجينا صباح جديد.. راجينو زمن بعيد
وللسودان يعيد.. أمجاد الزراري
ـ ـ. ـ ـ.
وتسقط بس تسقط بس.. القالها ما مندس
حاشاهو النضيف وعفيف.. ماهو الوسيخ الغث
مندسيين الحراامية.. السرقوونا علنية
والقسموونا زندية.. وجزوا وطنا جز
وتسقط بس ..تسقط بس.. القالها ما مندس..
وتسقط بس.. تسقط بس..
القالها ما مندس..
✌✌✌✌✌✌✌✌
#يسقط # _بس
====<<=<<====<<====
(احبابنا ادعو الله الشافى المغيث لأخونا د.على الكوبانى الإنسان والشاعر الجميل الراقى ان يمن عليه بعاجل الشفاء والعافيه )