09:11 AM January, 05 2019 سودانيز اون لاين زهير عثمان حمد-السودان الخرطوم مكتبتى رابط مختصر
تتملي عيوني وتفضي لمن اشوف لي بت عشرينيه بتتقدم الصفوف لا خايفة من رصاص ولا بمبان ولا هاميها يعتقلوها او يضربوها. النوع دا بالذات من البنات بتستفز رجولة اي واحد جمبها فيا إما لملم شوية الرجاله الفاضلة فيه ولا كمان بقي زي الحصان يغمض ويدخل العركة. بنات يحيرن والله. واحدة عامله ليها فيديو بتتحدي فيه وتقول انا ماخايفه منكم يا جبناء ياعواليق انا هبة دي ماخايفة منكم و....الخ اها زي دي بنت سمع وشوف، يعني مكملة كل شي وبتخلي الجبان قدام نفسو صغييييير قدر النملة.لا وكمان البزغردن ديلاك لمن واحد ينضرب رصاص.ديل كمان براهن كوم تاني . يا اخوانا بناتنا ديل حقو نعمل ليهن تمثال في قلب الخرطوم طول في عرض في ارتفاع يجسد جسارتن. ونجعلوا لينا مزار ومعلم زي تاج محل. نحن في تأريخنا خلدنا رابحه الكنانية عشان جرت مسافة،ليل في نهار،وخلدنا بنونه بت المك، ومندي بت السلطان عجبنا وغيرهن.لكن العبد الفقير الي الله بالنسبة ليه ومع إحترامو الشديد وتقديرو ليهن وما قامن بيه بشوف إنو بنات الجيل دا قدمن اعظم واكبر من القدمنو حبوباتنا ..ياخ ديل لاغنن ولا شجعن الجيوش ديل هن الجيوش في حد نفسن.ديل مش كنداكات ديل حاجة تانيه براها .. ديل جسارة الجسارة. والله بنات الجيل دا فيهن إرادة كان حضرن المهدي كان حررن معاه مصر وليبيا من الاستعمار.مش السودان بس. علي اي حال-الان-الواحد ممكن يطمن شديد إنو وراهو وقدامو ( شباب وشابات) يسدوا عين الشمس بي اصبعهم ويخجوا البحر لمن يدفق. اما بالنسبة لي فقبال كدا قلتها وتاني قلتها وحا اظل اقولها تالت ورابع ومليون وبدافع عنها وابشر بيها وادعمها واناضل من اجلها وهي ضرورة ان يكون رئيس الوزراء القادم إمرأة شابة مناضلة شمت ريحة البمبان واخدت ليها كم بسطونه وياحبذا كمان لو حصل مرة جدعوها في ضهرية بوكس بدون لوحات وعفصوها بي البوت،كدا ياداب دي بتكون زولتي تب ومرشحتي القادمة لرئاسة الوزراء
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
Kamal Alalla
فيس بوك
تويتر
انستقرام
يوتيوب
بنتيريست